Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri wattunna toa dudumo Daud, naangka’mi Salomo a’jari karaeng Israel.
2 Napa’rappungang ngasemmi Daud sikamma pamimping Israel, imang-imanga, siagang tu Lewia,
3 nampa narekeng sikontu tau bura’ne niaka ri suku Lewi, ia umuru’ tallumpulo taunga siagang rateangannaya. Yangasenna nia’ 38.000 tau.
4 Nampa nasare tugasa’ 24.000 tau battu ri ke’nanga untu’ anggaukangi jama-jamanga lalang ri Balla’Na Batara, 6.000 untu’ angngurusu’ sura’-sura’ siagang kara-karaya lalang ri pangadelang,
5 nia’ 4.000 nasare tugasa’ a’jari pangawala’, siagang 4.000 pole untu’ ammuji Batara siagang pakkakasa’ musi’ niaka nipasadia.
6 Nabagemi Daud anjo tu Lewia lalang tallu pa’rappungang, situru’ bijanna ke’nanga, iamintu bijanna Gerson, Kehat, siagang Merari.
7 Gerson nia’ rua ana’na bura’ne, iamintu: Ladan siagang Simei.
8 Ana’-ana’ bura’nena Ladang nia’ tallu, iamintu: Yehiel, Zetam siagang Yoël.
9 Iami ke’nanga a’jari kapala ri bija turungang battua ri Ladan. (Selomit, Haziel siagang Haran, ana’-ana’ bura’nena Simei).
10 Nia’ pole appa’ bura’ne ana’na Simei, iamintu punna nitotoro’ situru’ umuru’na: Yahat, Ziza, Yeus, siagang Beria. Turunganna Yeus siagang Beria tena najai, jari nikanaji ke’nanga se’re pa’rappungang bija.
11 (23:10)
12 Kehat nia’ appa’ ana’na bura’ne, iamintu: Amram, Yizhar, Hebron, siagang Uziel.
13 Amram iami manggena Harun siagang Musa. (Harun siagang sikontu turunganna iami nipa’jari satunggu-tungguna angngurusuki sikamma pakkasa’ sambayanga, attunu dupa untu’ Batara, allayani Batara, siagang ambarakkaki ra’yaka lalang arenNa Batara.
14 Ana’-ana’ bura’nena Musa, iamintu atanNa Allata’ala, nipantamai ri golongang suku Lewi.)
15 Musa nia’ rua ana’na bura’ne, iamintu: Gersom siagang Eliezer.
16 A’jari pamimpinga ri ana’-ana’na Gerson iamintu Sebuel.
17 Eliezer nia’ sitau bawang ana’na bura’ne, iamintu niarenga Rehabya. Mingka Rehabya jai sikali ana’na.
18 Yizhar, ana’na Kehat makaruaya, nia’ ana’na bura’ne niareng Selomit; iami a’jari kapala pa’bijanna ke’nanga.
19 Hebron, ana’na Kehat makatallua, nia’ appa’ ana’na bura’ne, iamintu: Yeria kaminang toaya, nampa Amarya, Yahaziel, siagang Yekameam.
20 Uziel, ana’na Kehat makaappaka, nia’ rua ana’na bura’ne, iamintu: Mikha kaminang toaya, siagang Yisia.
21 Merari nia’ rua ana’na bura’ne, iamintu niarenga: Mahli siagang Musi. Mahli nia’ rua ana’na bura’ne, iamintu: Eleazar siagang Kish.
22 Mingka matei Eleazar natena ana’na bura’ne; poro ana’-ana’ baineji bawang, ia a’buntinga siagang cikalinna ke’nanga iamintu ana’-ana’na Kish.
23 Musi, ana’na Merari makaruaya, nia’ tallu ana’na bura’ne, iamintu: Mahli, Eder, siagang Yeremot.
24 Iaminjo areng-arenna turunganna Lewi, ia niaka nicata’ situru’ areng kapala pa’rappungang bijanna siagang massing kaluargana ke’nanga. Umuru’na ke’nanga ruampulo taung siagang rateangannaya na nisare tugasa’ lalang ri Balla’Na Batara.
25 Nakanamo Daud, "Nasaremi Karaeng Allata’ala kasannangang umma’Na, siagang KalenNa nia’ki ammantang ri Yerusalem sa’genna satunggu-tungguna.
26 Lanri kammana anjo, ia KemaNa Batara siagang sikontu pakkakasa’ eroka nipake untu’ assambayang tenamo naparallu nipisang ri tu Lewi."
27 Situru’ kala’busang naparentakanga Daud, sikontu tu Lewi umuru’ ruampulo taung siagang irateanganna, musti nicataki untu’ nisare tugasa’.
28 Musti nabantui imang-imang turunganna Harun lalang anggaukangi pa’gaukang sambayanga lalang ri Balla’Na Batara, amparakai parang lakkenna siagang sikamma kamaraka lalang ri anjo Balla’Na Batara, siagang sollanna yangasenna apa-apa le’bakamo nipa’jari tangkasa’ untu’ Batara tena na’jari ra’masa’.
29 Kammayatompa tanggong jawa’ tongi ke’nanga ri jamang-jamang kammaya: roti eroka nipa’jari passare mae ri Allata’ala, labu’ eroka nipake untu’ passare ri Batara, kanre nipisi’ tenaya nammake pa’gambang, koro’bang nitunu, siagang labu’ nileoka siagang minynya’ zaitun. Musti naukkuru’ tongi siagang natimbangi sikamma apa eroka a’jari passare lanieranga mange ri Balla’Na Batara.
30 Pantaranganna anjo musti akkelongi ke’nanga untu’ ammuji ri Batara, bari’basa’ karueng.
31 kammayatompa ri wattu-wattu nia’ koro’bang nitunu untu’ Batara ri allo Pammari-marianga, ri allo passua’-suarrang Bulang Beru, siagang ri allo passua’-suarrang maraengannaya. Ri passala’na siapa jaina tu Lewi ri wattu-wattu tugasa’na, le’ba’ tommi nipare’ paratoranna. Sa’genna satunggu-tungguna musti nagaukang tu Lewi anjo tugasaka.
32 Nisare tongi tugasa’ ke’nanga untu’ amparakai KemaNa Batara kammayatompa Balla’Na Batara, siagang ambantui sikamma sari’battanna ke’nanga, iamintu sikamma imang turunganna Harun, untu’ anggaukangi passambayanganga ri anjo tampaka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA