Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kamma-kamma anne erokka’ a’bicara ri passala’ apa nupaua lalang ri sura’nu ngaseng. Punna nia’ bura’ne tena na’bunting, anjo bajiki.

² Mingka sollanna tena nanigodai taua anggaukangi apa-apa tenaya matu-matunna, bajikangangi punna massing nia’ baine kalenna se’re-se’rea bura’ne, kammayatompa massing nia’ bura’ne kalenna se’re-se’rea baine.

³ Sikontu tu bura’nea musti nagaukang bajiki kawajibanna mae ri bainenna, kammayatompa sikontu tu bainea musti nagaukang bajiki kawajibanna mae ri bura’nenna; jari rua-rua musti massing nagaukangi kawajibanna siagang baji’.

⁴ Bainea tena nakalenna koasa mae ri tubuna; mingka ia koasaya mae ri tubuna iamintu bura’nenna. Kammayatompa, bura’nea tena nakalenna koasa mae ri tubuna; mingka ia koasaya mae ri tubuna iamintu bainenna.

⁵ Teako assikabellai salaku tau akkalabini. Akkulle jako assikabellai untu’ poro sinampekang punna assamaturu’ jako. Sollanna punna kamma, akkulleko sipappala’ doangang natena nunggappa paccoba. Mingka musti ammoterekko sikambani salaku tau akkalabini. Punna takammaya, akkulleko ninyonyo’ ri setanga, nasaba’ takkulleai nutahang hawa napasunu.

⁶ Anne tena nakuparentako punna kupauangko, mingka kupakaingakko.

⁷ Sikontutojenna la’bi kungaiangangi punna a’jari sangkamma ngasengi inakke taua. Mingka massing le’ba’ ngasemmi taua anggappa passare battu ri Allata’ala. Nia’ tau anggappa passare kamma anne, nia’ anggappa passare kamma anjo.

⁸ Iaminne pappakaingakku mae ri tau tenayapa na’bunting siagang tau jandayamo: Bajikangangi punna akkale-kale tuli mako sangkamma inakke.

⁹ Mingka punna tanukulleai amparrangngi napasunu, bajikangang a’buntingko. Nasaba’ bajikangangi punna a’buntingko kala sanna’ dudua lompona hawa napasunu.

¹⁰ Naia kuparentakanga mae ri tau le’bakamo a’bunting iaminne: (Sikontutojenna teai inakke assarei parenta mingka Batara.) Inai-nai baine le’ba’mo a’bunting, takkulleai nabokoi bura’nenna.

¹¹ Mingka punna nabokoimi bura’nenna, musti tenamo na’bura’ne, yareka musti ammotereki mae ri bura’nenna. Na se’rea bura’ne takkulleai natalla’ bainenna.

¹² Naia pappakaingakku mae ri mara’-maraengannaya, iaminne: — anne pappakainga’ kalengku, teai Batara — punna nia’ sitau bura’ne Karisteng a’baine sitau baine tenaya natappa’ mae ri Almasi, naero’ja anjo bainenna assikatallassang siagang ia, anjo taua takkulleai natalla’ bainenna.

¹³ Kammayatompa punna sitau baine Karisteng a’bura’ne sitau bura’ne tenaya natappa’ mae ri Almasi, naero’ja anjo bura’nenna assikatallassang siagang ia, anjo bainea takkulleai antallaki bura’nenna.

¹⁴ Nasaba’ bura’ne tenaya natappa’ a’jari nipassiratangi ri Allata’ala, a’jari umma’Na Allata’ala lanri pa’buntinganna siagang anjo baine a’jariamo umma’Na Allata’ala. Kammayatompa, anjo baine tenayapa natappa’, akkullei a’jari nipassiratang a’jari umma’Na Allata’ala, lanri pa’buntinganna siagang anjo bura’ne a’jariamo umma’Na Allata’ala. Punna takammaya, anjo ana’-ana’na ke’nanga tantu la’jari sangkammai ana’-ana’ kapereka, padahala’ anjo ana’-anaka nipasanrapangi anggota umma’Na Allata’ala.

¹⁵ Mingka punna nabokoi anjo taua bainenna yareka bura’nenna Karistengamo, teako tahangi. Laluasako ri anne passalaka, nasaba’ Nakellai Allata’ala sollannu tasisala-salaya lalang ri katallassannu.

¹⁶ Nasaba’ ikau salaku baine, iamintu baine tappakamo mae ri Batara, antekamma lakkulle nuasseng angkanaya ma’nassa takkulleai nupasalama’ bura’nennu? Kammayatompa ikau salaku bura’ne Karistengamo, antekamma lakkulle nuasseng angkanaya ma’nassa takkulleai nupasalama’ bainennu?

¹⁷ Parallui massing nuatoro’ katallassannu situru’ Nakaerokia Batara, iamintu situru’ apa le’bakamo Napattantu Allata’ala ri wattunnu Nakio’ Allata’ala a’jari tau tappa’ mae ri Ia. Iami anjo paratorang le’baka kupangngajarrang ri sikontu jama’aka.

¹⁸ Alarapanna, punna nia’ tau le’ba’ memammi nisunna’ ri wattunna natarima pakkio’Na Allata’ala, teami nausahakangi ampattaenai anjo pammateina sunnaka. Kammayatompa, punna nia’ tau tenapa nale’ba’ nisunna’ ri wattunna natarima pakkio’Na Allata’ala, teami nasuro sunnaki kalenna.

¹⁹ Nasaba’ nipinawangi yareka tena anjo paratorang sunnaka, rua-rua tena naparallu. Ia parallua iamintu mannurukia ri sikamma parentaNa Allata’ala.

²⁰ Boli’mi kamma massing attallasa’ taua sangkamma ri wattunna natarima pakkio’Na Allata’ala.

²¹ Punna atako ri wattunnu nikio’, tena naparallu nususai kalennu annawa-nawai anjo passalaka. Mingka punna nia’ se’re wattu nunggappa kasampatang a’jari tu bebasa’, pakemi anjo kasampatanga.

²² Nasaba’ punna nia’ se’re ata tappa’mi mae ri Batara, anjo taua a’jarimi umma’Na Batara siagang a’jarimi tau bebasa’. Na punna nia’ tu bebasa’ a’jari tappa’mo mae ri Batara, a’jarimi atanNa Almasi.

²³ Le’ba’ mako niballi ri Allata’ala, siagang lappasa’mi ballinnu. Lanri kammana, teako passareangi kalennu a’jari ata mae ri rupataua.

²⁴ Jari, ikau sikamma sari’battangku, manna pole antekamma lampa-lampana katallassannu ri wattunnu nikio’, paralluko tuli attallasa’ ilalang ri ero’Na Allata’ala.

²⁵ Kamma-kamma anne passala’na tau tenayapa na’bunting. Ri sesena anne passalaka tena nakuanggappa parenta battu ri Batara. Mingka salaku tau akkullea nipatappa’ lanri pangngamaseanNa Allata’ala, erokka’ ampakaingakko.

²⁶ Nasaba’ jaina kasusaang akkulle antabaki’ kamma-kamma anne, kupikkiriki angkanaya bajikangangi punna kamma tommo anjo kamma-kammaya anne katallassanna taua.

²⁷ Punna takkala a’baine mako, teako pelakki anjo bainennu. Punna tenapa nu’baine, tea’ mako a’boyai baine.

²⁸ Mingka teaiji dosa punna a’baineko. Kammayatompa punna nia’ tulolo a’bunting, anjo teai dosa. Mingka lajai kasusaang nagappa anjo tau a’buntinga. Naerokka’ sollannu nipakabella battu ri anjo kasusaang-kasusaang kammaya.

²⁹ Pattujungku kammai anne sari’battang: Tenamo najai wattu ri katte. Appakkaramula ri kamma-kammaya anne, sikontu tau a’baineamo parallui attallasa’ sanrapang tau tenayapa na’baine;

³⁰ inai-nai angngarru’, sanrapangi tau tenaya nasi’na nyawana; inai-nai ammakkala’, sanrapangi tau tenaya narannu; inai-nai le’ba’mo ammalli apa-apa, sanrapangi tau tenaya apa-apanna;

³¹ siagang inai-nai jai urusanna ri passala’na pakkalinoanga, sanrapangi tau tenaya najampangi anjo passalaka. Nasaba’ tasalloami anne linoa niaka nicini’ ri kamma-kammaya anne lalanynya’ ngasengi.

³² Kukellaiko ta’lappasa’ ngaseng battu ri kasusaanga. Tau tenaya bainenna akkullei napasse’re pikkiranna mae ri apa-apa Nakaerokia Batara, sollanna akkulle napakasannang pa’mai’Na Batara.

³³ Mingka tau niakamo bainenna jaiangammi anne pakkalinoanga napikkiri’, lanri ero’na napakasannang nyawana bainenna;

³⁴ kale’bakkanna ta’bagemi pikkiranna. Baine tenaya na’bura’ne, yareka se’rea tulolo, lala’bi jaiangammi ero’Na Batara napikkiri’, lanri ero’na napassareang sikontu katallassanna a’jari Allata’ala pata. Mingka baine niakamo bura’nenna, napasse’remi pikkiranna mae ri passala’ pakkalinoanga, lanri eroki napakasannang nyawana bura’nenna.

³⁵ Yangasenna anne untu’ kabajikang kalennu nakupauangko; teai lanri ero’nu kupisangkai appakamma anne yareka appakamma anjo. Ia kukaerokia iaji bawang angkanaya sollanna akkulle nugaukang apa-apa annabaya siagang apa-apa siratanga; kammayatompa sollanna akkulle nupasse’re pikkirannu mae ri apa-apa Nakaerokia Batara.

³⁶ Punna nia’ tau angkasu’mangi ri kalenna angkanaya tena nasiratang batena appanggaukang mae ri parekang bainenna, yareka takkulleai naparrangngi hawa napasuna, kammayatompa parallumi nasa’ring a’buntinga, boli’mi kamma na’bunting ke’nanga. Tena nasala punna a’buntingi ke’nanga.

³⁷ Mingka punna nia’ tau le’ba’mi natappuki lalang ri nyawana angkanaya tala’buntingai, siagang natenaja nanipassai, bajiki anjo apa nagaukanga; bajiki punna tena na’bunting, assala’ akkulleji naparrangangi anggaukangi kammaya anjo.

³⁸ Bodona kana, bajiki punna a’bunting taua, kammayatompa bajikangangi pole punna ta’buntinga taua.

³⁹ Inai-nai baine le’ba’ a’bunting, tassikkoki anjo bainea mae ri bura’nenna lalang attallasa’na anjo bura’nenna. Punna matemo anjo bura’nenna, ta’lappasa’mi anjo bainea. Akkullemi a’bunting poleang siagang bura’ne nakaerokia, assala’ a’bunting cara tu Karistengi.

⁴⁰ Mingka la’bi upakangangi punna tenamo na’bunting poleang. Anne panggappaku tonji; mingka ri pakkasiakku, lanri koasa RohNa Allata’ala nakupau anne sikammaya.

1 Korintus

Video 1 Korintus 7

Ikuti Kami:

KONTAK | PARTISIPASI | DONASI