Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana jareya Rato Sulaiman makon para kapalana suku ban kapalana kaomma bangsa Isra’il, epakon ngadhep ka salerana e Yerusalim; reng-oreng jareya epakona ngale Petthe Parjanjiyanna PANGERAN dhari Siyon, Kottha Daud, ka Padalemman Socce.

² Daddi reng-oreng jareya pas padha akompol e Are Raja Ranggun Dhaun e bulan Etanim.

³ Saellana la-kapalana suku ban la-kapalana kaom jareya la akompol kabbi, Petthe Parjanjiyan jareya eangko’ bi’ para imam,

⁴ pas egiba ka Padalemman Socce. Kemah Socce ban parlengkabanna egiba keya ka Padalemman Socce bi’ para imam sarta reng-oreng Lewi.

⁵ Rato Sulaiman ban ra’yat Isra’il padha akompol kabbi e adha’na Petthe Parjanjiyan jareya, pas ngatorragi kurban dumba ban sape se ta’ kabitong bannya’na ka Pangeran.

⁶ Saellana jareya para imam pas ngangko’ Petthe Parjanjiyan jareya ka Padalemman Socce esaba’ e baba’anna ca-arcana kerub e dhalem Rowang Se Mahasocce.

⁷ Kalembangnga ca-arcana kerub jareya menthang notobi petthe gella’ ban kaju pekolan se epangosong petthe jareya.

⁸ Kaju kol-pekol jareya ce’ lanjangnga, sampe’ konco’na etangale’e dhari adha’anna Rowang Se Mahasocce, tape dhari kennengngan laenna ta’ etangale. (Sampe’ sateya ju-kaju pekolan jareya gi’ badha e jadhiya.)

⁹ Petthe Parjanjiyan jareya tadha’ esse laenna kajabana bato dhadhuwa’. Bato jareya esaba’ e jadhiya bi’ Mosa e Gunong Sinay, e baktona PANGERAN mabadha parjanjiyan ban bangsa Isra’il se badha e dhalem parjalanan dhari Messer ka Kana’an.

¹⁰ E baktona para imam kalowar dhari Padalemman Socce gella’ o-tao padalemman jareya katotoban ondhem.

¹¹ Ondhem jareya tera’ tar-kataran polana kahadiranna PANGERAN, sampe’ para imam jareya ta’ ngenneng maso’ pole kaangguy ajalannagi kawajiban-kawajibanna.

¹² Sulaiman pas adu’a: "Adhu, GUSTE, Junandalem se nyaba’ are e langnge’, namong Junandalem akasokanan alenggi e dhalem pettengnga ondhem.

¹³ Samangken paneka abdidalem abadhi compo’ se ce’ saena, kaangguy kalenggiyanna Junandalem salanjangnga."

¹⁴ Samarena adu’a Sulaiman abiluk addhep ka ra’yadda se manjeng e jadhiya, pas nyo’onnagi berkadda Pangeran kaangguy ra’yadda jareya.

¹⁵ Ca’na Sulaiman ka ra’yadda, "Lamba’ PANGERAN la ajanji kantha reya ka Daud tang rama, ‘Molae Sengko’ ngeba Tang ommat kalowar dhari Messer, e sanagara Isra’il tadha’ kottha se bi’ Sengko’ epele kaangguy epaddeggi padalemman kennengnganna oreng ajalannagi kabakteyan ka Sengko’. Tape ba’na, Daud, bi’ Sengko’ epele epamarenta’a Tang ommat.’ Molja’agi Guste Allahna ommat Isra’il se la neptebbi janjina jareya."

¹⁶ (8:15)

¹⁷ Sulaiman pas adhabu pole, "Daud tang rama la arancana’agi maddegga padalemman kennengnganna oreng ajalannagi kabakteyan ka GUSTE Allahna Isra’il.

¹⁸ Tape PANGERAN adhabu ka tang rama jareya, ‘Maksodda ba’na jareya becce’.

¹⁹ Tape se bakal maddegga Tang padalemman jareya ana’na ba’na, banne ba’na dibi’.’

²⁰ Ban sateya PANGERAN la neptebbi janjina. Sengko’ la agante tang rama daddi rato Isra’il, ban sengko’ la maddek padalemman kennengnganna kabakteyan ka PANGERAN, Allahna Isra’il.

²¹ E dhalem Padalemman Socce jareya bi’ sengko’ epobuwi kennengnganna Petthe Parjanjiyan se aesse bato parjanjiyanna PANGERAN ban para bangatowana sengko’ ban ba’na kabbi e baktona ebakta kalowar dhari Messer bi’ PANGERAN."

