¹ Em ba nakone wal bose wal oban edarak gwe-gwenan hen ekeisa-keisa gwe-gwenan? Zen ere mae mo hole-hle enlala nakonke. Sap eno mae mo enhonak man kirekam-kirekam kareksa de gon hap de enlalana eilman gwe-gwenan.
² Em dekon zebe aha zi mo bi gwibin kire-kiresa dwam ei gwibirin, hwena hom ep nol gwizimnin. Zebe enaka lail gibirida gwenan, hendep zebe edarak gwe-gwenan. Hendep dekon zebe enaka de tameran hap edwam gwe-gwenan. Hwena em mae habe ere mae mo dwam gwibin kire-kirena insa ulin srem gwe-gwenan: Sap em home Alapsa kire hap abe la gwenan.
³ Em sap ema abe la gwenan, hwena mae habe ulin srem gwe-gwenan: Sap em karek enlala nabane abe la gwenan. Ere mae mo hole-hle sane abe la gwenan, zep em bejen em ba maesa Alap onakon gul irin.
⁴ Zep em in men kiye– aha-ere we de zisi beyakam lop tanna. Zep em hen kirekam: Bejen em aha-ere Alapsa ang gweblan. Em san mese eeititi gwek? Auhu-kama naban de goldokot gwenna, dekam Alap mo jal zi hip em-am enwe-mase gwe-gwenan. Kire zini bejen etan Alap han zerdokot gwen.
⁵ Em san mese Alap mo ola ansa eititi eibik? “Zen mensa nebe mae hap angna zer gwizimnira, Zen desa anakan dwam gwe-gweblanda, ‘Zen ere en hap dena.’”
⁶ Hwena Alap mo kwasang-kwasangna man tangan taman kini gwenan– men kirekam zere mo olak lwakke, “Alap man bolte-bolte zini husus gwibirida gwenda. Enlala betek zini man kwasang gwibirida gwenda.”
⁷ Zen in zep, Alap ensa em betek gwe-gweblan. Dowal mo kigisa ja-ja la gwek. Zen dekam sa ebon mae onakon heya gwe-gwera.
⁸ Alapsa golek de lak. Zen dekam sa hen emsa golek de tabiri. Eno mae mo tahana men zen kareksa de gulin hana gwen hap ejok-jok gwek, emki ngan tasibin. Hen enhona men zen kil-kil gweka, emki lalak tan. Hen bap zen dan nen.
⁹ Dawem enkam emki ehalen– nwe go-ho naban hen enlala dowe hanan naban. Em home dawemkam ehaleꞌan. Zep eno mae mo bolamda hap de nga-ngola nwe go-ho hap emki li ta sone gwibin. Karek gon hap de isrip-srina desa enlala dowe hanan hap em wet tyasik gwibin– ekakim dawemkam Alap mo nwenak ehalek.
¹⁰ Alap en hon emki enlala betekkam lowehe gwen. Zen dekam sa altirin nikon emsa lup gul ine gwera.
¹¹ Aya-wal oso-wal, bahem enaka tonsubirida gwen. Men nara Kristen bose zemka tonsublunna, zen ki man kwasang hap de Bian mo titi tabin ola insa ngip guluda. Hen dekam man nwe-mase gwenan: Zen hen kwasang hap de ola insa anakan enlala bolte-bolte naban tonsubiꞌira, “Ahakon sap sa desan ang tal. Ëe molye.”
¹² Diki titi tabin olsa de golzimdin hip de Zini aha-en, hen neno mae mo karek-kareksa de hlaulzimdin hip Denaye. Zen Alap Ze-en. Zen diki zeno dena– zisi de anakan gublun hap dena, “Zini in karekna.” Zep em de zi bose omka anakan tonsublunna, “Zen karekna,” zen eno mae moka hom.
¹³ Emki ano ola ansa esane gwen: Biansa de eititi gweblankam bahem anakan ekalang gwe-gwen, “Namen ahaksa kaꞌan ee asa ena desan song gwer. Zewe holona aha-ere tahunkam asa gwer. Sap ba maesa de dekon lirak ta gwibinkim, te-alana mamkam asa gulin gwer.”
¹⁴ Hwena kaꞌan eno gwennak ba wehe lwaꞌak? Ena home tame guꞌura. Sap eno gwenna in ogom makan. Nabakam esa aya gwera.
¹⁵ Diki anakan de torankam emaka sam gwesiki, “Bian Alap mo dwam gwibin sin diki lwankam, ki asa ngaya gwer, hen kiresa asa ze syal gwibir.”
¹⁶ Hwena Alapsa de eititi gweblankam de kalang gwenna, dekam bolte-boltekame tonꞌara, hen enakae tep tasiꞌira. Kirekam zen karek.
¹⁷ Hen kirekam, em de ora dawemsa anakan tame tanna, “An diki zen, Alap mo dwam gwibin niye,” hwena em de aha ora san gwe hankam, dekam mese kareknak zannara.