¹ Zen in zep, aya-wal oso-wal, ee ama emsa titi tabiꞌin: Nen nere mae mo timni Alap en hap nen sosok gul gweblan– otweran ninsi de Alap hap de kalsnak lone seblan makan. Sap Alap tweran tangansa de tru ta seblan hap hom dwam gweꞌara. Zen diki neno mae mo timsi dwam gwibiꞌira. Nen mese anakan tame uk, “Alap mes zere mo serkam de kwasang-kwasang nakon Yesussu nebe mae hap sosok tazimki,” zep nen hen nen nere mae mo timni zebe hap sosok gul gweblan– dekam de zeno bosesa mam gulblun hap, hen dawemsa gol gweblan hap.
² Auhu-kama enlala enkam bap nen lowehe gwen. Hwena Alap dikim neno mae mo enhosa li ta sone gwizimdin hip nen nenaka Zebon onak sosok ta gwibin. Zen dekam esa eliwehe gwer– san de zi esena kiye. Dekam esa Alap mo nebe mae hap de dwam gwibir-zimdinni anakan dam ulsuk gwer, “An kirekam de lowe henna, zen tangan Alap zere mo nwenak dakastiꞌin.”
³ Aya-wal oso-wal, Alap man serkam asa kwasang gweblaka, zep asa dam tasiki– Kristus hup de olsa de golzim halada gwen hapye. Zen in zebe emsa kitak titi tabiꞌin: Sosonna mensa Alap zere mo syal hap nebe mae hap sren-srenkam gol gwizimꞌira, dawem enkam nen gwirensin. Bap nen nenaka anakan boltere ta gwibin, “Abon Alap onakore sosonna mamna.” Diki anakare enlala betek naban nen nenaka enlala gwibirida gwen, “Ba hap tangan Alap kirekam de sosonna abe hap golblaka? – sap ee an hen orep karek gol gwen nakake.” Zep men kirekam ena aha-en aha-enkam Alapsa anakan laibli gweblaꞌan, “Abe hap kire sosonsa golblaka,” zen kire enkam emki syal gwe-gwibin– hwena enaka de boltere ta gwibin sremkam.
⁴ Zep nen Kristussu de taibliblan wenya, nen mese Deban eraha-en gwek– san de aha-ere timni kiye. Zi mo timni zeno hli-hlina beyana, hen hlina in mo syala sren-srenna– men ki tanana, tahana, hen ing ala maena. Zep nen hen beyana, hen zere mo syal hap de sosonna mensa Kristus nebe mae hap wei yul sonezimki sren-srenna. Hwena nen an aha-ere tim nikorena, zen in zebe nenaka mas eibirida gwenan hen kwasang eibirida gwenan.
⁵ (12:4)
⁶ Zep Alap mes nebe mae hap zere mo serkam de kwasang-kwasang nakon sren-srenkam sosonna golzimki. Zep ebe mae hap de zere mo Enho nakore hamal hap de olsa ayang gul gwizimdin hip denaka gol gwizimdinkim, men kire enkam ena anakan taibliblaꞌara, “An Bian desa de ayang gulzimdin hip abe hap golblala,” ki emki hendep ayang gulzimdin.
⁷ Hen kirekam, ebe mae hap de aha zisi dikim mas gwibirida gwen hap de sosonsa gol gwizimdinkim, emki hendep mas gwibirida gwen. Ahaksa aha zisi de Alap mo olkam tawa ta gwibin hip de sosonsa de gol gwizimdinkim, ki emki hendep tawa ta gwibin.
⁸ Hen aha zisi dikim tatete ta gwibin hip denaka de gol gwizimdinkim, emki tatete ta gwibin. Tahalha zisi de te-alakam mas gwibirida gwen hap denaka de gol gwizimdinkim, emki isrip-sri naban mas gwibirida gwen. Hen Kristen zisi dikim nol gwibiridan hap de sosonsa de ebe mae hap gol gwizimdinkim, emki syal-syalkam nol gwibirida gwen. Hen aha zisi de kwasang gwibirida gwen hap denaka de gol gwizimdinkim, emki isrip-sri enlala naban kwasang gwibirida gwen.
⁹ Botonkam bahem aha zisi kwasang gwibirida gwen. Diki eiwa-eiwa tangankam em kwasang gwibirida gwen. Enlala jal-jalsa emki ja-ja ta gwen. Dawemsa de syal gwibin hip de enlalasa emki kyang-kyang tasik gwen.
¹⁰ Ere mo Kristen bose walya emki dawemkam kwasang gwibirida gwen– men kiye, ere mo iye tangansa de kwasang gwibiridanna. Eno bosesa de aha zi teip gulsublun hap bahem edwam gwe-gwen. Hwena diki hwe-hwekam em enaka blikip gwesibirida gwen.
¹¹ Eno mae mo enho nakon Alap hap de isrip-srina bap zen betek gwen. Hwena Alap mo Enho nakore isrip-sri naban emki Bian hap de syalak esyal-syal gwe-gwen.
¹² Isrip-sri naban emki anakare enlala naban lowehe gwen, “Mensa Bian nebe mae hap hamal gulzimki eiwa nen esa ulin.” Zep kareksa de goltowennak, tatem em ezauk gwen. Alapsa em gu sonebla tine gwen.
¹³ Kristen bose wal uk de etahalha gwenna, emki mas gwibirida gwen. Hen eno mae mo tame tabin srem zi de eno mae mo enak yaing gwe-gwe zankam, emki isrip-sri naban ere mae mo gola kon lup gulin gwen.
¹⁴ Zi de emsa Kristus mo bose hap karek tabinkim, Alapsa em gu sone gweblan– Zen de zebe mae hap dawemsa golzimdin hip. Hwena Alap de karek tabin hip bahem abe tan.
¹⁵ Em de Kristen bose omka anakan salbiridankam, “Zen isrip-sri naban lowe heꞌan,” emki hen zeno mae mo isrip-srina insa enhonak eisbin. Banakare kareksa de goltowen nakon de enlala dowe hanan naka salbiridanna, emki hen zeno mae mo enlala dowe hananna insa ere mae mo enhonak eisbin– em de hen gol towen makan.
¹⁶ Aha-ere enlalakam em lowehe gwen. Bahem anakan ebolte-bolte gwe-gwen, “Ëe wal bosyanna wakin han apdenak hom.” Hwena bose srem zi niban emki apdekam isrip-sri naban goleapde gwe-gwen. Bahem enaka anakan enlala gwibirida gwen, “Ëe an mes tangane tewesik.”
¹⁷ Zi de ebe mae hap kareksa golzimdinkim, em hwena bahem zebe mae hap karekna gol gwizimdin. Em hwena tingare zi mo nwenak dikim dam-dam enkam lowehe gwen hap em ealp gwe-gwen.
¹⁸ Diki dawemna ere mae mo soson jam en em ealp gwe-gwen– dekam de tingare aha zi niban enlala sesek enkam lowehe gwen hapye.
¹⁹ Hen aya-wal oso-wal, bahem tangan aha zi niban enaka hwe-hwekam karek ta gwibin. Diki Alap Zen sa karek ta gwibiri. Em bahem. Sap Alap mo olak man lwak, “Ëe ama emsa gu-gubiridaꞌan: Emsa de zi bose uk karek tabinni, Ëe asa hwena desa karek ta gwibir. Em bahem.”
²⁰ Zep men kirekam Alap mo aha olak lwaꞌan, kirekam em gweibirida gwen, “Eno jal zi de usak gwenna, tembanesa em golblan. Hen ho-hole gwenkam, hosa em golblan. Sap em de kirekam gwe gweblankam, dekam saherak esa drenera.”
²¹ Dowal mo kigi naban de zereijannak, bahem esin gwe hana gwen. Hwena dawemsa de gol gwen ennak em tatem ezauk gwen. Zen dekam sa karek san dep de titi tan hap emsa topse gweblala.