²² Saellana jareya, e adha’anna ra’yadda se badha e jadhiya, Sulaiman ngadek addhep ka mezba, pas ajungjung astana dhu kalaja

²³ sambi adu’a, "GUSTE Pangeran, Allahepon Isra’il! E langnge’ otaba e bume tadha’ se padha sareng Junandalem! Junandalem neptebbi dhabuna sareng noduwagi kataresna’an ka ommattepon Junandalem se esto sareng ta’at kalaban gu-onggu ate ka Junandalem.

²⁴ Junandalem ampon neptebbi dhabuna Junandalem ka rama abdidalem Daud. Pa-ponapa se edhabuwagi sareng Junandalem e are mangken ka’dhinto ampon kalakon.

²⁵ Junandalem adhabu jugan ka rama, manabi toronanna ta’at kalaban gu-onggu ate ka Junandalem akadi Daud, salanjangnga badhi badha’a sala settonga toronannepon rama se badhi daddiya rato Isra’il. Samangken ka’dhinto, Guste Allahna Isra’il, ngereng kasokana Junandalem neptebbi sadajana dhabuepon Junandalem se ejanjiyagi ka Daud, rama abdidalem.

²⁶ (8:25)

²⁷ Namong, Guste, ba’ lerressa Junandalem kasokan alenggi e bume ka’dhinto? Langnge’ ta’ cokop lebar kaangguy Junandalem, ponapa pole padalemman kennengngannepon kabakteyan se epaddek abdidalem ka’dhinto!

²⁸ Adhu, GUSTE Allah Pangeran kaula, abdidalem ka’dhinto abdiepon Junandalem! Namong kasokana Junandalem meyarsa’agi du’a abdidalem, sareng kasokana ngabbuli parnyo’onan abdidalem e are ka’dhinto.

²⁹ Moga-moga seyang malem Junandalem terrosa ajaga padalemman ka’dhinto se sareng Junandalem ampon epele menangka kennengngannepon oreng abakte ka Junandalem. Moga-moga dhari kalenggiyannepon Junandalem e sowarga Junandalem kasokana meyarsa’agi sareng nyapora abdidalem sareng ommattepon Junandalem manabi abdidalem sadaja ngadhep ka Junandalem sareng adu’a e padalemman ka’dhinto.

³⁰ (8:29)

³¹ Manabi badha oreng se earane sala ka oreng laen ebakta ka mezbaepon Junandalem e padalemman kennengngannepon kabakteyan ka’dhinto kaangguy asompa ja’ aba’epon ta’ sala,

³² adhu, GUSTE, kasokana Junandalem e sowarga meyarsa’agi sareng motose parkaraepon sadajana abdiepon Junandalem. Kasokana Junandalem ngokom se sala sabandhing sareng kasala’annepon, sareng kasokana Junandalem mabebas se ta’ sala.

³³ Manabi ommattepon Junandalem Isra’il epakala so-mosoepon amarga oreng Isra’il gadhuwan dusa, namong pas abali abakte ka Junandalem sareng ngormat Junandalem menangka Pangeran, sarta pas entar ka padalemman kennengngannepon kabakteyan ka’dhinto sareng adu’a nyo’on sapora ka Junandalem,

³⁴ moga Junandalem kasokana meyarsa’agi dhari sowarga. Moga Junandalem kasokana nyapora dusaepon ommadda ka’dhinto, sareng abakta ommat gapaneka abali pole ka nagara se sareng Junandalem ampon eparengngagi ka bangatowaepon reng-oreng gapaneka.

³⁵ Manabi ommattepon Junandalem abadhi dusa ka Junandalem, sareng Junandalem pas eokom ta’ eparenge ojan, namong ommattepon Junandalem pas atobat dhari dusana sareng ngormat Junandalem menangka Pangeran, saamponna ka’dhinto ngadhep sarta adu’a ka Junandalem e padalemman kennengngannepon kabakteyan ka’dhinto,

³⁶ kasokana dhari sowarga Junandalem meyarsa’agi ommattepon Junandalem ka’dhinto. Kasokana Junandalem nyapora dusaepon ommat Isra’il sareng ratoepon. Kasokana Junandalem ngajari reng-oreng gapaneka ngalakone pa-ponapa se lerres. Saamponna gapaneka, GUSTE, kasokana Junandalem matoron ojan ka nagara kaagungannepon Junandalem ka’dhinto, nagara se sareng Junandalem ampon eparengngagi salanjangnga ka ommattepon Junandalem.

³⁷ Manabi nagara ka’dhinto ekenneng laep otaba wabah, otabaepon men-tamennan erosak angen panas, panyaket otaba balang, otaba manabi ommattepon Junandalem eserrang moso, otaba ecapo’ panyaket,

³⁸ kasokana Junandalem meyarsa’agi parnyo’onanna ommattepon Junandalem ka’dhinto. Manabi e antaraepon ommat Isra’il badha se sossa atena sareng adu’a ka Junandalem sambi ajungjung tanangngepon se epanojju ka padalemman kennengngannepon kabakteyan ka’dhinto,

³⁹ kasokana Junandalem e kalenggiyannepon neng e sowarga meyarsa’agi sareng nyapora sareng nolong ommat ka’dhinto. Namong Junandalem se ngagali ka atena manossa. Daddi kasokana Junandalem apareng okoman sareng ganjaran ka tong-settongnga oreng sabandhing sareng lalakonnepon bang-sebang,

⁴⁰ sopaja ommattepon Junandalem salanjangnga ta’at ka Junandalem saabidda enneng e nagara paparengngepon Junandalem ka bangatowa abdidalem sadajana.

⁴¹ Manabi badha oreng dhari nagara manca se jau mereng parkara kaagungannepon Junandalem sareng parkara se jib-ajib se ampon elampa’agi sareng Junandalem kaangguy ommattepon Junandalem, saamponna ka’dhinto oreng manca gella’ entar ka padalemman kennengngannepon kabakteyan ka’dhinto kaangguy ngormat Junandalem sareng adu’a ka Junandalem,

⁴² (8:41)

⁴³ moga-moga dhari kalenggiyannepon Junandalem e sowarga kasokana Junandalem meyarsa’agi du’aepon sarta ngabbuli parnyo’onannepon reng-oreng ka’dhinto. Kalaban cara ka’dhinto sadajaepon bangsa e dunnya tanto oneng ka Junandalem sareng ta’at ka Junandalem akadi ommat Isra’il. Reng-oreng gapaneka bakal onenga ja’ padalemman se epaddek sareng abdidalem ka’dhinto kennengngannepon oreng abakte ka Junandalem.

⁴⁴ Manabi Junandalem makon ommattepon mangkat aperrang sareng moso, manabi reng-oreng ka’dhinto e ka’dhimma’a saos addhep ka kottha peleyannepon Junandalem ka’dhinto sarta adu’a addhep ka padalemman se sareng abdidalem epaddek kaangguy Junandalem ka’dhinto,

⁴⁵ moga-moga e sowarga Junandalem meyarsa’agiya du’ana reng-oreng ka’dhinto, sarta apareng kamennangan ka reng-oreng ka’dhinto.

⁴⁶ Manabi ommattepon Junandalem abadhi dusa ka Junandalem — salerressa pajat tadha’ oreng se tadha’ dusaepon — manabi Junandalem sakeng dukana ta’ nolonge ommattepon gapaneka kantos kala ka mosona sareng ebakta ebadhi tawanan ka settong nagara se jau otaba semma’,

⁴⁷ kasokana Junandalem meyarsa’agi parnyo’onannepon reng-oreng gapaneka. Manabi e ra-nagara gapaneka ommattepon Junandalem gapaneka mowang dusaepon, sareng nyo’on ka Junandalem sambi ngakone ja’ aba’epon dusa sareng daraka, peyarsa’agi du’aepon reng-oreng ka’dhinto, GUSTE.

⁴⁸ Manabi e nagara gapaneka ommattepon Junandalem kalaban ekhlas sareng gu-onggu ate adinggallagi sa-dusaepon, sarta adu’a ka Junandalem sambi addhep ka nagara se sareng Junandalem eparengngagi ka bangatowaepon abdidalem sadaja ka’dhinto, addhep ka kottha peleyannepon Junandalem sareng addhep ka padalemman kennengngannepon kabakteyan se epaddek abdidalem kaangguy Junandalem ka’dhinto,

⁴⁹ dhari kalenggiyannepon Junandalem e sowarga moga Junandalem kasokana meyarsa’agi du’aepon reng-oreng gapaneka sareng moga-moga Junandalem bellasa ka ommattepon Junandalem gapaneka.

⁵⁰ Kasokana Junandalem nyapora sadajana dusaepon sareng kadaraka’annepon ommat gapaneka ka Junandalem, sareng moga Junandalem aparenga partolongan sopaja para mosona ommattepon Junandalem eparengngana sae ka reng-oreng ka’dhinto.

⁵¹ Reng-oreng ka’dhinto ommattepon Junandalem dibi’ se sareng Junandalem ampon ebakta kalowar dhari nagara Messer kennengnganna reng-oreng ka’dhinto odhi’ eseksa.

