Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ On ma malim-malim ampa halak Levi, na tangkog rap pakon si Serubabel, anak ni si Sealtiel, ampa si Jesua, Si Seraya, si Jeremia, si Esra,

² si Amarya, si Malluk, si Hattus,

³ si Sekanya, si Rehum, si Meremot,

⁴ si Iddo, si Geneton, si Abia,

⁵ si Miyamin, si Maaja, si Bilga,

⁶ si Semaya, si Joyarib, si Jedaya,

⁷ si Sallu, si Amok, si Hilkia ampa si Jedaya. Ai ma kopala ni malim ampa sanina ni sidea bani panorang ni si Jesua.

⁸ Halak Levi, ai ma: Si Jesua, si Binnui, si Kadmiel, si Serebya, si Juda ampa si Matanya, ai ma sibobahon doding puji-pujian ampa sanina ni sidea.

⁹ Anjaha si Bakbukya ampa si Unni, sanina ni sidea, jongjong do patontang pakon sidea bani horja ai.

¹⁰ Ia si Jesua, ai ma bapa ni si Joyakim, si Joyakim bapa ni si Eliasib, si Eliasib bapa ni si Joyada.

¹¹ si Joyada bapa ni si Jonatan, si Jonatan bapa ni si Jadua.

¹² Sanggah bani panorang ni si Joyakim, kopala ni malim mar sasaompung, ai ma: Humbani si Seraya, si Meraya; humbani si Jeremia, si Hananya;

¹³ humbani si Esra, si Mesulam; humbani si Amarya si Johanan;

¹⁴ humbani si Malluk, si Jonatan; humbani si Sebanya, si Josep;

¹⁵ humbani si Harim, si Adna; humbani si Merayot, si Helkai;

¹⁶ humbani si Iddo, si Sakaria; humbani si Gineton, si Mesulam;

¹⁷ humbani si Abia; si Sikri; humbani si Miyamin ampa humbani si Moadia, si Piltai;

¹⁸ humbani si Bilga, si Sammua; humbani si Semaya, si Jonatan;

¹⁹ humbani si Joyarib, si Matenai; humbani si Jedaya, si Ussi;

²⁰ humbani si Salai, si Kallai; humbani si Amok, si Heber;

²¹ humbani si Hilkia, si Hasabya; humbani si Jedaya, si Netaneel.

²² Humbani halak Levi, bani panorang ni si Eliasib, si Joyada, si Johanan ampa si Jadua do tarsurat kopala ni mar sasaompung, sonai malim-malim das hubani harajaon ni si Darius, halak Persia ai.

²³ Kopala ni halak Levi mar sasaompung, tarsurat do ibagas buku barita das ronsi panorang ni si Johanan, anak ni si Eliasib.

²⁴ Kopala ni halak Levi ai ma: Si Hasabya, si Serebya ampa si Jesua anak ni si Kadmiel pakon sanina ni sidea, na patontang pakon sidea jongjong, laho mamuji-muji ampa mangkatahon tarima kasih, romban hubani parentah ni si Daud, halak ni Naibata, marbanjei-banjei.

²⁵ Si Matanya, si Bakbukya, si Obaja, si Mesulam, si Talmon pakon si Akkub, ai ma sijaga horbangan, marjaga i lambung ni kamar parartaan, na i lambung ni horbangan ai.

²⁶ Manggoluh do sidea ai sanggah panorang ni si Joyakim, anak ni si Jesua, anak ni si Josadak, ampa sanggah panorang ni si Nehemia, panrajai ai, ampa malim Esra, sibotoh titah ai.

²⁷ Sanggah na laho mamestahon tembok ni Jerusalem ai, ipindahi sidea ma halak Levi bani ganup ianan ni sidea laho mangarahkon sidea hu Jerusalem, laho mamestahon tembok ai marhasoman malas ni uhur, marhasoman tarima kasih ampa doding, marhasoman arbap, sordam ampa husapi.

²⁸ Roh ma martumpu ginompar ni halak sipandoding hun tanoh inggot ni Jerusalem ampa hun huta-huta ni halak Netopati.

²⁹ Sonai homa hun Bet-Gilgal ampa hun talun Geba pakon Asmavet; ai inggot ni Jerusalem do ipauli halak sipandoding ai huta ni sidea.

³⁰ Jadi iuras malim ampa halak Levi ai ma dirini; iuras sidea ma homa bangsa ai, horbangan ai pakon tembok ai.

³¹ Dob ai huhatahon ma kopala ni Juda naik hu tembok ai, anjaha huangkat ma dua tumpuan banggal sipandoding, na mardalan marodor. Sada laho dompak siamun i atas tembok ai hu horbangan parnapuan.

³² Irik hubani sidea mardalan ma si Hosaya ampa satongah kopala ni Juda.

³³ Sonai homa si Asarya, si Esra, si Mesulam,

³⁴ si Juda, si Benjamin, si Semaya ampa si Jeremia,

³⁵ ampa deba humbani anak ni malim marhasoman tarompit: Si Sakaria, anak ni si Jonatan, anak ni si Semarya, anak ni si Matanya, anak ni si Mikaya, anak ni si Sakkur, anak ni si Asap;

³⁶ ambah ni ai sanina ni sidea: Si Semaya, si Asareel, si Milalai, si Gilalai, si Maai, si Netaneel, si Juda ampa si Hanani rap pakon parugas musik ni si Daud, halak ni Naibata ondi; si Esra, sibotoh titah ai do mardalan i lobei ni sidea.

³⁷ Bani horbangan bah tubuh ai, tontang ni sidea, inaiki sidea ma andar ni si Daud; ijai ma naik tembok ai hu atas, hun lambung rumah bolon ni si Daud; anjaha mardalan ma sidea das hu horbangan bah hampit hapoltakan.

³⁸ Tumpuan pandoding na paduahon ai laho ma dompak sambilou, irik hubani sidea do ahu mardalan rap pakon satongah bangsa ai, i babou ni manara pamurunan ai das hu tembok na lumbang ai,

³⁹ hun lambung ni horbangan Efraim, horbangan Na Matua ampa horbangan Dengke ai, ampa hun lambung ni manara Hananeel ampa manara Meeya das hu horbangan Biribiri; anjaha i horbangan Parjagaan ma sidea maronti.

⁴⁰ Dob ai jongjong ma tumpuan pandoding na dua ai i rumah ni Naibata, sonai homa ahu ampa satongah kopala-kopala na rapkon ahu ai,

⁴¹ ampa malim-malim: Si Eliakim, si Maseya, si Miyamin, si Mikaya, si Elioenai, si Sakaria ampa si Hananya, martarompit bei;

⁴² ambah ni ai si Maaseya, si Semaya, si Eleasar, si Ussi, si Johanan, si Malkia, si Elam ampa si Eser. Anjaha mandoding ma sipandoding ai binobahon ni si Jisrahya.

⁴³ Igalangkon sidea ma galangan banggal bani ari na sasada ai anjaha marmalas ni uhur, ai ipamalas Naibata do uhur ni sidea marhitei malas uhur banggal; parinangon ampa dakdanak pe marmalas uhur do, pala tarbogei das bani na daoh malas ni uhur ni Jerusalem ai.

⁴⁴ Lanjar bani panorang ai ma homa ipabangkit sidea halak, na manramotkon kamar panimpanan ni arta, guguan, limbuah pakon parsapuluhan, laho patumpuhon hujai guguan bani malim ampa halak Levi, na dob tinontuhon marhitei titah, mangihutkon buei ni juma ni ganup huta; ai malas do uhur ni Juda mangidah malim ampa halak Levi siparugas ai.

⁴⁵ Idalankon sidea do parsombahon bani Naibata ni sidea ampa horja pangurasion ai, sonai homa halak sipandoding ampa sijaga horbangan, romban hubani parentah ni si Daud pakon si Salomo, anakni ai.

⁴⁶ Ai humbani sapari nari, olat ni si Daud, sai ginompar ni si Asap do kopala ni pandoding, mambobahon doding puji-pujian ampa tarima kasih bani Naibata.

⁴⁷ Halani ai, sanggah panorang ni si Serubabel ampa si Nehemia ganup halak Israel mamberehon guguan siganup ari hubani halak sipandoding ampa sijaga horbangan; ibere sidea do homa sibere-bere na pansing bani halak Levi, anjaha halak Levi mambere parbagianan ni ginompar ni si Aron.

Nehemia

Video Nehemia 12

Ikuti Kami:

KONTAK | PARTISIPASI | DONASI