¹ Zen kim hya gwesik, ki zebe hwena ngatan zi mo lang nakore zi beyam-bya de ol mamkam etakeran ola anakan sak, “Haleluya! Nere mae mo Alapsa nen boltere tan, sap engaya gwen hap dena hen sosonna kitak Zebon onak. Zen en teipsinni.
² Sap zeno zisi de klis gunnu dam-dam en tangankam. Bejen mae tautek gun. Zen mes e yala Babelsa hep tyaka, sap zewe de zini tingare zisi yang tasin alap-alapsa dikim ang gwibirida gwen hap yasik da gwibik. Zep zini Alap mo nwenak kahalo soson we wal mo kim enwe-mase gwe-gwek. Zen hen Alap hon de syal ta gwen zisi damera gwek. Zen in zep Alap zeno mae mo kala zebe mae hap ngero gulzimnira.”
³ Etan ki zep mamkam egu anek, “Haleluya! Alapsa nen boltere tan, sap syauknu men zep ena in hwei-swis gweꞌara, zeno butna sa hendep denaban sewese gwer.”
⁴ Alap mo alpnak de 24kam de teipsin-teipsin wenya hen dan-ner dan-nerkam de otweran makare zini in, zen dekam zep eik gwe hezak– Alap hap de anakan dawemsa golblan hap, “In eiwa tangan. Haleluya!”
⁵ Ki zep Alap mo komal tum alpna in kon ola wet sok, “Tingare Alapsa de betek gweblan wenya, nen boltere tan– tingan men zene Alapsa blikip eisik gweblananke, sap mam-mam wenya hen bete-tek wenya.”
⁶ Dekam zebe hwena ola sak– san de serkam de zi tra de etaken gwenna. Ol aukuna in san de hi de mamkam ngep gwenna, ahaksa san de ngli de mamkam tadre song gwenna kiye. Zen man etaken gweꞌak, “Haleluya! Alapsa nen boltere tan, sap neno mae mo Bian Alap Soson Zini Zen angkam kitak nesa irik giꞌira!
⁷ Nen terya ban isrip-sri gweblan. Nen boltere tan, sap Zen en teipsinni. Sap Alap mo Domba Tane hap de we oto gulblun yaklanak mes zaunun, hen we golgublun zem in mes zewe dep zenaka weir gulsunun.
⁸ Alap mes we zem in hap deyol dawemna serkam de ngap-ngap angtan-angtan naka teisyabirki– dekam de zenaka weir gulsun hupye.” Gulk sun de ola awe, Domba Tane mo wenya, zen tingare Alapsa de betek gweblan zi. Hen deyol dawem zem, zeno enlalana, dawemna mensa Alapsa de betek gweblan zini syal nei gwibirinke.
⁹ Ki zep Alap mo dam taha nakore zini men etan asa gubluka, “Ansa ale gul: Zini men desa Alap dam tasibirki, zen de Domba Tane hap de we oto gulblun tembane yawalak ang tan hap, zen heꞌho gwibin tangan naka sa hla nul.” Dekam zep etan abe hap ola mas gulbluka, “Ola an eiwa de tanganna, Alap zere onakorena.”
¹⁰ Ëe ki zebe Alap mo dam taha nakore zini in mo nwenak ik gwe hezak– dekam de desa boltere tan hap. Hwena ki zep asa gubluka, “Asa bahem boltere tan. Alap ensa em boltere tan. Sap ee hen Zebon de babu gwen zi, eban apdenak. Hen aya-wal oso-wal om men zen Yesus hup de ol dawemna nolluwe gwenan, deban mae hen apdenak. Sap tingan men zen Yesus hup de ol dawemna nolluwe gwenan, zen kitak Alap mo Enho naban.”
