¹ Pemerinta nakon men zen nesa irik nil gwenan, desa tingan nen blikip gwesibirida gwen. Sap tingare auhu-kamanak de teipsin-teipsin wenya, zen Alap dam tasik gwibirida. Zen de dam tasibin sremkam, hom eteipsik gwenan.
² Zen in zep, pemerinta mo titi tabin olsa de gulmurunkum, zen man nwe-mase gweꞌan– Alap mo olsa de gulmurunnu kiye. Alap Zen sa hen nesa kire hap karek ta gwibiri.
³ Men zen dawemna syal nei gwibirin, zen hom pemerinta mo mam-mamna nairibirida gwenan. Diki men zen karekna syal nei gwibirin, zen man nairibirida gwenan. Zep em de dawem ensa syal gwe-gwibinkim, emsa sa sam neisik gweblal, hen airin sremkam esa gwe gwera.
⁴ Sap pemerintanak de mam-mam wenya, zen desa mes Alap nebe mae hap de dawem hap dam tasibirki. Hwena nen de zeno mae mo nwenak kareksa syal gwe-gwibinkim, ki nen airin niban esa lowehe gwer. Ki hwena Alap sa desa nesa de karek tabin hip gubiridala. Sap desa mes Alap kire syal hap dam tasibirki.
⁵ Zen in zep, pemerintanak de mam-mam wenya nen blikip gwesibirida gwen. Zen nesa dikim karek tabin srem en hap hom, hwena nena hen nere mae mo enhonak kirekame Alap mo dwam gwibinni eis gwibiꞌin.
⁶ Zen in zep, pemerinta hap em pajak hap de te-alana gol gwizimdin. Sap men zen pemerintanak irik niꞌin, zen san de Alap hon de ebabu gwe-gwen zini kiye, hen zen kitak pajak te-alana in dekon gajina nulin gwenan.
⁷ Zep men kirekam dakastiꞌin, kire enkam em gol gwizimdin. Emsa de pajak hap de te-alasa de golzimdin hip gubiridankam, emki golzimdin. Hen men zen blikip gwesibirida gwen hap edakastiꞌin, emki desa blikip gwesibirida gwen. Hen te-ala maesa de bohe gunnu, emki etan sul sonenkam gol gwizimdin.
⁸ (13:7) Angkam kwasang hap denakae gulk sun blaonzimꞌin: Zini kim te-ala yawalsa zinik bohe nul gwenan, zen dekam ben jamkam etan nol gwizimnin. Kim su nul sone gwenan, dekam zep gol gweblanna nolzausuk gwenan. Hwena ee ama emsa gubiridaꞌan: Zi bosyansa de kwasang gwibirida gwenna desa bejen golzausun. Sap men zen zi bosyansa kwasang neibirida gwenan, zen dekam tingare Musa mo titi tabin olsa su nul sone gwenan.
⁹ Sap tingare Musa mo titi tabin ola, zeno ausuna zen kwasangnak lwaꞌan. Sap zi bosyansa de kwasang gweblankam, dekam wal bosyansa de karek ta gwen srem hap de titi tabin ola insa bejen gulmurun. Zep kwasang gweblankam bejen kahalo tan hen sowe tan. Kwasang gweblankam hen bejen zeno bi gwibin kire-kiresa dwam gwibin, hen bejen tan. Zep Musa mo jalse gwen ola in, zi bosyansa de karek ta gwen srem hap dena, zeno ausuna aha-en– men zen hen anakan lwakye, “Zi bose omka em kwasang gwibirida gwen– san de enaka de kwasang gweblanna kiye.”
¹⁰ Zep nen de aha zisi kwasang gwibirida gwenkam, nen dekam bejen desa karek tabin. Zep dekam man nwe-mase gwe-gwenan, nen hen kwasangsa de syal gwibinkim tingare Musa mo titi tabin olsae kim su kul sone gwenan.
¹¹ Kirekam de lowe henna zen hen mae hap: Sap Bian mo lwa halzan hap de yaklana angkam man tangan golek de gweꞌan. Zep ni truwen makan bap nen lowehe gwen. Sap nesa dikim hendep denaban ngaya tabin hip de yaklanak angkam mes tangan golek de gwer. Men kime Biansa laibliblak, dekam nama langanak.
¹² Sap kawesinni an zen angkam lwaꞌan, tap gwen hap man golek de gweꞌan. Hwena nen dikim ngatan tangannak lowehen hap de yaklana angkam man zilsiꞌin zala. Zep kawesinnik bap nen lowehe gwen. Kawesinnik de lowehe gwen zi mo syala bap nen gol gwen. Diki ngatannak de lowehe gwen zi mo syal ensa nen gol gwen– dowal mo kigisa dikim zereija gwen hapye.
¹³ Zep nen Kristus mo nwenak dam-dam enkam nen lowehe gwen– dekam de kitak nesa anakan tame tabin hip, “Zen eiwa ngatannak lowehe gwenan.” Syan-syan enlala enkam bap nen lowehe gwen. Hen ho mamakna bap nen mamkam otdeblanda gwen. Bap nen ekahalo gwe-gwen. Hen nere mae mo hole-hle san bap nen ang ta gwen. Hen bap nen edarak gwe-gwen. Hen aha zi de banakare dawem maesa gul irinnik hla tankam, bap nen kire hap husus gwibirida gwen.
¹⁴ Diki Bian Kristus Yesus en hon nen nenaka sosok ta gwibin– Zen dekakim enho nakon nesa golelowehe gweka. Hen bap nen enho nakon ekalang gwe-gwen– dekam de nere mae mo auhu-kama hole-hle san ang ta gwen hapye.