¹ “Ëe mae habe hamal hap kirekam emsa gubiridanan– em ekakim Asa de taibliblan nakon ebutehal gwe srem gwek.
² Abe hap de jal hap emsa sa but srem gol-gola kon nolealsa sone gwer, hen eno mae mo ahakorena sa damera gwer. Dekam in zen ki emsa neibirida gweꞌak anakan sa kil nil gwer, ‘Alap man ano mae mo syala ansa sam gwesik gwibiꞌira.’
³ Zen kirekam sa emsa neibirida gwer, sap zen Asa Bian han hom tame nosoꞌan.
⁴ Hwena an zebe ki hamal hap dena insa emsa gubiridanan. Sap men dekam ki emsa kirekam neibirida gweꞌak, dekam esa eenlala gwe-gwer, ‘Zen men desa hamal hap asa gubiridaka, angkam man ki lwaꞌan.’” “Ëe home menkam kirekam emsa tawa ta gwibik, sap Ëe dekam namae emsa golelowehe gweꞌak.
⁵ Sap angkam Ëe ama etan lwa haꞌan– men Zen Asa zer sonekake, Zebon osan dep. Hwena em home Asa lakensibliꞌan, ‘Em enda san debe song gweꞌara?’
⁶ Hwena Ëe ama emsa tame tabiꞌin: Asa de kirekam sane tankam, eno mae mo enlalana man tangan dowe hanaꞌara.
⁷ Hwena eiwa denakae emsa gubiridaꞌan: Ëe de emsa hli yuludanna, zen ebe mae hap man tangan sam gwesizimꞌin. Sap Ëe de emsa hli yuludan sremkam, ki emsa de mas gwibirida gwen hap de Zini in molya ebon mae hata zaka. Ëe de emsa hli yuludankam, Ëe asa zer sonezim.
⁸ Zen kim de hataꞌan zaka, Zen dekam sa tingare okamanak de zi hip eiwa dena goltrei gwizimdi– kareksa de gol gwen srem hap dena, dam-damkam de lowehen hap dena, hen Alap de klis gun hup dena.
⁹ Sap okamanak de zini Asa de taibliblan hap man baes ta gwenan, zep Alap mo Enhona sa zebe mae hap anakan goltrei gwizimdi, ‘Em ema dekam ekarek gwe-gwenan.’
¹⁰ Ëe Bian osan debe song gweꞌan, zep ano tim bwanak Zen sa dam-damkam de lowehen hap denaka tawa ta gwibiri.
¹¹ Alap mes dowal mo kigina karek tan hap gu-gubluka. Zep Alap mo Enho de hata zankam, Zen sa hen Alap de tingan klis gun hup denaka tawa ta gwibiri.
¹² “Ano emsa de tawa tabin hip dena sap nama blala. Hwena angkam em molye dokwak uk.
¹³ Hwena Alap mo Enho, Zen Zen– eiwa denaka de ayang gul gwizimdin hip de Zi niye. Zen Zen sa eiwa de oranak dep emsa golewet so gwera. Zen molya zere en mo enlala san tawa ta gwibirki, hwena men desa de Abon sane gwe-gweꞌanka, Zen desa sa ebe mae hap ayang gul gwizimdi. Zen zep sa hen ngein sin dep dena hamal hap goltrei gwizimdi.
¹⁴ Tingan mensa Bian bi gwibiꞌira, Ëe desa apdenake bi eibiꞌin. Zen in zebe emsa gubiridal, ‘Alap mo Enhona men desa de Abon sane gwe-gweꞌanka, Zen desa sa ebe mae hap ayang gul gwizimdi.’ Zep zeno syala kon, zini sa ano bosena teip nulsunda gwer.”
¹⁵ (16:14)
¹⁶ “Molya holo gwek, em dekam molye etan Asa hla lak. Hwena etan holo gwehan sremnak esa Asa hla lal.”
¹⁷ Zere hon de ang ta gwen wenya, ee ahakon dekam zebe enaka anakan lakensibirida gweꞌak, “Zeno enlalana banakan lwablaꞌara? Nen home tame ul– in kim anakan gulu, ‘Molya holo gwek, em dekam molye etan Asa hla lak. Hwena etan holo gwehan sremnak esa Asa hla lal.’ Hen nen home tame ul– in kim anakan gulu, ‘Sap Ëe Bian osan debe song gweꞌan.’”
¹⁸ Ama hen anakan enaka lakensibirida gweꞌak, “In kim anakan gulu, ‘Molya holo gwek,’ dam gulsunnu banakan? Nen home dam ulsuꞌun.”
¹⁹ Hwena Yesus mes anakan asa tame tabirki, “Zen man Asa de takensiblin hap edwam gweꞌan,” ki zep asa takensibiridaka, “Em san teibin hibe enaka lonbiridaꞌan? – insa anakan emsa gubiridalye, ‘Molya holo gwek, em dekam molye etan Asa hla lak. Hwena etan holo gwehan sremnak esa Asa hla lal.’
²⁰ Eiwa denakae emsa gubiridaꞌan: Em esa aitin-aitin niban Asa gosa la gweblal, hwena auhu-kama enlala zini sa dekam eisrip-sri gwe-gwer. Em hwena dekam enlalana esa edowe hanal, hwena enlala dowe hananna in isrip-sri hap sa etan liwe hera–
²¹ men kirekam hen, we de eisbir anenna. Zen dekam enlalana man edowe hana gwenan. Sap dekam mes zaunun– zeno hlesgwan-hlesgwan gwen hap denakye. Hwena kim de jaha gweꞌak, zen dekam sa sang-sangna insa eititi gwibir. Sap dekam walasna insa sa isrip-sri gweblal.
²² Em hen kirekam esa egwer: Angkam em enlala dowe hanan nabane lowe heꞌan. Hwena em kime etan Asa hla laꞌak, em dekam tangan esa Asa isrip-sri eblal. Isrip-srina in, zen hendep dena. Zini bejen kire isrip-srina ebon mae onakon gulsuzimdin.
²³ Dekam em etan molye edwam gwek– Asa de srip gulsuzimdin hip takensiblin hapye. “Eiwa denakae emsa gubiridaꞌan: Ano bosekam de ba mae hap Biansa abe tanna, Zen sa ebe mae hap gol gwizimdi.
²⁴ Em home menkam ano bosekam ba mae hap Biansa abe la gwek. Hwena angkam emki abe ta gwen. Dekam esa ulin gwer. Zen dekam tangan sa eno mae mo isrip-srina taman kini gwer.
²⁵ “Ano ola ebe mae hap gulk sun de blaonzimdin makan mes yap lwal. Hwena yaklanak sa hatal, dekam molye etan gulk sun de blaonzimdinkim emsa tawa ta gwibik. Hwena dam-dam enkam asa ere mo Bian hap dena ebe mae hap srip gulsuk gwizim.
²⁶ Yaklana iwe de hatankam, em dekam molye etan Asa en gweblak– eno mae mo abesa de Bian hap ayang gul gweblan hapye. Hwena en esa Biansa ano bosekam abe la gwer.
²⁷ Sap Bian Zena man emsa kwasang gwibirida gweꞌara, sap em ema Asa ensa ola gweblak, hen em ema Asa anakan laibliblak, ‘Zen eiwa Alap onakon hataka.’
²⁸ Ëe eiwa okamana awe dep Zebon onakone hatazak. In zebe etan Zebon osan dep lwa haꞌan.”
²⁹ Ëe zere hon de ang ta gwen wenya dekam zebe enblak, “Angkame dam-dam enkam asa gubiridanda– gulk sun de blaonzimdin sremkamye.
³⁰ Angkame Emsa tame lanan: Em kitak tawana. Em zi mo enlalana ema tame ta gwizimnira, zep Emsa de takensiblin sremnake ap ding gul gwizimnira. Zen in zebe tangan Emsa laibliblaꞌan, ‘Em eiwa Alap onakone hata zaka.’”
³¹ Dekam zep hwena ap ding gulzimki, “San ha eiwa tangane Asa laibliblaꞌan?
³² Emki esan: Angkam mes tangan golek de gwer, em dekam esa ere mae mo gol-gol san dep esyawer. Em dekam esa Asa hli la gukhal. Hwena ere mo Bianna molya ze Asa da tasiki, sap Zen nama Asa zergwe gweꞌara.
³³ An kitak mese emsa gubiridanan– aban de zeraha-en gwenkam ekakim engalap gwen sremkam lowehe gwek. Auhu-kamanak awe karekna mam naka esa oltowe gwer. Zep enlala tatete naban lowehe gwek– men kirekam hen Aena enlala tatetekam de zaunkum auhu-kama mo sosonna holenak zaubir anekke.”