¹ Hwena ano ola insa, Yahudi zini sa husus neibir– mae hap, “Ki san Yahudi zikim de lowe henna hen to mip blom tasibinni zen waba hap?”
² Hwena ee ama kirekam de egun wenya insa ding gulzimꞌin, “Zen sap waba hap hom. Zen sap dawem tanganna.” Sap Alap Yahudi zini nebe mae en hap zere mo epba ola golzimki.
³ Hen ahakon sa asa dakensiblil, “Yahudi zini nen Alapsa anakane en guk gweblak, ‘Ëe asa Musa mo titi tabin ola insa kitak syal ei gwibir.’ Hwena nen home sowe henkam desan ang tak. Zep san ha Alap hen molya zere mo nesa de gu-gubiridanna nebe mae hap sul sonezimki?”
⁴ Zen molya sul sonezim srem gweka. Sap mes dam gwesik, Alap bejen boton gwen. Hwena tingare zini zen boton tamna. Zen zep hen Daud Bak Alapsa anakan gubluka, “Em eiwakame zisi klis gul gwenda, hendep tingare zini hen kirekam sa Emsa nenblal. Men nara eno klis gunnu in kon egunnu, ‘Ëe home kirekam ekarek gwek,’ hwena Em dekam esa zeno mae mo karek-karekna tingare zi hip goltreizimdi. Zen dekam sa esaher gwer.” Zep Alap taibliblan tanganna, zep Zen bejen sul sonezim srem gwen– mensa gu-gubiridan naye.
⁵ Hwena Yahudi zini em bahem Alap mo ebe mae hap de gu-gubiridanna insa kareksa dikim hwena syal gwibin hip li yul sone gwen. 5,7Sap ahakore Kristen gwen srem Yahudi zini auhu-kama enlala naban anakan yasik da gwibirin, “Ëe sap kie karekna ol gwenan, hwena Yahudi zini abe mae hap sap. Sap ano mae mo karek gol gwenna, zen dekon aha zi Alapsa anakan tame daꞌan, ‘Zeno ola Yahudi zi hip dena botonsa hom.’ Zep ano mae mo karek nakon Alap molya asa karek tabirki, sap zini dekon Zenaka tame da gwenan, ‘Zen taibliblan tanganna.’” 8Hwena kirekam bahem eenlala gwe-gwen. Sap kirekam man nwe-mase gweꞌan– san de anakan de egu gwenna kiye, “Nen kareksa gulin hana gwen– Alap dekakim dawemsa mamkam nep gol gwizimki.” Ahakon hen anakan asa lamang da gwek, “Paulus in man kirekam yasik ta gwibiꞌira.” Kirekam de asa lamang ta gwen wenya, Alap de karek tabin hip man tangan edakastiꞌin. 6Zep Alap eiwa taibliblan tanganna, hwena bahem dekon anakan ekil gil gwen, “Alap Yahudi zini ano mae en mo karek-karekna nwe-enkam sa kara gul gwizimdi.” Kirekam hom tangan Alap hap sam gwesibliꞌan, sap Zen eiwa kitak de okamanak de zisi sa klis gulu.
⁶ (3:5)
⁷ (3:5)
⁸ (3:5)
⁹ Zep san ha Yahudi zi en hap sa Alap dawemna golzimdi? – hwena aha zi ausu ensa sa zere mae mo karek-karek nakon karek tabiri. Kina ki kirekam bejen. Diki men kirekame nonol emsa gubiridal, zen kirekam sa lwal: Sap Yahudi zi, sap Yahudi srem zi, zere mae mo karek-karek nakon tingan mes kareknak de kang gun hup edakastik.
¹⁰ Zep zen man Alap mo ol ale gun nuban dakastiꞌin– anakan men zen lwan dakye, “Auhu-kama zini Alap mo nwenak de dakastinni aha-en mae hom tangan.
¹¹ Sap aha-en mae hom– Alap mo dwam gwibinsi de tame gun nuye, hen Desa de teblan hap de enlala nabare zi niye.
¹² Tingare zini mes Alapsa hli dak. Kire zini Alap mo nwenak ase naban. Hen dawemsa de gol gwen zini aha-en mae hom. Eiwa, hom tangan.”
¹³ “Zeno mae mo ol torankam men zen nopna ek tihi nakon wet so gwenan, zen san de zi tok asena kiye. Hen ol boton-botonkam man zenaka hit di gwibirin.” “Hen zeno mae mo ek tihi nakon in zen wet so gwenan– san de wanya mo zisi de hit tinnak de sosonna kiye.”
¹⁴ “Zeno mae mo ek tihi nakon men zen wet so gwenan, zen zisi de karek tabin en hap dena hen lamang ta gwibin en hap dena.”
¹⁵ “Zen man tangan zisi de tamera gwen hap esyal-syal gwe-gwenan.”
¹⁶ “Zini men desan etenda gwenan, zen karek ensa zi bose zikhip nolzimnira gwenan, hendep zep enlalana edowe hana gwenan.”
¹⁷ “Zen hom aha zi niban de umlaekam golelowehen hap de orana tame dak.”
¹⁸ Hen “Alapsa de blikip gwesiblinna mes kitak baes tak.”
¹⁹ Zep zi de kitak Alap mo nwenak ekarek gwen hap de Alap mo ola in, zen Yahudi zini nen hen zewe biti gweꞌan. Nen hwena ema ekil gil gwek, “Musa mo titi tabin ol san de ang ta gwenkam esa Alap mo nwenak edakastil.” Hwena Alap mo aha ola in kon man tangan dam gwesinin, “Hom tangan zini– Alap mo nwenak de zere mo syala kon dakastin niye.” Zen hwena mae hap titi tabin ola insa nep golzimki: Tingare zisi dikim saherak kang gun hup– Zen kim de nesa klis guꞌunkaye, sap Yahudi zi, sap Yahudi srem zi. Dekam toton nara dep? – Alapsa de anakan gublunna, “Ano karekna hom.”
²⁰ Zep zini toton bejen Alap mo nwenak edakastin– Musa mo titi tabin ola insa de syal gwe-gwibin nikonye. Sap titi tabin ola in, zen man nesa anakan hleng sosubirida gwenan, “Em in kitak kareksae ol gwenan.”
²¹ Zep nen de Alap mo nwenak edakastin hip dena, zen Musa mo titi tabin ol san de ang ta gwenkam bejen. Hwena angkam Alap zere mo nwenak de edakastin hip de ora esena mes nebe mae hap sal tazimki. Hen ora esena in hap dena Musa mo titi tabin olak hen Alap mo olsa de ayang gul gwen zi mo olak mes hamal hap ale nuk.
²² Zep angkam Alap mo nwenak de edakastin hip dena, zen diki Bian Yesussu de taibliblan en nakon. Kitak men zen de Yesussu daibliblaꞌak, sap Yahudi zi, hen Yahudi srem zi, zen zen sa Alap zere mo nwenak edakastil. Sap zere mo nwenak, zi ausuna sren-srenkam hom,
²³ hwena kitak kareksa nulin halasen gwenan, hendep zep Alap zere onakon mes elanga gwesik hen kawesinnik lowehe gwenan.
²⁴ Sap eiwa kirekam, hwena angkam Alap zere mo kwasang-kwasang en nakon nesa zere mo ngatan san dep golewet so gweꞌara– ba maesa de zebe hap syal gwibir-blin sremkam. Zep Kristus onakon nesa gubiridaꞌara, “Angkam em mese edakastil– ere mo nwenakye.”
²⁵ Sap Alap mes Yesussu zer soneka– dekam de orasa nebe mae hap kles tyasizimdin hip, nen dikim zeno kala kon zere mo nwenak engan gwehen hap denaye. Zep nen de kirekam Yesussu taibliblankam, dekam neno mae mo karek-karekna man nep tap gulsuk gwizimnira, hen hom etan nesa jal gwibiridaꞌara. Zen Alap mae hap ki kirekam syal gwibirki: Dekam de zi Zenaka anakan tame tan hap, “Zen eiwa enlala dam-dam enkam klis gul gwenda.” Sap menkam Alap holokam zi mo karek-karekna nwe enkam kara gul gwizimki.
²⁶ Hwena angkam Kristus onakon zep Alap anakan klis gul gwizimꞌira, “Men zen Yesussu daibli gweblaꞌan, zen zen ere mo nwenak edakastil gweꞌan. Men zen daiblibla srem gweꞌan, zen hom.” Kirekam de Alap klis gulzimdinni airis, sap Zen Zen zere mo nwenak dikim edakastin hip de orana insa zerzimki.
²⁷ Zep angkam nen bejen nen nenaka anakan boltere ta gwibin, “Ëe mes-am ere mo syala kon Alap mo nwenak dakastik.” Diki tangan Alap mo nwenak de edakastin hip dena zen Yesussu de taibliblan en nakon.
²⁸ Sap nen Kristussu de taibliblan en nakone edakastiꞌin. Musa mo titi tabin olsa de syal gwe-gwibin nikon hom. Zep nen bejen nen nenaka anakan boltere ta gwibin, “Ëe ere mo syala kone dakastiꞌin.”
²⁹ Zep Yahudi zini nen bap nen ekil gil gwen, “Alap, Zen ano mae en mo. Aha zi ausu mo Alapsa hom.” Zen hen aha zi ausu mo Alap sake!
³⁰ Sap neno mae mo Alapna aha-en. Zen Zen Yahudi zini nebe mae hap zere mo nwenak dikim edakastin hip dena Kristussu de taibliblan nakon gol gwizimꞌira. Hen Yahudi srem zi hip Zen hen kire hap dena Kristussu de taibliblan nakon gol gwizimꞌira.
³¹ Hwena kirekam de lwankam, zini sa asa anakan dakensiblil, “Ki san em mese Musa mo titi tabin ola insa zalta dep tahan san gwei gubir kinila?” Kirekam bejen. Hwena nen mese titi tabin ola insa eiwa de uk, sap nen de Kristus onakon engaya gwen hap dena mes zewe hamal hap ale nuk.