¹ Korintusk de Alap mo hlil irin zi hip, Paulus onakon, hen nere mae mo wal bosena Sostenes onakon: Dawem! Ëe, Paulus, mae habe ep ale gul sonezimꞌin: Sap Alap zere mo dwam gwibin sin mes asa dam tasiki– Kristus hup de olsa de gol halada gwen hapye. Hen emsa mes Alap kwang guludaka– Zen dikim emsa bi gwibiridan hap. Zep em kime Kristus hun eraha-en gwek, Zen dekam zep emsa lalak tasibirki. Zep men zen Bian Yesus hup tingare lang nakon boklena kom dabla tine gwenan, em hen mese deban mae siri gwek. Sap Yesus in kitak neno mae mo Teipsinni.
² (1:1)
³ Zen diki Bian Alap ne Bian Kristus Yesus ne sa kwasang-kwasang zemka mamkam ebe mae hap ol gwizimdi. Hen nen zere nik mo taha terenak esa lowehe gwer.
⁴ Ëe ama Bian Alap hap dawemsa golbla tine gwenan– mae hap: Sap em ano tawa tabin nikon mese Kristus hun eraha-en gwek, zen in zep Bian Alap sosonna zere mo kwasang-kwasang nakon ebe mae hap sowenkam gol gwizimꞌira.
⁵ Sap em kime Kristus hun eraha-en gwek, em dekam zebe ere mae mo enhonak sowehen tangankam eisbik– sap ol toran hap dena, hen enlala blal hap dena.
⁶ Zen dekam zebe anakan dam ulsuk, “Paulus mensa Kristus hup de ola golhata zaka, zen eiwa de tanganna.”
⁷ Zep angkam sosonna mensa Alap mo Enhona nebe mae hap gol gwizimnira, em home aha-en mae tahalha eibiꞌin. Em in zebe isrip-sri naban Bian Yesussu es gweblaꞌan– Zenaka de etan zertre zannak depye. Ëe in zebe Alap hap dawemna anakan gol gweblanan, “Ema asa sam ta gweꞌara.”
⁸ Zen sa emsa tatete ta gwibiri, hendep zere mo lwa halzan hap de yaklanak de zaunnuk zep esa enho kles gwesin srem nik ezaul.
⁹ Alap sa kirekam ebe mae hap syal gwibir-zimdi, sap Zen zere mo ol gu-gunnu man sul sone gwenda. Zen bejen emsa eititi gwibiridan, sap Zen emsa kwang guludaka– zere mo Tanena Bian Yesus hun dikim zergolek de gwen hapye.
¹⁰ Aya-wal oso-wal, ee Bian Yesus mo bosekame emsa gubiridaꞌan: Enlalasa em aha-en ta gwen– dekam de ehliwe gwen srem hapye. Bahem enaka jakal gwibirida gwen, hwena banakare maesa de dwam gwibinni ahaksa kalang gwibinni, nonol em enlalasa dawemkam aha-en ta gwen.
¹¹ Sap Kloe mo iyena man asa nenblazak, “Korintusk de Kristen zini man edarak gwe-gwenan.”
¹² Insa darak gwen hap dena emsa gubiridal, zen anakan de egwe gwensa: Ahakon ema egu gwenan, “Ëe an Paulussu de ang gweblan zi.” Ahakon egu gwenan, “Ëe Apoloꞌa de ang gweblan zi.” Ahakon egu gwenan, “Ëe Petrussu de ang gweblanna.” Hen ahakon egu gwenan, “Ëe Kristussu de ang gweblanna.”
¹³ Hwena kirekam de lwankam, ki san Kristus mo timni esa blum ul? – deban de sren-srenkam lowe hendan hapye. Ahaksa san ha te-lidak sonnak ebe mae hap eye tik? Ki san emsa ano bosekam baptis dabik?
¹⁴ Angkam ee ama sam gwesiꞌin— mae hap: Ëe home emsa baptis tabik. Ëe diki Krispus ne Gayus en nekae baptis sok.
¹⁵ Zep ebon mae onakon ahana bejen anakan gun, “Paulus zere mo bosekam asa baptis taka.”
¹⁶ O ahakon mese hen enlala gwibiridanan: Stepanus Baksa hen zeno golak de wenya, zen hen eye baptis tabik. Hwena dekon ahakorena, ee home enlala gweꞌan.
¹⁷ Sap Kristus asa zisi de baptis ta gwibin hip hom dam tasiki. Zen diki zere hap de ol dawemsa de gol halada gwen hap asa dam tasiki. Hen Zen anakan asa gubluka, “Auhu-kama zi mo enlala blala bahem ere hap de ol dawem naban siri gun. Ëre hap de te-lidak soblan hap de ola, diki zen zen bol-zaun gwen.” Zen mae hap ki kirekam asa gubluka: Sap zi mo ehalen hap de sosonna, zen kitak zere hap de te-lidak soblan ennak lwaꞌan.
¹⁸ Sap men zen juwen hap de ora san ang taꞌan, zebe mae hap Kristus mo te-lidak sonnak de tinni, zen asyas ol makan lwazimꞌin. Hwena nen engaya gwen hap de ora san de ang tan wenya, nen ema anakan tame ul gwenan, “Alap mo sosonna, zisi de ngaya tabin hip dena, zen zewe.”
¹⁹ Sap Alap mo olak man lwak, “Auhu-kama zi mo enlala blala Ëe asa hom tazim. Nwe hleng gwen wenyik mo tame gunnu Ëe asa jek-jak gulzim.”
²⁰ Zep auhu-kama nakore enlala blalsa de tawa tabin hip de wenya, hen sekolasa de sul sonen wenya, hen ol gulsun-gulsun hup de etewesin wenya, zeno mae mo auhu-kama en nakore tame gunnu in Alap mes joblo-top gulzimki.
²¹ Sap Alap zere mo enlala blalkam mes tingare zini gubiridaka, “Em bejen em ere mae mo enlala blala kon Asa tame tan.” Zen hom kirekam dep dwam gweka. Hwena Zen a kirekam mo nesa angkam gubiridaꞌara: “Ola mensa ena ‘asyas ol makan’ enlala ei gwibirin, hwena zen dekon asa emsa ngaya tabir– em de desa taiblibinkimye.”
²² Hwena Yahudi zini, zen nonol owassa de goltreizimdin hip eabe gwe-gwenan– dekam de taiblibin hipye. Hwena Yahudi srem zini, zen zere mae mo enlala blal en san de ang tan hap edwam gwe-gwenan.
²³ Zep neno mae mo tawa tabinni, Kristussu de te-lidak sonnak makan ta irin hip dena, Yahudi zinik man jawe guk hana gwenan. Hen Yahudi srem zini, zen man asyas ol makan enlala nei gwibirin.
²⁴ Hwena nesa men desa Alap Zena kwang guludaka, sap Yahudi zi, sap Yahudi srem zi, nebe mae hap Kristus hup de ola in man nwe-mase gwizimꞌin, “Alap mo sosonna hen enlala blala zen zewe.”
²⁵ Zep Alap onakore enlala joblo-top makare ola in, zen hwena auhu-kama zi mo enlala blalsa man gulmunꞌun. Hen Alap onakore asyas makare ola in, zeno sosonna man taman kiniꞌan– auhu-kama zi mo soson nakonye.
²⁶ Aya-wal oso-wal, emki eenlala gwen– men kim Alap emsa kwang guludakake. Dekam em auhu-kama zi mo nwenak, bose nabarena beya naka hom. Em in totore lowehen zi– soson sremna hen enlala joblo-topna, auhu-kama zi mo nwenakye.
²⁷ Hwena Alap enlala joblo-top wenya emsa kwang guludaka– dekam de enlala blal wenyik esaher gwe-gwen hap. Hen Alap soson srem wenya emsa mes hlil inki– dekam de soson wenyik esaher gwe-gwen hap.
²⁸ Mensa bose nabare wenya anakan lamang da gwibirin, “Wakin totore zi– ba maesa de tame gun sremna,” hwena desa mes Alap dam tasibirki– desa de bose nabare wenya in hap lamkam anakan goletreizimdin hip, “An zen ano nwenak de edakastin wenyaye. Em hom.”
²⁹ Mae hap ki kirekam syal gwibirki: Auhu-kama zi dikim Alap zere mo nwenak zenaka bolte-bolte ta gwibin srem hap.
³⁰ Sap nen Alap zere mo syal en nakone ki Kristus hun eraha-en gwek. Zen zep nebe mae hap de ausu hap Desa en dre neka. Zep neno mae mo enlala blal hap dena Zebon. Dam-damkam hen lalakkam de Alap mo nwenak gwen hap dena hen Zebon. Hen engaya gwen hap dena Zebon en.
³¹ Zen in zep Alap mo olak anakan lwak, “Zini diki Bian ensa zen boltere ta gwen. Zenaka bap zen.”