¹ Ki zebe etan Alap mo dam taha nakore zini ahana hla ta guk– ngatan zi mo lang nakon de ati gwe zannak. Tahakam juwen zi mo bwi kawesinnik dep de kunci naban besikam de dokot hak dohon-hon naban ein haꞌan zaka.
² Zen zep jalom yala insa balk taka– orep de wanya yala in saye, mensa nen gweblanan “dowal mo kigi”kam ahaksa, “Zi Golliwe Bak”kam. Desa zep besikam de dokot hakna inkam tahaleka. Zen tahalen nik sa gwe gwera– holona seribu tahun enkam.
³ Ki zep hendep juwen zi mo kama hulak de bwi kawesinnik dep tak ta ineka. Zena dekam zep lilikinni insa kuncina inkam solhlasik inki. Mae hap kirekam gweblaka: Zen de etan zi aususa yasik ta gwibin srem hap, seribu tahunna in de tap gwesin sremnak. Hwena zeno hyanak, dekam sa etan hil di soner, hwena dekam molya etan okamanak holo gweka.
⁴ Ki zebe hwena teipsin-teipsin zi mo teinikin gwen komal tumna hla tandak. Hen zini men zen ze teinikinꞌik, zen men desa Yesussu de ang gweblan jal hap hen Alap mo ol jal hap damera gwekke. Zep zen hom otweran dowala in hap boklena kom da gweblak, hen otweran dowala in mo yang tasin dowala in hap hom kom da gweblak. Zen hen man baes tak– zebe hap de nomorsa de mirenak ahaksa tahanak makan gunnu. Kire jal hap zep hendep ahakon nola blom dasibir-zimk. Hwena zen zep etan de engaya gwenkam teipsinkim teinikink, sap Alap man zebe mae hap golzimki– zen de seribu tahunna inkam Kristus mae han apdenak irik gin hip.
⁵ Zen zen sa enonol gwer– tin nikon de engaya gwenkamye. Hwena ahakore juwen wenya, zen seribu tahunna in mo hyanak sa engaya gwer.
⁶ Zini in zen de nonol engaya gweꞌak, zen heꞌho gwibin tangan naka sa hla nul gwer, hendep zep sa Alap mo dang gwen nakon egwe gwer. Alap de aumwa hap zisi klis gunkum zen molya noltowek– mensa nen gwibirin, “Hendep de tin hip dena.” Hwena zen Alap ne Kristus nebon sa lowehe gwer– Alap mo golak de syal ta gwen zi mo kim. Zen Kristus mae han sa apdenak irik nil gwer– holona seribu tahun enkam.
⁷ Seribu tahunna in kim de tamanꞌak, etan dekam sa dowal mo kigina insa bwi nakon hil di soner.
⁸ Zen dekam sa etan tingare lang san tingare zi ausuna yasik tabir song gwera– sap yakla hata sezan san dena, nikin anen san dena, hendep eihya-lip eihya-lip san dena. Zi ausuna insa man Alap mo hamal hap de olak ol gulk sun de blaorankam bose nuk “Gog ne Magog ne.” Zen desa sa eijan hap tagal gulsulu, hen zeno mae mo beyana san de hinak de hisglimni kiye. Aitbinkim bejen sul sonen.
⁹ Jana zini in sa tingare lang nakon sek gwe song gwezal– Alap mo irik gin wenyik mo e yalsa de hatablazan hap, Alap mo dang tini tan e yawala insa. Hwena syauknu dekam sa ngli nakon ati gwe zala– zao de ehwei-swis gwen hap.
¹⁰ Hwena dowal mo kigi, in zen yasik ta gwibirki, desa sa Alap mo dam taha nakore wenyik serkam de syauk bla hi-hitin sal-salak hiri daser– men zao nonol dowal darena insa hiri noso sekke. Zen zao sa hendep denaban serkam de sang-sang karek tangannak nolelowehe gwer.
¹¹ Zen kim hya gwesik, dekam zebe Teipsin Tangan Zini Alap mo komal tumna akek. Zen yawal tanganna hen serkam de ngap-ngap tanganna. Zena zewe nikinꞌinka. Ngli naban okama naban hendep dekam zep jek-jak nek– san de but de yakla sal-sal hap jek-jak gwen makan.
¹² Ki zebe hwena juwenkam men zen teingir gwe guk desa hlauludak– sap bose nabare wenya hen bose srem wenya. Zen Alap mo dang gwen nakon ezauꞌuk. Alap mo dam taha nakore zini dekam zep bukuna kwala-kla dabik– men zewe zi mo auhu-kamanak de syal gwibinni ale nul gwekke. Aha bukuna hen man kwala nosok, zen hendep de engaya gwen hap de wenyik mo bosemse nabare bukusa. Alap ki zep klis guꞌunka. Men kire enkam zere mae mo syal gwibinni bukunak iwe lwak, kire enkam zep klis gulku.
¹³ Hi yala dekam zep hen, men zen zewe ekei-king gwek, desa etan tapblap-bla guk. Juwen zi mo langna dekam zep hen zewe de lam tabin zini tapblap-bla guk. Desa hen Alap man klis gulku– men kirekam zere mae mo syal gwibinni hen bukunak iwe lwakke.
¹⁴ Juwen zi mo langna dekam zep serkam de syauk bla hi-hitin sal-salak hiri da inek, sap zao molya etan zini biti gwek. Syauk blana in, desa hen man nen gweblanan, “Hendep de tin hip dena.”
¹⁵ Zini men zeno mae mo bosem-sesa ale dabir-zim srem gwek hendep de engaya gwen hap de wenyik mo bosemse nabare bukunak, desa hen man syauk blana iwe yal nulsek.