Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi sapuluh tolu tahun do dokahni Raja Salomo pajongjongkon rumahni, ai pe ase siap ibahen ganup.
2 Ipajongjong do homa rumah harangan Libanon, ganjangni saratus asta, bolagni lima puluh asta, anjaha gijangni tolu puluh asta; ipajongjong do ai bani tolu ristei tiang na hun bani hayu ares, anjaha i atas ni tohang na hun bani hayu ares.
3 Anjaha itutup do ai bani hayu ares i babou ni kamar na i atas ni tiang na ompat puluh lima ai, sapuluh lima sanristei.
4 Ambahni ai adong do jendela patitir, tolu ristei, patontang bei.
5 Ganup labah ai pakon jendela ai marompat suhi do, marjaring-jaring, anjaha patontang do labah ai, tolu ristei.
6 Ipadear do homa sada surambih na martiang, lima puluh asta ganjangni, tolu puluh asta bolagni; anjaha i lobei ni ai adong ope surambihni martiang anjaha marandar.
7 Ambahni ai ipaturei do sada kamar bolag paratas, iananni manguhum, ai ma paruhuman; ilampis do dasorni das hu bani langit-langitni bani hayu ares.
8 Rumahni pe, na niiananni ai, bani alaman na legan ipudi ni kamar ai, sonai do parpaulini. Ipaturei si Salomo do homa sada rumah bani boru ni Parao, na binuatni bahen parinangonni, sonai do homa parpaulini.
9 Ganupan ai ipaturei hun bani batu na maharga, na binarbar mangihutkon ukuranni, na ginargaji hunbagas pakon hun darat, hun dasorni nari das hu tayub, hun bani alaman ni Rumah ni Jahowa das hu alaman bolag.
10 Ia onjolanni ai batu na maharga do, batu na banggal, batu siualuh asta pakon sisapuluh asta,
11 anjaha i atas ni ai batu na maharga, na binarbar marukuran, pakon hayu ares.
12 Ia alaman bolag ai adong do tembokni inggot hun bani tolu ristei batu na binarbar pakon sanristei tiang hun bani hayu ares; sonai do homa alaman parbagas ni Rumah ni Jahowa pakon surambih ni rumah ai.
13 Dob ai isuruh Raja Salomo ma na mangalopi si Hiram hun Tirus.
14 Anak ni sada na mabalu do ia hun marga Naftali, tapi anggo bapani halak Tirus do, tuhang tombaga, gok hapentaran, pambotoh anjaha na pandei maruhur do ia manukangi parugas hun bani tombaga. Roh ma ia hu bani Raja Salomo laho mangkorjahon ganup silahouanni ai.
15 Ituang ma dua tiang tombaga. Sapuluh ualuh asta do gijang ni tiang na sada, anjaha sapuluh dua asta do gijang ni tali ukuran ni lilitni ai; ompat jari do hapalni anjaha marruang do ai, tiang na paduahon ai pe sonai do.
16 Ipaturei do homa dua uluni, na tinuang hun bani tombaga, anjaha inahkon ma ai hu atas ni tiang ai; lima asta do gijang ni ganup uluni.
17 Dob ai ipaturei ma dua bayu-bayuan pakon rantei-rantei hu ulu ni tiang ai, sada bani ulu na sada, anjaha sada bani ulu na sada nari.
18 Ibahen ma homa buah ni dalima, dua ristei inggot bani bayu-bayuan ai bahen parrongkob ni uluni na i atas ni tiang ai; sonai do homa parpaturei bani na paduahon ai.
19 Ia ulu na i atas ni tiang ai, usih do ai bani bunga pansur na mangerbang, ompat asta gijangan hun bani surambih ai.
20 I atas ni tiang na dua ai do ulu ai anjaha i babou ni na gemong ai, na i lambung ni bayu-bayuan ai; adong do dua ratus buah ni dalima ijai, dua ristei inggot; sonai do homa pakon ulu na legan ai.
21 Dob ai ipajongjong ma tiang ai bani surambih ni rumah panumbahan ai; tiang na pinajongjong hampit siamun ai, ibahen ma goran ni Jakin, anjaha tiang na pinajongjong hampit sambilou ai, ibahen ma goran ni Boas.
22 Sonai ma pardob ni horja bani tiang ai.
23 Dob ai ipaturei ma sada bongbongan tuangan, sapuluh asta hun topi na sada hu topi na sada nari, bongkou poupouni, lima asta gijangni anjaha tolu puluh asta lilitni inggot.
24 Anjaha inggot ni bongbongan ai, i toruh ni topini ai, adong do jagar-jagar hun bani mutik ni bunga-bunga, tolu puluh asta lilitni inggot. Dua ristei do mutik ni bunga-bunga ai, anjaha rap pakon bongbongan ai do ituang.
25 Jonam do ai i atas ni sapuluh dua lombu, tolu dompak utara, tolu dompak pastima, tolu dompak dangsina, tolu dompak hapoltakan, anjaha i atas ni sidea do bongbongan ai; dompak bagas do anggo ihur ni sidea.
26 Ia hapalni santopak do; bibirni songon bibir ni panginuman, songon bunga ni bunga pansur; siat dua ribu bat.
27 Ipadear ma homa sapuluh tong parburihan hun bani tombaga, ganup parburihan ai ompat asta do ganjangni, ompat asta bolagni anjaha tolu asta do gijangni.
28 Sonon do parpadearni bani parburihan ai: Marlais do ai inggot, anjaha marpetak-petak do laisni ai.
29 Anjaha bani petak-petak ni lais ai adong do gombaran ni singa, lombu pakon herub, sonai homa bani lais ai. Hampit datas pakon hampit toruh ni singa pakon lombu ai adong do jagar-jagar.
30 Ambahni ai ganup parburihan ai adong do ompat galapangni hun bani tombaga anjaha asni pe tombaga do, marabara do suhi-suhini na ompat ai; na tinuang do ai, anjaha ganup ai marjagar-jagar do.
31 Hampit bagas ni laisni ai do babahni, anjaha saasta hu atas; bongkou do babahni ai, usih bani tonjolan ni tiang ibahen, tongah dua asta bagasni. Maruhiran do babahni ai; marompat suhi do petak-petak ai, lang bongkou.
32 I toruh ni petak-petakni ai do galapangni na ompat ai; mardomu do as ni galapang ai hu bani parburihan ai; anjaha tongah dua asta do gijangni ganup galapang ai.
33 Songon galapang ni gareta do ipadear galapang ai; asni, lingkarni, jari-jarini, kopala kambingni, ituang do ganupan ai.
34 Adong do ompat abara bani haompatsi suhi-suhi ni parburihan ai; marsada do abara ai bani parburihan ai.
35 Bongkou do hampit ulu ni parburihan ai, satongah asta gijangni; bani ulu ni parburihan ai do sijolomanni, anjaha sada do ai hu bani petak-petak na i laisni ai.
36 Anjaha iuhirhon do bani sijolomanni pakon hu bani petak-petak ni laisni ai gombaran ni herub, singa pakon palem marguru hu bani parsiatni ijai, anjaha marjagar-jagar do ai inggot.
37 Sonai ma parpadearni bani na sapuluh parburihan ai, dos tuanganni, sada sibaranni pakon sada turpani.
38 Ambahni ai ipadear ma sapuluh hudon hun bani tombaga, siat ompat puluh bat sada hudon; ompat asta do tahar ni ganup hudon ai anjaha i atas ni ganup parburihan na sapuluh ai adong do hudon sada.
39 Dob ai inahkon ma parburihan ai, lima hampit siamun ni rumah ai, na lima nari hampit sambilouni; tapi anggo bongbongan ai inahkon ma hampit siamun ni rumah ai, hampit anggonini.
40 Ipadear si Hiram ma homa hudon, suyuk-suyuk pakon mangkuk. Ase siap ma horja ni si Hiram, na hinorjahonni bani Raja Salomo i Rumah ni Jahowa;
41 na dua tiang ai, na dua ulu na i atas ni tiang ai, na dua bayu-bayuan panrongkob ni ulu na dua na i atas ni tiang ai;
42 sonai homa na ompat ratus buah ni dalima ai, na longkot hu bani bayu-bayuan ai, dua ristei buah ni dalima bani sada bayu-bayuan bahen panrongkob ni na dua ulu na i atas ni tiang na dua ai;
43 na sapuluh parburihan pakon na sapuluh hudon na i atas ni parburihan ai;
44 bongbongan ai pakon na sapuluh dua lombu na i toruh ni bongbongan ai;
45 hudon, suyuk-suyuk pakon mangkuk ai. Ganup parugas ai, na pinauli ni si Hiram bani Raja Salomo i Rumah ni Jahowa, hun bani tombaga na pinolas do ipauli.
46 Bani pamah ni Bah Jordan, i holangkolang ni Sukot pakon Sartan do ipatuangkon Raja Salomo ganupan ai, ibagas tuangan na hun bani tanoh halampung.
47 Ipaturut Raja Salomo do ganup ugas ai lang itimbang, halani bueini; ase seng na botoh sadiha borat ni tombaga ai.
48 Ihatahon Raja Salomo ma homa na paulihon sagala parugas, na ipakei ibagas Rumah ni Jahowa: Ai ma anjapanjap omas pakon meja omas hatibalan ni ruti sigalangonkon;
49 parpalitaan omas, lima hampit siamun anjaha lima hampit sambilou, i lobei ni ianan na tang ma pansing ai, hun bani omas pitah; jagar-jagarni, palitani pakon guntingni hun bani omas;
50 mangkuk, pisou, batil, balanga pakon pardahupaan hun bani omas pitah; engsel ni labah ni ianan na tang ma pansing ai pakon engsel ni labah ni ianan na ma pansing ai hun bani omas do.
51 Ase sahei ma ganup horja ni Raja Salomo bani Rumah ni Jahowa. Jadi ibahen si Salomo ma hubagas rumah ai sagala na dob niuras ni bapani si Daud, ai ma pirak, omas pakon parugas-parugas, inahkon ma ai i kamar parartaan ni Rumah ni Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA