¹ Yesus ki zep asa gubluka, “Ola ansa emki ale gul sonen: Efesusk de jematsa de kara gul gwen hap de Alap mo dam taha nakore zi hip, Yesus onakon: Ëe an tujukam de keis nibare Zi. Dam tahakame teirensik gweꞌan. Hen Ëe an tujukam de lampu emas nabare Zi.
² Ëe eno mae mo syal gwibinni kitak tawana. Em abe hap de syala dohon-hon tangan nakae ol gwek, hen dawemkame tatem ezauk gwek. Hen Ëe tawana: Em karek gol gwen zi niban home olesiri gwe-gwek. Hen men zen zenaka nenbirida gwek, ‘Ëe an Yesus mo zer sonen zi,’ hwena em mese sap desa akasibirida gwek, hendep dekam zebe ahakorena anakan tame la gwibik, ‘An nesa de yasik tabin hip de zi.’
³ Emsa mes ano bose hap karek da gwibik, hwena em ema eenlala gwe-gwek, ‘Sap sa ki asa zebe hap de jal hap neibirida gwer, hwena ee molye kim baes eblak.’
⁴ Sap eiwa, kirekame lowehe gwek, hwena angkam em a dekone mo esyalhe kiniꞌan: Orep eno mae mo kwasang-kwasangna mamna. Hwena angkam mes betek gwer.
⁵ In zep em ere mae mo karek-karek nakon ehalen. Sap em mese ere mae mo nonol lowehen dawem nakon elanga gwesil. Men kirekame nonol lowehe gwek, kirekam em etan lowehen. Dekon de ehalen sremkam, ki dekam asa eno mae mo jemat hap de lampuna insa gulsul. Dekam kawesinnik esa etan lowehe gwer.
⁶ Hwena aha-en ki dawemna ebon mae onak lwaꞌan: Men kirekam Nikolaus Bak yasik tabin hip de zini gweka, kirekam de lowe henna em ema hwa kulsuk gwenan– Aena men kirekame hen hwaulsuk gwenanke.
⁷ Em dwan i nibanke! Zep mensa Alap mo Enhona ebe mae hap ayang gulzimꞌira, zen desa em esal gwen. Men zen de tatem ezauꞌuk, Ëe asa zebe mae hap golzim– dekam de hendep de gwen hap de tetan dansa twinbin hip, Alap mo nganak denaka.”
⁸ Yesus ki zep asa gubluka, “Ola ansa emki ale gul sonen: Smirnak de jematsa de kara gul gwen hap de Alap mo dam taha nakore zi hip, Yesus onakon: Ëe an nonol lonesen nakore Zi, hen aumwa topnak de Zi. Ëe mese sap tik, hwena ama etan ngaya gwek.
⁹ Ëe tawana: Em tahalha zi, hen kareksa de goltowe gwen zi. Hwena eiwa dena, eno mae mo ngatan zi mo langnak de kire-kirena beya tanganna. Ëe tawana: Yahudi zini man emsa lamang da gwibirin. Zen sap man zenaka nenbirida gwenan, ‘Ëe an Alap mo hlil irin wenya,’ hwena zen mes angkam dowal mo kigi onak biti gwek.
¹⁰ Bahem eairin. Ëe ama emsa gubiridaꞌan: Emsa sa ahakon dowal mo kigina bwinak yal gul nera– emsa dikim akasibiridan hap. Yaklana dare taha-tap enkam esa jalom ek tihinak karekkam loweher. Hwena tatem em anakare enlala naban ezaun, ‘Sap sa asa dameral.’ Ki dekam asa ebe mae hap hendep dikim lowehe gwen hap de mire sigina lop tazim.
¹¹ Em dwan i nibanke! Zep mensa Alap mo Enhona ebe mae hap ayang gulzimꞌira, zen desa em esal gwen. Tatem men zen de ezauꞌuk, zen molya noltowek– mensa nen gwibirin, ‘Hendep de tin hip dena.’”
¹² Yesus ki zep asa gubluka, “Ola ansa emki ale gul sonen: Pergamusk de jematsa de kara gul gwen hap de Alap mo dam taha nakore zi hip, Yesus onakon: Ëe an mahal ben-ben nabare Zi– nebok eihya-ngi eihya-ngi ben-ben makan.
¹³ Ëe tawana: Em in dowal mo kigi mo enake lowehe gwenan– men zao teipsinkim irik gil gwendake. Sap eiwa kirekam, hwena karek yala in kim ebon mae onak hatak, em namae dawemkam ano bosena urensik gwek. Em dekam home Asa de taibliblanna baes tak. Hen in kim sap Antipas Baksa eno mae mo ngirinnik abe hap de jal hap dak, em dekam home Asa anakan azabeblak, ‘Ëe Zebon de ang ta gwen zisi hom.’ Hwena em hen Antipas Bak mo kime Abon onak tatem ezauk gwek.
¹⁴ Hwena ano husus gwibinni hen ki— ebon mae onakye. Sap ahakon hen ema Bileyam Bak Swe mo tawa tabin sin ang ta gwenan. Sap zen orep tangan Balak Baksa tawa taka, ‘A kirekam em Israel Bak mo ausu nakore zi hip zol makan eiyas ta guzimdin,’ hendep dekam zep ze ekyan hezak. Zen dekon zep yang tabin boton alap hap de tembanenak ang ta gwek, hen kahalo-kahalo san ang ta gwek.
