¹ Ere mo tawa ta gwibin zini em enlala sobirida gwen– zen deka pemerinta mo mam-mam naka blikip neisibirida gwek, hen zen deka zeno mae mo olsa i-san i-san nei gwibik. Zen diki hohle gwen nik zen lowehe gwen– mam zi nik de banakare syal dawem hap gubiridannak depye.
² Zen bap zen aha zisi lamang ta gwibin. Hen bap zen aha zi niban edarak gwe-gwen. Zen diki sae-sae enkam zen lowehe gwen– tingare zisi de blikip gwesibirida gwenkam.
³ Sap orep nena hen enlala joblo-topna, hen Alap mo dwam gwibin sin home ang ta gwek. Hwena totore tawa tabin sine ang ta gwek. Nesa hen mes kirekam-kirekam dwam-dwam enlala en hulek. Nebon mae dekam enlala jal-jal en lwa gweka, hen nenaka de husus gwibiridan enlala en. Nen dekam zebe aha zi niban hwe-hwekam nenaka husus eibirida gwek.
⁴ Hwena nesa de ngaya tabin hip de Zini Alap dekam zep nebe mae hap golzimki– dekam de zere mo enlala kae-kaesa hen kwasang-kwasangsa tame gun hup denaye, Tane zemka in kim zer sonekake. Nen sap home ba dawem maena syal eibik– dekam de nesa ngaya tabin hipye. Hwena zere mo kwasang-kwasang en nakon ki nesa ngaya tabirki. Dekam zep nesa karek-karek nakon ngan tasibirki. Nen de desa sowe henkam nere mae mo lowe hennak eisbin hip, Zen zep zere mo Enhona dawem en tangankam nebe mae hap hle ta sonezimki. Zen Dekon zebe etan de jaha gwibiridan hap dena eis gwibirin. Hendep dekam zebe aha zi makan eliwehe gwenan. Zep eiwa Alap mamkam nesa kwasang gwibiridaka, zep kitak nesa de ngaya tabin hip de Zini Yesus onakon kirekam syal gwibirki– nen dikim zere mo nwenak edakastin hip dena insaye. Zen in zep esa hendep de lowehe gwen hap dena hla kul– men kirekame Alapsa enlala zon tasiblin naban blol eblaꞌanke. Sap nen an zeno hanan tabin walas.
⁵ (3:4)
⁶ (3:4)
⁷ (3:4)
⁸ Insa Alap mo kwasang hap dena ale gul, zen eiwa tanganna. Ëe zebe dwam gweꞌan– em de dekam kitak dawem enkam tawa ta gwibin hip. Dekam Alapsa de taibliblan wenya enlala zon tasik gweblan naban sa dawem ensa de syal gwe-gwibin hip ealp gwe tine gwer. Kirekam de lwankam, tingare zini anakan sa eenlala gwe-gwer, “In airis,” hen zen dekam sa zeno mae mo lowehen dawemna in san ang tal.
⁹ Hwena Yahudi mo epba olak de kokung gul zahe gwen hap de ol keisa-keisana emki langa gulsuk gwen– hen sap orep de auyan-aza mo bosemse hap dena, hen Musa mo epba jalse gwen ol hap de eilman gwe-gwen naye. Kire nakon de eol tetek gwe-gwenna, zen waba hap.
¹⁰ Zi de eno jematnak denaka zere osan dep de hlil irin hip titi ta gwibinni, emki sap jalse gweblanna dan soblan. Zen de dekam sal srem gwenkam, emki tingare Kristen zisi gubiridan– zen de zini in han zersiri gwen srem hap.
¹¹ Sap ena tawana: Kirekam de zini, zeno mae mo enlala dawemna mes hom gweka. Zere mae mo karek gol gwenna, zen dekon zebe dam lasik gwibirin, “Zen mes eiwa de orana hli dak.”
¹² Ëe kime eno weinak dep Artemaꞌa zer soneꞌak, ahaksa Tikikuꞌu, zen dekam em nabakam abon onak dep Nikopolisk hatazan. Sap ee mese hi ngep tamle benkam de zewe gwen hap kalang gwek.
¹³ Hwena zi darena an zebone suratna ansa gol soneꞌan, ahana pemerinta mo jalse gwen olsa de klis gul gwen zini Zenas Bak, ahana Apolos. In kon de etan song ennak, emki dawem enkam mas gwizimdin– tahalha sremkam deka song eka.
¹⁴ Zen diki neno mae mo jematnak de zini, kirekam zen lowehe gwen– dawemsa de goltrei gwizimdinkimye. Nen kirekam nen nere mae mo Kristen bose walya ban hwe-hwekam nere mae mo tahalhana sul sone gwizimdin. Totoresa bap nen lowehe gwen.
¹⁵ Men zen awe aban mae lowehe gwenan tingan dawem ensa ep nol soneblal. Ano mae mo dawem gol sonenna ansa hen tonbirida– kitak men zen asa Kristus mo bose hap kwasang neibirida gwenanye. Dikire Bian mo kwasang-kwasangna kitak ebon mae onak lwa gwek.