¹ Zep Yahudi zini, neno mae mo auyanna Abraham Baksa de enlala gweblankam, zen banakan gweka? – zep Alap mo nwenak dakastilkiye.
² Zen de zere mo syala kon Alap mo nwenak dakastinkim, zen maka anakan zenaka boltere taka, “Ëe mese aha zisi beya tangankam kwei-kwik guk.” Hwena zen bejen Alap mo nwenak kirekam zenaka boltere tan.
³ Sap zebe hap dena Alap mo olak anakan lwak, “Abraham zen Alapsa taibliblaka, zep Alap anakan gubluka, ‘Em mese ere mo nwenak dakastili.’”
⁴ Zep anakarekam lwaꞌan: Zi de te-ala hap syal gwenkam, mam zik de te-alana insa golblankam, zen bejen anakan enlala gweblan, “Zen totoresa ap golblala.” Hwena zen sa anakan enlala gwera, “An ere mo syala kon ap golblala.” Zep hen kirekam, zi de Alap de dawemsa zebe hap golblan hap syal gwenna, zen bejen anakan enlala gwen, “Zen totoresa abe hap golblaka.”
⁵ Hwena zini men zen esyal gwen sremkam Alap ensa anakan daibliblaꞌan, “Karek gol gwen zi hip Zen Zen ngaya gwen hap dena totoresa Kristus onakon gol gwizimnira,” zen eiwa kire zisi Alap gubiridaꞌara, “Zen zen ano nwenak edakastiꞌin.”
⁶ Zen in zep Daud Bak hen kirekam enlala gweka– isrip-sri gwibinnik de lowehen wenya kim hamal hap hlauluda gukuye, men desa Alap zere hap de ba maesa syal gwibir-blin sremkam anakan gubiridaꞌaraye, “Em ema ano nwenak edakastiꞌin.” Daud anakan gubiridaka,
⁷ “Zini men zeno mae mo karek-kareksa Alap ngan gulsuk gwizimꞌira hen tap gulsuk gwizimꞌira, zen isrip-sri gwibinnik lowehe gweꞌan.
⁸ Hen men zeno mae mo karek-kareksa Alap aitbir-zim srem gweꞌara, zen hen isrip-sri gwibinnik lowehe gweꞌan.”
⁹ Men zen de kirekam isrip-sri gwibinnik lowe heꞌak, zen Yahudi zi en molya. Hwena zen hen Yahudi srem zi niban esa apdenak. Sap nen mese Abraham hap dena insa anakan tame uk, “Zen Alapsa taibliblaka, dekon en zep Alap mo nwenak dakastilki.”
¹⁰ Zep Alap kim Abrahamsa kirekam gubluka, san ha to mip blonsublun naka? San ha kire srem naka? Zen eiwa dekam to mip blonsublun srem nik gweꞌanka– Alap in kim kirekam gublukaye!
¹¹ Zen hwena hyanak to mip blonsun hup gubluka– dekam de zenaka anakan zertren hap, “Ëe mese Alapsa taibliblak– men dekam asa anakan gublukaye, ‘Em mese ere mo nwenak dakastili.’” Zen in zep Abraham Bak nwe-mase gweꞌara, zen hen to mip blonsublun srem nik mo bian– tingan men zen Alapsa de taibliblan nakon zere mo nwenak edakastil gwenanye.
¹² Hen kirekam Abraham Bak zen tingare to mip blom tasibir-zimdin nik mo Bian– men zen en Alapsa zere mo kim daibliblaꞌanke, men kirekam Abraham zena to mip blonsublun sremnak taibliblakake.
¹³ Alap mensa Abrahamsa gu-gubluka, auyan-aza zeban de okamasa zibi gwibin hip, zen dwan Musa mo titi tabin ol de hatan sremnak kirekam gu-gubluka. Zep Abraham dekam hom desan ang gweka– dekam de Alap mo nwenak dakastin hip, hen dekam de dawemna insa golblan hapye. Zen hwena Alapsa de taibliblan en nakon ki zebe hap kirekam lwablak.
¹⁴ Sap anakan de lwaꞌanam, “Titi tabin ol en san de ang tankam esa Abraham mo walas hap eliweher,” ki Alap menkam waba hap Abrahamsa gu-gubluka– zere mo nwenak de dakastin hip. Hen nebe mae hap Abraham mo kim de Alapsa taibliblanna waba hap maka lwaꞌan.
¹⁵ Eiwa, nen bejen nen titi tabin ol san de ang ta gwen en nakon edakastin. Sap zini men zen desan de ang tan hap ealp gwe-gwenan, hwena sul sonenna toton banakan dep? Zen in zep Alap mo jal ennak lowehe tine gwenan. Diki titi tabin ola in de lwan sremkam bap. Dekam basa molye ulmun gweꞌanam!
¹⁶ Zen in zep, Alapsa de taibliblanna kunci makan nebe mae hap lwazimꞌin! Sap Alap man nesa anakan dwam gwibirida gweꞌara, “Ëe mensae Abrahamsa orep gu-gubluk, zen dikire totoresa Yesussu de taibliblan en nakon nulin gwek.” Zen eiwa nen esa ulin– sap Yahudi zini men zen Musa mo ola nama enlala nei gwibirin, hen sap Yahudi srem zini men zen desa enlala neibir srem gwe-gwenanye. Sap nen ema Abraham mo kim Alapsa laibliblaꞌan. Zen in zep Abraham Bak anakan nwe-mase gweka, “Zen tingare Alapsa de taibliblan zini neno mae mo bian.”
¹⁷ Zen zep Alap Abrahamsa anakan gu-gubluka, “Ëe ama emsa gubluꞌan– zi ausu beya mo bian hap de jowen hap.” Zep Alap mo ola in kon, Abraham man nwe-mase gweꞌara, “Zen neno mae mo bian.” Sap zen Alapsa anakan taibliblaka, “Zen Zen juwen zisi ngaya ta gwibirida, hen Zen Zen ba maena totoresa de jowen hap ol gu anen enkam gu gwibirida.”
¹⁸ Diki Abraham maka anakan enlala gweka, “An molya kirekam lwak, sap ee we walya ban mese tangan bogol ek. Zep ee banakan dep? – walas en naye.” Hwena zen nama Alapsa taibliblaka– mensa anakan gu-gublukake, “Zi ausu beyana emsa ‘bian’kam sa nen gweblal.” Sap Alap mes hen anakan gu-gubluka, “Eno auyan-aza tane walya sa beya gwe song gwer– san de nglinak de keis mo beyana kiye.”
¹⁹ Abraham dekam hom mae anakan enlala gweka, “Ëe banakan asa walas er? – sap ee an tin hip mes-am tangan golek de gwer. Sap ano gwen tahunna seratusnuk dep man-am golek de gweꞌan. Hen Sara Bak mo wal gola mes-am yok gwibik.”
²⁰ Sap eiwa kirekam, hwena Abraham mo Alapsa de taibliblanna hom mae sin gweblak. Hwena man tangan tatete gweblak. Zen zep tangan Alapsa anakarekam boltere taka, “Bian, Ema asa sam taka, sap men kirekam asa gu-gubluka, Em esa kirekam ap syal gwibir-blira.”
²¹ Hen zen man tangan Alapsa anakan taibliblaka, “Men desa asa gu-guk gweblaka, zeno sosonna ki– kirekam de owas-owassa dikim abe hap syal gwe-gwibir-blin hap denaye.”
²² Zen serkam tangan Alapsa taibliblaka, zen in zep zebe hap dena Alap mo olak anakan lwak, “Em mese ere mo nwenak dakastili.”
²³ Alap mo nwenak de dakastin hip dena insa ale nuk, zen Abraham en hap hom.
²⁴ Zen hwena kitak nebe mae hap– men zene Alapsa anakan laibliblaꞌanke, “Zen eiwa mes Bian Yesussu tin nikon ngaya taka.” Kirekam de taibliblanna in, nen dekone Alap mo nwenak edakastiꞌin.
²⁵ Sap Alap Zen neno mae mo karek-karek hap Yesussu tin hip sosok taka, hwena ki zep etan ngaya taka– dekam de nen anakan tame gun hup, “Nen an zene Desa laibliblaꞌan, nen ema Alap mo nwenak edakastiꞌin.”