Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Niniwe, kam sangana iperang. Kuasa si engkernepken kam nggo reh. Pesikap bentengndu! Jagai pasar-pasarndu! Erbenting kibullah lako erperang!

² (Iulihken TUHAN kap AteNa kemulian Israel, bali ras tupung imbang-imbangna langa ngerampasi ia.)

³ Tentera musuh maba ampang-ampang megara, ipakena seragam megara. Nggo sikap ia nerangsa! Gereta perangna erndilap bagi api! Kudana ernengkat-nengkat!

⁴ Gereta perangna meter perdalanna i bas pasar-pasar, si ayak-ayaken i babo taneh lapang. Har-har bagi obor gara, si lebe-leben desken kilap sumagan.

⁵ Tentera si mbisa idilondu, tupung maju erdalan tertuktuk ia. Kalak si nerang kiam kempak tembok kota, nggo ipajekken i je perkakas ngeruntuhken tembok.

⁶ Pintu gerbang deherken lau mbelin nggo talang, istana nggo guntar.

⁷ Kemberahen nggo ibaba tertaban, tangis ngandung dayang-dayangna, bali ras ndarapati si ndengep, itemtemina tentenna, ceda kal atena.

⁸ Bali ras lau sampuren mburtas, bage me perkiam kalak i Niniwe nari. "Ngadi! Ngadi!" nina kalak si erlebuh. Tapi la lit si nulihkenca.

⁹ Rampokilah pirak! Rampasilah emas! Kota e dem alu erta-erta!

¹⁰ Niniwe nggo kernep, jadi taneh melungen si terulang. Picet kal ukur, perban mbiar, tiwen nggirgir, gegeh bene, ayo jadi mbulan.

¹¹ I ja genduari kota e? Si nai bali ras ingan singa, jadi ingan anak singa ibere nakan, ingan singa ras beruna erdalan-dalan, ingan anak singa nggeluh alu teneng.

¹² Singa njerngem si man panganna, jenari icaing-caingna man beruna ras anak-anakna, idemina liangna alu daging si nggo ijerngemna.

¹³ "Aku kap imbangndu!" nina TUHAN si Mada Kuasa. "Kututung gereta perangndu. Tenterandu maten i bas perang jenari Kubuat kerina si ibuatndu i bas kalak si deban nari. Kuasandu i doni enda lanai terbegi."

Nahum

Video Nahum 2

Ikuti Kami:

KONTAK | PARTISIPASI | DONASI