1 Ki zep etan gubiridaka, “Eiwa denakae emsa gubiridaꞌan: Em an zene awe lowe heꞌan, em molye ahakon na-en juwek– Alap mo yakla yalak de zaun sremnakye. Em esa Asa hla lal– Ëe kime zere mo soson yawala ban zere mo bosekam de irik gin hip hataꞌan zakye.”
2 Yaklana kim enam enkam damank, Yesus dekam zep zere hon de ang ta gwen wenya Petrus, Yakobus, hen Yohanis mae en han ze-en kwatap yawal san dep golesek gweka. Hwena dan-ahare zini in mo nwenak zep Yesus mo timni liwe heblak.
3 Zeno pakeanna man tangan serkam ngap-ngap neblak hen man nalilingtilbliꞌak. Okamanak de ngap-ngap kire-kirena, men ki ogom ngap-ngapna, zen man kitak lwala heꞌan– zeno ngap-ngap nakonye.
4 Ki zep hwena Musa Bak ne Elia Bak ne mumuk ennak jo ke zaka, hen Yesus hon de ang tan dan-ahare zini in ki zep ze nakek– zen kim Yesus hun eraisil gweꞌanka.
5 Petrus ki zep hwena Yesussu totoresa gubluka, “Bian, dawem tanganna– nen de awe lowehe gwen hapye. Zep ee asa gol kluksa dan-ahan syal eblandal– ahana Bian ere hap, ahana Musa Bak hap, hen ahana Elia Bak hap.”
6 Hwena Petrus insa kirekam gubluka, hyanak zena man saher gwibiꞌinka, “O ee an ba habe kirekam gublul!” Sap zen wal bose dare zem in han man serkam ziairiꞌanka.
7 Hwena butna ki zep ze wale tabirzik, hen butna iwe zep ola esak, “An ano Tane– ere mo dang tininak de tanganna. Desa em sal gweblan.”
8 Zen nabal-bakam zep sap men-san an-sankam ekaratda gwendak, hwena zi maena hom ze hla dak. Hwena Yesus Zena en naka ze hla dak.
9 Kwatapna in kon kim etan goletine gweꞌanka, zao zep gubiridaka, “In desa ki ena hla kul, etan aha maesa bahem gubiridan– ngatan zi mo lang nakore Zi Tanganna Ëe de nama tin nikon ngaya gwen sremnakye.”
10 Zen man Yesus mo ol jalse gwibiridanna in san ang tak, hwena ze-erenak zep ze-en anakan don gwibik, “‘Tin nikon de etan ngaya gwenna,’ zen banakarekam sa lwal? Nen home dam ulsuꞌun.”
11 Dan-ahare zini in dekam zep hwena dakensiblik, “Elia Bak mes-am lwa hala. Ëe hwena ama tim ul, ‘Zen sa Emsa ngeirbli zala.’ Sap Musa mo olsa de tawa ta gwibin hip de zini kirekam am egu gwenan, ‘Zen diki nonol Elia Bak sa etan lwahal zankam ngeirbli zala, ki sa hwena nesa de ngaya tabin hip de Zini hata zala.’”
12 Yesus ki zep hwena ding gulzimki, “In sap eiwa kirekamke. Elia zen sap kirekam-kirekamsa de nonol sul sone gun hup de zini zen– Israelsa de ngaya tabin hip de Zini Ëe de hwena kirenak hatazan hap. Hwena Alap mo ola ahana hen ki, kirekam de hen Abon jowen hap dena– men zen anakan lwakye, ‘Ngatan zi mo lang nakore Zi Tanganna sa baes neblal, hen karekna mam tangan naka sa goltowe gwera.’
13 Hwena ee ama emsa gubiridaꞌan, Elia zen sap mes eiwa Asa ngeirbli zaka, hwena zini zere mae mo dwam gwibin sin kirekam-kirekam karek-karek ensa nol gweblak– men kirekam hen zebe hap dena Alap mo olak hamal hap lwakke.”
14 Yesus kim etan zere hon de ang ta gwen zi dan aharena in han golelwandahal zaka– ahakore zere hon de ang ta gwen wesyan dep, hwena zi beyam-bya naban zep ze hla nulidaꞌak. Musa mo ol tawa ta gwibin wenyik ze Yesus hon de ang ta gwen wenya in han noleol tetek gweꞌak.
15 Hwena Yesus Zenaka kim hla da guk, ausa zep anakare hap nohlo gubluk, “Zena man hataꞌara.” Dekam zep hut tu ane gun hup ehlu-hluk gwezak.
16 Yesus ki zep takensibiridaka, “Em ba habe eol tetek gwesan?”
17 Hwena zini ki zep zi trana in kon ding gulbluka, “Bian, ee ere mo walassae ebon dep zer halzal. Dowal til gweblanda, zep tol ol srem gweka.
18 Dowala in kim til gweblanda, dekam zep ek tutum nuban kamanak zenaka zerheir isen gwenda. Ëkna dekam zep hen ngalk-ngalk so gwenda, hendep dekam zep tingare timni kyang-kyang gwe-gwenda. Ëe mese sap ere hon de ang ta gwen wenya zeralsa sonen hap gubiridal. Hwena man sap nakablal.”
19 Yesus ki zep gubiridaka, “Eiwa, angkam de zini em ei nibarena hom tangan! Ëe san ese nakae sap emsa golelowehe gwek?! Ëe ama bae– eban mae de holokam golelowehe gwen naye. An san emki walasna insa zerhalzan.”
20 Ki zep ner halzak. Dowala in kim Yesussu hla taka, dekam zep walasna insa yal-yal taka, ki zep hendep kamanak zerheirki, zao zep ek tutum nuban ololo gweꞌanka.
21 Yesus ki zep bi zemka takensiblika, “Dowala in bawalkam kon gwesibli hanaka– kirekam de gwe gweblan naye?” Ki zep ding gulbluka, “In beteknak ki hendep til gweblaka.
22 Dowala in syauknuk de zerheir gwenna mes beya taka– hen honak de keing ta gwen naye. Zen kire tangankam tan hap am ki gweblaꞌara. Hwena eno soson de kirekam lwablankam, emki tol asa kwasang gwizimdin hen mas gwizimdin.”
23 Yesus ki zep hwena jalse gweblaka, “Ha! Em bap kirekam Asa gublula, ‘eno soson de kirekam lwablan’kamye? Ki em home Asa taibliblaꞌara. Em de Asa taibliblankam kina ki banakare maena man? Ëe de ebe hap syal gwibir-blin srem hap denaye!”
24 Bi zem in dekam zep hendep ol mamkam gu aneka, “Ëe sap ama Emsa taibliblaꞌan, hwena sowehen tangankam home. Emki ano Emsa de taibliblansa ap esek gul seblan!”
25 Yesus kim hlauludaka, “Zini angkam man hlu-hluk gwe-gwe zankam Asa dot dasiꞌin,” ki zep dowala insa gubluka, “I srem hen ol srem dowal, walasna an kon em wet son. Bahem etan tilblin.”
26 Dowala in ki zep herheka, etan ki zep walasna insa karek tangankam yal-yal taka, ki zep hendep zebon onakon wet soka. Walasna in tok makan zep ze lwaꞌanka. Zi beyam-byana in dekam zep nenblak, “In mes tilida.”
27 Hwena Yesus ki zep taha nakon de zer inenkam li taka. Dekam zep hendep dawem gweka.
28 Yesus kim ze-en golak gweꞌanka, zere hon de ang ta gwen wenya dekam zep ze-en du neblazak. Zao zep dakensiblik, “Bian, ee ba hap tangane dowala insa eralsa sone srem gwer?”
29 Ki zep ding gulzimki, “Kirekam de dowala, toton banakare aha maekam bejen zeralsa sonen. Zen aha-en diki Alapsa de abe ta gwen enkam de zeralsa sonen.”
30 Yesus dekam zep zere hon de ang ta gwen wenya langna in kon golesek gweka, Galilea san zep goletaman gweka. Zen hom dwam gweka zi de anakan tawa gweblan hap, “Yesus zewe gweꞌara.”
31 Sap Zen dekam dua-blaskam de wenya in ensa tawa ta gwibiꞌinka. Zen anakan tawa ta gwibiꞌinka, “Ngatan zi mo lang nakore Zi Tanganna Asa sa jal zi mo tahanak dep tapbla dazim. Zen sa hendep Asa dal, hwena yaklana dan-ahan ki asa etan tin nikon ngaya gwer.”
32 Hwena zere hon de ang ta gwen wenya hom tame nul gweꞌak– insa kirekam tawa ta gwibiꞌinkaye. Hwena takensiblin hap man nairiblak.
33 Kapernaumk kim dua-blaskam de zini insa goleyaing gweka, golak kim golebiti gweka, zao zep takensibiridaka, “Em oranak basae ol eibir sinzal?”
34 Zen hwena man nasalsiblik, sap oranak zen eiwa man mae hap eol gwezak, “Diki ee amaka nere mae onakon mam gweꞌan.”
35 Yesus ki zep tagal gwesin hip gubiridaka. Zena dekam zep nikin aneka– dekon de tawa tabin hip. Ki zep gubiridaka, “Kitak esane gwek. Zi de Alap mo irik ginnik mam gwen hap dwam gwenna, zen diki tingare zi mo babu gwen zi makan zen gwen. Zen dekam sa Alap mo nwenak mam gwera.”
36 Ki zep hwena walas tola haen gweblaka, dekam zep zeno mae mo nwenak de zaun hup gubluka, zao zep babang tan naban gubiridaka,
37 “Zini men zen de ano bose hap aha zisi mas gweblaꞌanka– sap anakare walas tol maesa, Ëe asa desa enlala gweblal, ‘Zen Asa mas gweblaꞌara.’ Hen zi de Asa mas gweblanna, Alap men Zen Asa zer soneka, Zen sa desa hen enlala gweblala, ‘Zen hen Asa dekam mas gweblaꞌara.’”
38 Ki zep hwena Yohanis gubluka, “Bian Guru, ee zisie hla lak– eno bosekam de dowalsa golealsa sone gwennak. Ëe zebe jalse eblak, sap zen nebon mae de ang gwe-gwen naka hom.”
39 Ki zep hwena gubiridaka, “Em bap jalse eblak, sap zi de ano bosekam owassa syal gwibinni, kirekam de zini bejen nabakam Asa lamang tan.
40 Sap zini men zen nesa baes neibirida srem gweꞌan, zen zen– nebon mae onak dep denaye.
41 Eiwa denakae emsa gubiridaꞌan: Zi de ano bose hap emsa mas gwibiridanna– aha-ere ho mok mae tolsa de anakare enlala naban golblankam, ‘Zen Kristussu de ang gwe-gweblanna,’ ki Alap sa zebe hap hen dawemna lamkam golblala. Zen molya golbla srem gweka.
42 “Men nara Asa de taibliblan zisi, sap hen anakare walas betek maesa, karek san dep zertoranna, zen dikim hwena Asa hli tan hap, kire zini Alap serkam tangan sa karek tala. Diki dawemna, zen maka zertoran sremnak karekkam de tinsi hlaulku. Kaso dohon-honsa de holenak hule soneblan naban de hi tateknak hiri tan maekam, ki zen molya karek san dep zertonnanam, hen Alap molya karek taꞌanam.
43 “Emsa de ere mo aha taha anakan titi da gweꞌanam, ‘Haen, karekna ansa nen on,’ diki dawemna em blansin. Sap eme dare taha naban zigweꞌanka, ki esa hendep Asa hli tala. Ki hwena tinsin srem syauknuk esa hendep denaban gwe gwera. Blansinkim ki emaka sam gwesiꞌira– aha-ere taha naban de Alap onak gwe gwen hapye.
44 (9:43)
45 Hen kirekam, emsa de ere mo aha tana anakan titi da gweꞌanam, ‘Kareksa de gon hap nen song en,’ diki dawemna em blansin. Sap eme dare tana naban zigweꞌanka, ki esa hendep Asa hli tala. Ki hwena tinsin srem syauknuk dep sa emsa hiri daser. Blansinkim ki emaka sam gwesiꞌira– aha-ere tana naban de Alap onak gwe gwen hapye.
46 (9:45)
47 Hen kirekam, emsa de ere mo aha nwe titi da gweꞌanam, ‘Haen, nen karekna wakinsa karatda un,’ ki nwena insa em alsin. Sap eme dare nwe naban zigweꞌanka, ki esa hendep Asa hli tala. Ki hwena tinsin srem syauknuk dep sa emsa hiri daser. Men zewe kirekam de zini yal nulse gwenan, ‘zao blena hendep denaban zeno mae mo timni hlok dasik gwibirin, hen zen man hendep denaban syauk sal-sal ngirin nikon sang-sangna neis gwibirin.’ Alsinkim emaka sam gwesiꞌira– aha-ere nwe naban de Alap onak gwe gwen hap, Zen kim de kitak irik giꞌinkaye.”
48 (9:47)
49 Yesus ki zep gulk sun de ol blaonzimdinni dan mas sozimki: “Zep zini tingan syauk sal-sala sa neis gwibir. Ahakon okama ennak sa neis gwibir. Hwena ahakon, zen hendep de tangan naban sa neis gwibir.
50 “Em an zene Abon onak ang ta gweꞌan, em okamanak san de hina kiye. Hina zen sap tembanesa de derek gun hup dawemna. Hwena bleble gwenkam, dekam tembanesa dikim derek gun hup dena man hom gwe-gwenan. Hwena em bahem hi mo kim derekna ehom gwen. Ki hwena em molye aha-ere enlalakam lowehe gwek.”

Studi Alkitab lengkap, silahkan lihat Alkitab SABDA :: Markus 9
Studi Alkitab mobile, silahkan lihat Alkitab Mobi :: Markus 9
Studi Alkitab dengan Video LUMO, silahkan lihat LUMO Indonesia :: Markus

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke