Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Idi ratnan amung-amung luk inayud muyuh bang surat muyuh ineh, idi do' deléi aleg perurum dengan decur.

² Iamo' ngaceku ratnan pasét, idi do' anid-anid deléi ngalap awanneh sebuleng, idi anid-anid decur ngalap awanneh sebuleng.

³ Idi do' deléi luk inan awan ineh nganau luk petulu kuan decurneh, kudeng ineh teh decur luk inan awan ineh kuan deléineh.

⁴ Idi decur luk inan awan ineh na miak ngimet bururneh sebuleng, iamo' deléi ineh. Kudeng ineh teh deléi luk inan awan ineh na miak ngimet bururneh sebuleng, iamo' decur ineh.

⁵ Aleg mebpeng seburur inan seburur, iamo' dengan pian anid-anid kuan segageh mo', pad muyuh miak sembayang idi muci miak pamung teh, pelé muyuh na tetunin Sétan, ngaceku muyuh na miak ngimet burur muyuh sebuleng.

⁶ Iamo' balaku ini baken ukum, iamo' bada' mo'.

⁷ Setuneh ui pian kudeng muyuh mepad kudeng ui ini. Iamo' anid-anid burur miak ngalap baréneh ratnan Allah, ieh ineh seburur kudeng ini, idi seburur kudeng ineh.

⁸ Iamo' kuan lun anak adi' idi kuan lun tinula' ui sikal mala, idi do' ideh mulun kudeng ui ini teh.

⁹ Iamo' kudeng ideh na miak ngimet bururdeh, nima' nedeh ngaweh, ngaceku meluun do' ngaweh ratnan medereh ku lilideh.

¹⁰ Iamo' kuan lemulun luk pangeh nengaweh ineh ui ngecuk (ieh ineh baken ui ini iamo' Tuhan), idi aleg decur ineh patad ratnan awanneh,

¹¹ (iamo' kudeng ieh pangeh nepatad, idi do' ieh kudeng anak adi' ruked-ruked, kudeng na ieh pedo' dengan deléineh)--idi aleg deléi ineh ngelagkan decurneh.

¹² Idi kuan lemulun luk baken ineh ui ini luk pebala (idi baken Tuhan), idi kudeng idé lun kinanak luk inan awan luk na manu, idi decur ineh sikal tudo denganneh, idi aleg deléi ineh ngelagkan neneh.

¹³ Idi decur luk inan awan luk na manu, idi deléi ineh sikal tudo denganneh, idi aleg decur ineh ngelagkan neneh.

¹⁴ Ngaceku deléi luk na manu ineh linigan bang decurneh, idi decur luk na manu ineh linigan bang awanneh. Kudeng na pieh kudeng ineh, kali' rungen anak-anak muyuh ineh melutak, iamo' nekini ideh meligan peh.

¹⁵ Iamo' kudeng lemulun luk na manu ineh pian patad, nima' neneh patad. Idi kinanak deléi idi kinanak decur ineh na inabet teh bang anun-anun luk kudeng ineh. Iamo' muyuh pangeh tinawar Allah mulun dengan pedo'

¹⁶ O decur luk inan awan, kudeng apehké iko kali' kudeng iko miak ngulun awanmu? O déléi luk inan awan, kudeng apehké iko kali' kudeng iko miak ngulun awanmu?

¹⁷ Do' anid-anid burur mulun maya' baré Tuhan neneh, mepad kudeng ulunneh kareb ieh tinawar Allah. Ini bada'ku bang amung-amung sidang.

¹⁸ Kudeng selemulun tinawar kareb pangeh sinudat, aleg nutun nala' tanu' sunatneh. Idi kudeng selemulun tinawar kareb nateh ieh sinunat, aleg ieh uen nunat.

¹⁹ Ngaceku sunat idi na sunat pana' nateh ulekneh. Luk inan ulek, ieh ineh maya' ukum Allah.

²⁰ Do' anid-anid burur lutep bang ulun luk inanneh tinawar Allah.

²¹ Kudeng iko demulun kareb iko tinawar, aleg iko mesusa'. Iamo' kudeng iko miak puatin, meluun do' puatin.

²² Ngaceku seburur demulun luk tinawar Tuhan, ieh ineh lun pinuit Tuhan; kudeng ineh teh lun luk baken demulun luk tinawar Keristus, ieh ineh demulun Keristus.

²³ Allah pangeh nemelih nemuyuh. Ngaceku ineh aleg muyuh mangun ku demulun lemulun.

²⁴ O kinanak-kinanakku, do' anid-anid burur perurum dengan Allah bang ulun luk inanneh tinawar atun.

²⁵ Idi ratnan anak-anak luk pun mebaruh, na bala Tuhan negku. Iamo' ui maré pinianku kudeng lemulun luk lutep ngaceku ratnan éi' Tuhan.

²⁶ Idi ui ngerawé, ngaceku ratnan susa' luk nekini, do' lemulun lutep bang ulun luk inanneh pekalai nekini.

²⁷ Kudeng iko inan decur, aleg iko patad rat neneh. Kudeng iko nateh nengaweh, aleg nakap awan.

²⁸ Iamo kudeng iko ngaweh, na iko mesala', idi kudeng seburur anak decur luk pun mebaruh ngaweh, na ieh mesala'. Iamo' lemulun luk kudeng ineh miak ngalap susa' bang tana' ini. Idi ui ini méi' nemuyuh.

²⁹ Ini ilung balaku, O kinanak-kinanakku, idi na kareb luk mekadang peh. Ngaceku ineh rat pad kareb ini nima' lemulun luk inan awan ineh mulun mepad kudeng lemulun luk na awan;

³⁰ idi lemulun luk nangi' mepad kudeng lemulun luk na nangi', lemulun luk meriruh, mepad kudeng lemulun luk na mawang niat, lemulun luk pebelih, mepad kudeng lemulun luk na binaweh;

³¹ idi lemulun luk makai tana' ini, mepad kudeng lemulun luk na makai ineh; ngaceku ayu tana' ini miak metutu'.

³² Iamo' pianku, aleg muyuh merapang, Lemulun luk na awan ineh meluun ngerawé ratnan kekamen Tuhan, ngaceku ieh sikal maya' pian Tuhan.

³³ Iamo' lemulun luk inan awang ngerawé ratnan ulun tana' ini, ngaceku ieh sikal maya' pian awanneh,

³⁴ idi niatneh perapid. Idi decur luk na awan ineh idi anak decur luk pun mebaruh pana' ngerawé ratnan kekamen Tuhan, ngaceku ieh pian uen ngeligan bang bururneh idi rohneh pana'. Iamo' decur luk inan awan ineh, ngerawé ratnan ulun tana' ini, ngaceku ieh sikal maya' pian awanneh.

³⁵ Ui pebala kudeng ini ngaceku ui pian ngedengan nemuyuh. Na ui sikal ngabet nemuyuh. Iamo' ui pian pad muyuh nganau' luk matu idi luk petulu, idi pad muyuh lutep ngakem kuan Tuhan dengan amung niat muyuh.

³⁶ Iamo' kudeng selemulun ngerawé na do' luk inau'neh kuan tudukneh, idi kudeng ieh pangeh rayeh, idi kudeng na miak tuman, nima' neneh nganau' luk pianneh, na ieh mesala', idi miak didueh ineh paweh.

³⁷ Iamo' idé luk lutep niatneh dengan na sinaad, iamo' miak tuman na ngaweh, idi pangeh nengeletep niatneh na ngalap tudukneh ineh, idi kekamenneh ineh do' teh.

³⁸ Ngaceku ineh lemulun luk ngaweh tudukneh nganau' luk do', idi lemulun luk na ngaweh neneh nganau' luk meluun do' teh.

³⁹ Idi decur luk inan awan inabet kuan deléineh kareb awanneh ineh mulun; iamo' kudeng awanneh maté, idi ieh mepuit pad miak paweh dengan idé-idé luk pianneh, iamo' bang Tuhan mo'.

⁴⁰ Iamo' ui ngerawé meluun do' kuanneh kudeng ieh na awan baruh. Ineh maya' terawéku, idi ui teh inan Roh Allah.

1 Korintus

Video 1 Korintus 7

Ikuti Kami:

KONTAK | PARTISIPASI | DONASI