¹ Yesus ki zep etan asa tawa tabirki, “Ëe an Zen anggur te tangan naye. Em in hwena ano hli-hlina. Ano Bianna, Zen hli-hli naka de tasyalsik gwibin hip de Zi.
² Ano hli-hli nik de eten sremna, desa man blum gulsuk gwenda. Men zen ete gwenan, desa man ala naka hen mas-mas naka blum gulsuk gwenda– dekam de mamkam ete gwen hap.
³ Emsa mes ere mo olkam tasyalsik gwibirki– dekam de dawemkam ete gwen hap.
⁴ Abon onak em emas gwirin, dekam Ëe asa eban mae goleaha-en gwer. Hlina ze-en bejen eini ten. Diki apdenak timnik de esaltil irinkim. Em hen kirekam. E-en molye eini etek– aban de zeraha-en gwen sremkamye.
⁵ “Ëe an anggur te. Em in hli-hlina. Zi de Abon mas gwirinni, hen Ëe de deban zeraha-en gwenna, dekam zeno danna beyana. Sap Ëe sremkam, em bejen ba maesa syal gwibin.
⁶ Zi de Abon mas gwirin sremna, zen men kiye– anggur hlisa de tasyalsibinni. Zen esasan gwenkam kire syauknuk yal tasen– zewe de ehwasden hap.
⁷ Em de aban zeraha-en gwenkam hen ano ol de ebon mae lwa gwenkam, dekam em basa de dwam gwibinkim, emki kire hap Alapsa abe ta gwen. Zen sa dekam ebe mae hap gol gwizimdi.
⁸ Em de dawemkam dan nik ete gwenkam, dekam sa aha zi ano Bian mo sosonna ebon mae onak hla nul gwer. Dekam sa hen emsa tame da gwibir, ‘Zen Abon de ang ta gwen wenya.’
⁹ Men kirekam ano Bian Asa kwasang gwe-gweblanda, Ëe hen kirekame emsa kwasang gwibirida gwenan. Ano kwasang-kwasangnak emki lowehe gwen.
¹⁰ Em de ano ol san enlala tatete naban ang ta gwenkam, dekam ano kwasang-kwasangnak esa lowehe gwer– Aena men kirekame hen ere mo Bian mo ol san enlala tatete naban ang gwe-gwenanke. Zep Ëe zeno kwasang-kwasangnake gwe gwenan.
¹¹ “Ëe mae habe kitak insa gubiridanan– Abon onakore isrip-sri dekakim eno mae mo enhonak lwa gwek. Dekam eno mae mo isrip-srina sa tangan taman kini gwer.
¹² An zebe hen ola ansa hli yulzimꞌin: Enaka em kwasang gwibirida gwen– men kirekam Ëe hen emsa kwasang gwibirida gwenanke, em hen kirekam enaka kwasang eibirida gwek.
¹³ Kwasangna taman kinin tangan wenya an zen: Zi de wal bosyansa de ngaya tan hap zere mo timsi sosok gunnu, hendep zep de tinni. Zen zen– serkam de mam tangan wenyaye.
¹⁴ Em de ano ol san enlala tatete naban ang ta gwenkam, em ki eiwa ano wal bose wal tangan.
¹⁵ Angkam Ëe home etan Abon de babu gwen zikim emsa gubiridaꞌan. Sap kirekam ebe mae hap hom dakastilzimꞌin, sap babu gwen zini hom zere mo zi bina in mo syala tame nul gwenan. In zebe hwena angkam wal bose walkam emsa gubirida gweꞌan. Sap mensae Bian onak sane gwe-gwek, Ëe desae ebe mae hap ayang gul gwizimk.
¹⁶ Em home Asa dam lasik– Ëe dikim emsa bi gwibiridan hapye. Diki Ëye emsa dam tasibik– dekam de ano olsa gol halada gwen hap, hen em dikim dan nik ete gwen hapye. Em insa danna ete gweꞌan, zen hendep de elwa gwen hap dena. Zen zep sa Bian eno mae mo abena dokwak gul gwera– em de ano bosekam abe ta gwenkamye.
¹⁷ Zen in zebe ebe mae hap ola ansa hli yulzimꞌin: Enaka kwasang eibirida gwek.”
¹⁸ “Auhu-kama enlala zini sa emsa husus neibirida gwer. Kirekam kim de ebon mae jowe gweꞌak, zen dekam eenlala gwe-gwek, ‘Ano teipsinni hen kirekam ne gweblak.’
¹⁹ Eme nama auhu-kama enlala zi niban enlala siri tankam lowehe gweꞌanam, dekam zen maka emsa kwasang neibirida gweꞌan. Hwena Ëe mese emsa zebon mae onakon hlil inhak. Em mese zebon mae onakon wet so gwek, zen zep emsa husus neibirida gweꞌan.
²⁰ Anakan mensa emsa gubirida gwek, desa emki enlala gwe-gwibin: ‘Zi bina, zen mamna. Zebon de babu gwen zini, zen betekna.’ Zep men kirekam ere mae mo mamna Asa ne gweblak, zen kirekam sa hen emsa neibirida gwer. Zen man Asa karek da gwek. Zep emsa hen kirekam sa karek da gwibir. Ano tawa tabin sin da-en ang ta gwek. Zep ebon mae osan kire enkam sa hen ang ta gwer.
²¹ Zen mae hap sa emsa karek da gwibir: Sap em Abon onak de wenya, hen zen hom Bian, men zen Asa zer soneka, Desa tame daꞌan.
²² Ëe de hatazan sremkam hen tawa ta gwibin sremkam, ki karekna molya zebon mae onak mamkam lwaꞌanam. Hwena angkam Ëe mese tawa ta gwibik. Zep aumwa hap de zisi klis gunnuk zen banakan molya anakan eguk, ‘Ëe home anakan etawa gwek, “Ëe ama ekarek gweꞌan.”’
²³ Men nara Asa husus gweblanna, zen ki hen ano Biansa husus gweblaꞌara.
²⁴ Owas-owasna men desa Ëe zeno mae mo nwenak syal gwe-gwibir-zimk, aha zi hom tangan orep kirekam de owasna syal neibik. Ëe de kirekam syal gwibir-zimdin sremkam, ki karekna zebon mae onak molya mamkam lwaꞌanam. Hwena angkam zen mes hla nul gwek, hwena zen man Asa ere mo Bian naban husus nei gwizimk.
²⁵ Zen hwena kirekam de jowen hap mes ki lwak, sap men kirekam Alap mo olak anakan ale nukke, ‘Zen man totoresa asa husus ne gweblak,’ zen bejen ki lwa srem gwen.
²⁶ “Ano tim bwanak, dekam Ëe asa emsa de mas gwibirida gwen hap de Zini insa zer sonezim. Zen Alap mo Enho– eiwa de enlalasa de ing ta sone gwizimdin hip de Zini. Zen Zen sa hen abe hap de ola ebe mae hap ing gul sone gwizimdi.
²⁷ Em hen dekam esa abe hap dena ol halada gwer. Sap Ëe kime Alap mo ola nonol tawa tabinkim kon gwesibir hanak, eme Asa ang e gweblak.”