⁵² Adhu, Guste ALLAH, Pangeran kaula, moga-moga Junandalem salanjangnga kasokana ajaga ommat Isra’il sareng ratoepon. Sareng moga-moga Junandalem kasokana meyarsa’agi du’ana ommattepon Junandalem manabi reng-oreng ka’dhinto nyo’on partolongan ka Junandalem.

⁵³ Adhu, Guste ALLAH, Pangeran kaula, sareng Junandalem oreng Isra’il ampon epele e antarana sadajana bangsa e dunnya ka’dhinto epadaddi ommattepon Junandalem dibi’, akadi se ampon edhabuwagi Junandalem ka reng-oreng gapaneka kalaban parantara’annepon Mosa, abdiepon Junandalem, e bakto Junandalem asarengnge bangatowaepon bangsa Isra’il se kalowara dhari nagara Messer."

⁵⁴ Kantha jareya Sulaiman se adu’a sambi adekkong e adha’anna mezba, astana dhu kalaja ejungjung ka attas. Saellana jareya Sulaiman pas ngadek

⁵⁵ sarta nyo’on epakaja ka PANGERAN berkat kaangguy sakabbinna oreng se akompol e jadhiya, dhabuna,

⁵⁶ "Molja’agi PANGERAN se la apareng kataremtemman ka ommadda menorot se la ejanjiyagi kalaban parantara’anna Mosa, abdina. Pa-apa se becce’ se ejanjiyagi la elampa’agi.

⁵⁷ Moga-moga GUSTE Allah asarengngana ba’na ban sengko’ akantha se asarengnge bangatowana ba’na ban sengko’ lamba’. Moga-moga Allah ta’ adinggallagiya ba’na ban sengko’.

⁵⁸ Moga-moga ba’na ban sengko’ bi’ PANGERAN epadaddiya oreng se esto ka Salerana me’ olle ba’na ban sengko’ teptebba odhi’ atoro’ ka apa se daddi kasokanna sarta ngestowagi sakabbinna hokom ban papakonna se la edhabuwagi ka bangatowana ba’na ban sengko’.

⁵⁹ Moga-moga PANGERAN, Allahna ba’na ban sengko’, emoda terros ka du’a ban parnyo’onan se eatorragi sateya reya bi’ sengko’. Moga-moga Salerana teptebba noduwagi kamora’anna ka ommat Isra’il ban ka ratona kalaban apareng sabarang se ekabuto re-saarena.

⁶⁰ Kalaban cara se kantha jareya sa-bangsa neng e dunnya reya bakal taowa ja’ tadha’ Allah salaenna PANGERAN, tadha’ laenna pole.

⁶¹ Ba’na kabbi reya, iya areya ommadda PANGERAN kodu teptep esto ka PANGERAN, Allahna ba’na ban sengko’ sarta kodu ta’at ka sakabbinna hokom ban papakon akantha se la elakone ba’na e are teya reya."

⁶² Saellana jareya Rato Sulaiman ban sakabbinna oreng se akompol e jadhiya ngatorragi kurban ka PANGERAN.

⁶³ Kaangguy kurban karokonan Sulaiman ngatorragi sape dhu lekor ebu meggi’ ban dumba saratos dhu polo ebu meggi’. Daddi Sulaiman ban sakabbinna ra’yat la mabadha opacara aresmeyagi Padalemman Socce jareya.

⁶⁴ E are jareya keya Sulaiman aresmeyagi bagiyan tengngana palataran se badha e adha’na Padalemman Socce jareya. Saellana jareya neng e palataran buru Sulaiman ngatorragi kurban obbaran, kurban gandum, sarta gajina keban kaangguy kurban karokonan. Jareya kabbi eatorragi e jadhiya sabab tor-ator jareya ta’ kabuwa’ esaba’ e mezba paronggu se badha e dhalem.

⁶⁵ E Padalemman Socce jareya Sulaiman ban sakabbinna ommat Isra’il mabadha paraya’an Ranggun Dhaun, abidda pettong are. Oreng se akompol e jadhiya ce’ bannya’na. Reng-oreng jareya dhateng dhari kennengngan se jauna sampe’ ka Jalan Hamat e bagiyan dhaja ban sampe’ ka batessa Messer e bagiyan lao’.

⁶⁶ E are se kapeng ballu’ reng-oreng jareya bi’ Sulaiman epakon mole. Kabbi padha ngalem Sulaiman, saellana pas padha mole ka bengkona; atena perak polana PANGERAN la apareng berkat ka Daud abdina sarta ka bangsa Isra’il ommadda.

1 Raja-raja

Video 1 Raja-raja 8

Ikuti Kami:

KONTAK | PARTISIPASI | DONASI