¹ Hwena Yesus Zena dekon zaitun tra nabare kwatap tek san zep asa golezahe gweka.
² Kaꞌankam orap tola ban zep etan Alap mo gol san dep asa golesek gweka. Zi trana kim etan tagal neblazak, Yesus Zena dekam zep nikin aneka– dekon de tawa tabin hip.
³ Farisikam de zini Musa mo olsa de tawa ta gwibin hip de zi niban ki zep hen wenya nolhatazak, ki zep tingare zi mo nwenak de zaun hup tik-tik nuk. Zen kahalo gwennak balk nuk.
⁴ Ki zep Yesussu nenblak, “Bian, wenya an kahalo gwennake balk ul halanzal.
⁵ Neno mae mo titi tabin olak Musa Bak man nesa gubiridaka, ‘Kire wenya em kasokam tok hap i ti gibin.’ Hwena eno tawa tabin nikon, kirenak de balk gun wenya nen banakan esa eibir?”
⁶ Zen kirekam mae hap ki dakensiblik, sap zen mes aningkim ola aha-en nuk– Yesussu dikim anakan akasiblin hap, “Zeno tawa tabin nik de Musa mo titi tabin ola ban apde nen sremkam, ki esa karek lal.” Hwena Yesus man huwe heka, ki zep kamanak de sonnak taha bolkam ale gul gweꞌanka.
⁷ Hwena zen dekam nama hen-henkam dakensik gweblaꞌak, ki zep hendep dam-dam gwe seka, dekam zep gubiridaka, “Men zen de zenaka enlala gweblak, ‘Ëe home aha-en mae karekna gok,’ zen zen de nonol kasokam gwik.”
⁸ Kim kirekam gubiridaka, ki zep etan sonnak de ale gun hup huwe heka.
⁹ Kirekam kim Yesussu nasalblak, ki zep aha-en aha-enkam teso gwe-gweꞌak– hendep kitak sekwak gwek. Bong-bongkam de wenya, nonol zen teso gwek. Hendep Yesus ensa zep ze hli dak. We enna in nama ze zauꞌuk.
¹⁰ Ki zep etan dam-dam gwe seka, dekam zep gubirki, “Zini men endawe? San ha emsa de karek gun hup de wenya in mes kitak sekwak gwer?”
¹¹ Ki zep ding gulbluk, “Mes, bian.” Ki zep hwena gubirki, “Ëe hen home emsa karek guꞌun. Sap esa song gwera, hwena bahem etan karekna gon.”]
¹² Etan kim zi beyanak asa golegweꞌanka, ki zep ze gubiridaka, “Ëe an okamana an hap de ngatanna Zen. Zini men zen de Asa ang ne gweblaꞌak, zebon mae onak sa engaya gwen hap de ngatanna zil ine gwer. Zen molya kawesinnik lowehe gwek.”
¹³ Farisikam de zini in zen ze hen lowe heꞌak, ki zep nenblak, “Em e-en tangane ki kirekam asa gubiridanda. Diki aha zi de eno olsa tril senkam bap, ki amaka emsa laibliblaꞌan.”
¹⁴ Ki zep ding gulzimki, “Ëe, zi de Asa tri tasen sremkam de kirekam gubiridanna, ano ola in nama eiwa dena. Sap Ëe tawana– men dekone hatazak hen men zao debe lwa haꞌak. Hwena em desa tawa naka hom.
¹⁵ Em in kirekame egwe gwenan: Zisi nabakame enbirida gwenan, ‘Em mese karek gwera.’ Hwena em in auhu-kama zi mo enlala en sane klis ul gwenan. Hwena Ëe angkam zisi home klis guꞌun.
¹⁶ Hwena Ëye klis guꞌunam, zen eiwakam sa ki lwal, sap Ëe A-en home kirekam syal gwe-gweꞌan. Bian men Zen Asa zer soneka, Zen aban zersyal gweꞌara.
¹⁷ Neno mae mo titi tabin olak man lwak, ‘Zi dare mo kira en ol de apde nenna, amki laiblizimk.’
¹⁸ Ëe an ere hap denaka emsa gubiridaꞌan. Ano Bianna men Zen Asa zer soneka, Zen hen man ano ola an trilse gweꞌara. Zep Ëe Debane dan e gweꞌan.”
¹⁹ Ki zep dakensiblik, “Eno bianna in endawe?” Ki zep ding gulzimki, “Em home Asa tame laꞌan hen home ano Biansa tame laꞌan. Asae tame laꞌanam, ki emaka hen ano Bianna tame laꞌan.”
²⁰ Zen kirekam gubiridaka– Alap hap de te-ala ing gul gweblan teksonnak kim tawa tabiꞌinkaye. Dekam hen hom balk dak, sap kire hap de yaklanak hom dekam zauꞌuk.
²¹ Etan ki zep Yesus gubiridaka, “Ëe asa song gwer. Em esa Asa le gweblal, hendep zao esa ere mae mo karek-karek naban oltil. Sap men zao debe song gweꞌak, em molye desan Asa ertrok.”
²² Yahudi mo mam-mam wenya men zen esane gweꞌak dekam zep zenaka dakensibiridaꞌak, “San ha zen man zenaka de tan hap enlala gweꞌara? – in zep ki gunda, ‘Men zao debe song gweꞌak, em molye desan asa ertrok.’”
²³ Yesus ki zep ayang gulzimki, “Em an auhu-kamana an kore zi. Ëe an gulk korena. Em in okamanak de esaltin zi. Ëe dekore naka hom.
²⁴ Zen in zebe emsa gubiridanan, em esa ere mae mo karek-karek naban oltil. Zen kirekam sa ebe mae hap lwazim– eme Asa laiblibla srem gweꞌakye. Sap Ëe an Zen– mensa ena kara e gweblakye.”
²⁵ Dekam zep jala ban dakensiblik, “Zep ki em an nara mo weinak dep de zi? – zebe kirekam enaka gu gweblaꞌaraye.” Ki zep ding gulzimki, “Men kirekame nonol lonesen nakon emsa gubirida gwek, zen kirekamke.
²⁶ Ano ola ebe mae hap dena nama beya tanganna– dekam de eno mae mo karek-kareksa goltrei gwizimdin hip denaye. Ano Bianna Zen taibliblan tanganna, hen men desae Zebon onakon sane gwe-gweꞌan, zen desae okamanak de zini ebe mae hap ayang gul gwizimꞌin.”
²⁷ Zen hwena hom zeno ol-gunnu insa anakan dam nulsubluk, “Zen ngatan zi mo langnak de Bian hap denaka ki gunda.”
²⁸ Zen in zep ki Yesus anakan gubiridaka, “Em kime ngatan zi mo lang nakore Zi Tanganna Asa gulk makan la inꞌik, zen dekam esa anakan Asa dam lasil, ‘An eiwa Zen– mensae kara e gweblakye.’ Em dekam esa Asa anakan tame lal, ‘Zen hom zere en mo bose hap ba maena syal gwibirki. Zeno tawa tabinni zen eiwa kitak Bian onakorena.’
²⁹ Bian men zen Asa zer soneka, Zen aban zersyal gwe-gweꞌara. Bian hom Asa da tasik gwenda, sap ano syala man sam gwesik gwibirida.”
³⁰ Kirekam de torannak kim sane daꞌak, dekam zini beya nik zep daibliblak.
³¹ Men zen Yesussu daibliblaꞌak, ki zep desa en gubiridaka, “Eme ano ol san enlala tatete naban ang ta gweꞌak, em ki eiwa Abon de ang ta gwen zi tangan.
³² Ki esa eiwa dena tame ul gwer, hen dekam esa aha mo emsa de jap gul sonendan nakon ehil gwe hanal.”
³³ Ki zep hwena ahakore nik ding nulblik, “Nen an Abraham Bak mo ausu nakore zi sike. Nen home mae aha zi mo tana iltikinnik ebabu gwek. San ki man nesa dahale gwibik. Zep em ba habe kirekam gulu? – ‘Em esa jap gul sonendan nakon ehil gwe hanal.’”
³⁴ Ki zep ding gulzimki, “Eiwa denakae emsa gubiridaꞌan: Men zen karekna nol gwenan, ki zen karekna in zebon ebabu gweꞌan.
³⁵ Zi mo tana iltikinnik de babu gwen zini, zen zi bina in mo iyesa hom. Zep zen molya hendep zewe gwe gweka. Hwena tane zem, zen zewe en sa gwe gwera, sap zen tane tangan zem.
³⁶ Zen in zep, ngatan zi mo langnak de Bian mo Tane Tangan de emsa hil ti sonebinkim, dekam esa tangan ehil gwe hanal.
³⁷ Ëe tawana: Em hen sap Abraham Bak mo auyan-tane wal. Hwena em tan habe Asa dwam eblaꞌan, sap ano ola ebon mae man jawe guk hana gwenan.
³⁸ Mensae ere mo Bian hon hlaul gwek, Ëe desae ebe mae hap ayang gul gwizimnin. Hwena em ere mae mo bian mo ol sane syal ta gwenan.”
³⁹ Ki zep ding nulblik, “Ëe an Abraham Bak mo walas sake.” Ki zep ding gulzimki, “Hwena Eme eiwa Abraham mo walas lowe heꞌanam, ki Abraham mo kim emaka lowehe gweꞌan.
⁴⁰ Mensae Alap hon sane gwe-gwek, Ëe desae ebe mae hap ayang gul gwizimꞌin, hwena em tan habe Asa dwam eblaꞌan. Abraham hom kirekam gwe gweka!
⁴¹ Em ere mae mo bian mo kime lowehe gwenan.” Ki zep hwena ding nulblik, “Ëe an malin walassa hom! Ëe an tingan Alap mo wei-wik gun walas sake.”
⁴² Hwena dekam zep Yesus ding gulzimki, “Eme eiwa Alap mo wei-wik gun walas lowe heꞌanam, ki emaka Asa enna ola gweblaꞌan. Sap Ëe an Alap onakone hatazak, hendep zebe angkam awe gweꞌan. Ëe ere mo enlalakam home hatazak, hwena Zen ki Asa zer soneka.
⁴³ Em an mae habe ano ola tame ul srem gwe-gwenan: Sap em makare zini bejen ano ola dokwak gun.
⁴⁴ Em an ere mae mo bianna dowal mo kigi mo wei-wik gun walas. Zen in zebe zeno dwam gwibin sin ang ta gwenan. Zen nonol lonesen nakon kirekam gwe gweka– zi tan zi. Eiwa de ola hom tangan zebon onak, sap eiwa de ola zebon man jawe guk hana gwenan. Zen de boton gwenna, zebe hap man dakastilin, sap zeno enhonak boton en. Zen in zep ki gweka, boton tam zi, hen zen tingare boton tam zi mo bian.
⁴⁵ “Hwena Ëe eiwa de en nakae ayang gul gwizimnin, in zebe Asa laiblibla srem gwe-gwenan.
⁴⁶ Ebon mae onakon, nara molya ano karek-kareksa anakan dam gulsubluka, ‘Em kire kareksae golka.’ Zen in zep, Ëe de eiwa de en naka tawa tabinni, em ba habe Asa laiblibla srem gwe-gwenan?
⁴⁷ Alap mo wei-wik gun walasna, zen man Alap mo ola i-san i-san nei gwibirin. Em hwena bejen, sap em in zeno walassa hom!”
⁴⁸ Yahudi mo mam-mamna men zen zewe lowe heꞌak dekam zep ze lamang daꞌak, “Em in eiwa Samaria wal karek hen dowal de bi gweblanna!”
⁴⁹ Yesus ki zep ding gulzimki, “Ëe dowala ban hom. Ëe ama ere mo Bian mo bosesa de mam gulblun hap syal gwe-gwenan. Em hwena ema Asa lamang la gwenan.
⁵⁰ Ëe ere mo bosesa de mam gun hup home syal gwe-gweꞌan. Hwena ano bosesa de mam gun hup de Zini ki– Zen ngatan zi mo langnak gweꞌara. Zen man Asa zerzauk sone gwenda.
⁵¹ An eiwa denakae emsa gubiridaꞌan: Men zen ano ol san enlala tatetekam ang ta gweꞌak, zen molya hendep denaban juwe gwek.”
⁵² Ki zep nenblak, “Angkam eiwa mese emsa dam lasinin: Em in dowal mo bi gweblan zi! Abraham Bak orep man tilki, hen Alap mo olsa de ayang gun hup de zini hen man juwe gwek. Hwena em ema gunda, ‘Men zen ano ol san ang ta gweꞌak, zen molya juwe gwek.’
⁵³ Auyan Abraham ki tilki. Em san ema enaka kil tiꞌara? – ‘Ëe an Abraham onakon de teipsinni.’ Alap mo olsa de ayang gun hup de zini san ki juwe srem gwe-gwek! Zep em banakane enaka kil tiꞌara?”
⁵⁴ Ki zep ding gulzimki, “Aen de ere mo bosesa mam gunkum, dekam eiwa, bejen Asa taibliblan. Hwena men Zen ano bosena mam gul gweꞌara, Zen ere mo Bian– men Desa em en gweblananke, ‘Ano mae mo Alap’kam.
⁵⁵ Hwena ena home tame laꞌan. Ëe en kie tame taꞌan. Ëe de anakan gunkum, ‘Ëe home Alapsa tame taꞌan,’ dekam ki hwena Ëe boton tam zi, men ki hen em! Hwena Ëe kie tame taꞌan, deban zeno ol en sane enlala tatetekam ang gwe-gwenan.
⁵⁶ Eno mae mo auyanna Abraham, zen man heꞌho gweka– hamal hap kim anakan salka, ‘Ëe asa ngatan zi mo lang nakore Zi Tangansa okama san dep de ati gwennak hla ta soner.’ Kirekam kim Asa hla ta soneka, man tangan sam gwesiki.”
⁵⁷ Ki zep ding nulblik, “Eno tahunna hom lima-pulunak hataꞌan. Em banakan de Abraham Baksa hla tan hap?”
⁵⁸ Dekam zep hwena ding gulzimki, “Eiwa denakae emsa gubiridaꞌan: Abrahamsa de jaha gwen sremnak, Ëe an Zen Tangan– Alap han de bose apde naye.”
⁵⁹ Kirekam kim nasalblak, dekam zep zi beyam-byana in kasona lop da inek– dekam de i tiblan hap. Hwena Zen dekam zep zeno mae mo nwe nakon aning gwe ine halka, ki zep kon hendep song gweka.