¹⁵ Hen ebon mae onakon zini ahakon kirekam hen Nikolaus Bak mo yasik tabinni nurensik gwenan.
¹⁶ Zen in zep, em ehalen. Sap em de ehalen sremkam, ki Ëe asa emsa, hendep in zen emsa yasik da gwibirin, deban mae goleeijazal– ere mo nebok makare mahal ben-benkam.
¹⁷ Em dwan i nibanke! Zep mensa Alap mo Enhona ebe mae hap ayang gulzimꞌira, zen desa em esal gwen. Men zen de tatem ezauꞌuk, Ëe asa zebe mae hap golzim– dekam de orep de tembane aning gunsu twen gweblan hap, mensa orep Israel mo ausu nakore zi hip Alap gol gwizimkike, zen kim nama sasa lang san sek gwe song gweꞌakke. Hen zebe mae hap Ëe asa kaso ngap-ngapsa kae gweblazim. Ëe asa etan desa aha bosekam bosemse tabir, hen ese bosesa asa kasona iwe ale tabir-zim. Bosem-sena in aha molya tame nuk, hwena men zen en de deirensiꞌik, zena enna sa anakan tame nul gwer, ‘Yesus kirekam asa bose taka.’”
¹⁸ Yesus ki zep asa gubluka, “Ola ansa emki ale gul sonen: Tiatirak de jematsa de kara gul gwen hap de Alap mo dam taha nakore zi hip, Alap mo Tanena, Abon onakon: Ëe an men zeno nwe nik syauk mo kim nihitil gweblananke, hen men zeno tana nik tembaga ese ang gun makan nalilingtil gweblananke.
¹⁹ Kitak em insa syal ei gwibirin, Ëe tawana. Ëe tawana: Em ema enaka kwasang eibirida gwenan. Em Asa de taibliblan nabane lowehe gwenan, hen abe hap de syala ema dawemkam ol gwenan, hen tateme ezauk gwenan. Ëe tawana eno mae mo syala angkam man nonol syala kon esek gwe seꞌan.
²⁰ Hwena ebon mae onak an zen en husus gwe-gweꞌan: Em ba habe wenya insa, Izebel Baksa, kara ul gwenan? In zen botonkam anakan gubirida gwenan, ‘Ëe an Alap mo olsa de ebe mae hap ayang gul gwizimdin hip de we.’ Hwena zeno kirekam de yasik tabinni in kon zep Abon de ang ta gwen wenya beya nik zebon osan ang ta gwek– ekahalo gwe-gwenkam, hen yang tabin alap hap de tembanesa de twen gweblankamye.
²¹ Ëe mese sap Izebel Baksa de karek gun hup de yaklana esek gul gwek– dekam de zere mo swi soson nakon halen hap. Hwena zen man halen hap baes gwe-gwek.
²² Tumna men zewe karekna gol gwenan, Ëe asa zewe etan hiri gulser– zao de sang-sang kareksa gollwa gwen hap. Hen men zen kahalo nei gwibik, kirekam asa gweibiridal. Zen hen karekna mam naka sa noltower– zen de karekna in kon ehalen sremkamye.
²³ Hen zebon de ang ta gwen wenya ahakon asa juwen tabir– dekam deka tingare jemat-jemat Asa tame dak, ‘Eiwa, Zen zi mo enlalana hen enho naban man tame ta gwizimnira.’ Zep Ëe asa ere mae mo karek gon jam enkam emsa karek ta gwibir.
²⁴ Hwena Tiatirak de wenya, em ahakon home yasik tabin hip de wenya in mo tawa tabin sin ang tak. Mensa zebon de ang ta gwen wenya nen gwibirin, ‘Dowal mo kigi mo enlala aning tanna’, desa de tawa gweblan hap em ahakon home ang tak. Em ema zi enlala karek-karekna insa nol sang-sang eibirida gwenan, zep ee home ebe mae hap aha syala wei yul sonezimꞌin.
²⁵ Hwena em in kirekame angkam Asa laibli gweblaꞌan, kire ennak tatem ezauk gwek– hendep ano lwahal zannak de zauꞌuk. Bahem Asa de taibliblanna insa baes gwibin.
²⁶ Men zen de ano dwam gwibin en san lowehe gweꞌak, hen tatem ezauꞌuk, hendep aumwa hap denak de hataꞌak, zebe mae hap Ëe asa ere mo sosonsa golzim– dekam de tingare zi aususa irik gin hip denaka.
²⁷ Emki eenlala gwen– men kirekam Mazmuruk Daud Bak abe hap dena ale gulkuke, abe hap de Bian sosonsa golblan hap dena. Zen anakarekam ale gulku, ‘Em esa tatete tangankam irik gili. Zini men zen de esoson gweꞌak, desa esa timbwas tabiri– men kiye, besi tekkam de botolsa lwa tabinni.’ Hwena sosonna in desa asa hen ebe mae hap golzim– men zen de tatem ezauꞌukye.
²⁸ Ëe hen asa hleng gwen hap de keisni ebe mae hap zerzim.
²⁹ Em dwan i nibanke! Zep mensa Alap mo Enhona ebe mae hap ayang gulzimꞌira, zen desa em esal gwen.”