¹ Zep aya-wal oso-wal, ee ama tangan dwam gweꞌan– ano zi ausu nakore zini kitak de sap engaya gwen hap. Zen in zebe enlala zon tasiblin naban Alapsa aberbe ta tine gwenan.
² Ëe eiwa denakae emsa gubiridaꞌan: Yahudi zini in sap eiwa Alap mo syal hap syal-syal tanganna. Hwena zeno mae mo syala in, men kirekam angkam Alap goltreizimꞌira, zen diki desan maka ang taꞌan.
³ Sap zen hom Alap zere onak dikim edakastin hip de ora esena dam dasiꞌin. Zen hwena zere mae mo enlala san epba titi tabin ol enna insa kyang-kyang nulsuk tine gwenan. Zen in zep Alap mo ora ese zertreizimdin sin de ang tan hap baes ta gweꞌan.
⁴ Sap Kristus mes nebe mae hap Musa mo titi tabin ola insa sul sonezimki. Zep tingan men zene angkam Kristus ensa laibliblaꞌan, zen dekam zebe Alap mo nwenak edakastiꞌin– titi tabin ola insa de enlala gwibin sremkam.
⁵ Hwena Alap mo nwenak de edakastin hip dena Musa mo olak man lwak, “Men zen de ano titi tabin ola an san sul sonenkam ang ta gweꞌak, zen zen en sa hendep denaban engaya gwer.”
⁶ Hwena Alap mo olak, Zenaka de taibliblankam de zere mo nwenak edakastin hip dena man hen lwak, “Em home auhu-kama tim niban de ngatan zi mo lang san de teblan hap edwam gweꞌan. Hen juwen zi mo lang san de teblan hap hen home edwam gweꞌan.” Alap mo olak de gulk sun ol blaoranna in mo dam gulsunnu a kirekam moye: Em home edwam gweꞌan– Kristussu de ngatan zi mo lang nakon zerati gwezan hap, ahaksa juwen zi mo lang nakon de zerta gwe sezan hap, Zen dikim engaya gwen hap emsa mas gwibiridan hapye. Sap Kristus ebon mae onakon langanak hom.
⁷ (10:6)
⁸ Sap em dikim engaya gwen hap dena, zen Kristussu de taibliblan en nakon– ee men kirekame ol dawemna ol halada gwenanke. Zen zep Alap mo olak anakan lwak, “Ol dawemna in, ba hap de langa san teibin hip? Zen ere mae mo ek tihinak hen enhonak am lwaꞌan.”
⁹ Sap em de ere mo enho nakore taibliblanna insa zi mo inik anakan kira gunnu, “Yesus Zen ano Teipsinni,” hen enho nakon de anakan taibliblanna, “Desa eiwa mes Alap tin nikon ngaya taka,” ki em hen esa ngaya gwera.
¹⁰ Sap em de enho nakon taibliblankam, dekam em mese Alap mo nwenak dakastilida. Hen ere mo taibliblanna insa de zi mo inik kira gunnu, dekam em mese ngaya gwenda.
¹¹ Sap Alap mo olak man lwak, “Men zen de Biansa daibli gweblaꞌak, zen molya anakan eenlala gwe-gwek, ‘Ëe an waba habe taibliblak.’”
¹² Alap mo kirekam de gu-gubiridanna in, zen kitak de zi hip dena– sap Yahudi zi, sap hen Yahudi srem zi. Sap zeno mae mo Bianna aha-en, hen men zen Desa abe da gwenan, zebe mae hap man dawemna mamkam gol gwizimnira.
¹³ Sap Alap mo olak anakan lwak, “Men zen Biansa anakan abe daꞌak, ‘Asa em ngaya tan,’ zen zen sa engaya gwer.”
¹⁴ Hwena zini banakan sa abe da gwer? – zen de nama taibliblan sremkamye. Hen banakan sa daibli gweblal? – zen de nama zebe hap denaka esane gwen sremkamye. Hen zen banakan sa zebe hap dena esane gwe-gwer? – zi de tonbiridan sremkamye.
¹⁵ Hen zini banakan sa ol dawemna insa zebon mae osan dep nolsong gwe-gwer? – Alap de zisi zebon mae osan dep lup gul sonen sremkamye. Zen zep Alap mo olak anakan lwak, “Zini men zen Alap mo ol dawemna golhata zanna, zen isrip-sri gweblan tanganna.”
¹⁶ Hwena ol dawemna insa nolhalada gwenan tingare zini hom dokwak nul gwenan. Serkam tangan Yahudi zi. Sap zen kire hap dena Yesaya Bak mo olak man dakastiꞌin anakan in zen lwak, “Bian, ee insa eno ola ayang gul gwenan, hom dokwak nul gwenan.”
¹⁷ Sap Kristussu men zen daibli gweblaꞌan, zen diki men zen zebe hap de ol dawemna insa esane gwe-gwenanke.
¹⁸ Hwena Yahudi zi de esane gwen hap dena banakarekam Alap mo olak lwak? San zen maka anakan egu gweꞌan? – “Alap, bahem asa karek tan, sap ee home ol dawemna insa sak.” Hwena zen diki zen maka enlala hohle tan naban lowehe gweꞌan, sap Alap mo olak anakan am lwak, “Alap de kitak yang tabin hip de ola mes tingan etawa gwendal. Sap keis maesa de hlauludankam zen dekam maka Alapsa tame daꞌan.” Kirekam de dam gulsunkum, ki zen maka hen Alap mo Kristus hup de hamal hap de ola insa dawemkam daiblibik.
¹⁹ Hwena san ha Yahudi zini Kristus hup de ol dawemna hom yap tame nuꞌin? Zen diki nonol zen maka tame nuk, sap nonol tangan Musa Bak zebe mae hap Alap mo ola anakan ayang gulzimki, “Ëe asa syal gwibir– em dikim Yahudi srem zisi sisngin gwibirida gwen hap denaye, sap Ëe asa zebe mae hap dawemsa golzim. Hendep em esa Asa de tame tan srem zi ausuna insa jal eibirida gwer.”
²⁰ Hen Musa mo hyanak etan Alap mo ola ansa Yesaya Bak Yahudi srem zi hip dena damnak anakan ayang gulzimki, “Zi ausuna men zen Asa debla srem gwek, zen sa hwena Asa dam dasil. Hen men zen Asa tame da srem gwek, Ëe asa zebe mae hap Ënaka zertreizim.”
²¹ Hwena Yahudi zini abe mae hap dena Yesaya Bak sap anakan ayang gulku, “Ëe holo tangankame sap ere mo tahana Yahudi zisi de haen gwibiridan hap inin sosuk tine gwek, hwena nol drak-drak zi ausuna in hom mae Asa nasalblak.”