Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Genduari ateku encakapken kerna isi surat si ikirimkenndu man bangku. Mehuli tuhu adi dilaki la empo.

² Tapi erdandanken i japa pe nterem kal kalak si erlua-lua, emaka kerina dilaki lit min ndeharana sekalak-sekalak, bage pe kerina diberu lit min perbulangenna sekalak-sekalak.

³ Si dilaki arus nehken tugasna selaku dilaki man ndeharana, bage pe si diberu arus nehken tugasna selaku diberu nandangi perbulangenna.

⁴ Labo ndehara si erkuasa nandangi kulana, tapi perbulangenna nge. Bage pe labo perbulangen si erkuasa nandangi kulana, tapi ndeharana nge.

⁵ Ula tulak kerincuhenndu pekepar guna ersada kula, pala alu arih ersada i bas paksa si kentisik, gelah lit kesempatenndu ertoto; tapi kenca bage teruskenlah nehken kerincuhenndu e, gelah ula kam icubai iblis erdandanken la kam ngasup nahanca.

⁶ Si kukataken enda ndai labo paksan, tapi persunget nge ngenca.

⁷ Si tuhuna ulin nge kuakap maka kerina kam bali ras aku; tapi i bas sekalak-sekalak lit pemere Dibata; lit pemere bagi si enda, lit pemere bagi si ah.

⁸ Man kalak si la erjabu, subuk diberu-diberu si nggo mbalu, kukataken: ulin kam tetap la erjabu bali ras aku.

⁹ Tapi adi la kam ngasup, erjabulah. Ulin erjabu asangken gara rusur kerincuhenndu.

¹⁰ Man kalak si nggo erjabu kuperentahken -- enda labo perentahku, tapi perentah Tuhan: sekalak ndehara la banci nadingken perbulangenna.

¹¹ Adi itadingkenna, ulanai ia erjabu, pala mulihken ia man perbulangenna e; bage pe sekalak perbulangen la banci ngulihken ndeharana.

¹² Man kalak si deban kukataken (enda labo kata Tuhan, tapi katangku): adi lit sekalak perbulangen si nggo Kristen, ndeharana la erkiniteken man Tuhan, tapi ndeharana e nggit tetap nggeluh ras ia, ula iulihkenna ndeharana e.

¹³ Bage pe adi lit sekalak ndehara si nggo Kristen, perbulangenna la erkiniteken man Tuhan, tapi perbulangenna e nggit tetap nggeluh ras ia, ula ipindona mulih man perbulangenna e.

¹⁴ Sabap perbulangen si langa Kristen e nggo ikhususken arah persadanna ras ndeharana si nggo Kristen e gelah ia pe jadi sikerajangen Dibata. Bage pe ndehara si langa Kristen nggo ikhususken arah persadanna ras perbulangenna si nggo Kristen gelah ia pe jadi sikerajangen Dibata. Adi la bage, anak-anakndu tentu la banci deher ras Dibata; sedangken genduari anak-anakndu e nggo jadi sikerajangen Dibata.

¹⁵ Amin bage gia, adi perbulangen si la Kristen ntah ndehara si la Kristen ersura-sura nadingken ndeharana ntah perbulangenna si nggo Kristen pelepaslah bage. I bas si e, perbulangen si nggo Kristen ntah ndehara si nggo Kristen e bebas. Dibata ndilo kam maka kam nggeluh alu dame.

¹⁶ O ndehara, kuga pemetehndu maka la kam ngasup nelamatken perbulangenndu? Bage pe kam o perbulangen, kuga pemetehndu maka la kam ngasup nelamatken ndeharandu?

¹⁷ Kerina min nggeluhken geluhna rikutken kai si nggo itentuken Tuhan man bana sekalak-sekalak, bali ras asum ia ipilih Dibata nai. Enda me aturen si kuajarken i bas kerina perpulungen.

¹⁸ Adi sekalak si nggo isunatken jadi Kristen, ula iusahakenna meneken tanda-tanda sunat e. Adi sekalak si langa isunatken nggo jadi Kristen, ula ia isunatken.

¹⁹ Sabap labo penting ersunat ntah la ersunat. Si perlu eme ngikutken pedah Dibata.

²⁰ Sekalak-sekalak min nggeluhken geluhna tetap bali ras asum ia idilo Dibata jadi kalak si tek.

²¹ Adi budak kin kam nai asum kam ipilih Dibata, labo dalih! Tapi adi lit kesempaten man bandu jadi kalak bebas, pergunakenlah kesempaten e.

²² Sabap sekalak budak si nggo ipilih Tuhan, ia nggo kalak bebas erkiteken jadi sikerajangen Tuhan ia. Bage pe kalak si bebas asum ia ipilih Kristus, ia budak Kristus kap.

²³ Kam nggo itukur Dibata meherga kal; emaka ula kam jadi budak manusia.

²⁴ O senina-senina, sekalak-sekalak kam arus tetap bali i bas adep-adepen Dibata ras keadanndu asum kam tangtangna IpilihNa nai.

²⁵ Kerna kalak si langa erjabu la lit i bas aku perentah Tuhan. Tapi kusehken pendapatku man bandu, sabap erdandanken perkuah ate Tuhan metunggung aku iakap kalak.

²⁶ Nginget kesusahen-kesusahen si lit genduari enda, mehuli kuakap adi manusia tetap bagi keadanna si genduari.

²⁷ Adi nggo lit ndeharandu ula sirangken ia. Adi langa kam empo, ula darami si man emponndu.

²⁸ Tapi adi empo kam, labo kam erdosa. Bage pe adi sekalak singuda-nguda tersereh, labo ia erdosa. Saja ngenca, kalak si nggo erjabu inanamina me erbage-bage kesusahen. Janah ateku maka ula kam ngenanami kesusahen si bage rupana.

²⁹ Maksudku bagenda, o senina-senina: paksa si itentuken Tuhan nggo ipegendeki; emaka kalak si nggo empo, nggeluh min ia tempa-tempa la lit ndeharana.

³⁰ Kalak si tangis, tempa-tempa ia la tangis; kalak si ermeriah ukur, tempa-tempa la meriah ukurna; kalak si nukur barang-barang, tempa-tempa la lit barangna.

³¹ Kalak si make barang-barang doni enda, pakenalah e tapi ula ia pepuasken. Sabap tempas doni si genduari enda lawes ku lesapna kap.

³² Ateku gelah bebas kam i bas aru atendu nari. Sekalak dilaki si la lit ndeharana iukurina kerna Tuhan ras DahinNa, kuga erbahanca maka ngena ate Tuhan.

³³ Tapi sekalak si lit ndeharana iukurina kerna keperlun doni enda, sabap atena ndalanken si ngena ate ndeharana.

³⁴ Enda erbahanca ukurna ertupang. Diberu si la lit perbulangenna ntah pe singuda-nguda, iukurina kerna Tuhan ras DahinNa, sabap atena tendi ras kulana khusus jadi sikerajangen Tuhan. Tapi diberu si lit perbulangenna iukurina kerna keperlun doni enda, sabap atena ndalanken si ngena ate perbulangenna.

³⁵ Si enda kukataken man bandu guna kiniulinndu jine. Labo ateku ngolangi kam. Tapi ateku gelah kam nggeluh alu ratur dingen tetap ersembah man Tuhan alu la ersungsung janah la lit ganggunna.

³⁶ Tapi adi lit kalak si iakapna la patut adi la iempoina tunangenna, janah tunangenna e nggo ndekah jadi singuda-nguda, janah iakapna la ia ngasup nahan kerincuhen kulana, ibahanalah rikutken sura-surana, eme erjabu sajalah ia; labo ia erdosa adi bage.

³⁷ Tapi adi lit sekalak si nggo erbahan keputusen i bas ukurna guna la erjabu ras tunangenna, janah keputusenna e la lit si maksasa, mehuli nge e, adi ngasuplah ia ndalanken si bage rupana.

³⁸ Emaka mehuli nge perbahanen kalak si ngempoi tunangenna, tapi ulin ka pe perbahanen kalak si la ngempoisa.

³⁹ Sekalak diberu si lit perbulangenna la banci bebas adi nggeluh denga perbulangenna. Tapi adi mate perbulangenna e, banci ka ia erjabu ras dilaki si ngena atena asal perjabunna e ilakokenna i bas Tuhan.

⁴⁰ Tapi adi kuakap senangen nge iakapna adi lanai ia erjabu. Enda me pendapatku, tapi kuakap Kesah Dibata lit i bas aku.

1 Korintus

Video 1 Korintus 7

Ikuti Kami:

KONTAK | PARTISIPASI | DONASI