¹ Kime ze nama kara gweꞌak, ki zebe hwena Domba Tanena hla tak. Zen Yerusalemk de kwatapna Sionk zauk aneꞌanka, hen zi beyam-byana 144 ribu enkam ze golezauꞌunka. Zeno mae mo mirenak mes Eirzi-Bia yawal mo bosena ale dabir-zimk.
² Ki zebe hwena ngli san aukuna salsek– san de ho li yawal mo aukuna kiye, ahaksa san de ngli de mamkam tadren aukuna kiye. Hen san de zi beyam-bya mo jublandan gitar aukuna kiye.
³ Zi trana in Teipsin Zini Alap mo nwenak ter esesa daꞌak. Dan-ner dan-nerkam de otweranna hen 24kam de teipsin-teipsin zini in hen man esane gweꞌak. Zeno mae mo terya in aha zi hom tawa neblak hen bejen tan. Diki 144 ribukam de zini mensa auhu-kama nakon Domba Tanena in ngan tasibirkike, zen en tawa neblak, hen zen en de ta gwen hap dena.
⁴ Zi trana in, zen lalak enna, sap zen hom boton alap-alapsa ang neibirida gwek hen hom ekahalo gwe-gwek. Zep zen Alap mo nwenak san de zi nungglina kiye. Zeno mae mo mip nakon boton ola hom tangan wet sok. Zen enho kles gwesin sremna. Insa kirekam elalak gwek, in zep Eirzi-Bia yawal hon zeno mae mo bosem-sena serkam edawem gwek– tingare ahakore wenya konye. Zen zep Domba Tanena insa ang ne gweblanan– men desan ki te gwendaye. Sap zen zen– zere mo kalkam de ngan tasibin wenyaye.
⁵ (14:4)
⁶ Ki zebe hwena etan ahana Alap mo dam taha nakore zini hla tak. Zen man gulk tangan san ihe nasenꞌan haka. Zen Alap onakore ol dawemsa gol haꞌan zaka, hen ol dawemna in hendep denaban sa lwa gwer. Ola in tingare okamanak de zi ausu hap dena– sap tingare sop nwe-mase zi ausu, hen tingare kirekam-kirekam ol ton gwibin zi, hen sap tingare irik gin langnak de zi hip dena.
⁷ Zen ol mamkam gu ane gweꞌanka, “Alapsa em airiblan, hen zeno bose ensa em teip gulsuk gweblan, sap angkam mes zaununm– Zen dikim zisi klis gun hup denakye. Boklena kom la gweblak– men Zen nglina, kamana, hina, hen ho nwena kitak yang tabirkiye.”
⁸ Etan ki zep hwena ahanik Alap mo dam taha nakore zini zertro kinzika. Zen man anakan isrip-sri gwe ine nasen gweꞌanka, “Ë yala Babel mes timbwas gwera! Mes timbwas gwera– men zen tingare zi aususa kahalo soson enkam dikim lowehe gwen hap mamak ta gwibirkike, san de ho mamaksa de otdebinni kiye. Zen zep Alap e yala insa kareknak drenera.”
⁹ Etan ahanik zertro kinzika, ki zep ol mamkam gu ane zaka, “Zini men zen de otweran dowal yala insa blikip neisibliꞌak, hen zeno nwe-masekam de yang tasin dowala insa, desa hen sa Alap kirekam de kareknak kang gulu. Hen kirekam, men zen dowal yala in hap de nomorsa zere mae mo mirenak ahaksa tahanak ale dabiꞌik, desa hen sa kirekam de kareknak kang gulu. Zen kitak sa Alap onakore hep nabare zitan hona notdebir, hendep Alap mo jalak sa lowehe gwer– serkam de syauk bla sal-salak. Zao sa Domba Tanena in Alap mo dam taha nakore zi niban zikara ta gwibiri.
¹⁰ (14:9)
¹¹ Syauknu in zen de karek ta gwibiꞌik, zeno butna hendep denaban sa sewese gwer. Ni tanna banakan dep, sap zen kam denaban gweram denaban zausun sremkam sa Alap mo jalak lowehe tine gwer. Sap zen otweran dowal yala hen zeno nwe-masekam de yang tasin dowala in han blikip neisik gwizimk, hen zebe hap de nomorsa zere mae hon ma-makan dabik.”
¹² Zen in zep, Alap mo irik ginnik de biti gwen wenya, em tatem ezauk. Alap mo ol san de ang ta gwennak hen Yesussu de taibliblannak, zewe en em tatem ezaun.
¹³ Ki zebe hwena ngatan zi mo lang nakore ola etan salsek– ahanik kim anakan gu aneka, “Ansa emki ale gun: Angkam man kon gwesik hanaꞌan, hen hendep kirekam sa lwa zahe gwer. Tingan men zen Bian Yesus onak de tatem ezaunnuk juwe gweꞌak, zen heꞌho gwibinnik sa lowehe gwer.” Ki zep hwena Alap mo Enhona ding gulbluka, “In eiwa! Zen sa zere mae mo syal dohon-honna nolzausul. Zen hwena heꞌho gwibinnik sa lowehe gwer, sap zeno mae mo syala kore eini awe sa mamkam nulin gwer.”
¹⁴ Ki zebe etan hlauk– but ngap-ngapna kim wet so kinzik. But tahanna iwe zen nikin aneꞌanka– san de Zi Tanganna kiye. Nolak emaskam de mire sigisa ala gulku. Tahakam nebok gwa ben-bensa gwirenka.
¹⁵ Ki zep hwena ahanik Alap mo dam taha nakore zini ngatan zi mo langnak de Alap mo gola kon te so zaka, ki zep but tahannak de Zini insa takenblaka, “Nebokna inkam emki okamanak de gandum dansa taran, sap mes bil gwera hen taran hap denak mes zaul.”
¹⁶ Ki zep butnak de Zini nebokna inkam okamanak de eini tanka.
¹⁷ Ki zep hwena ahanik Alap mo dam taha nakore zini te sokin zika– ngatan zi mo langnak de Alap mo gola kon. Zen hen nebok gwa ben-bensa gwirensiꞌinka.
¹⁸ Ki zep hwena etan ahanik Alap mo gol homannak de kals alp nakon te sokin zika– men zen kalsnak de syauk blana kara ta gwendake. Zen ki zep ol mamkam nebok gwiredan zini insa takenblaka, “Okamanak de angguru mes bil gwera. Emki taran.”
¹⁹ Dekam zep nebokna inkam okamanak de anggur danna tim nikon blom tan daka, ki zep kaso hul gunnuk yal ta seka– zao de tanakam de zaublun dankam na tan hap. Alap orep mes kaso hul gunnu insa hamal gulku– men zen zere mo jalak lowe heꞌakke, desa de ze karek tabin hip.
²⁰ Anggur danna in e yala in mo alpnak tanakam de zaublun dankam na dak, dekam zep kon zi kala ho mo kim tinek– langana 300 kilometer enkam. Olk san dep de akabinkim, tatekna dua meterak man golek de gwek.