¹ Angkam ee ama ep ding gulzimꞌin– mensa ena suratkam asa lakensiblikke, anakan insa hen ale uk, “Sap langna angkam man tangan karek gweꞌan, san ha dawemna? – nen de swi sremkam lowehe gwen naye.”
² Hwena zep denakae ep ding gulzimꞌin: Angkam kahalo hap dena man tangan mam gweꞌan, zep dawemna zini wesya zen gon. Wenya hen zisi zen zen.
³ Zini we zemka bejen swi en sremkam daulsuk gwen. We zem hen zi zemka bejen da tasik gwen.
⁴ We zem zen zen hom zere mo timni bi gwibiꞌin. Zen diki zi zik bi gwibiꞌira. Hen zini zen hom zere mo timni bi gwibiꞌira. Zen diki we zik bi gwibiꞌin.
⁵ Bahem enaka da kososuk gwen– swi en sremkamye. Holo en sremkam sap esa– anakan de olsa aha-en unkimye, “Nen swi ensa yausun– dekam de Alapsa abe la tine gwen hap.” Hwena holo tangankam bahem. Ki hwena dowal mo kigi sa emsa karek san dep titi sola, hen dekam em molye tatem yauku.
⁶ Zep ee home emsa titi tabiꞌin, “Swi en sremkam em lowehe gwen,” hwena sap esa holo sremkam kirekam egwe gwer– olsa de aha-en unkimye.
⁷ Ano dwam gwibin tanganna, diki ano kim emaka we gon sremkam lowehe gweꞌan. Hwena ee mese tame guk, kire hap de sosonna home kitak Alap onakon ulin gwenan, sap Zen sren-srenkam nep sosonna gol gwizimnira.
⁸ Wal sei-siwiri hen wenam sei-siwiri, hen we sem-semna, ee ama emsa titi tabiꞌin: Dawem tanganna em we-gon srem zi-zen sremkam em lowehe gwen– ano kim. Sap dekam em molye okama ennak de syalak ehir-hir gwe-gwek.
⁹ Hwena eno mae mo swi hole-hle de mam gwenkam, ki amki enaka kap la gwek. Sap e-en de gwenkam, eno swi hole-hle de enho nakon syauk mo kim hitil hana gweꞌak, zen karek tanganna. Zep dawemna wesya em gon, ahaksa zisi em zen.
¹⁰ Angkam wenya bare wenya hen zi nibare wenya kibe ayang gulzimꞌin: Ansae ale gul sonezimꞌin, zen ere mo enlala nakore naka hom. Zen Bian hen kirekam titi tabirki: Wenya ere mo zini bahem hli tan.
¹¹ Zini hen ere mo wenya bahem baes gwibin. Hwena we de zi zemka hli tanna, zen diki aha zisi de zen sremkam zen gwe gwen, ahaksa dawem tanganna zi zem osan dep zen lwahan.
¹² Hwena ahakon, eno mae mo we walya ahaksa zi walya hom eKristen gweꞌan. Kristus Zena hom kire hap de ola nep hli yulzimki. Ëe zebe hwena emsa titi tabiꞌin: Kristen zi de gwenna, hwena we zik de Kristen gwen sremkam, wenya in de nama en hap dwam gwenna, zini in bap zen baes gwibin.
¹³ Hen kirekam, Kristen we de gwenna, hwena zi zik de Kristen gwen sremkam, zini in de nama en hap dwam gwenna, zen hen bap zen baes gweblan.
¹⁴ Em ema ekil gik, “Kristen we de gwenna, hwena zi zik de Kristen gwen sremna, Alap sa husus gwizimdi.” Kirekam bejen. Zen diki Alap sa Kristen wenya in kon zi zem insa anakan enlala gweblala, “Zen angkam Asa golek de taꞌara.” Hen kirekam– zi en zik de Kristen gwenna. Zep zeno nik mo walasna hen Alap sa enlala gwibiridala, “An ano bi gwibiridan wenya.”
