Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma 'orasi ne'ena ngoi tomau tabicara 'okia naga gee niangose-ngose 'ania suratioka. Nako 'o nauru koyongaamokuwa ge'ena yaowa.

² Ma 'uwa sigado yomakapake kayo'itimaronga, so yaowa 'o nauru moi-moi de manga wekatoka, de 'o ngeweka moi-moi de manga rokatoka.

³ 'O rokata salingou yakileleani manga wekatika, de 'o wekata mita koge'enali manga rokatika.

⁴ 'O wekata ge'ena ko 'onawa ma sirete yomaparetano, yakiparetano ge'ena manga rokata. Koge'enali mita 'o rokata ge'ena ko 'onawa ma sirete yamaparetano, ma 'ena manga wekata.

⁵ 'O giabereki koidadiwa nimakakurutika so konimakapakewa. Ma nako ka 'o 'orasi moi ge'ena kaidadi duga salingou nioodumu niosimoteke, la ngini moi-moi 'idadi niolahidoa. Ma ge'enaka de salingou nimalomuoli de nimakapakeli la 'uwa niodomoteke 'o Tokata ma Koana sigaro sababu ngini koniatahanuwa nia nyafisuu.

⁶ Ngoi kone'ena tongose ge'ena kotinisulokuwa 'ato nimaogoro mimakaleleani 'o giabereki, ma 'ena kaidadi nimaogoro 'o 'orasi moi.

⁷ Ma tongose 'ifoloi yaowa nako 'o nyawa 'iodumu koyongaamokuwa 'isoka ngoioli. Duga 'o nyawa 'iodumu nanga co-catu moi-moi pamakekau ma Jo'oungu ma Dutuno. Moi manga co-catu neda, de munuka 'ireguoli.

⁸ Gedagee koyonga-ngaamokuawasi de 'o bao-baoka, takidongose konee: 'Ifoloi yaowa ngini koniongaamokuawau 'isoka ngoi.

⁹ Ma nako ngini konia'akunuwa niatahani 'ania nyafisuu, ge'ena 'ifoloi yaowa niongaamoko. Sababu 'uwa sigado nia nyafisuu nidarama.

¹⁰ Gedagee yonga-ngaamokokau, takisitotara 'o besesongo naneda. ('O besesongo ne'ena ma Kristusino so ko to ngoiwa 'ai besesongo.) Ma besesongo ge'ena konaneda: 'O ngeweka gee yonga-ngaamokokau, koidadiwa manga rokata yakioluku.

¹¹ Ma nako 'ona yakiolukokau, 'ona salingou tatapu koyongaamokuawau, bolo yolioli manga rokatika. De 'o rokata koidadiwa manga wekata yaoluku.

¹² Gee 'iregu-reguka, ngoi ma sirete takisibesesongo konee: Nako wimoi wongaku-ngaku ma Kristusika la 'awi wekata komongaku-ngakuwa ma Kristusika ma muna momodeke yomagiabereki de de 'una, 'o nyawa gu'una koidadiwa womioluku.

¹³ De nako mimoi mongaku-ngaku ma Kristusika la 'ami rokata kowongaku-ngakuwa ma Kristusika, de mi rokata gu'una womodeke yomagiabereki de de muna, ge'ena muna koidadiwa mioluku.

¹⁴ Sababu 'o rokata gee koyongaku-ngakuwa ma Kristusika, 'idadi ma Jo'oungu ma Dutu wakidawongo yodadi 'awi 'umati, sababu wongaamoko de 'o ngeweka gee modadiokau ma Jo'oungu ma Dutu 'awi 'umati. Koge'ena mita 'o wekata gee komongaku-ngakuwa, 'idadi ma Jo'oungu ma Dutu womidawongo modadi to 'una 'awi 'umati, sababu mongaamoko de 'o nauru gee wodadiokau ma Jo'oungu ma Dutu 'awi 'umati. Nako ko koge'enawa, ma raiokau to 'ona manga ngowa-ngowaka 'isoka 'o ngowaka ma dorou. 'Ena momongo 'o ngowa-ngowaka go'ona ma desongo ma Jo'oungu ma Dutu 'awi 'umati.

¹⁵ Ma nako 'o nyawa gee koyongaku-ngakuwa la yomau yakioluku manga wekata bolo manga rokata gee yongaku-ngaku, ge'ena niakimadaka. Ne'ena dau ma dodaka ge'ena ngini konipusuikawau 'o ngaamoko ma besesongo, sababu ma Jo'oungu ma Dutu womau la ngini nio'ahu 'isa-sanangi.

¹⁶ Sababu ngini 'o wekata gee niongaku-ngakuokau ma Jouka, kokia so ngini nianakokau 'ato ngini koidadiwa niakisilaha 'ania rokata? Koge'enali mita 'Esa moi ngini 'o rokata gee niongaku-ngaku, kokia ngini 'idadi nianako 'ita-tantuu 'ato ngini koidadiwa niakisilaha 'ania wekata?

¹⁷ Moi-moi nio'ahu salingou moteke ma Jou wosingekomokau de wositatapuokau ma 'orasi ngini niokurue niongaku 'unaka ma ngale wini'asoko. Ma 'atorangi ge'enau gee tosidoto-dotoko 'o jamati 'isinoimika.

¹⁸ Nako kogee wimoi wisunakau ma 'orasi 'una wamake 'o ga-gasoko ma Jo'oungu ma Dutuno, ge'ena 'uwau womau waisanga ma suna ma no-nako ge'ena. Koge'enali mita nako wimoi kowisunawasi ma 'orasi 'o ga-gasoko wamake ma Jo'oungu ma Dutuno, ge'ena 'uwau womasuna.

¹⁹ Sababu pomasunaka bolo ko'uwa, ge'ena ma ngale koi'iwa. 'Iparaluu ge'ena pamoteke ma Jo'oungu ma Dutu wi pareta.

²⁰ 'Ifoloi yaowa 'o nyawa 'iodumu tatapu yo'ahu 'isoka kokia naga ma 'orasi 'ona 'ikurue yongaku ma Kristusika ma ngale ma Jo'oungu ma Dutu waki'asoko.

²¹ Nako ngini ni'asoko ma ngale niongaku 'ena ngini ge'ena 'o yongosi, ge'ena 'uwau nia singina 'isusa. Ma dua nako ngini niamake 'o 'orasi ma ngale nisimada 'o yongosioka, ge'ena nginou ma sirete nima'aturu.

²² Sababu 'o yongosi moi gee yongaku-ngakuokau ma Jouka, 'ona ge'ena ma Jou wi nyawa gee ma Kristus wakisipidilokau manga sowonoka. De moi ko 'o yongosuawau gee yongakuokau ma Jouka, ge'ena wileleani ma Kristus.

²³ Ngini ge'ena ma Jo'oungu ma Dutu wini'ijakau ma ngale winituusokau, de nia 'ija watotomoka. Sababu ge'ena ngini 'uwa ka 'o nyawaka niakisingounu ma 'ena ma Jo'oungu ma Dutuka.

²⁴ Ge'enau so 'Esa moi riaka dodoto ka 'o ngo-ngaku moi, 'isoka kokia naga nia 'ahu ma 'orasi ma Jo'oungu ma Dutu wini'asoko niongaku ma Kristusika, yaowa nio'ahu ka koge'enali mita.

²⁵ Ma ngale 'o nyawa gee koyonga-ngaamokuawasi, ngoi kotamakewa 'o pareta ma Jouno. Duga sababu ma Jo'oungu ma Dutu 'awi co-catu so ngoi 'idadi 'o nyawa 'ingaku, so tokula 'ai di-dibangi.

²⁶ 'Ai di-dibangi konee, ma ngale pongano-nganono 'o sagala susa 'inadutuku ngone pongaku-ngaku ma 'orasi ne'ena, ngoi tamao 'ifoloi yaowa nako 'ona tatapu koyongaamokuwa 'isoka ne'ena naga.

²⁷ Nako de nia wekatokau, 'uwa niakioluku. Nako nia wekata koi'iwasi, 'uwau niononu.

²⁸ Ma nako ngini niongaamoko, ge'ena koniosowonuwa. Koge'enali mita nako 'o mosolese mimoi mongaamoko, ge'ena komosowonuwa. Duga gee yonga-ngaamoko dua yodaari 'o susa ma gudaiku. De ngoi tomau ngini 'uwa nidaene 'o susa ge'ena.

²⁹ 'Esa moi riaka dodoto ka 'o ngo-ngaku moi! 'Ai dumutu ge'ena konee: To ngone nanga 'orasi koiamokuawau ma ngale 'o dunia ma do-dogumu 'isoriokau. Sababu ge'ena, 'o nyawa gee de manga wekatokau salingou yo'ahu 'uwa duga ka manga wekata yakalesangi, ma salingou yosilamo-lamo ma Jo'oungu ma Dutu 'awi manarama.

³⁰ De 'o nyawa gee yo'ari-'ariku, salingou 'uwa ka manga singina ma susa yamoteke; gee yo'ie-'iete, salingou 'uwa ka manga morene yamoteke; de gee yomadi-di'ijakau, salingou 'uwa manga kia sonaa yakipareta.

³¹ Ge'enau so 'o nyawa gee yadi-diai 'o dunia ma kia sonaa, tanu ge'ena 'uwau yakisikadangono. Sababu 'o dunia ma jamani kone'ena gee dua 'iisanga!

³² Ngoi tomau ngini 'uwa niododato. 'O nyawa yongaku-ngaku gee koyongaamokuwa, dua manga di-dibangi duga ka ma Jouka sababu 'ona yomau ma Jou wi singina 'isanangi.

³³ Ma 'o nyawa gee de manga wekatoka 'asa 'ikudai yatibangi ma ngale 'o dunia ne'ena ma rongamoi, sababu yomau yakisisanangi manga wekata.

³⁴ Ma duanguku manga di-dibangi 'ikapula-pula. 'O ngeweka gee koyomodokawa, bolo 'o mosolese, dua 'ikudai yatibangi ma ngale ma Jou, sababu 'ona yomau manga 'ahu 'iodumu yokula ma Jo'oungu ma Dutuka. Ma 'o ngeweka gee de manga rokatoka, dua manga di-dibangi yosilamo-lamo ka 'o dunia ne'ena ma rongamoi, sababu 'ona yomau yosisanangi manga rokata manga singina.

³⁵ Ngoi tatulisuku 'iodumu ge'ena ma ngale to ngini ma sirete nia laha, ko ma dumutuwa 'ato kotinisidabiwa niadiai konee de koneda. Ma ngoi tomau ngini niadiai gee ma gou-goungu yadaene, la ngini niatiba-tibangi duga ka ma Jou winileleani.

³⁶ Nako wimoi wamaoku salingou womingaamoko 'awi baingi sababu 'awi nyafisuu kowatahanuwa, ge'ena ngaro kawomingaamoko sababu ge'ena ko 'o sowonuwa.

³⁷ Ma nako moi manga singinaka yaputusokau 'ato koyongaamokuwau ngaro de manga baingou ma, de manga butusangi ge'ena komoiwa yakipakisaa, ge'ena yaowa, 'itilai ya'akunu yatahani manga nyafisuu.

³⁸ So 'o nyawa gee yonga-ngaamoko ge'ena yodiai yaowa-owa, de gee koyongaamokuwa ge'ena yodiai 'ifoloiosi yaowa.

³⁹ 'O ngeweka mimoi gee mongaamokokau, muna mi rokata miparetano duga ka ma 'orasi wowango-wangosi. Nako mi rokata wosongenokau muna 'idadiokau mongaamoko de 'o nyawa 'iregu moteke to muna mi singina ma mau, 'itilai mongaamoko moteke kokia naga 'o nyawa yongaku-ngaku.

⁴⁰ Ma muna 'asa 'ifoloi mosanangi nako komongaamokuawau. Ge'ena to ngoi ma sirete 'ai di-dibangi, ma ngoi tamao 'okia naga gee tosidemo ne'ena ge'ena de 'o Ngomasa 'Itebi-tebini ma kuasa.

1 Korintus

Video 1 Korintus 7

Ikuti Kami:

KONTAK | PARTISIPASI | DONASI