¹ Alap mo dam tahanak, ki zebe buku lak gulsunnu hlauk. Bukuna in alekam mes eihya-san eihya-sankam sowehek, hen hulen nik lwaꞌak. Dokot buknu tuju enkam.
² Hwena ki zebe hla tak– Alap mo dam taha nakore jana nabare zi sosonna, ol mamkam kim taken gweꞌanka, “Nara en airis? – zen de tujukam de dokot buknu ansa hil ti sonebirzin hap, hen zen de bukuna ansa kwala-kla gun hupye.”
³ Hwena aha-en mae hom tangan nadakastik– zen de bukuna insa kwala-kla gun hup, hen zao de alena insa de baca gun hup– sap ngatan zi mo langnak de wenya, sap auhu-kamanak de wenya, hen juwen zi mo langnak de wenya.
⁴ Ëe dekam zebe yusyustin niban gona gweꞌak– mae hap, “Hare zini aha-en mae homke! – zen de bukuna insa kwala-kla gun hup, hen zewe de alesa baca gun hup denaye.”
⁵ Hwena in zen teipsin-teipsin wenya 24 enkam lowe heꞌak, zen zep ahanik asa gubluka, “Bahem gona gwen. Singana insa emki hla tan. Zen Yehuda mo auyan-aza nakorena, teipsin zini Daud Bak mo Auyan-tane. Zen mes zere mo jal zini holenak zaubirida ineka. Zen Zen sa tujukam de dokot topna insa hil ti sonebiri, hen bukuna insa Zen sa kwala-kla gulu.”
⁶ Hwena Domba Tanesa zebe hla tak, Alap mo komal tum golek denak zauꞌunka. Dan-ner dan-nerkam de otweran makare zini in ze ngirin daꞌak, hen tingare 24kam de teipsin-teipsin wenya in. Domba tanena in hla tankam san de Alap hap de zip soblanna. Zen wei-wei naban ze zauꞌunka. Zeno nola kore hli-hlina tuju enkam. Nwena hen tuju enkam. Tujukam de nwena insa de dam tasibinni, Alap mo Enho mo tujukam de nwe-mase– mensa Alap tingare okamasa de amjan gwibin hip dam tasibirkike.
⁷ Hendep ki zep Domba Tanena in song gwe zaka, ki zep hendep bukuna insa Alap zere mo dam tahanak gul inki.
⁸ Domba tanena in kim gul inꞌinka, dekam zep dan-ner dan-nerkam de otweranna in, hen 24kam de teipsin-teipsin wenya in boklena kom da gweblaꞌanzak. Zen kitak gitar makare naka deirensiꞌik, hen emaskam de pancisa deirensik. Emaskam de pancina in, zen men zao Alap hap irase dawem nabare te kili ang nulsuk gweblananke. Irase dawem nabare te kili in mo dam gulsunnu, Alap mo irik ginnik de biti gwen wenyik mo ol gu sone gweblan.
⁹ Zen dekam zep ter esena daꞌak: “Em airis– bukuna ansa de gon hap, hen dokot topna insa de hil ti sonebin hip. Sap Emsa mes dak, hen eno kalkam ema zini ngan tasibirki– desa de Alap onak dep kap gulhan hap, sap tingare zi ausu nakore zi, sap tingare men-kore men-kore ol ton gwibin zi, hen tingare irik gin lang nakore zi, hen kirekam-kirekam sop zi ausu.
¹⁰ Em mese desa tingan Alap mo irik ginnik dep golebiti gweka. Hendep zen sa loweher– san de Alap mo golak de syal ta gwen zini kiye. Zen hen sa tingare okamana irik nil gwer.”
¹¹ Ki zebe etan dekon kara gwek, hen Alap mo dam taha nakore zi beyam-bya mo olsae sak. Zeno mae mo beyana banakan dep? – aitbinni, hendep ratusan jutanak man yap tamank. Zen man Alap mo komal tumna insa wale nososuk– hendep dan-ner dan-nerkam de otweranna hen teipsin-teipsin wenya in han.
¹² Zen terya ol mamkam daꞌak: “Domba Tanena men desa Alap hap zip nosoblakke, Zen airis– tingare langsa de bi gwibin hipye. Dikire tingare sosonna hen enlala blala Zebon lwa gwek. Dikire kitak betek ne gweblak hen boklena kom da gweblak. Dikire kitak zeno bosena teip nulsuk gweblak hen boltere nul gweblak.”
¹³ Ki zebe etan salbiridak– tingare zini hen tingare otweranna– sap nglinak dena, okamanak dena, hi mwanak dena, hen juwen zi mo langnak dena, hendep kitak tangan. Zen terya anakan daꞌak: “Teipsin Tangan Zini Alap hen Domba Tane zem in han dikire tingan zeno nik mo bosena boltere noso gwizimk, hen blikip neisik gwizimk. Dikire tingan teip nososuk gwek, hen dikire tingare sosonna Zebon nebon hendep denaban lwa gwek!”
¹⁴ Dan-ner dan-nerkam de otweran nwe-mase makare zini in ki zep ding nulzimk, “In eiwa!” 24kam de teipsin-teipsin wenya in dekam zep boklena kom dak, hen Eirzi-Bia mo bosena teip nulsuzimꞌik.