¹ Aha yaklakam, ki zep Yesus Yerusalem san dep asa golesek gweka– Yahudi zi mo aha yakla yalak dep.
² Ë yala Yerusalemsa in kasokam de kolkam orep mes ki wale dak, hen zeno aha lilikinni man bose nosok “Domba zaho hap de Lilikin.” Til hannak zao ki aili ho yawala, zeno gol kluk-klukna aha-ere taha-tap enkam. Ibrani olkam aili hona insa man bose dak “Betesda”kam.
³ Zewe zi sang-sangna tra nik eglang-glang gwe-gwek– sap nwe haina, lekna, hen taha-tana teisya ine gwen srem wenya. [Zen man ze ekara gwe-gwek– aili hona insa dekon ngep-ngep gwennak hla tan hap.
⁴ Sap menkam-en menkam-enkam Alap mo dam taha nakore zini man jowe ine gwe zaka, dekam zep hona insa ngep-ngep ta gweka. Ngep-ngep gwenkam, dekam men nara honak de talhenkam nonol gwenna, zen dekam de sang-sang nakon dawem gwen– sap banakare sang-sang mae nakon.]
⁵ Zao hen ki zini, zen 38 tahun enkam sang-sang naban gwe gweka.
⁶ Yesus kim tumnak zini insa hla ta zaka, zen man tame taka, “An mes holo tangankam sang-sang gweka,” ki zep takensiblika, “Em wehe dawem gwen hap dwam gweꞌara?”
⁷ Ki zep ding gulbluka, “Bian, ee banakan de dawem gwen hap? Asa de mas gweblan hap de zini san ki? Zep hona an de ngep-ngep gwenkam, ee kime nama song gwen hap sap akasik gwenan, dekam zep hwena aha zi talhenkam enonol gwe-gwenan.”
⁸ Yesus ki zep gubluka, “Dekam luwe, hendep ki ere mo ni ta gwen sre-srena insa gol san dep gul ine kini.”
⁹ Hendep dekam zep zini in dawem gweka, ki zep sre-srena insa gul ine kinika. Yaklana in dekam Yesus zini insa dawem taka, dekam Hari Sabat– Yahudi zi mo syal tan srem yaklakam.
¹⁰ Hwena Yahudi zi mo mam-mamna kim zini insa hla da sonek, ki zep ze nen soneblak, “Neno mae mo ol jalse gwennak, Hari Sabatkam sre-srena bejen gwirenhan.”
¹¹ Hwena man ding gulzimki, “Zini men zen asa dawem tala, zen man asa gublula, ‘Ere mo sre-srena insa em gol san dep gwirenhan.’”
¹² Dekam zep dakensiblik, “Zen nara zi ki emsa kirekam gublula?”
¹³ Hwena zini in hom anakan tame taka, “Zini bosena Yesus asa dawem tala,” sap Yesus zi beyanak iwe aya gwe ine halka.
¹⁴ Yesus ki zep zini insa etan Alap mo gol teksonnak zertoweꞌanka, zao zep gubluka, “Emki sane gwen: Emsa mese dawem tak, hwena kareksa de gol gwenna emki baes gwen. E-baes gwe srem gweꞌanka, ki hwena serkam de karek tangan wenyaka esa goltowera.”
¹⁵ Kirekam kim salblaka, zini in dekam zep Yahudi zi mo mam-mam wenyaka gubiridaka, “Zini in zen asa dawem taka, zen bosena Yesus.”
¹⁶ Zen dekam zep Yahudi zi mo mam-mamna Yesussu de sil-sil tanna kon neisibli hanaꞌak, sap Zen Hari Sabatkam zisi dawem ta gwibiꞌinka.
¹⁷ Hwena Yesus ki zep gubiridaka, “Ano Bianna hom syala golzausuk gwenda. Ëe hen zebe kirekam syal gwe tine gwenan.”
¹⁸ Yahudi zi mo mam-mamna dekam tangan zep Yesussu de tan hap ola aha-en nuk– mae hap: Sap zeno mae mo dam gulsunkum, Zen Hari Sabat en hap denaka hom gulmun gweka. Zen hwena Alapsa hen “Ano Bian”kam gu gweblaka. Dekam hwena zeno ola man nwe-mase gwe-gwek, “Ëe Alap han ki en.”
¹⁹ Yesus ki zep Yahudi mo mam-mam wenya insa gubiridaka, “Ëe eiwa denakae emsa gubiridaꞌan: Ëe bejene ere en mo enlalakam ba maesa syal gwibin. Hwena mensae ere mo Biansa anakan kara ta gwenan, ‘Bian kirekam syal gwe-gwenda,’ Ëe hen zebe kire enkam syal gwe-gwenan. Men kirekam Bian syal gwe-gwenda, Ëe hen desan zebe ang gwe-gwenan.
²⁰ Sap ano Bianna man serkam Asa kwasang gwe-gweblanda, zep mensa Zena syal gwe-gwibirida, tingan zep abe hap goltre gweblanda. Hen Zen sa etan serkam de owassa dikim ebe mae hap syal gwe-gwibir-zimdin hip denaka abe hap gol gweblala, hendep owasna in esa lenggwanbirida gwer.
²¹ Men kirekam ano Bian juwen zisi ngaya ta gwibirida, abe hap hen mes kire hap de sosonna golblaka– Ëe de hen kirekam ngaya ta gwibin hip, men desa Aena dwam gwibiridaꞌanke.
²² Hen ano Bian Zena angkam bejen zisi klis gun. Sap Zen mes klis gun hup dena kitak abe hap golblaka.
²³ Zen mae hap kirekam abe hap golblaka: Dekam de tingare zi Asa blikip gwesik gweblan hap– san de men kiye, ere mo Bian Zenaka de blikip gwesiblinna. Zep zini men zen Asa blikip gwesiblin sremna, zen hen hom ano Bianna blikip neisik gweblanan– men zen Asa zer sonekaye.
²⁴ “Ëe eiwa denakae emsa gubiridaꞌan: Zini men zen ano ol san ang ta gweꞌak, hen ano Bian, men Zen Asa zer soneka, Desa daibliblaꞌak, zen ki mes hendep de gwen hap dena nulin. Kire zisi bejen aumwa hap de klis gunnuk karek tabin. Sap zen mes tin hip de orana hli dak– dekam de engaya gwen hap de ora san ang tan hapye.
²⁵ Ëe eiwa denakae emsa gubiridaꞌan: Yaklanak sa hatal hen angkam man kirekam lwaꞌan, dekam men zen juwen zi mo kim lowehe gwenan, zen sa Alap mo Tanena ano kwang guludan ola esal gwer, hen men zen de Asa ang neblaꞌak, zen zen sa engaya gwer.
²⁶ Sap ngaya gwen hap de ausuna Bian onak, hwena Zen mes Tane zem abe hap golblaka– dekam de Abon onakon engaya gwe-gwen hap denaye.
²⁷ Hen Zen mes zisi dikim klis gul gwen hap de sosonna abe hap golblaka, sap Ëe an Zen– ngatan zi mo lang nakore Zi Tanganna.
²⁸ “Ano tawa tabinni ansa bahem tenggwanbin. Sap yaklanak sa hatal, dekam tingan men zen juwek ngatan zi mo lang nakore Zi Tanganna ano kwang guludahan hap de olsa sa esane gweser.
²⁹ Zen dekam sa zenaka de kang gulne gwen nakon luk tal. Men zen dawemna nol gwek, desa asa engaya gwen hap tagal gulsul. Men zen karekna nol gwek, desa karek tabin hip asa tagal gulsul.
³⁰ Ëe bejene A-en ba maesa syal gwibin. Ëe de zisi klis gunkum, dekam Ëe ama Bian mo Asa de gublun en san ang gwe-gwenan. Ano zisi de klis gunnu bejen li tabin, sap Ëe home ere mo dwam gwibin sin ang gwe-gwenan, hwena men Zen Asa zer sonekake, zere mo dwam gwibin en sane ang gwe-gwenan.
³¹ “Ëe de anakan gubiridankam, ‘Ëe an Zen– mensa em kara e gweblananye,’ hwena aha zi de ano olsa trilsen sremkam, dekam molye Asa laibliblak.
³² Hwena ano olsa de trilsen hap de Zini ki. Zen ere mo Bian. Hen ee tawana: Zeno Asa de tri tasen hap de ola eiwa tanganna.
³³ Em ema zini baptis ta gwibin zini Yohanis osan dep lup ul sonek, hen zen dekam zep eiwakam abe hap dena damnak kira gweka.
³⁴ Auhu-kama zi de Asa tri tasen sremkam hen sap. Hwena en dikim lamkam engaya gwen habe ki emsa enlala sobiridal.
³⁵ Yohanis mo gwenna lampu makan lwa gwek– san de lampu de okama kawesinnik awe zil inenna kiye. Nonol lone sennak em ema sap zeno ngatanna insa isrip-sri eibik.
³⁶ Zep Yohanis hen man Asa tri ta seka, hwena diki dawem tanganna, emki ano owas syal gwe-gwibinsi taibli gwibin. Bian Zen zep abe hap owas-owassa dikim syal gwe-gwibin hip de sosonna golblaka– em ekakim Asa anakan laibliblak, ‘An eiwa Bian Alap zer soneka.’
³⁷ Ëre mo Bianna men Zen Asa zer soneka, Zen man hen Asa tri ta seꞌara. Hwena em hom tangane zeno ol toranna esane gwek, hen home zeno nwe-masena hla lablak.
³⁸ Alap mo ola man eno mae mo enhonak jawe guk hana gwenan, sap em home zere mo zer sonen Zini Asa laibliblaꞌan.
³⁹ “Em sap Alap mo ol ale gunnu kie karatda ul gwenan, dekam zebe sap anakan eenlala gwe-gwenan, ‘Ëe asa dekon hendep de gwen hap de orana dam lasil.’ Hwena ol ale gunnu in, zen sap abe hap dena– Asa dikim tame tan hap!
⁴⁰ Hwena em ema baes ta gwenan– Asa de engaya gwen hap dena kip abe tan hapye. Ëe ki amaka ebe mae hap golzimꞌin.
⁴¹ “Ëe zi dikim ano bosesa mam gulblun hap home awe hatazak.
⁴² Sap Ëe mese emsa tame tabik. Eno mae mo enhonak hom– Alapsa de ensa lwablan hap denaye.
⁴³ Ëe ere mo Bian mo bosekame hatazak, hwena em home asa dokwak laꞌan. Hwena auhu-kama zi de zere en mo bosekam hata zankam, desa en ema dokwak la gwibirin.
⁴⁴ Em ema esam gwesik gwenan– hwe-hwekam de enaka bose naka anakan teip gulsuk gwizimdinni, ‘Em zini dawemna.’ Hwena em home ealp gwe-gwenan– Aha-ere Zini Alap dikim emsa sam gwesibiridan hapye. Kirekam de zini em an banakan dep? – Asa de taibliblan naye.
⁴⁵ “Bahem Asa kil tin, ‘Zen sa Bi zikhip ano mae mo karekna goltreblala.’ Hwena eno mae mo kareksa de Bian hap goltreblan hap de zini, zen Musa Bak– mensa ena kil liꞌan, ‘Alap de klis gunnuk zen zen sa asa golezauk sonera.’
⁴⁶ Em de eiwakam Musa mo olsa taiblibinkim, ki emaka hen Asa laibliblaꞌan, sap zen hen abe hap denaka ale gulku.
⁴⁷ Hwena em ema baes ta gwenan– Musa mo ola insa de taiblibin hipye. Zep kire zini banakan dep? – ano olsa de hen taiblibin niye!”