Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Iạ e reng mahumbisarang apang nịbawohẹ su ral᷊ungu surat'i kamene. Sěngkatau esẹ kụ tawe nẹ̌kawinge mapia wue.
2 Mẹ̌deạu i sie tawe kawinsanaěngu mẹ̌koạ apan tawe mẹ̌tatal᷊ahino, sěngkatau esẹ e mapiawe piạ kawinge, ringangu apam bawine e mapiawe piạ kawinge.
3 Kawing esẹ e harusẹ̌ měndal᷊engu patikụ munaran sěngkatau esẹ su kawinge, ringangu marehokange harusẹ̌ měngganapẹ̌ kal᷊awọu munarang sěngkatau wawine su kawinge esẹ e; sěngkatau-sěngkatau e měngganapẹ̌be munarane sěmbaụ su wal᷊ine.
4 Marehokang e tawe kawasa su wadang e hala; piạ kawasa su wadang e kawe kawing e. Kerene lai esẹ e tawe kawasa su wadang e hala; piạ kawasa su wadang e kawe marehokang e.
5 Kumbahangbe mẹ̌těngkaghea sěngkatau wọu kawinge, tuhụewe tundung pẹ̌sěngkawingang. Botonge su pẹ̌sěngkakuhuange asal᷊u ruamběka e sěngkanaungbue. Kamạgeng kerene ute makapanuntụbe pẹ̌kakal᷊iomanenge ringangu tawẹ konsange apa. Arawe wọu ene ute, i kamene e harusẹ̌ be pěmpẹ̌sul᷊e pěmpẹ̌tatamba tuhụ tundung pẹ̌sěngkawingang. Kereu wal᷊inewe kerene ute, kạdingạbe i kamene kasal᷊ukatengu setang, ual᷊ingu i kamene tạ pẹ̌tatingkẹ̌dange.
6 Iạ e mẹ̌bẹ̌bera kere ini e wal᷊inewe kere měpẹ̌parenta, kaiso kawe tabidạu sasal᷊ěntihọ.
7 Iạ něngalembom puluang kereu kẹ̌bị taumata e makoạ kere iạ. Kaiso sěngkatau-sěngkatau e kawe seng nahiạ u laonggọ u tatal᷊ěntụ si sie tutune wọu Mawu Ruata. Sěngkatau seng nitilakehu kere ini, wal᷊ine e lai kerene.
8 Su taumata apan tawe někẹ̌kawing dingangu su manga wawine wal᷊u e, ute sasal᷊ěntihọku e kere ini: Mapiawe i kamene kạtatanạ sěsa kere iạ e.
9 Kai kereu i kamene tawe makapẹ̌tingkẹ̌dang ute i kamene pěmpẹ̌kawingke. U mapiawe i kamene měmpẹ̌kawing sul᷊ungu mẹ̌tatahangu ěnning sụsahoka.
10 Si sire apan bọu němpẹ̌kawinge ute, parentaku e kai kere ini: (Tuhụ hinone e wal᷊inewe iạ nẹ̌gěllịu parenta ini e, kaiso kawe Mawu). Sěngkatau wawine kụ seng bọu nẹ̌kawinge ute kumbahangbe maněntangu kawinge.
11 Kereu i sie kawe seng naněntang ute, kạtatanạbe tawẹ kawinge, arau pẹ̌piang kawinge. Dingangu sěngkatau esẹ e tawe wotonge mapẹ̌tal᷊ein kawinge.
12 Si sire lai wal᷊ine ute waweraku -- ini e kai sasasaku hala wal᷊inewe Mawu e -- u kereu sěngkatau taumatan Sahani e piạ kawinge tau wawine kụ ta mangangimang si Kristus, kụ kawinge ene e mapulu mẹ̌dal᷊ahiking u kawinge Sahani e, ute tau esẹ e abe panindo si sie.
13 Mase lai kereu sěngkatau wawine Sahani e nẹ̌kawingu taumata kụ ta mangangimang si Kristus, kụ kawinge (esẹ) ene e mapulu mẹ̌dal᷊ahiking dingange, ute tau wawine ene kumbahang manindo kawinge ene.
14 U tau esẹ ta mangangimange kawe nitarimạ u Ruata e ual᷊ingu pẹ̌kakawinge ringangu tau wawine kụ seng nakoạ tataghuanengu Ruata. Kerene lai tau wawine ta mangangimange nitarimạ u Ruata e ual᷊ingu pẹ̌kakawinge ringangu tau esẹ kụ seng nakoạ tataghuanengu Ruata. U kereu wal᷊inewe kerene ute, manga anạ i sire e tantu kai manga anạ u tau kapirẹ̌ e, sěmbal᷊iu manga rariọ kawe nakoạ kere ralohon jamaatu Mawu.
15 Kai kamageng u taumata ta mangangimange kai maněntangu kawinge (wawine) arau kawinge (esẹ) Sahani e, ute kumbahang mametọ si sie. U su hal᷊ẹ̌ ini e ute baẹ bawine arau lai esẹ e walawe i sie, u Mawu Ruata e kawe mapulu tadeạu i kamene e apẹ̌biahẹ̌be su pẹ̌darame.
16 U lahạu i kau sěngkatau wawine -- kụ seng nangimang su Mawu e -- kereapa wue i kau makakasingkạ kahěngang u i kau tawe makaambang kawingu e? Kerene lai i kau sěngkatau esẹ Sahani e kereapa wue i kau makakasingkạ mal᷊ahẹ u i kau tawe makaambang kawingu e?
17 Sěngkatau-sěngkatau pěhingide wiahe tumuhụ ahạu Mawu kerẹewe seng nitilakehu Mawu e si sie su tempon Mawu Ruata e kimui si sie pěmpạngimang si Sie. Kụ ene e takụ ilẹ̌atorẹ̌ kerene su patikụ jamaatẹ̌.
18 Umpamane, kereu piạu nisunatẹ̌ su tempon i sie nakatarimạu kakuin Mawu e, tangu kumbahangbue tau ene makiul᷊ịu ěnạ u pẹ̌sasasunatẹ̌ e. Kerene lai kamageng piạu ta nisẹ̌sunatẹ̌ su tempong i sie kinakuiangu Mawu e ute kumbahang bue i sie makisunatẹ̌.
19 U watụ u tumuhụ atorangu pẹ̌sasunatẹ̌ arau tala e mamben tạ mangal᷊ene apa. Kapiaěnge ute tumbạu tụtuhụ kal᷊awọu titam Mawu e.
20 Sěngkatau-sěngkatau e mapiawe kạtatanạ měbẹ̌biahẹ̌ kere nạung kakakoạu i sie seng nakatarimạu kakuin Duata.
21 Kamageng su tempong i kau nikuiang kawe nạung ěllang, ute abe kasusang ene. Kụ kamageng i kau semben makapẹ̌těngkal᷊iwirẹ̌, ute limemboweng kapiane.
22 U sěngkatau ěllang kụ seng nangimang su Mawu, ute kai taumatang Mawu nipakal᷊iwirẹ̌. Dingangu sěngkatau kụ seng nipakal᷊iwirẹ̌ e seng nangimang su Mawu e, ute kai ěllang i Kristus.
23 Mawu Ruata e kai seng němaehẹ̌ si kamene dingangu kai seng nasueng baehe, kụ ual᷊ingu ene ute, kumbahangbe i kamene mẹ̌těngkakoạ ěllangu taumata.
24 Kụ i kamene, manilaing kerea kakakoạ i kamene su tempon nikuiange kai i kamene e měngkate pakatanạ mẹ̌bẹ̌biahẹ̌ kerene kạdaringang su Mawu Ruata.
25 Mihinọewe su apan ta někẹ̌kawing. Su hal᷊ẹ̌ ini e, iạ e reng ta něnarimạ u laoro apa wọu Mawu e. Kaiso kere sěngkatau kụ ual᷊ingken tatal᷊ěntụ u Mawu e kụ hinong pangimangeng ute iạ kai mapulu měngonggọu sasal᷊ěntihọku.
26 Kereu mẹ̌patehẹ̌ kal᷊awọu susa ramahi kạděntane, ute su pěndangengku e mạpiangbe balạe kạtatanạ kere.
27 Kereu i kau e seng nẹ̌kawinge ute abe kawe mẹ̌těngkapěllọ bọu kawing ene e. Kereu i kau e reng tawe nẹ̌kẹ̌kawing ute manịeng tawe mẹ̌kawing.
28 Kai kereu i kau kawe nẹ̌kawinge ute wal᷊inewe rosa. Kerene lai kereu sěngkatau mahuala e mẹ̌kawing, ute wal᷊inewe nẹ̌koạ dal᷊awang. Kětạengbeng i sire apan němpẹ̌kawinge kai mẹ̌sombangu haghin sigěsạ. Kụ iạ e kai mapulu tadeạu i kamene kai mal᷊iu wọu kal᷊awọu haghin sigěsạ ene.
29 Timonaku e kai kere ini, manga anạ u sěmbaụ: Tempong kitẹ e kai kadodọ. Těntal᷊ang ene ute, manětạ bọu někawinge ute pẹ̌biahẹ̌ko kere sěngkatau ta nẹ̌kẹ̌kawing;
30 i sain sụsangị, ute tạbidạu mẹ̌bẹ̌biahẹ̌ tạ susan naunge; i sain rul᷊ẹ̌ge ute tạbidạu tạ karal᷊uase; i sain seng bọu němpamělli e tạbidạu ta mananaghuang apa-apa;
31 dingangu i sain měngkai kạl᷊ausihẹ̌ su hal᷊ẹ̌ u mạdunia e ute pěmpẹ̌biahẹ̌ko tabidạu tạ tasibung kěbị-kěbị ene. U semben tawẹ kạděngụe dunia ini e, u su ral᷊ungu kakakoạ e kere orasẹ̌ ini e ute sarungbe maparung!
32 Kapuluku e tangu kai tadeạu i kamene mal᷊iu wọu sigěsạ. I saing kụ tạ kawinge ute kai reng makapẹ̌sěmpị u tiněnnane su munaran Mawu e, u i sie mapulu makal᷊uasẹ̌ naungu Mawu.
33 Arawe i saim piạ kawinge ute sarungbe měngkai mẹ̌tẹ̌tiněnnan hal᷊ẹ̌u dunia ini, batụu i sie mapulu mapakal᷊uasu naungu kawinge;
34 kụ pul᷊ise ute naunge kai mạpahiạ. Sěngkatau wawine tạ kawinge arau sěngkatau mahuala e, měngkai sarung mẹ̌sẹ̌sěmpị hal᷊ẹ̌ u Mawu e, u i sie měngkai lẹ̌lahimpuluangu wadange ore lai rohkẹ̌ e makoạ tataghuanengu Ruata. Kai arawe sěngkatau wawine kụ seng nẹ̌kawinge, ute kai mạsasuagẹ̌ tiněnnane su hal᷊ẹ̌ u dunia ini, u i sie mapulu mapakal᷊uasu naung u kawinge.
35 Iạ namohẹ u patikụ ini e, kai waugu i kamene hala, wal᷊inewe mapulu mẹ̌sẹ̌dingu ini ringangu mẹ̌sẹ̌ding u ene. Ěnningku e tumbạben tadeạu i kamene makapanuntụ mẹ̌koạ apan matatul᷊idẹ̌ e ringangu katěngadẹ̌ e ringangu tadeạu i kamene maamumang dingangu matinalung mẹ̌sěmpị u tiněnnang kamene su Mawu e.
36 Kereu piạ u sěngkatau makạpěndangu ta makahino pẹ̌kakoạ e su kaghiange, kereu i sie tawe makapẹ̌tingkědangu kapulune, mase i sie seng makapěndangu hinong mẹ̌kawing dingangu wawine ene, ute walạe pẹ̌kakoạ e apang kinapěndangenge kụ mapia. I sie tawe nẹ̌sal᷊a kereu i sire mariadi mẹ̌kawing.
37 Kai kereu pẹ̌sěngkatau e seng nẹ̌koạ putusange su ral᷊ungu naunge kụ semben tawe mẹ̌kawing dingangu putusange wal᷊inewe nisihasa, tangu apang kụ kinoạ ene e mapia, kamageng i sie tawe nẹ̌kawingu kaghiange, asal᷊u i sie natahutěngadẹ̌ bue su naunge.
38 Hatede, i sain nẹ̌kawing, mapiang koạ e, ringangu i sain tawe nẹ̌kawing, limembọeweng kapiane lai kakakoạ e.
39 Sěngkatau wawine kụ seng nẹ̌kawinge mạkakauhẹ̌ dingangu kawinge karěngụeweng kawinge wiahẹ̌. Kereu kawinge seng nate ute, wawine ene sembeng makapẹ̌kawingu esẹ kẹ̌kapulune, asal᷊u pẹ̌kakawing ene e kai pẹ̌kakawingu Sahani.
40 Kai limemboweng kapiane kereu i sie semben tawe saụ mẹ̌kawing. Ene e pěndangkuwe sẹ̌saku, kai su naungku ete wue mal᷊aing Rohkẹ̌ u Ruata e mẹ̌ngẹ̌ngahạ si siạ.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA