Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tano nyak haga cawa tentang masalah sai keti sebut delom suratmu. Kik sai bakas mak kawin, udi helau.

² Kidang in mak teguda untuk bebuat hal-hal sai mak patut, lebih betik unggal jelma bakas ngedok inggomni tenggalan rik unggal bebai ngedok kajongni tenggalan.

³ Kajong harus memenuhi kewajibanni sebagai kajong tehadap inggomni, rik inggom harus memenuhi kewajibanni sebagai inggom tehadap kajongni; masing-masing memenuhi kewajibanni tehadap sai bareh.

⁴ Inggom mak bekuasa tehadap badanni tenggalan; sai bekuasa atas badanni iado kajongni. Injuk reno muneh kajong mak bekuasa atas badanni tenggalan; sai bekuasa atas badanni yakdo inggomni.

⁵ Dang saling ngejaohi peperda keti secara rua mekajong. Ngasi untuk sementara waktu, asal rua-ruani jejama radu setuju. Jama injuk reno masing-masing dapok bedua mak teganggu. Kidang kak raduni, harus keti muloh saling ngeredik secara rua mekajong. Kik mak injuk reno, kanah keti dapok nutuk bujukkan ruh jahat, mani keti mak kuat nahan nafsu.

⁶ Nyak nyawako inji lain sebagai perintah, kidang sebagai petuah.

⁷ Sebenorni nyak lebih gering kik sunyinni jelma jadi injuk nyak. Kidang masing-masing radu nerima karunia khusus jak Allah. Sai jelma ngedok karunia inji, sai bareh ngedok karunia udi.

⁸ Untuk jelma-jelma sai makkung kawin rik untuk bebai-bebai sai radu randa, injido petuahku: Lebih betik Puari tetap hurik tenggalan injuk nyak.

⁹ Kidang kik Puari mak dapok nahan nafsu, Puari hagani kawin. Mani lebih betik Puari kawin jak birahimu bekobar-kobar.

¹⁰ Tehadap tian sai radu kawin, injido perintahku: (Sebenorni lain nyak sai ngeni perintah inji, kidang Tuhan.) Sai jelma bebai sai radu kawin dang ninggalko kajongni.

¹¹ Kidang kik radu ia ninggalkoni, ia harus tetap mak ngajong, atau muloh jama kajongni. Rik sai kajong mak ngasi nyeraiko inggomni.

¹² Untuk sai barehni, petuahku yakdo: -- inji petuahku tenggalan, lain jak Tuhan -- kik sai jelma Kristen nginggomko sai jelma bebai sai mak percaya jama Almasih, rik inggomni setuju untuk hurik jejama jama ia, jelma udi mak ngasi nyeraiko inggomni.

¹³ Rik kik sai jelma bebai Kristen ngajongko sai jelma sai mak percaya jama Almasih, rik kajongni setuju untuk hurik jejama jama ia, maka inggom udi mak ngasi nyeraiko kajongni.

¹⁴ Mani kajong sai mak percaya dilayakko untuk jadi umat-Ni Allah mani perkawinanni jama inggomni sai radu jadi kedau-Ni Allah. Injuk reno juga inggom sai mak percaya dilayakko untuk jadi umat-Ni Allah, mani perkawinanni jama kajong sai radu jadi kedau-Ni Allah. Kik mak injuk reno, anak-anak tian tantu injuk anak-anak kaper, padahal anak-anak udi dianggap sebagai umat-Ni Allah.

¹⁵ Kidang kik jelma sai mak percaya udi ninggalko inggomni atau kajongni sai Kristen, dang nahan ia. Delom hal inji Puari sai bebai atau Puari sai bakas ano bebas, mani Allah haga in Puari hurik rukun.

¹⁶ Mani Puari sebagai inggom -- sai radu percaya jama Tuhan -- injuk repa Puari pasti dapok pandai bahwa Puari mak dapok nyelamatko kajongmu? Injuk reno muneh Puari sebagai kajong Kristen, injuk repa Puari dapok pasti pandai bahwa Puari mak dapok nyelamatko inggommu?

¹⁷ Hagani masing-masing ngator kehurikanni nutuk bimbingan Tuhan injuk sai radu ditantuko ulih Allah bagi ia pada waktu Allah ngurauni untuk percaya jama Ia. Udido atoran sai kuajarko jama unggal jemaah.

¹⁸ Umpamani, kik sai jelma radu disunat pada waktu ia nerima urauan-Ni Allah, maka dangdo ulun udi berusaha ngehapusko tanda-tanda sunat udi. Injuk reno juga kik sai jelma makkung disunat pada waktu ia nerima urauan-Ni Allah, dangdo ulun udi ngilu disunat.

¹⁹ Mani nutuk atoran sunat atau mak nutukni, kerua-ruani jejama mak bereti api-api. Sai penting iado nutuk perintah-perintah-Ni Allah.

²⁰ Hagani unggal jelma tetap hurik delom keadaan injuk waktu ia nerima urauan-Ni Allah.

²¹ Kik pada waktu Puari diurau, Puari yakdo sai hamba, dangdo Puari susah-susah mikerko hal ano. Kidang kik kanah Puari mansa kesempatan untuk jadi bebas, pakaido kesempatan udi.

²² Mani jelma sai patuh sai radu percaya jama Tuhan, iado jelma Tuhan sai bebas. Rik sai jelma bebas sai radu percaya jama Tuhan, iado jelma sai patuh Almasih.

²³ Allah radu ngebeli Puari rik radu lunas ngebayarni. Ulihni seno dangdo Puari nyerahko diri untuk jadi hamba manusia.

²⁴ Jadi, Puari-puari injuk repa pun keadaanmu pada waktu diurau, hagani Puari tetap hurik injuk reno jejama jama Allah.

²⁵ Tano tentang jelma-jelma sai makkung kawin. Tentang hal ano, nyak mak nerima perintah api-api jak Tuhan. Kidang sebagai jelma sai mani rahmat-Ni Tuhan patut dipercayai, nyak haga ngeniko petuahku.

²⁶ Ngingok sunyin kesusahan sai ngancam tano inji, kurasa lebih betik kik jelma tetap ngejalani hurik injuk keadaanni sai tano.

²⁷ Kik Puari radu wat inggom dang berusaha lepas jak inggommu udi. Kik Puari makkung wat inggom dang nyepok inggom.

²⁸ Kidang kik Puari kawin, ano lain dusa. Injuk reno juga kik sai muli kawin, mak bereti ia dusa. Angkah, tian sai kawin udi haga ngehadapi lamon kesusahan. Rik nyak mirak Puari tehindar jak kesusahan-kesusahan udi.

²⁹ Maksudku injuk reji, Puari-puari: Ram mak ngedok lamon waktu lagi. Mulai jak tano, unggal jelma sai radu wat inggom hagani hurik seolah-olah ia mak ngedok inggom;

³⁰ jelma sai miwang, hurik seolah-olah ia mak sedih hati; jelma sai lalang, seolah-olah ia mak gembira; jelma sai radu ngebeli, seolah-olah ia mak ngedok api-api;

³¹ rik jelma sai bekecimpung delom hal-hal dunia, hagani hurik seolah-olah ia mak disibukko ulih hal-hal seno. Mani mak mesaka lagi dunia inji, delom keadaan sai tano, haga lebon!

³² Nyak mirak in Puari bebas jak kesusahan. Jelma sai mak ngedok inggom haga memusatko pikeran pada hal-hal tentang Tuhan, mani ia mirak nyenangko Tuhan.

³³ Kidang jelma sai wat inggom haga lamon mikerko hal-hal dunia inji, mani ia mirak nyenangko hati inggomni;

³⁴ akibatni perhatianni tebagi-bagi. Sai jelma bebai sai mak ngedok kajong, atau sai anak muli, haga lamon mikerko hal-hal tentang Tuhan, mani ia mirak in jiwa ragani jadi kedau-Ni Allah. Kidang sai jelma bebai sai radu wat kajong, memusatko pikeranni pada hal-hal dunia inji, mani ia mirak nyenangko hati kajongni.

³⁵ Nyak nulis sunyinni ano untuk kebetikanmu tenggalan, lain hak jama maksud ngelarang sinji rik ngelarang seno. Sai nyak mirak angkah in Puari ngelakuko sai benor rik patut, rik in Puari dapok memusatko pikeranmu jama Tuhan.

³⁶ Kik sai jelma ngerasa mak ngejalanko sai sepatutni tehadap tunanganni, kik ia mak dapok nahan nafsuni, rik ia ngerasa perlu kawin jama muli udi, tagando ia ngelakuko api sai dirasani helau. Ia mak bedusa, kik tian kawin.

³⁷ Kidang sai jelma radu nyani keputusan di delom hatini untuk mak kawin jama tunanganni rik keputusanni ano mak tepaksa, maka sai dilakukoni ano helau, asal ia kuat ngelakukoni.

³⁸ Tegasni, jelma sai kawin betik perbuatanni, rik jelma mak kawin lebih betik lagi perbuatanni.

³⁹ Sai bebai sai radu kawin teikok jama kajongni angkah selama kajongni hurik. Kik kajongni radu mati, bebai udi bebas kawin lagi jama jelma sai ia gering; asal perkawinan ano perkawinan Kristen.

⁴⁰ Kidang ia haga lebih beruntung kik mak kawin lagi. Udi pendapatku tenggalan, kidang kurasa bahwa sai kuucapko ano iado jama kuasa Ruh-Ni Allah.

1 Korintus

Video 1 Korintus 7

Ikuti Kami:

KONTAK | PARTISIPASI | DONASI