¹ Minggukam kak tangannak zep Magdala kore wenya Maria Yesussu de drenen kaso hul san dep song gwek. Kim hlaul kinik, “Lilikin kaso yala in mes irhi nul kinil,”
² dekam zep Petrus osan dep hluwezak. Aha zini, Yesus hon de ang gwe-gwenna hen zao gweꞌanka– men desa Yesus Zena kwasang gwe-gweblakake. Maria dekam zep guzimk, “Bian mo tokna mes nerhak, hen ee home tame guꞌun, ‘Endawe nennek?’”
³ Dekam zep Petrus aha zini in han kaso hula in san dep hlu keka.
⁴ Hwena aha zini in nabakam hluweka, zep zen nonol hataka.
⁵ Zen ki zep ake irin hip huwe heka, hwena kaen ngap-ngap enna insa zep ze hlaul inki. Hwena zen hom til halka.
⁶ Hwena Petrus kim lun kon hata zaka, zen hendep ki zep til halka. Zen hen kaen ngap-ngap blala in ensa zep ze hlaul onka.
⁷ Hen kaenna men dekam nola tatak dablak, desa hen ze hlaulku. Zen lak gun nik sren lwaꞌak.
⁸ Ki zep hen aha zini men zen nonol hata zaka kaso hula iwe tilki. Zen dekam zep hen hlaulku, hendep kim hyanak tame gulku, dekam zep Yesussu taibliblaka.
⁹ Sap menkam zi darena in hom tame ulki, hwena kim iwe lilki, zen dekam zep dam ulsuku– mensa Alap mo hamal hap de olak zebe hap dena anakan lwakye, “Zen tin nikon sa ngaya gwera.”
¹⁰ Zen dekam zep gol san dep ola halka.
¹¹ Hwena Magdala wenya Maria nama kaso hulak iwe e nakon gweꞌak, hen gosa kon gweꞌak. Zen ki zep go gwen naban huwehek– kaso mwa san dikim ake irin hip.
¹² Hwena dekam zep Alap mo dam taha nakore zi darena ze akeink. Zeno nik mo pakeanna ngap-ngapna. Men zewe Yesus mo tokna nennek, zao inikinꞌinka– ahana men desan nola kim nen nekke, ahana tana san dekam.
¹³ Zen dekam zep lakensibirki, “Em ba habe gona gweꞌara?” Dekam zep ding gulzimk, “Ano Bian mo tok naka nerhak, hen ee home tame guꞌun, ‘Endawe mes yap nennek?’”
¹⁴ Kirekam kim guzimk, zena ki zep tahan san lero gwek. Dekam zep hwena Yesussu hla tak. Zen hwena hom anakan tame tak, “An Yesus.”
¹⁵ Hwena Yesus ki zep takensibirki, “Em ba habe gona gweꞌara? Em narasae teblaꞌara?” Zen hwena man kil tiꞌak, “An te tra nwe awesna ansa de dam-en ta gweblan zi,” zep ding gulbluk, “San eme zer halka? Ki emki asa gubin, ‘Zaoe drenek,’ ee aka etan zerhak.”
¹⁶ Yesus dekam zep bosena kim gubirki, “Maria.” Maria ki zep etan lero gweblan naban Ibrani olkam takenblak, “Raboni.” Zeno enlalana neno mae mo olkam, “Bian guru.”
¹⁷ Ki zep gubirki, “Bahem Asa babang tan, sap Ëe nama home ere mo Bian osan dep song gweꞌan. Hwena ano oso walkam de gubirida gwen wenyaka em gubiridan, ‘Zen man gulu, “Ëe ere mo Bian osan debe song gweꞌan. Zen ano Bian, hen eno mae mo Bian. Zen ano Alap, hen eno mae mo Alap.”’ Kirekam em gubiridan.”
¹⁸ Zen dekam zep asa gubiridazak, “Ëe mese Biansa ngaya naka hla tanan!” Hen dekam zep asa tonbiridaꞌak– ola mensa abe mae hap de ayang gulzimdin hip gubirkiye.
¹⁹ Mingguna in mo kam-en, ee zere hon de ang ta gwen wenya aha-ere golake lowe heꞌak. Tingare lilikinni tayalsibin nik erlwaꞌak, sap ee ama Yahudi zi mo mam-mam naka airibiridak. Hwena Yesus ki zep ano mae mo ngirinnik jowe zaka, ki zep ze asa gubirida zaka, “Dawem. Em Alap mo taha terenake lowe heꞌan.”
²⁰ Zen dekam zep abe mae hap taha zemka zitreizimki, hen zabanak de weina goltreizimki. Hla tankam ee ama tangan eisrip-sri gwek.
²¹ Etan ki zep asa gubiridaka, “Em eiwa Alap mo taha terenake lowe heꞌan. Men kirekam Bian Asa zer soneka, Ëe hen kirekame emsa lup gul soneꞌan.”
²² Kirekam kim asa gubiridaka, ki zep asa aha-en aha-enkam zere mo ensasakam hop ta sonebirida gweꞌanka– anakare ola ban, “Alap mo Enho Zen emsa ing gwe heblan.”
²³ Zen hen Alap mo Enhona in hap man asa gubiridaka, “Em dekam esa Alap mo dwam gwibin sin tingare zi hip anakan klis ul gwizim, ‘Kirekam de karek-karek nakon de halenkam, Alap sa karekna insa tap gulsuk gwizimdi. Hwena aha karek-karekna ansa, desa bejen tap gulsuzimdin.’”
²⁴ Yesus kim abon mae jowe zaka, Tomas Bak, mensa nen gweblanan “dan de we son walas”kam, zen dekam zao hom gweꞌanka.
²⁵ Hwena kim hata zaka, ki zebe enblak, “Ëe Biansa ngaya nakae hla lal!” Hwena Tomas man ap ding gulzimki, “Ëe aen de tahanak de paku weisa hlaulblun sremkam hen towanzim-blin sremkam, hen zabanak de weinak de towanblan sremkam, ee molye na-en taiblik.”
²⁶ Aha mingguna kim tamank, ee etan gola iwe lowe heꞌak. Dekam Tomas hen zewe gweꞌanka. Tingare lilikinni tayalsibin nik erlwaꞌak, hwena Yesus ki zep ano mae mo ngirinnik jowe zaka. Dekon zep asa gubiridaka, “Dawem. Em Alap mo taha terenake lowe heꞌan.”
²⁷ Ki zep ze Tomaꞌa gubluka, “Emki taha bolkam ano tahanak de paku weisa towanzimdin, hen emki Asa zaba weinak towanblan. Bahem taibli srem gwen! Emki taiblin!”
²⁸ Tomas ki zep ding gulbluka, “Are ano Teipsinni, hen ano Alap!”
²⁹ Ki zep Yesus ding gulbluka, “Em in Ënaka de hla tankame taiblinda. Hwena men zen Asa de hla tan sremkam etaibliꞌan, zen heꞌho gwibinnik lowe heꞌan!”
³⁰ Yesus owas-owasna beya naka syal gwe-gwibirki– zere hon de ang ta gwen wenya ano mae mo nwenak. Hwena ee home tingan bukuna awe ale guk.
³¹ Ëe mae habe bukuna ansa ale gulzimk– em dikim anakan etaiblin hap, “Yesus Zen eiwa nesa de ngaya tabin hip de Teipsinni, hen Zen Alap mo Tane.” Sap kirekam de Yesussu taibliblankam, zen dekam esa hendep denaban engaya gwer.