¹ Yaklana dan-ahan, dekam zep langna Galilea mo aha ena Kanak we-zi daresa oto nosoꞌak. Yesus mo anena man ze ang gwek.
² Dekam zep Yesussu hen nenblak– Zen de hen zere hon de ang ta gwen wenya asa goleang tan hap.
³ Anggur hona kim tap gwizimki, Yesussu ki zep an zem gubluk, “Anggur hona mes tap gwizimnira.”
⁴ Ki zep ding gulbirki, “Anyan, em bap kirekam Asa gublula. Sap Ëe dikim ere mo sosonsa goltreizimdin hip denak hom am zauꞌun.”
⁵ An zem ki zep gola iwe de babu gwen zisi gubiridak, “Ano tanena an de emsa ba mae hap gubiridanna, zen hendep kire enkam syal eibik.”
⁶ Gola iwe kasokam de drem yawal-yawala ki erlwaꞌak– enam enkam, seratus liter mo dena. Zen weyasa ze hamal da gwibik– tembane tankam dikim Yahudi mo auyan-aza mo epba ol san tahasa su tablanda gwen hap, hen piring-moksa de ze os-os ta ine gwen hap.
⁷ Yesus ki zep gubiridaka, “Drem-dremna ansa hokam beya labik.” Dekam zep hona tutu dak, hendep dremna in man esuwehe kinik.
⁸ Ki zep etan gubiridaka, “Men zen tagal gwenna awe nol gweꞌarake, emki zebe hap zeisirbli hanan.” Ki zep hendep nyeisirblihak.
⁹ Hwena dremnak de weyana in mes anggur ho hap ejowek. Tagal gwen hap de nol gwen zini in kim akasibirki, zen hom anakan tawa gwibiꞌinka, “An owas hap ki lwanan,” hwena babu gwen zini in, zen en mes sap tame nuk. Ki zep we gon hap de zini insa kwang taka,
¹⁰ ki zep gubluka, “Tembane yawalsa de syal gwibinnik, diki anakan syal nei gwibirin: Nonol te-ala mamkam de anggur ho dereksa de golzimdin. Hwena kim derek wenya insa sowe henkam otdebinni, dekam sap de lun kon totore anggur hona golzimdin. Hwena em an derek wenya ema lam gulu– lun kon de hwena kae gwibir-zimdin hip!”
¹¹ Zen zen Yesus mo nonol owas syal gwibin niye– kim langna Galilea mo ena Kanak nonola zere hap dena goltreizimki. Zen zewe zere mo ngatan zi mo lang nakore sosonna nonola goltreizimki. Zen dekam zep zere hon de ang ta gwen wenya nonol sap daibliblak.
¹² Kim hya gwesik, Yesus ki zep Kapernaum sun dep goletine gweka– an zem, oso wal zem, hen ee zere hon de ang ta gwen wenya ban. Zao mingguna san ha aha-en mes yap asa golelowe heka.
¹³ In kim Yahudi mo yakla yala Paskanak golek de gweꞌak, dekam zep Yesus Yerusalem san dep asa golezahe gweka.
¹⁴ Alap mo gol mwanak de teksonnak ki zep zini hlauludaꞌan haka– men zen sapi-dombana, hen mawana te-ala hap lirak da gwibikke– dekam de aha zi desa Alap hap tru tasik gweblan hap. Hen men zen Roma mo te-ala hap Yahudi mo te-alasa lirak da gwibik, zen hen zao teinikinꞌik. Meja-mejanak te-alasa naitblin daꞌak.
¹⁵ Ki zep dokot hak-haksa siri tasiki– dekam de sapi-dombana insa lek-lek tabin hip, dekam zep tingan golealsa sonebirki. Te-ala lirak ta gwibin meja-mejana man yal tazimki, hendep te-ala kasona man sekwak tabir-zimki.
¹⁶ In zen mawana lirak dabiꞌik, desa ki zep gubiridaka, “Mawa om ansa dekam kap ul inehak. Ano Bian mo gola ansa bahem pasar hap li yul sone gwen.”
¹⁷ Ëe zere hon de ang ta gwen wenya, ee dekam zebe enlala eibik– mensa Alap mo olak anakarekam ale nukye, “Ëe Alap mo golsae dawemkam anakan enna lwa gwibirin, ‘Bap zen zini kun gun.’ Zen in zep de jal hap sa Asa karek dal.”
¹⁸ Yahudi mo nol-nolik zep hwena nenblak, “Nara ebe hap golblaka? – dekam de Alap mo gola ansa wet gulsun hupye. Ki abe mae hap emki owassa syal gwibir-zimdin– ee akakim anakan emsa tawa eblak, ‘Alap eiwa mes kirekam de syal gwe-gwibin hip dena ebe hap golblaka.’”
¹⁹ Ki zep ding gulzimki, “Em gola ansa dri kulsuk, hwena Ëe asa dan-ahare yaklakam etan taul.”
²⁰ Ki zep ding nulblik, “Alap mo gola ansa kim dauk, tahunna 46 enkam man-am altilsik, hwena em ema gulu, ‘Dan-ahare yaklakam asa etan taul’!”
²¹ Hwena Yesus Alap mo gol tangansa de dri yulsun hup hom ki gubiridaka. Zen hwena zere mo tim hip denaka gulk sun ola blaonzimki.
²² Zep Yesus kim tin nikon ngaya gweka, ee dekam zebe zere mo ola insa enlala eibik. Dekam zebe hen Alap mo hamal hap de ol ale gun nuban Yesus mo ola ban laiblizimk.
²³ Yerusalemk kim yakla yawala Paskanak gwe gweꞌanka, zini beya nik daibliblak, sap zen man zeno owas syal gwibinsi hla nul gweꞌak.
²⁴ Hwena Yesus hom desa anakan taiblibiridaka, “Zen eiwa Asa daibliblaꞌan.” Sap Zen mes kitak tame tabirki.
²⁵ Zen zi mo enlalasa Zen hla ta gwizimki, zep Desa ba hap de anakan gublun hap, “Zini in karekna,” ahaksa, “Zen dawemna.”