¹ Ëe an Kristus zere mo nwenake eiwa tangan naka emsa gubiridaꞌan, hen Alap mo Enho naban ere mo enho naban man asa anakan tri la seꞌara, “Ëe eiwa home emsa boton tabiꞌin.”
² Ëe ama serkam enho nakon dowe hana gwenan,
³ sap ere mo ausu nakore zini, Yahudi, zen hom beyakam Kristussu daibliblaꞌan. Zep Kristus dikire asa hla tak, ee de emsa boton tabinkimye: Ëe eiwa amaka syauk blanak enaka drene seꞌan– hendep denaban dikim Kristus onakon langa gwen hapye, ere mo ausu nakore zini insa dikim ngaya tabin hipye.
⁴ Zen sap Alap mo hlil irin zi– Israel Bak mo auyan-tane wal, mensa sap nonol Alap zere mo hanan tabin walaskam gubirida gwekake. Sap Alap nonol zere mo ngatan zi mo lang nakore ngatanna zebe mae hap goltrei gwizimki. Hen Alap mo nonol zi niban de ol ziaha-en gunnu, zen dokwak nul gwek. Hendep zao kim lwa seꞌak, Musa Bak dekam zep hen titi tabin ola insa ayang gulzimki. Sap Alap nonol zebe mae en hap anakan goltreizimki, “Syala an desa em gol gwen– Asa dikim blikip gwesik gweblan hapye.” Hen nonol tangan zebe mae hap zere mo gu-gubiridan ola gol gwizimki.
⁵ Zeno mae mo auyan-azana Abraham, Isak, hen Yakob mae man tangan sap Alap mo nwenak edakastik, hendep Israelsa de ngaya tabin hip de Zini, auhu-kama zi mo enlala gweblankam, zeno mae mo ausu nakon saltilki. Zep zen ba hap daiblibla srem gweꞌan? Sap eiwa dena, Kristus Zen hen Alap. Hen Zen kitak teipsibiridaꞌara– hendep denaban. In eiwa tangan!
⁶ Hwena anakan bahem eenlala gwe-gwen, “Alap mensa Israelk de zini gu-gubirida gweka, zere mo hanan tabin walas mo kim de lamkam golelowehe gwen hap dena, Zen molya desa zebe mae hap golzimki, sap zen mes Kristussu de taibliblan hap baes tak.” Kirekam bejen. Hwena ansa emki enlala gwibin: Kitak mensa auhu-kama zi mo wei-wik gun nukon Yahudikam nenbirida gwenan, hwena Alap mo nwenak zen kitak Yahudi tangansa hom.
⁷ Hen kirekam, auhu-kama zi mo aitbinkim, Abraham mo auyan-tane walkam de gubiridanna, zen hom kitak Alap mo aitbinkim Abraham mo auyan-tane walyak biti gweꞌan. Sap Alap anakan Abrahamsa gubluka, “Eno auyan-tanena, zen Isak onakon sa naitbir song gwer.”
⁸ Zep zeno dam gulsunnu, Abraham mo tingare auyan-tane walya, zen hom Alap mo nwenak Abraham mo auyan-tane walkam enwe-mase gweꞌan. Hwena ee Yahudi zini ama ekil gil gwenan, “Ëe an tingan Abraham mo auyan-tane wal, zep ee kitak Alap mo hanan tabin walas.” Hwena diki Alap mensa zere mo hanan tabin walasnak de biti gwen hap gubiridaꞌara, zen zen en biti gweꞌan– men kirekam hen Abraham mo tanena Isaksa dam tasikike.
⁹ Sap Alap anakan Abrahamsa gu-gubluka, “Ngein sin de tahunkam Ëe asa lwa halzal, dekam walas naban asa Sara Baksa hlaulzul.”
¹⁰ Walasna insa gu-gubluka, zen ano mae mo auyanna Isak Baksa. Zena zini Ismael, zen hom Alap mo gu-gublunnak tiꞌira. Zep Yahudi zini angkam, zen sap kitak Isak Bak mo auyan-aza nakorena, hwena ahakore en nik Alap mo dam tasibin nik biti gweꞌan. Ahakon hwena Ismael Bak mo kim egwei kiniꞌan. Hwena Isak Bak kim Ripka Baksa golka, zen zep zi walasna dan-dan we sok.
¹¹ Hwena walas en sremnak, Alap mes Ripka Baksa hamal hap anakan gu-gubirki, “Em desa zi walas darena we soꞌanka, oso zik mo auyan-tane walya, zen zen sa eteipsil. Hwena aya zik mo dena, zen zeno mae mo tana iltikinnik sa lowehe gwer.” Zep Alap man nen dikim anakan dam gulsun hup dwam gweka, “Zen zere mo kalang gwen san dawemna zi hip gol gwizimnira, hen sap karekna. Zi mo dawem nakon hom gol gwizimnira.” Sap Ripka in kim Alap mo ola insa sane gwek, ungalanak de walas darena in hom banakare karek maena syal eibirki.
¹² (9:11)
¹³ Zep Alap mo olak zeno walas darena in hap dena anakan lwak, “Ëe asa Yakobsa kwasang gwe-gweblal. Esausa asa husus gwe-gweblal.”
¹⁴ Zep angkam dam gulsunnu banakan? San ha Alap man karek gweka? – kirekam zep ba maesa de syal eibin sremnak kles sokaye. Sap diki Alap bejen karek gwen!
¹⁵ Hwena Zen insa kirekam hamal hap gu-guzimki, zen man hen dakastiꞌin– men kirekam hen Musa Baksa gublukaye, “Aen asa ere mo dwam gwibin sin dam tasik gwibir– men desae kwasang gwibiridaꞌakye. Hen dawemsa de gol gwizimdin hip de wenya, zen hen Aen asa dam tasik gwibir.”
¹⁶ Zep Alap mo hlil irinnik de biti gwen hap dena, zen zi nere mae mo dwam gwibin sin hom, hen zen zi nere mae mo syal gwibinkim bejen. Zen diki Alap zere mo kwasang-kwasang en nakon– men desa en Zena dam tasibirkike.
¹⁷ Zen in zep hen Mesir mo teipsin zi hip dena Alap mo olak anakan lwak, “Ëe mae en habe emsa Mesirsi de irik gin hip dam tasik: Dekam de tingare okamanak de zi ano sosonsa tame gun hup. Ëe kime emsa de karek tan hap de owasna syal gwe-gwibiꞌik, zen dekam sa tingare okamanak de zini Asa tawa neblandal.”
¹⁸ Zep man dam gwesinin: Men desa Alap dam tasik gwibirida, Zen desa en kwasang gwibirida gwenda. Hen men desa Mesir mo teipsin zini in mo kim dam tasik gwibirida, zebe mae hap enol drak-drak gwen hap denaka gol gwizimnira.
¹⁹ Zep em ahakon anakan esa asa lakensiblil, “Ki Alap ba hap de zini enol drak-drak gwen hap karek tabin hip? – sap Zen Zen am kirekam de enol drak-drak gwen hap gubiridaka! Hen zini nen bejen jalse gweblan!”
²⁰ Hwena bahem kirekam Alapsa gublun! Sap em in zeno yang tabin nikake! Zep em ba hap de zeno kareksa hlaulblun hap? San ha yuna maka? – men zen ik guk, desa gubiꞌin, “Em bap asa yu hap ik gulku? Diki blome hap emaka.”
²¹ Men zen ik guk, san ha zenoka hom? – anakan de kles son hap, “An yu hap asa ik gul– mwin-mwankam de wei yul gwen hap. Ahana an blome tol hap asa ik gul.”
²² Zep zen Alap zere mokake– kirekam de nesa klis gun hup denaye, dekam de zi lamkam zere mo serkam de soson naban jala ban tame son hapye. Hwena Zen na-en hom desa zitreizimꞌira. Hwena nonol, men desa kareknak de kang gun hup hamal gulku, Zen desa nwe enkam de holokam kara ta gwibin hip dwam gwibiridaꞌara. Hyanak sa hwena serkam karek tabiri.
²³ Hen kirekam, kwasang gwibiridan hap dena mensa nesa hamal gulku, nesa sap sa hen holokam kara ta gwibiri– dekam de lamkam zere mo ngatansa mam tangankam gol gwizimdin hip,
²⁴ men desa kiresa de golzimdin hip kalang gwibiridaka hendep kwang guludaka, sap Yahudi zi, sap Yahudi srem zi.
²⁵ Sap Yahudi srem zi hip dena, Hosea Bak man Alap mo ola anakan ayang gulzimki, “Men zen ano hlil irin zinik biti gwe srem gwek, hwena angkam Ëe asa desa hen gubiridal, ‘Em in hen ano hlil irin wenya.’ Men desae menkam kwasang gwibirda srem gwek, hwena Ëe asa angkam kwasang gwibirdal.
²⁶ Ë-enak de zini men desae gubiridak, ‘Zen in ano hlil irin zisi hom,’ hwena desa Ëe asa gubiridal, ‘Em in Ngaya Zini Alap ere mo walas tangan.’”
²⁷ Hwena Yahudi zi hip dena, Yesaya Bak anakan Alap mo ola tenggwaran naban ayang gulku, “Sap eiwa, Israel Bak mo ausu nakore zini zeno beyana san de hinak de hisglimni kiye, hwena da-en tangan sa engaya gwer.
²⁸ Sap Bian Alap nabakam sa okamana ansa olo gulu.”
²⁹ Etan Yahudi zi hip Yesaya Bak man ale gulku, “Soson Zini Bian Alap de nesa anakan gubiridan sremkam, ‘Dikire da-en engaya gwek,’ ki emaka kitak tangan ena Sodom hen Gomorak de zi mo kim juwek.”
³⁰ Zep nen banakarekam esa Alap mo ola insa srip ulsul? A kirekam esa: Yahudi srem zini, zen sap hom Alapsa de gweblak. Zen hwena Alapsa de taibliblan nakon ki zere mo nwenak edakastiꞌin– Kristus hup de ol dawemna insa kim daibli gwibiꞌinke.
³¹ Hwena Yahudi zini, zen serkam sap zere mae mo sosonkam Musa mo titi tabin ol san de ang tankam alp nei gwibirin– dekam de Alap mo nwenak edakastin hipye. Hwena waba tolkam!
³² Ba hap waba hap? Zen sap zere mae mo sosonkam ealp gwe-gwenan– hwena Alapsa de taibliblan sremkam. Zen in zep gol tenya iwe de tanasa tang ta zankam altil gwenan–
³³ men kirekam Alap mo olak lwakke, “Ëe ama gol te dawemna Yerusalemk ngirinnik ik giꞌin, zi deka zewe tana bol tang ta gwe zankam ealtil gwek. Zen zep sa gol tenya insa husus nei gwibir. Hwena men zen de gol tenya insa daibli gwibiꞌik, zen molya anakan eenlala gwe-gwek, ‘Ëe an waba habe taiblibik.’”