¹⁵ Hwena Kristen gwen srem zini in de Kristen wenya emsa hli yun hup dwam gwenna, bahem tru-tru gulblun. Zen dikire emsa hli yuk. Hen kirekam– Kristen srem we de Kristen zini emsa hli tankamye. Kirekam dep Alap hom jalse gweꞌara. Sap Zen mes nesa kwang guludaka– dekam de enlala sesekkam zere mo nwenak lowehe gwen hapye.
¹⁶ Hwena Kristen wenya em bahem Kristen gwen srem zi omka hli tan, sap em bejen em anakan tame gun, “Nama de enkam zen wehe haleꞌanka?” Hen kirekam Kristen zini, bahem Kristen gwen srem we omka hli yun.
¹⁷ Bian kim emsa kwang guludaka, em san ahakon wenya ban, ahaksa zi niban? Em san dekam to mip blaonsublun sremna? Ahaksa em san dekam zi mo tana iltikinnik de lowe henna? Men kire nike lowehe gwek, zen kire enkam em lowehe gwen– men kirekam dep Bian emsa dam tasibirkike. Ëe kirekam de lowehen habe tingare jemat-jematsa titi ta gwibirin.
¹⁸ Zep anakarekam lwaꞌan: Bian kim emsa kwang guludaka, Musa mo titi tabin ol san de em to mip blaonsublun nik gwenna, ki etan bahem alp gwen– dekam de em to mip blaonsublun srem nik gwen hapye. Hen kirekam, em de to mip blaonsublun srem nik gwenna, em bahem ealp gwen– dekam de blaonsublun hapye.
¹⁹ Sap to mip blaonsublun nik de gwenna, ahaksa blaonsublun srem nik de gwenna, zen bana hom. Diki bol-zaun tanganna, Alap mo titi tabin sin em ang tan.
²⁰ Zep Bian men kim emsa kwang guludaka, dekam men kire nike lowe heꞌak, zen kire en nik emki lowehe gwen.
²¹ Zep emsa kim kwang guludaka, em san ki zi mo tana iltikinnik de ebabu gwenna? Ki bahem enlalana ebeya gwen– wet so gwen hapye. Hwena Alap de ebe mae hap wet so gwen hap denaka golzimdinkim, ki sap esa wet so gwer.
²² Sap zi mo tana iltikinnik de ebabu gwen zini, desa de Bian kwang guludankam, dekam zen Bian mo nwenak san de kirenak de lowehe gwen srem zi. Hen zi mo nwenak men zen babukam lowehe srem gwe-gwenan, desa de Bian kwang guludankam, dekam zen man enwe-mase gwe-gweꞌan– san de Kristus hon de ebabu gwen zi.
²³ Sap Alap mes emsa kwisisa de zerzimdinkim gwiswe soneka, zep ere mae mo timni bahem zi hon golgu gwen– zeno mae mo tana iltikinnik de etan lowehen hapye.
²⁴ Zen in zep, aya-wal oso-wal, Alap men kim emsa kwang guludaka, dekam men kire nike lowehek, zen kire en nik em Bian mo nwe kara gwennak lowehe gwen.
²⁵ Mensa asa suratkam lakensiblik, wenam sei-siwir hen wal sei-siwir hip dena, ee ama ebe mae hap ding gulzimꞌin: Kire hap de ola Bian hen hom hli yulzimki. Hwena Zen mes kwasang-kwasangna mamkam abe hap golblaka, hendep syala hen mes abe hap wei yul soneblaka. In zebe ere mo dam gulsunnu ansa anakare enlala naban ale gul sonezimꞌin, “An airis– taiblibin hipye.”
²⁶ Sap angkam man tangan langna karek gweꞌan, zep in kirekame angkam lowehe gweꞌan, zen kire enkam emki sap lowehen.
²⁷ We walya bare wenya, bahem we wal omka hli yuluda gwen. We wal srem wenya, bahem wesya de gon hap ealp gwen– nama de langna an karek gwennakye.
²⁸ Hwena em de we gon hap dwam gwenna, zen kareksa home goꞌara. Hen kirekam, wenam seiwir de zisi zenna, zen hen kareksa hom. Hwena em de enaka leisyankam, em okamanak de karekna esa oltowe gwera. Zep desa de goltowe gwen srem habe kirekam emsa gubiridal.
²⁹ Aya-wal oso-wal, ano enlalana anakan lwaꞌara: Angkam aumwanak dep yaklana beya naka hom. Zep we walya bare wenya, we wal oban de hir-hiri sap esa Bian mo syal hap eititi ei gwibir. We walya hen, zi nibare wenya, zi oban de hir-hiri sap esa hen Bian mo syal hap eititi ei gwibir.
³⁰ Hen kirekam, men zene enlala dowe hanan hap gona ta gweꞌan, emki enlala dowe hananna insa eititi gweblan. Men zene auhu-kama isrip-sri hap nga-ngola ban lowehe gweꞌan, emki auhu-kama enlalana insa eititi gweblan. Men zene okama ennak dep de kire-kirena te-alakam kap la gweꞌan, kap ta gwen srem makan em lowehe gwen.
³¹ Hen men zene okamanak de kire-kiresa bi eblanda gweꞌan, emki hwena bi gweblandan srem makan lowehe gwen. Sap molya holo gwek, okamana an dekam sa jek-jak gwer.
³² Ëe mae habe kirekam ebe mae hap ale gul sonezimꞌin– em de okama ennak dep de kire-kirenak ehir-hir gwe naseran srem hap. Sap we wal srem Kristen zini, zen ehir-hir gwen sremkam Bian en mo syalsa nol gwenan– anakare enlala naban, “Bian dekakim asa sam gwesiblika.”
³³ Hwena we walya bare wenya, zen auhu-kamanak de kirekam-kirekamnak sa ehir-hir gwe-gwer, sap zen we zik dikim sam gwesiblin hap de syalsa hen nol gwenan.
³⁴ Hendep zep sa zeno mae mo enlalana dare syak ner. Zi srem we walya hen kirekam: Zen Bian mo dwam gwibin en san dep sa ealp gwe-gwer, sap zen man edwam gwe-gwenan– tim niban enho naban de Bian mo nwenak lalak nen hap. Hwena zi nibare we walya, zeno mae mo enlalana zen auhu-kama ennak de syalak ehir-hir gwe-gwenan, sap zen zi wal zik dikim sam gwesibiridan hap ealp gwe-gwenan.
³⁵ Ëe ere mae mo dawem habe kirekam ale gulzim. Zen emsa dikim jalse gwibiridansa hom. Sap ano emsa de dwam gwibiridan tanganna, diki em ealp gwe-gwen– zi mo nwenak dikim dawemkam lowehe gwen hap, hen Bian en hon de tal gwesinkim dikim lowehe gwen hap.
³⁶ Zep zi de we golgu gweblan nabare nik gwenna, zen de anakan eisbinkim, “Ëe de gon sremkam, ki en tol sa gwe gwer,” hen anakan de eisbinni, “Ëe ama tangan gon hap dwam gwibiꞌin,” zen dikire gok. Zen hom dekam karek gweꞌara.
³⁷ Hwena ahanik de hen we golgu gweblan nik gwenna, zen de anakan enlala gwenkam, “Ëe ba hap de gon hap? Ëe Bian mo syal ensa de gon habe dwam gweꞌan. Ano enhona drak-drak nakake. Ëe sap asa ki en gwe gwer,” kirekam zen hen man sam gwesiꞌira.
³⁸ Zep zi de we golgu gweblan zemka gonna, zen man sam gwesiꞌira. Hen Alap mo nganak de syal hap de wesya gon sremkam, zen hen man tangan sam gwesiꞌira.
³⁹ Zi nibare we walya, zen etan bejen ahasa de zen hap enlala gwen– nama de zi zik gwennakye. Diki zi zik de tinkim, dekam sap de ahasa zen. Hwena Kristen gwen srem zisi bahem.
⁴⁰ Hwena ano enlalakam, zi zen sremkam zen maka tangan sam gwesiꞌin. Hen ee ama eisbiꞌin: Alap mo Enhona hen kirekam enlala gweꞌara.