¹ Zao hom tangan holo gweꞌak, Yesus ki zep Kapernaum sun dep lwa halka. Dekam zep hendep ola anakan nol haladak, “Yesus mes etan hatanda.”
² Zi beyam-byana dekam zep Zebon onak dep tagal gwesizik, hendep man kyang gwesik. Lilikin mae san ezaundak. Yesus zao zep Alap mo olkam tawa tabirki.
³ In kim tonbiridaꞌanka, dan-ner dan-nerkam de zini dekam zep taha-tana teisya ine gwen srem zi sang-sangna Yesus onak dep neiren halzak.
⁴ Hwena zewe zini beya tangan nik ze lowe heꞌak, zep Yesussu ba nakon dep? – golek de tan naye. Zep hendep gola insa gulk kon dre dasik anehak– men dekon en Yesus gweꞌankake. Desan zep berya ban ner dwanuk.
⁵ Yesus kim anakan tame tabirki, “Eiwa, zen man tangan Asa daibliblaꞌan,” dekam zep zi sang-sangna insa gubluka, “Tane tol, eno karek-karekna mese ep tap gulsublunan.”
⁶ Musa mo titi tabin olsa de tawa ta gwibin wenya men zen ze teinikinꞌik, dekam zep enlala ennak donsubluꞌak,
⁷ “Zini an zeno ola bolte-bolte tanganna! Zen bap kirekam Alapsa lamang tanda! Zi bejen zi bose zik mo karek-karekna tap gulsublun. Diki Bian Alap bap.”
⁸ Yesus hwena dekam zep hendep zeno mae mo enlalana insa tame tazimki, dekam zep jalse gwibiridaka, “Em bap kirekam enlala ennak Asa lonsubluꞌan!
⁹ Em ema ano ola husus eibir– anakan insa gublulye, ‘Eno karek-karekna mese ep tap gulsublunan.’ Hwena anakan de gublunkam, ‘Em luwen. Ere mo berya insa teisyahal,’ san esa hen etan husus eibir? Sap ol-gun darena in apdenak– Alap mo sosonkam de gublun ol.
¹⁰ Hwena angkam Ëe ama ebe mae hap goltreizimꞌin– em dikim Asa anakan tame tan hap, ‘Alap mes ki ngatan zi mo lang nakore Zi Tanganna abe hap sosonna golblaka– okamanak awe dikim zi mo karek-kareksa tap gulsuk gwizimdin hip denaye.’” Ki zep hwena etan zi sang-sangna insa gubluka,
¹¹ “Ëe ama emsa gubluꞌan: Em luwen. Ere mo berya insa teisya, ki gol san song gwe.”
¹² Dekam zep hendep luweka, ki zep hendep ber zem insa teisyaka, ki zep hendep tingare zi mo nwenak song gweka. Zi trana in man tangan etenggwank. Dekam zep Alap mo bosena teip nulsuk gweblaꞌak, hen man egu gweꞌak, “Hom tangane kirekam de owasna hla kuk– an kirekam lwananye!”
¹³ Yesus kim etan Ho Gutuna Galilea mo alp san dep lwa haꞌan zaka, zi beyam-byana zao zep Zebon onak dep yaing gwezak. Zao zep tawa tabirki.
¹⁴ Dekon kim song gweꞌanka, dekam zep Roma mo irik ginnik dep de pajak te-ala alal ta gwizimdin hip de zini Alpeus mo tanena Lewi Baksa hla taꞌanka. Zen zere mo syal gwe-gwen teksonnak nikinꞌinka. Zao zep gublu zaka, “Haen. Asa em ang gweblan.” Lewi dekam zep luweka, dekam zep hendep ang gweblaka.
¹⁵ Yesus kim Lewi mo golak goletembane taꞌanka, dekam zep hen ahakore pajak te-ala alal tanda gwen wenya beyakam yaing gwezak. Hen ahakore karek-karek gulin halasen gwen wenya, zen hen beyakam yaing gwezak. Dekam kirekam de enlala karek-karek nabare zini Yesussu beya nik sap ang ne gweblaꞌak. Deban mae zep apdekam goletembane taꞌanka, hen zere hon de ang ta gwen wenya ban.
¹⁶ Hwena Musa mo titi tabin olsa de tawa ta gwibin wenya men zen hen Farisi hon biti gwek, zen kim anakan hla nulidak, “Yesus Roma hap de pajak te-ala alal ta gwizimdin zi niban apdenak goletembane taꞌara, hen ahakore karek-karek gulin halasen gwen wenya ban,” zen dekam zep husus neblaꞌak. Dekam zep zere hon de ang ta gwen wenyaka nenbiridak, “Yesus in ba hap tangan pajak te-ala alal tanda gwen wenya ban apdenak goletembane taꞌara, hen karek-karek gulin halasen gwen zi nibanye! Zen in kwae nabanke!”
¹⁷ Yesus kim kirekam salbiridaka ki zep ding gulzimki, “Zini, sang-sang srem wenya, zen hom doktersa dwam ne gweblanan. Zen diki zi sang-sang en dwam ne gweblanan. Ëe an dokter makane hatazak– zi enlala karek-kareksa de dawem san dep kwang guludan hap. Hwena men zen zenaka tim di gwibirin, ‘Ëe an dawem-dawemna,’ Ëe desa de kwang guludan hap home hatazak.”
¹⁸ Aha yaklanak kim zauk, baptis ta gwibin zini Yohanis hon de ang ta gwen wenya man tembanesa elwak– men kirekam Yahudi zi mo auyan-azana egwe gwekke, Alapsa dikim enlala zon tasiblinkam abe ta gwen hap. Hen Farisikam de gubirida gwen wenya dekam zep hen kire hap elwak. Ki zep hwena zini Yesussu dakensiblizak, “Yohanis hon de ang ta gwen wenya hen Farisikam de gubirida gwen wenya, zen man tembanena elwa gwenan, hwena ebon de ang ta gwen wenya ba hap elwa srem gwe-gwenan?”
¹⁹ Yesus ki zep ding gulzimki, “Abon de ang ta gwen wenya kip man dakastilzimꞌin– an kirekam tembanesa de elwan sremkam lowehe gweꞌanye. Sap zen angkam teipsin zisi de zergwen makan Asa nergwe gweꞌan. Zep Ëe kime nama golelowehe gweꞌan, zen bejen tembanesa elwan.
²⁰ Hwena jal zini kim de Asa jek-jak daꞌak, Abon de ang ta gwen wenya yaklana dekam molya tembane tak. Embwan hap sa baes tal.”
²¹ Etan ki zep kire hap gulk sun de ol blaonzimdinni dan mas sozimki, “Zep hen kirekam, zi mo baju kwang de hul nenkam, zen bejen deyol sop esekam makan tazimdin. Kirekam bejen dakastin. Sap ngan sosunkum deyol esena in de yok gweꞌak, dekam sa baju epba hula in mam enkam etan kalk ner.
²² Hen kirekam, anggur ho esesa bejen kambing sopkam de botol epbanak yuren. Kirekam hom dakastiꞌin. Sap anggur ho esesa de kambing sop botol epbanak yurenkam, anggur hona in kim de nopna tail giꞌik, kambing sopkam de botola in dekam sa kalk ner. Hendep anggur ho naban kambing sop botola ban sa karek ner. Anggur ho esena zen diki kambing sop botol esenak de yurenkam dakastiꞌin. Zep hen kirekam, Abon de ang ta gwen wenyik de etan epba lowehen san abarenak ang tan hap hom dakastiꞌin.”
²³ Aha Hari Sabatnak kim zauk– Israelk de zi mo syal tan srem yaklanak, Yesus ki zep zere hon de ang ta gwen wenya ban gandum tra san goletaman gweꞌanka. Hwena zere hon de ang ta gwen wenya dekam zep usak hap gandum danna insa kilk di-in kini gweꞌak.
²⁴ Hwena Farisikam de gubirida gwen wenya kim hla nulidak, dekam zep Yesussu nenblak, “Em san home ere hon de ang ta gwen wenya insa hlauludaꞌara? Zen in nere mae mo titi tabin olsa ngip nuꞌin– kirekam de Hari Sabatnak syal gwibinkimye.”
²⁵ Yesus ki zep hwena ding gulzimki, “Em bawalkam esa Alap mo ola an mo eini dam ulsul? – men kim Daud Bak zere hon de ang ta gwen wenya ban goleusak gweꞌankaye.
²⁶ Abayatar Bak men dekam Alap mo golak teipsinkim irik gilkike, Daud Bak dekam Alap mo golak tilki, zao zep Abayatar Baksa abe taka– Alap hap de roti loneblanna insa de golblan hap. Kim golblaka, desa zep zere hon de ang ta gwen wenya ban zitwinbir song gweka. Hwena sap neno mae mo titi tabin olak man lwak: Sap Daud zena hen zebon de ang ta gwen wenya, zen bejen Alap hap de rotina insa twinbin. Zen diki Alap mo golak de syal ta gwen zi en dwin gwibirin. Sap eiwa kirekam, hwena Daud hom Alap mo nwenak karek gweka– zen kim usak hap zitwinbirkiye. Zep hen kirekam, Abon de ang ta gwen wenya an, zen kim usak hap kilk di-in kinzil, zen hom ekarek gwer.”
²⁷ Yesus ki zep Hari Sabat hap dena insa waulsuzimki, “Alap zini Hari Sabatsa de blikip gwibin hip hom yang tabirki. Alap mo nwenak bol-zaun tanganna, zen diki zi. Hari Sabatna in hwena zini emsa dikim oto tasik gwibin hip mas gulzimki.
²⁸ Zep ngatan zi mo lang nakore Zi Tanganna, Ëe an Zen tangan– Hari Sabat mo Nolaye. Zep anakarekam de klis gul gwizimdin hip dena, ‘Desa sap esa Hari Sabatnak syal eibir,’ ahaksa, ‘Kirekam bahem,’ zen ano dena.”