¹ Yesus dekam zep dekon zere hon de ang ta gwen wenya ban zere mo ena Nazaret san dep golelwanda halka.
² Hari Sabatnak kim zauk, Yesus zep zewe de but srem golak tawa tabirki. Zi beyam-byana men zen sane daꞌak man tangan denggwanblaꞌak. Zep ze hwena donsubluꞌak, “Zini an endawe sekola gweka? – zep kil giꞌira, ‘Ëe asa tawa tabir.’ Hen owas-owassa de syal gwe-gwibin hip de sosonna endawe sa gul iri?
³ An dwan zenke– gol syal gwe-gweblan zi niye, Maria mo tane sake. Zeno oso walya Yakobus, Yoses, Yudas, hen Simon. Hen zeno somol walya awe am hen lowe heꞌan.” Sap zen mes kirekam tame dak, zep baes neblak.
⁴ Hwena man ding gulzimki, “Zini kirekam egwe gwenan: Men-kore men-kore e nakon, Alap mo ol ayang gul gwen hap de zini man blikip neisibirida gwenan. Hwena zere mo iye, ahaksa zere mo e nakore nik de kirekam ayang gul gwizimdinkim, desa hom tangan blikip neisibirida gwenan.”
⁵ Zen in zep Yesus zewe owas-owasna beyakam syal gwibir-zim srem gweka, sap zen hom daibliblak. Hwena zi sang-sang ensa ze dan en dawem tabirki– tahasa de tehabirida ine gwenkam.
⁶ Sap zere mo enak de zini kirekam daiblibla srem gwek, zep tangan tenggwanbiridaka. Ki zep hwena e-e san amjanbir song gweka hen desan tawa tabirida gweka.
⁷ Ki zep hwena dua-blaskam in zen ang ne gweblak, desa kwang guludaka, zao zep gubiridaka, “Em dan-dan dan-dankam e-e san sek gwen. Ëe asa ere mo sosonsa ebe mae hap golzim– dowal-dowalsa ekakim olealsa sone gwibik.
⁸ Bahem ba maena ora san dep lop tan. Dute ensa leirenk. Tembanena hen bahem lop tan. Honna bahem wewek tan, hen te-ala maena bahem kap tan.
⁹ Sepatu enna amki alala lak, hen bajuna tim ennak dena kim sek gwek.
¹⁰ Gol karek mae nakon de emsa teisya irinni, ‘Haen, awe se keza,’ zen zewe en emki en. Bahem dekon etan gol dawem san dep al ehan.
¹¹ Hwena men dekore e nakon emsa anakare ola ban teisya irin sremna, ‘Em ba habe awe aptanan zala? Ëe ama emsa de salzimdinni baes taꞌan,’ zen dekam em hendep dekon song en. Ë topnak em tana sonsa taik-tik oso guk kinin– dekakim anakan tame nuk, ‘Zen sap Alap onakore ol dawem naban nebe mae hap olhatazim zira, hwena nen insa lesya-in srem gwenan nere mae hap de kareksae kim mam ulin.’”
¹² Zen dekam zep dan-dan dan-dankam sek gwek, hen anakan tawa dabir-song gwek, “Ere mae mo karek-karek nakon em ehalen.”
¹³ Hen dowal-dowala beya tangan naka nolealsa sone gwibik, hen zi sang-sangna Yesus mo bosekam de minyak zaitunkum dra tabinkim beyakam dawem da gwibik.
¹⁴ Galileak de teipsin zini Herodes Bak kim zere mo osona Pilipus mo wenya Herodiana Baksa al gulbluka, hwena baptis ta gwibin zini Yohanis zep damnak anakan jalse gweblaka, “Musa mo titi tabin ola kon, em sap diki bejen em oso uk mo wenya gon.” Hwena Herodes dekam zep zere mo jana nabare zisi Yohanissi de bwinak tahalen naka tak ta irin hip gubiridaka.
¹⁵ (6:14)
¹⁶ (6:14)
¹⁷ (6:14)
¹⁸ (6:14)
¹⁹ We zem in, Herodiana Bak, zen hen man enlala ennak Yohanissi tail gik gweblak. Zen man sap Yohanissi de tan hap enlala gwe-gwek, hwena Herodes de gubiridan sremkam bejen tan.
²⁰ Sap Herodes hen man Yohanissi airi gweblaka, sap zen man enlala gwe-gweblaka, “Yohanis zen zini dawemna. Alap zer soneka.” In zep tan hap jalse gwibirida gweka. Herodes hen man zeno olsa de sane gwen hap dwam gwe-gweka, hwena hyanak zep etan zeno enlalana anakan dowebla hana gweka, “Ëe banakan asa gweblal? Zini an Alap mo zer sonen nakake.”
²¹ Hwena Herodes zenaka de jaha gweblan yaklanak kim hatak, tembane yawalsa zep syal neibik. Tingare irik ginnik de mam-mamna hen jana nabare zi mo mam-mamna, hen Galilea kore nol-nola, zen man ze yaing gwezak, zao zep apdekam tembane tak. Zen dekam zep zauk– Herodiana mo baptis ta gwibin zini Yohanissi de tail gik gweblanna in dikim jowen hap denakye.
²² Tembane tanna iwe, Herodiana mo wenam seiwiri man hen tilzik, zao zep tingare zi mo nwenak zisya gweꞌak. Herodes man tangan sam gwesibirki, hen tingare zi trana in man tangan sam neisibik. Herodes ki zep wenam seiwiri insa gu-gubirki, “Men desae ki ena abe gwibiꞌinka, zen desa asa ki hendep ebe hap golbir.”
²³ Zen kirekam wenam seiwiri insa tingare zi mo inik gu-guk gwibiꞌinka, “Ngli naban kama naban mes asa nasalblanan: Ëe asa eno abe gwibinni insa ebe hap sul sonebir, hendep ere mo irik gin maena asa ep hlilbir!”
²⁴ Wenam seiwiri in dekam zep an zem Herodianasa de anakan takensibin hip te sok, “Ëe basa asa dawem kire-kirena abe gwibir?” Dekam zep ding gulbik, “Baptis ta gwibin zini Yohanis mo nolsa de blaonin halzan hap em abe gwen– ee akakim anakan tawa gwek, ‘Zen eiwa mes tangan tili.’”
²⁵ Wenam seiwiri in ki zep nabakam Herodes osan dep lwa halzak, ki zep gubluzak, “Ëe baptis ta gwibin zini Yohanis mo nolakae abe gwibiꞌin– angkam de hendep ap piring niban awe lonebir anezan hap.”
²⁶ Herodes kim zeno abena insa salka dekam enlalana man tangan dowebla hanaka. Hwena etan bejen zeno abena insa wet gulsubin, sap zen mes ki zen zi tra mo inik kirekam etan-etankam gu-guk gwibiꞌinka.
²⁷ Dekam zep hendep zere mo jana nabare zini gubluka, “Em bwinak Yohanis mo nolsa ap blaonblin halzan.” Jana nabare zini in dekam zep hendep blaonblinhal zaka.
²⁸ Piring niban zep golhal zaka, ki zep hendep wenam seiwiri in hap golbir zika. Zen zep hwena an zikhip golbirhak.
²⁹ Yohanis hon de ang ta gwen wenya kim esak, dekam zep tok naka de zerhan hap yaing gwezak. Ki zep hendep kaso hulak nennek. Hwena zao kim lwa seꞌak, dekam zep hen etan Yesus hup de ola Herodes hon hatak, sap dekam mes Yesus mo syal hap dena e-e san etawa gwendak. Zep ahakon man egu gwek, “In eiwa, Yohanis Su Tabin Swe mes yap etan ngaya gweka. In zen hwena bosena Yesuskum li yul soneka. In zep zebon owas-owaꞌa dikim syal gwe-gwibin hip de sosonna lwaꞌan.” Hwena ahakon man egu gwek, “In orep de Alap mo ol ayang gul gwen zini Elia Bak mes yap– men zen Alap osan dep sewe sekake. Zen hom tilki, in zep Yesuskum hwena jowe zaka.” Ahakon hwena man egu gwek, “Ki hom. Zen Alap ese naka zer soneka– orep men kirekam hen lup gul sone gwekake.” Hwena Herodes kim salka, dekam zep guku, “Aha hom. An Yohanis Su Tabin Swe. Ëe mes-am sap zeno nolsa de blaonsublun hap gubiridak. Hwena in zen mes yap etan ngaya gweka!”
³⁰ Dua-blaskam de zere hon ang ta gwen wenya– mensa zena lup gul soneka, ki zep etan Yesus onak dep lwanda halzak. Zao zep donblazak– mensa zena syal tandak hen tawa dabiridakye.
³¹ Hwena zini hen beya tangan nik yaing gwe-gweꞌanzak, hendep Yesus zep zere hon de ang ta gwen wenya ban golehir-hir gweꞌanka– hendep goletembane tan maena ba kon dep? Yesus dekam zep zere hon de ang ta gwen wenya insa gubiridaka, “Haen, awe bejen nen teinikirin. Nen ne-en zi sremnak de teinikirin hip sek gwen.”
³² Ki zep hendep bulkum egwahak– zao de ze-en lowehen hap.
³³ Hwena zi beyam-byana in mes egwa hannak hla nulida sonek, hen zen mes anakan tame dabik, “O an Yesus maeke!” Zep e-e nakon beya enkam eik ora san ehlu-hluk gwek, hendep zen zep nonol yaing gwek.
³⁴ Yesus kim bulu kon ati gweꞌanka, ki zep zi beyam-byana insa hlauluda kinika. Zen serkam ze kwasang gwibiridaka, sap zen bi srem zaho makan ze lowe heꞌak. Zep ze mamkam tawa tabirki.
