¹ Yesus ki zep zere hon de ang ta gwen wenya asa gubiridaka, “Bahem enlala nakon engalap gwen. Alapsa em taibliblan, hen Asa emki taibliblan.
² Ano Bian mo gol yala, teksonna beyana. Hen Ëe desane song gweꞌan– em de ze lowehe gwen hap denaka dikim hamal gulzimdin hip. Kirekam de lwan sremkam, Ëe molye kirekam emsa gubiridananam.
³ Kime kitak hohle gulzimꞌik, dekam asa etan lwa halzal– emsa dikim zewe dep kwang guludahan hapye, apdekam dikim emsa zewe golelowehe gwen hap.
⁴ Hen men zao debe song gweꞌan, em orana tawana.”
⁵ Tomas ki zep takensiblika, “Bian, ee home anakan dam ulsuꞌun, ‘Em desan debe song gweꞌara.’ Ëe banakan de orana insa tawa gweblan hap?”
⁶ Yesus ki zep ding gulbluka, “Ëe an Zen tangan– eiwa de oranaye, em dikim hendep de gwen hap denaka hlaun hup denaye. Em de Abon osan ang gwen sremkam, em bejen em Bian onak hatan.
⁷ Asa de tame tankam, ki ano Biansa hen ema tame laꞌan. Angkam tangan esa Asa dawemkam tame lal, zebe hen Biansa tame laꞌan, hen mese Desa hla la gwek.”
⁸ Pilipus ki zep gubluka, “Bian, ere mo Biansa abe mae hap zertreizim. Dekam asa esam gwesil.”
⁹ Ki zep ding gulbluka, “Ëe mese sap holokam emsa golelowehe gwek, zep Pilipus, em ba habe Asa tame ta srem gweꞌara? Zini men zen Asa hla tanna, zen hen ano Biansa hla tanda. Zep em de Asa tame tankam, em ba hap de Asa gublun hap? – Ëre mo Biansa de zertreizimdin hipye.
¹⁰ Em san home Asa taibliblaꞌara? – Ëe an Zen, Bian han de zeraha-en gwen Zi niye, hen Zen aban aha-en. Ola mensae ebe mae hap ayang gul gwizimnin, zen ere en mo enlala nakore olsa hom. Hwena Bian men Zen ano enhonak gwe gwenda, Zen Zen Asa zersyal gwe-gwenda.
¹¹ Ansa emsa gubiridaꞌan, desa em taiblibin: Ëe mese Bian han zeraha-en gwek, hen Zen mes aban zeraha-en gweka. Ano olsa de taiblibin sremkam, ki ano owas-owas syal gwe-gwibin ensa em taibli gwibin. Zen dekam esa hendep Asa laibliblal.
¹² Eiwa denakae emsa gubiridaꞌan: Zini men zen Asa taibliblanna, zen sa ano kim syal ta gwer– Ëe men kirekame syal gwe-gwenanye. Asa de taibliblan zini, zen sa hen ano syala kwei nul gwer– banakare owassa de mamkam syal gwe-gwibinkimye. Zen mae hap sa ki lwa gwer: Sap Ëe Soson Zini Bian osan debe song gweꞌan– dekon de emsa mas gwibirida gwen hap.
¹³ Em de Alapsa banakare mae hap ano bosekam abe tanna, Ëe asa desa ep syal gwe-gwibir-zim. Dekam sa zini Bian mo sosonna hla nul gwer, hen zep sa Biansa boltere da gwer.
¹⁴ Asa de banakare mae hap ere mo bosekam abe tanna, Ëe asa ki desa ebe mae hap syal gwe-gwibir-zim.”
¹⁵ “Em de Asa ensa lwa gweblankam, ki esa ano ol san ang ta gwer.
¹⁶ Hen Ëe asa Biansa abe tal– Zen deka ebe mae hap Zisi Ahanaka zer sonezimki, Zen de emsa mas gwibirida gwen hap. Zen Zen sa hendep denaban emsa golelowehe gwera.
¹⁷ Zen Alap mo Enho. Zen Zen– eiwa de enlalasa de ing ta sone gwizimdin hip de Zi niye. Auhu-kama enlala zini, zen molya Desa neirin gwek, sap desa nwekam bejen hla tan, hen zen bejen Desa tame tan. Hwena em en mese Desa tame lak, sap Zen emsa golelowehe gweꞌara, hen Zen sa eno mae mo enhonak gwe gwera.
¹⁸ “Ëe molye emsa kwasap walas mo kim da tasibik. Ëe asa etan emsa hlauluda gwezal.
¹⁹ Molya holo gwek, okamanak de zini dekam etan molya Asa hla da gwek, hwena em en esa Asa hla la gwer. Ëe asa etan tin nikon ngaya gwer. Zep em hen esa engaya gwer.
²⁰ Yaklana zewe de hatankam, zen dekam esa abe hap dena anakan tame ul, ‘Zen eiwa mes Bi zeban zeraha-en gweka. Hen eiwa neban mae mes goleaha-en gweka.’
²¹ Men zen ano ol san enlala tatete naban ang ta gwenan, zen zen Asa enna nola gweblanan. Zen kire zisi sa ano Bian kwasang gwibirida gwera– men zen kirekam Asa enna nola gweblananye. Aena hen asa kwasang gwibirida gwer, hendep zep asa Ënaka zebe mae hap zertrei gwizim.”
²² Hwena ena Kariot walya Yudas Bak mo apde bosena Yudas, zen dekam zep takensiblika, “Em banakan esa abe mae en hap Enaka zertreizimdi– okamanak de zi de Emsa hla tan sremkamye?”
²³ Ki zep ding gulbluka, “Zini men zen de Asa enna nola gweblaꞌak, zen sa ano ol san enlala tatete naban ang ta gwer. Hen Bian sa desa kwasang gwibirida gwera, hen Ëe asa Bian han zeno mae mo enho nakon olelowehe gwer.
²⁴ Hwena zini men zen Asa enna nolabla srem gwe-gwenan, zen molya ano ol san ang ta gwek. Hwena emki eenlala gwe-gwen: Ano ola, zen ere onakore naka hom. Zen Bian onakorena– men Zen Asa zer sonekake.
²⁵ “Ëe mese nama de emsa golelowe hennak kirekam gubiridanan.
²⁶ Hwena ano tim bwanak Bian sa emsa de mas gwibirida gwen hap de Zini insa ebe mae hap zer sonezimdi. Zen zere mo Enho. Zen Zen sa hwena emsa enlala sobirida gwera– Ëe men desae emsa tawa ta gwibikye. Hen Zen Zen sa eiwa de en naka ano weinak tawa tabir song gwera.
²⁷ “Angkam Ëe ama ebe mae hap em dikim Alap mo taha terenak engalap gwen sremkam lowehe gwen hap denaka hli yulzimꞌin– Aena men kirekame ngalap gwen sremkam gwe gwenanke. Auhu-kamanak awe aha zi molya kiresa ebe mae hap nolzimk. Zep bahem enlala nakon engalap gwen hen bahem eairin.
²⁸ Em kie Asa asalblal kime emsa gubiridal, ‘Ëe ama emsa hli yuludaꞌan, hwena asa etan emsa hlauluda gwezal.’ Em de dawemkam Asa kwasang gweblankam, ki emaka esam gwesil– anakan de Asa salblankamye, ‘Ëe Bian osan debe song gweꞌan.’ Sap ano Bianna Zen Abon onakon teipsinni. In zebe duweblaꞌan.
²⁹ An zebe hamal hap emsa gubiridanan. Sap in kim kirekam joweꞌak, dekam esa Asa laibliblal.
³⁰ Angkam Ëe molye holokam eban mae kire hap de ola ziton gwibik, sap okamana ansa de irik gin zini dowal mo kigi angkam man hataꞌara. Zen Asa bejen irik tan.
³¹ Ëe in zep asa Bian mo abe hap kitak de dwam gwibir-blin san ang gwer. Zen dekam sa okamanak de zini Asa anakan tame dal, ‘Zen eiwa man zere mo Biansa ensa lwa gweblanda.’” In kim kirekam asa tawa tabiꞌinka, ki zep etan asa gubiridaka, “Haen. Nen gola an kon sek gwen.”