¹¹ Ki zebe hwena kara gwek– ngatan zi mo langna mes dalusunun. Zao zebe kuda ngap-ngapna hla tak. Men zen kuda tahannak nikin aneꞌanka, bosena “eiwakam hen tatetekam de Alap hap denaka golluwe gwen hap de Zi.” Zen mae hap ki kirekam bose dak: Sap zeno zisi de klis gunnu hen goleijanna dam-dam enkam– Alap mo dwam gwibin en san.
¹² Zeno nwena syauk hi-hitinni kiye. Hen nolak de mire sigina beyam-byana. Hen mirenak alena man. Zen zere mo aha bose, hwena bosena in aha zi bejen tame gun. Zen diki Ze-en tame guꞌura.
¹³ Baju blal zem, kal bles-bles nabare naka ala soka. Zini in mo aha bosena “Alap mo ola bare Zini.”
¹⁴ Ngatan zi mo langnak de jana nabare wenya man ang ne sebla halzak. Zen hen kuda ngap-ngapnak teinikin halzak. Zeno mae mo pakeanna hen ngap-ngap tanganna.
¹⁵ Zeno mahala nebok ben-ben makare nik te so gweblaꞌanka. Zen dekam sa tingare zi ausuna karek tabiri. Zen Zen sa tingare zi aususa tatete tangankam irik gili. Hwena men zen Teipsin Zini Alap mo jalak lowehe gwenan, desa sa timbwas tabiri– men kiye, anggur dansa de tanakam de zaublun dankam na tanna.
¹⁶ Zeno bajunak, ik dan jam en, a kirekam mo ze zere mo aha bosena ale nuk, “Teipsin Zini Bian, tingare teipsin zi mo Teipsinni.”
¹⁷ Hwena ki zebe Alap mo dam taha nakore zini ahana hla tak– yakla nwe tahannak de zauk anennak. Ol mamkam zep kon takenka, “Tingare mawana em in zen gulk sun eihe nasenꞌanke, haen! Em tagam gwezan– tembane yawala ansa Alap ebe mae hap tehazimꞌirake, zewe de ang tan hap!
¹⁸ Tingare mawana, haen! Teipsin-teipsin wenyik mo tok-tok naka eka olgwenblandak– hen jana nabare zi mo tok-tok naka, sap mam-mam wenya hen bete-tek wenya, hen sap kuda tahan nakon de eeija gwen wenya, hendep kuda tok-tok zeban. Haen, tingare lang nakore zi tok-toksa eka olgwenblandak– sap zi mo tana iltikinnik de teinikirin zi mo tokna, sap zisi de bi gwibiridan zi mo tokna, sap bose nabare zi mo, sap bose srem zi mo tok-tok naka.”
¹⁹ Ki zebe hwena etan otweran dowal yala insa hla tak. Auhu-kamanak de teipsin-teipsin wenya mes desa eijannak de mas gweblan hap tagam neisiblik– hendep zere mae mo jana nabare zi niban. Zen dekam zep kuda ngap-ngap tahannak de nikirin Teipsin Zini in han nereijak.
²⁰ Zen zep hwena zere mo jana nabare zi niban otweran dowal darena insa zibalk soka. Nonol hi mwa nakore otweran dowal yala insa zibalk taka. Etan domba mo nola kore hli nabare dowala insa zibalk taka– men zen boton gwekake, “Ëe an Alap mo olsa de ayang gul gwen hap de zi.” Zen in men zen owas-owasna syal gwe-gwibirkike– otweran dowala in osan dep dikim yasik ta gwibin hip. Men zen ang ne gweblak, zen men zen otweran dowala in mo bose hap de nomora timnik makan dabiridak, hen men zen otweran dowala in mo nwe-masekam de yang tasin dowala insa boklena kom da gweblakke. Hendep dowal darena insa ki zep ngaya naka serkam de syauk bla hi-hitin sal-salak hiri nososek.
²¹ Kuda tahannak de nikirin Zini in dekam zep zeno nik mo jana nabare zini zere mo nebok ben-ben makare mahalkam tamerasiki. Mawana dekam zep zeno mae mo tok-tokna dwenblan dazak, hendep man tangan serkam eitri gwek.