³⁵ In kim tawa tabiꞌinka, zao zep hendep kaweꞌak. Dekam zep zere hon de ang ta gwen wenya Yesussu nenblazak, “Angkam man kaweꞌan, hen langna an tahalha tanganna.
³⁶ Diki dawemna zini an emaka zen de langna awe de golek de e-e san te-alakam tembane hap ehakan hap enbiridaꞌan.”
³⁷ Hwena Yesus ki zep ding gulzimki, “Amki em tembanena zebe mae hap hen olzimk.” Dekam zep ding nulblik, “Asya! Nen an san te-ala beya zi! Ëe banakan de tembanena zebe mae hap golzimdin hip?!”
³⁸ Yesus ki zep etan takensibiridaka, “Eno mae mo rotina banakaꞌen? Emki hla tandan.” Kim hla dandak, ki zep nenblak, “Rotina aha-ere taha-tap enkam. Hogwena dan-dan.”
³⁹ Ki zep hwena zi beyam-byana insa so trana iwe de hlik-hlikkam teinikirin hip gubiridaka.
⁴⁰ Dekam zep kirekam eteinikin nirak. Ahakore hlik-hlikna 100-100kum. Ahakorena 50-50kam.
⁴¹ Yesus ki zep aha-ere taha-tapkam de rotina insa hogwe darena in han teisyaka, dekam zep ngli san de kara gwesen naban Alap hap dawemna golblaka. Ki zep hwena rotina insa ahap tabirki, hen hogwe darena insa kwa-kwak soka. Desa zep dua-blaskam de zini in hap etan-etankam kap ta gwizimꞌinka– zen de hwena zi trana in hap kae gwebla-zimdin hip.
⁴² Zi trana in kim dwenblandak, man tangan eitri gwek.
⁴³ Ki zep hwena dua-blaskam de wenya in tembane mosrona insa tagam dak. Hendep yuna dua-blas enkam zep esuwek.
⁴⁴ In zen rotina insa dwenblandak, zi ensa de aitbinkim, beyana lima ribu enkam– we wal walassa de aitbin sremkamye.
⁴⁵ Kim tembane tasik, dekam zep hendep dua-blaskam de ang ta gwen wenya insa bulkum de ho gutu men eihya san sek gwen hap gubiridaka– Zenaka de ena Betsaida san dep ngeir gublun hap. Ki zep hen zi beyam-byana insa sekwak gwen hap gubiridaka.
⁴⁶ Yesus kim zi beyam-byana insa hli yuludaka, ki zep ze-en kwatap tek san hata seka– dekon de Alapsa gu soneblan hap.
⁴⁷ Kim kawesik, zere hon de ang ta gwen wenya bare bulu mes ho gutu ngirinnik zauk, hwena Yesus Zena nama kwatapnak gweꞌanka.
⁴⁸ Dekon zep anakan kara tabir aneꞌanka, “Asesena ngein nikon mamkam tailbiridaꞌara, zep karekkam ho ngepna insa bulu inkam sap nakabiꞌin.” Zena hwena oho-bung gun nuban zep ho gutu tahan san de song gwe zankam gulmun nuran makan gweibiridaka.
⁴⁹ Zen kim hla da sonek weya tahan san de song gwennak, ki zep au hloblankam eherhek, sap zen man kil dik, “Hobwem dowal!” Hwena ki zep gubirida kinzika, “Em esewehen! Bahem eairin. Ëe an Ëe.”
⁵⁰ (6:49)
⁵¹ Ki zep hendep zeno mae mo buluk iwe sewese zaka. Asesena in dekam zep hendep sewe heka. Zere hon de ang ta gwen wenya in man tangan serkam denggwanblak.
⁵² Sap zen aha-ere taha-tapkam de rotina mensa ahap tabir-zimki lima ribu enkam de zi hip, zen hom owasna desa tame nuk. Zeno mae mo nola dekam nama drak-drakna, zep zebe mae hap man tangan gwa-gwa gwizimk– desa de tame gun hupye.
⁵³ Genesaret kim bulkum yaing gwek, ho gutu men eihyanak,
⁵⁴ kim atiti gwek, zewe de zini hendep dekam zep Yesussu tame dazak, “O an zenke.”
⁵⁵ Zen dekam zep tingare langna iwe de e-e san gubiridan hap ehlu-hluk gwe gu nusenk. Zen kim anakan nasal gweblaꞌak, “Angkam Yesus zao gweꞌara,” dekam zep zi sang-sangna zato naban desan dep kap nulhal gweꞌanzak.
⁵⁶ Yesus men desan ki tenda gweka zi sang-sangna hen zewe noleyaing gwenda gwek– sap e yalak, sap e bete-teknak, hen sap ora san de gol-gol mae san. Hen pasar maenak kang nul gwek, dekon zep Yesussu abe da gwek, “Bian, zi sang-sangna an wehe baju top en mae nakon Emsa olk taꞌanka? – dekakim tol dawem gweka.” Tingan men zen olk da gwek, zen dekam zep hendep edawem gwe-gwek.