Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ruben iami ana’ kaminang toana Yakub. Mingka lanri le’ba’na nagau’ sala kalase’renna baine maraenna manggena, sa’genna niallemi anjo ha’na salaku ana’ kaminang toa nampa nipassareang mae ri Yusuf. Mingka manna nakamma, ia kaminang kassaka battua ri turunganna Yakub teai suku Yusuf, passangalinna suku Yehuda. Ba’lalo ia uru-uru a’jaria karaeng mae ri sikontu umma’ Israel iamintu tubattua ri anjo suku Yehuda.
2 (5:1)
3 Anjo Ruben, ana’ kaminang toana Yakub, nia’ appa’ ana’na bura’ne, iamintu: Henokh, Palu, Hezron, siagang Karmi.
4 Iaminne pattottorang battua ri turunganna Yoël: Semaya, Gog, Simei, Mikha, Reaya, Baal, siagang Beera. Na ia Beera, iami a’jari pamimping ri suku Ruben ri wattunna nijakkala’ ri Karaeng Tiglat-Pileser battua ri Asyur, nampa nierang ke’nanga mange ri daera pammelakkanga.
5 (5:4)
6 (5:4)
7 Lalang ri pattottoranga tattulisi’ tongi siapa are kapala lalang ri suku Ruben, iamintu: Yeiel, Zakharia,
8 siagang Bela ana’naya Azas, cucunna Sema battu ri tu Yoël. Suku Ruben ammantangi ri Aroër siagang ri daera appakkaramulaya battu ri Aroër a’lampa wara’ sa’genna ri Nebo siagang Baal-Meon.
9 Jai sikali olo’-olo’na ke’nanga ri daera Gilead. Lanri kammana napattampakimi ke’nanga daera bageang rayangnganga sa’genna ri parang lompo niaka sa’genna simbella Binanga Efrat.
10 Ri jammanna Karaeng Saul, nabundukimi suku Ruben sa’genna nabeta tu Hagri, niaka irayanganna Gilead, nampa napammantangngi ke’nanga anjo pa’rasanganga.
11 Ri bageang warakkanna daerana suku Ruben, anjoremmi ammantang suku Gad ri butta Basan sa’genna Salkha bellana ri bageang iraya.
12 Battu ri anjo suku Gad, Yoël a’jari boe-boe lomoro’ se’re, siagang Safam a’jari boe-boe tu lomoro’ rua. Yaenai siagang Safat iami boe-boena tu maraengannaya.
13 Sikamma tumaraengannaya lalang ri suku Gad, niaki lalang ri anne tujua pa’rappungang, iamintu: Mikhael, Mesulam, Syeba, Yorai, Yakan, Ziya, siagang Eber.
14 Iami ke’nanga turungang battua ri Abihail, ana’na Huri. Ia pattottoranna ke’nanga battu irawa nai’, iamintu: Abihail, Huri, Yaroah, Gilead, Mikhael, Yesisai, Yahdo, siagang Bus.
15 Ia kapalaya ri anjo ke’nanga iamintu Ahi, ana’na Abdiel, cucunna Guni.
16 Ammantangi ke’nanga ri daera Basan siagang Gilead, kammayatompa kota-kota niaka ri anjo daeraya, siagang ri sikontu parang rukuka ri Saron.
17 Anne pattottoranga nipareki ri jammang Yotam a’jari karaeng Yehuda, siagang Yerobeam a’jari karaeng ri Israel.
18 Lalang ri suku Ruben, Gad, siagang Manasye, niaka ammantang ri bageang rayanganna Binanga Yordan, nia’ 44.760 tantara le’baka nilati siagang niaka pangalamanna ammake pannangkisi’, pa’dang, siagang pana.
19 A’bunduki ke’nanga siagang suku Yetur, Nafis, siagang Nodab, iamintu suku-suku niaka lalang ri bansa Hagri.
20 Anjo tantaraya tappaki ri Allata’ala siagang appala’ tulungi mae ri Ia, naniturukiang pappala’na ke’nanga iamintu nisarei pammetang ke’nanga mae ri anjo tu Hagri siagang agang-aganna.
21 Lanri ero’Na Allata’ala nakajariang anjo pa’bundukanga, jaimi musu nabuno ke’nanga. Nia’ todong 100.000 tau najakkala’ ke’nanga, siagang nia’ narampasa’ ke’nanga 50.000 unta, 250.000 gimbala’ siagang 2.000 keledai (sangkamma jarang ca’di). Le’baki anjo ammantang tulimi ke’nanga ri anjo daeraya sa’genna ri wattu nijakkala’na ngaseng bansa Israel nampa nierang mange ri butta pammelakkanga.
22 (5:21)
23 Sipa’gang suku Manasye ammantangi ri daera Basan sa’genna wara’ ri Baal-Hermon bellana, Senir, siagang Moncong Hermon. Pila’ mange allo pila’ katambangi jaina ke’nanga.
24 Iaminne sikamma kapalaya ri ke’nanga: Hefer, Yisei, Eliel, Azriel, Yeremia, Hodawya, siagang Yahdiel. Yangasenna ke’nanga tantara sanna’ baranina.
25 Amminrai bansa Israel mae ri Allata’ala nasombaya boe-boena ke’nanga. Nabokoi ke’nanga Allata’ala nampa anynyomba mae ri barhalana bansa-bansa le’bakamo nibongka ri Allata’ala battu ri butta Kanaan.
26 Lanri kammana anjo Napagio’mi Allata’ala atinna Karaeng Pul battu ri Asyur, sa’genna mange ke’nanga ambunduki anjo pa’rasanganga. Anjo Karaeng Pul nigallara’ tongi Karaeng Tiglat-Pileser. Nampa naerammo suku Ruben, Gad, siagang suku Manasye, niaka ri bageang rayanganna Binanga Yordan, a’jari tunitahang nampa nipela’ mange ri butta Halah, Habor, Hara, siagang ri se’reang tampa’ ri ampi’na Binanga Gozan. Anjoremmi ke’nanga ammantang tuli sa’genna anne alloa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA