¹ Zao hom tangan holo gweꞌak, ki zep zi beyam-byana Yesus onak dep tagal gwezak. Tembanena kim tap gwizimki, Yesus ki zep zere hon de ang ta gwen wenyaka haen gwibiridaka, zao zep gubiridaka,
² “Ëe ama zi trana ansa dawemkam kwasang gwibiridaꞌan, sap zen mes dan-ahare yaklakam awe Asa nergwek, hendep angkam zeno mae mo tembanena mes tangan tap gwizimdi.
³ Ëe de usak naban de sek gwen hap gubiridankam, zen sa hwena ora san etilsik song gwer, sap ahakon an langa nakon yaing gwezak.”
⁴ Zere hon de ang ta gwen wenya in ki zep ding nulblik, “Zi srem langna awe, tembanena endawe esa ol? – dekam de zi beyam-byana ansa sul sonen hapye.”
⁵ Ki zep hwena takensibiridaka, “Eno mae mo rotina banakaꞌen?” Ki zep ding nulblik, “Tuju enkam.”
⁶ Yesus ki zep zi beyam-byana insa teinikin niran hap gubiridaka. Ki zep tujukam de rotina insa kap taka, dekam zep Alap hap dawemna golblaka, ki zep hwena ahap tabirki. Desa zep zere hon de ang ta gwen wenya kip etan-etankam kap ta gwizimꞌinka– zen dikim kae gwibin hip.
⁷ Hogwe bete-tekna hen da-en ze nolaꞌak. Yesus etan hogwena in hap dawemsa Alap hap golblaka, ki zep hen gubiridaka– dekam de hen kae gwibiridan hap.
⁸ Kim dwenblandak, zen man tangan eitri gwek. Mosrona kim tagam dak, yu yawal-yawala tuju enkam zep esuwek.
⁹ In zen tembane tak beyana san ha empat ribu enkam mes yap. Yesus ki zep sekwak gwen hap gubiridaka.
¹⁰ Zena zere hon de ang ta gwen wenya ban dekam zep hendep Dalmanuta mo lang san dep bulkum golesek gweka.
¹¹ Farisikam de gubirida gwen zini ki zep Yesus hun de ol zerkeisa-keisa gwen hap yaing gwezak. Zen dekam de akasiblin hap anakan abe dak, “Emki ngli nakore owassa ap syal gwibir-zimdin. Zen dekam asa emsa anakan laibliblal, ‘Zen eiwa Alap onakon hata zaka.’”
¹² Yesus nonol enlala dowe hanan naban zep ensasana langa tasiki, ki zep gubiridaka, “Em bap auhu-kama enlala zini ngli nakore owassa de ebe mae hap syal gwibir-zimdin hip Asa abe lal. Eiwa denakae emsa gubiridaꞌan: Em makare zi hip Ëe bejene owassa syal gwibir-zimdin.”
¹³ Kirekam kim gubiridaka, ki zep ze hendep hli yuluda guk halka. Bulkum zep zere hon de ang ta gwen wenya ban men eihya san dep goletablan gwe kinika.
¹⁴ In kim bulkum sek gwek, Yesus hon de ang ta gwen wenya hwena hom tembanena sowe henkam kap dak. Rotina hwena aha-en tol ing nuk.
¹⁵ Yesus ki zep ola gulk sun blaonzimki, “Dawem. Terya-tyakam lowehek. Farisi zi mo ragisa ema ing ulink. Hen Herodes moka ema hen ing ulink.”
¹⁶ Zere hon de ang ta gwen zini in hom anakan dam nulsuk, “Kire hap ki asa gubiridala,” zep hwena zenaka donbiridaꞌak, “Nen home rotina biti lazal. In zep ki nesa gubiridala.”
¹⁷ Yesus hwena mes tawa gwibiridaka– insa zenaka donbiridaꞌak, ki zep gubiridaka, “Em ba habe roti biti tazan srem hap enaka lonbiridaꞌan? Em ba hap tangane tame ul srem gwe-gweꞌan?! Em in eiwa enlala joblo-topna.
¹⁸ Em dwan nwena kike. Em ba habe hla kul srem gwe-gweꞌan? Em dwan ini kike. Ba habe egwe gweꞌan? – san de esan sremna. Em san home enlala eibiꞌin?
¹⁹ Mensa aha-ere taha-tapkam de rotina lima ribukam de zi hip ahap tabir-zimk, dekam tembane mosrona kime tagam lasik, yuna banakaꞌen esuwek?” Ki zep ding nulblik, “Dua-blas enkam.”
²⁰ “Hen mensa empat ribukam de zi hip tuju enkam de rotina ahap tabir-zimk, dekam tembane mosrona kime tagam lasik, yu yawal-yawala banakaꞌen esuwek?” Etan ki zep ding nulblik, “Tuju enkamke.”
²¹ Dekam zep gubiridaka, “Ki em ba habe tame ul srem gwer? Ëe san rotisa de biti tazan srem habe emsa gubiridal.”
²² Betsaidak kim yaing gwek, zi nwe diminni ki zep Yesus onak dep ner halzak, zao zep abe dazak, “Bian, emki zi nwe diminni ansa tahasa tehabla inen– dekakim tol etan nwesa kara gweka.”
²³ Yesus ki zep ena in kon tahakam irik ta halka, zao zep oltepkam nwena insa dra soblaka, ki zep tahana nwenak tehabla ineka. Tahana insa kim teisyasiki, ki zep hwena takensiblika, “Em wehe dawemkam hlauludaꞌara?”
²⁴ Zini in dekam zep kara gweka, ki zep ding gulbluka, “Kie. Ëe kie zini kara tabiꞌin, hwena san de te de ete naseranna kiye.”
²⁵ Yesus ki zep etan nwenak tahana tehabla ineka. Dekam tangan zep dawemkam kara gwen hap alp gweka. Dekam zep hendep nwena in etan serkam tangan dawem neblak, hendep lalak tangankam kitak kara gweka– men kiye, dimin neblan sremnak kim gwekake.
²⁶ Yesus dekam zep gubluka, “Dekam gol san song gwe. Hwena e san bahem tamaran, ki sa anakan etawa gwer, ‘Zen mes dawem tala.’”
²⁷ Yesus ki zep zere hon de ang tan wenya ban e bosena Kaesarea-Pilipi mo golek de san de e-e san golesek gweka. Oranak zep takensibiridaka, “Zi mo Asa de dam tasinkim, Ëe an nara mo weinak debe hatazak?”
²⁸ Ki zep ding nulblik, “Ahakon man emsa nen gweblanan, ‘In baptis ta gwibin zini Yohanis Swe tin nikon etan ngaya gweka. In zen hwena Yesuskum bosena li yul soneka.’ Hen ahakon man emsa nen gweblanan, ‘In Elia Bak mo weinak Alap mo olsa ayang gul gwizimꞌira.’ Hen ahakon man emsa enlala ne gweblanan, ‘Zen diki ahanik mo weinak dep jowe zaka– men zen orep Alap mo ola ayang nul gwekke.’”
²⁹ Ki zep etan takensibiridaka, “Hwena ere mae mo Asa de dam tasinkim, Ëe an diki nara mo weinak dep dena?” Petrus zep ding gulbluka, “Bian, Em in Zen– Israelsa de ngaya tabin hip de Teipsin niye.”
³⁰ Ki zep hwena jalse gwibiridaka, “Asa insa kirekam dam lasinin, aha maesa hwena bahem gubiridan.”
³¹ Yesus ki zep kon gwisibir hanaꞌanka– zere hon de ang ta gwen wenyaka de anakan tawa tabinkim, “Alap mo dwam gwibinni abe hap dena a kirekam sa lwal: Ngatan zi mo lang nakore Zi Tanganna Ëe karekna mam tangan naka asa goltower. Yahudi mo nol-nola ban, Alap mo golak de syal tan zi mo mam-mamna, hen Musa mo olsa de tawa ta gwibin zi niban sa Asa baes neblal. Ki sa hendep Asa dal. Hwena yaklana dan-ahan, ki asa etan tin nikon ngaya gwer.”
³² Zen dam-dam enkam kirekam gubiridaka– zen de karekkam dam gulsun srem hap. Petrus ki zep hwena Yesussu ora nakon de asyal hehan hap gubluka, zao zep anakan jalse gweblaꞌanka, “Em bap kirekam gulu! Kina ki bejen kirekam lwan.”
³³ Hwena Yesus ki zep lure san ahakore zere hon de ang ta gwen wenyaka lero gwibiridaka, ki zep zeno mae mo inik Petrussu anakan jalse gweblaka, “Em in dowal mo kigi! Ki lun em gwen. Eno kirekam de enlalana in Alap mo dwam gwibin sin denaka hom. Zen auhu-kama zi mo dena.”
³⁴ Dekam zep Yesus zi trana insa hendep zere hon de ang ta gwen wenya ban haen gwibiridaka, ki zep ze gubiridaka, “Men nara Abon de ang gwe-gwen hap dwam gwenna, zen diki zere mo gwenna zen eititi gwibin– dekam de zere hap de te-lidak son we son naban Asa zertronda gwen hapye, anakare enlala naban, ‘Ëe sap asa Yesus hun apdenak lil.’
³⁵ Sap men zen de zere mae mo auhu-kamanak de gwenna anakan nolairi gweꞌak, ‘Ëe babe Yesussu de ang gwe-gweblannak karekna goltowe gwen,’ ki zeno mae gwenna in sa jek-jak gwer. Diki men zen Asa de ang gwe-gweblan hap hen abe hap de ol dawemsa de gol halada gwen hap zere mae mo gwenna sosok nul gweꞌak, hendep zao mae de tin hip, zen zen sa hendep denaban engaya gwer.
³⁶ San ha dawemna? – em de serkam te-ala beya gwenkam kitak de okamana ansa bi gwibinni, dekam de hwena ere mo gwensa tihis gin hip. Kirekam dawem naka hom!
³⁷ Tinkim san ha emaka te-ala beyana inkam ba maesa Alap hap golblaꞌara? – dekam de etan ngaya gwen hapye. Kina ki bejen.
³⁸ “Auhu-kamanak de zini man Alapsa hli da gwenan– dekam de dowal-dowalsa ang gwibirida nasen gwen hap, hen kirekam-kirekam kareksa dikim gulin halasen gwen hap. Hwena Abon de ang gwe-gwen zini em de zeno mae mo ngirin nikon anakan de gunsu saher gwenna, ‘Ëe Yesussu de ang gwe-gweblan zi,’ ki ngatan zi mo lang nakore Zi Tanganna Ëe kime Bian mo ngatan naban hen soson naban zeno dam taha nakore zi niban goleyaing gweꞌanzak, Ëe molye hen emsa anakan kira tak, ‘Zini an eiwa Asa de ang gwe-gweblanna.’”