¹ Yaklana dekam dan nola kiniꞌak– Paskanak dikim zaun hupye. Paska yaklanak kim zauk, zen dekam zep hen ekon gwesik hanak– aha-ere minggukam de ragi sremkam rotisa tru ta gwen naye. Alap mo golak de syal tan zi mo mam-mamna hen Musa mo olsa de tawa ta gwibin wenya, zen hen dekam zep anakan orana deblaꞌak, “An banakarekam esa aningkim Yesussu tan hap dokwak lal?”
² Hwena man hen eguk, “Yakla yalak awe bap nen balk tan, sap zini beya tangan nik dwam neblaꞌan. Ki deban mae esa mamkam eilman gwer.”
³ Yesus ki zep Betania san dep zere hon de ang tan wenya ban golesek gweka. Zewe Simon mo golak zep golebiti gweka. Simon in, men zen orep kusta gwekake. Yesus kim goletembane taꞌanka, hwena wenya dekam zep zebe hap de kwasangsa goltreblan hap hatazak. Zep te-ala mamkam de gon minyak, serkam de irase dawem nabarena, golhatazak. Kirekam de kaso botola bejen mat-matna ulsun. Zep kim golek de taꞌanzak, dekam zep botola insa ek tihi nakon kam sok, dekam zep minyakna inkam Yesussu nola kon hle tablak.
⁴ Hwena ahakon men zen ze lowe heꞌak, dekam zep husus neibiꞌik, hen dekam zep donsubiꞌik, “Zen ba hap minyakna insa kitak tangan zalta dep hlei yul soneblanan?
⁵ Dawemna diki minyakna in te-ala hap de lirak gulunam, te-alana mam tangan naka maka nep zerzimnin. Desa emaka tahalha zi hip kae e gwebla-zimꞌin.” Kirekam zep wenya insa jakal neibiꞌik.
⁶ Hwena Yesus dekam zep gubiridaka, “Dikire gwek. Em ba habe wenya ansa lonsubiꞌin? Zen man tangan sam gwesil– kirekam de Asa gweblankamye.
⁷ Sap tahalha wenya em desa nama esa olelowehe tine gwer. Em de mas gwibirida gwen hap edwam gwe-gwenkam, em sap esa dekam mas eibirida gwer. Hwena Asa em molye dakal hap ergwe gwek.
⁸ Insa irase dawem nabare minyakkam Asa hle tablanan, zen hamal hap ki Asa gweblanan– deban de Asa dre nwanun hap. Zen dekon etan banakan dep? – aha syal maesa de abe hap syal gwibir-blin hapye.
⁹ Eiwa denakae emsa gubiridaꞌan: Tingare lang san kim Alap onakore ol dawemna nol halada gweꞌak, wenya ansa kirekam abe hap syal gwibir-blinan, desa hen sa aisil nei gwibir. Hendep wenya ansa zep sa eititi neibir srem gwer.”
¹⁰ Dua-blaskam de zere hon ang ta gwen wenyik mo ahana, ena Kariot walya Yudas Bak dekam zep Alap mo golak de syal tan wenyik mo nol-nol san dep song gweka– Yesussu de zebe mae hap zerguzimdin hip.
¹¹ Salblankam man tangan sam neisiblik. Dekam zep nenblak, “Te-alasa asa ebe hap erblal.” Dekam zep hendep Yudas Bak in orana teblaꞌanka– Yesussu dikim sowekam balk tan hap denaye.
¹² Rotisa de ragi mas gun sremkam tru tan hap de minggu mo nonol yaklanak kim zauk– yaklana men dekam Paskanak dep de tembane yawalak dep domba zahona Alap hap blom da gwibir-blikke, zere hon de ang ta gwen wenya in dekam zep Yesussu dakensiblik, “Bian, endawe esa Paskanak dep de tembanena aban mae zitwenblala? – ee akakim zao hamal uk.”
¹³ Dekam zep dan-dan guzimki, “Em Yerusalem san song en. Zewe esa zini ertowera– kama ngatdarakkam de weya blome gwiren halzan naban. Zen desa ang ebla.
¹⁴ Gola men zao de tik, em hen zao lil. Zao gol bi naka enbla, ‘Bian Yesus man emsa takensiblila, “Ëe teksonna enda zao asa ere hon de ang ta gwen wenya ban Paskanak de tembanena zitwenblal?”’
¹⁵ Zen sa ebe nikip gulk de tekson yawalsa zertreizimdi. Zewe kire-kirena mes ototo da guk, hen komal tum maena sowe henna. Zao hamal ul guk.”
¹⁶ Zi darena in dekam zep hendep song eka, zao zep hendep oltoweka– men kirekam Yesus guzimkiye. Zewe zep hendep tembanena hamal ul guku.
¹⁷ Kim kawesik, Yesus Zena dekam zep sepulukam de ahakore zere hon ang ta gwen wenya ban goleyaing gwe zaka.
¹⁸ Kim goletembane taꞌanka, zao zep gubiridaka, “Eiwa denakae emsa gubiridaꞌan: Em an zene aban ertembane gweꞌan, ahanik sa Asa zertrera– zao de Asa balk tan hapye.”
¹⁹ Kirekam de gubiridannak kim nasalblak, dekam zep enlalana edowe hanak. Dekam zep aha-en aha-enkam dakensik gweblaꞌak, “San ha asa tol home yap ki gublunda?”
²⁰ Ki zep ding gulzimki, “Nen an zene apdenak roti apna kolho honak os-os la ine gweꞌan, ahana sa Asa zertrera– zao de Asa balk tan hapye.
²¹ Men kirekam Alap mo olak ngatan zi mo lang nakore Zi Tanganna abe hap dena lwak, zen hendep kirekam asa til. Hwena kwasang tol, zini men zen Asa dikim ze balk tan hap zertreꞌara, zen sa karekna mam tangan naka Alap onakon hlaulu. Zen an zik de jaha gweblan sremkam maka sam gwesiki, sap dekam zen molya karekna mam tangan wenya insa goltoweꞌanam.”
²² Kim tembane taꞌak Yesus ki zep rotina gul ineka, ki zep Alap hap rotina in hap dawemna golblaka, ki zep ahap gul guku. Dekam zep zere hon de ang ta gwen wenya in hap anakare ola ban kap tazimki, “Em twenblandan. An ano timni.”
²³ Ki zep hwena anggur ho nabare mokna zer ineka, dekam zep etan Alap hap dawemna golblaka, ki zep hwena zebe mae hap anakare ola ban zerzimki, “An ano kala zen. Zen sa ano tim nikon wet sol– Alap mo zi niban de ol ziaha-en gun esesa dikim sul sonen hapye. Zep zini beya tangankam sa ano kala kon Alap mo nwenak edakastil gwer.” Dekam zep tingan notdebik.
²⁴ (14:23)
²⁵ Ki zep gubiridaka, “Eiwa denakae emsa gubiridaꞌan: Ëe angkam na-en molye anakare anggur hona etan otdek. Hwena ano Bian mo irik ginnik kim de hataꞌak, zen diki dekam asa anggur esesa ziotdebir.”
²⁶ Ki zep hwena Alap hap de terya dak. Kim dasik, dekam zep hwena zaitun tra nabare kwatap tek san dep golesek gweka.
²⁷ Ki zep zere hon de ang ta gwen wenya insa gubiridaka, “Em namen kitak esa airin hip Asa hli la gukhal. Sap Alap mo olak man lwak, ‘Ëe asa zaho ta gwibin zini insa karek tal. Zaho zem dekam sa men-san an-sankam heya-hya gwer.’
²⁸ Hwena Bian kim de etan Asa ngaya taꞌanka, Ëe asa dekam emsa Galilea san dep ngeirbiridal.”
²⁹ Petrus dekam zep ding gulbluka, “Ahakorena an sap sa heya-hya gwenkam Emsa hli dasil. Aena tangan molye Emsa hli tak!”
³⁰ Yesus ki zep hwena ding gulbluka, “Eiwa denakae emsa gubluꞌan: Namen ayang de gunsu dan son sremnak, em dekam esa anakan de Asa zabeblanna dan-ahan soblala, ‘Zini in ee home tame taꞌan.’”
³¹ Petrus dekam zep udobe naban ding gulbluka, “Bian, ee apdenak asa Eban lil. Ëe molye tangan Emsa zabeblak.” Ahakore wenya kirekam zep sap hen egu anek.
³² Getsemanik kim goleyaing gwe naka, zao zep gubiridaka, “Awe teinikin guk. Ëe ama e-en Biansa gu soneblaꞌan.”
³³ Hwena Petrus, Yakobus, hen Yohanis mae ensa zep gubiridaka– zen en de ang gweblan hap. Hwena zao zep enlalana serkam tangan dowebla hanaka, hendep hlik gwebla hanan hap alp gwesiblika.
³⁴ Dekam zep gubiridaka, “Ano enlalana serkam tangan dowe hananda, hendep tin hibe alp gwesiꞌin. Em awe Asa ergwek, hen enlala naban esa loweher– Alapsa de abe ta tinen naban.”
³⁵ Zebon mae onakon kim engka en langa gwe halka, zao zep kamanak ik gwe heka. Dekon zep sap karek yala insa de wei yun srem hap Alapsa anakan abe taka,
³⁶ “Bian, toton banakare maena hom– eno syal gwibin srem hap denaye. Karek yawala ansa Ëe goltoweꞌan, diki Em Abon onakon langa gulsun. Hwena ano dwam gwibin sin bap zen lwan. Diki ere mo dwam gwibin sin zen lwan.”
³⁷ Alapsa de abe ta gwenna kim hya gwesiki, dekam zep etan zi dan-aharena in osan dep lwa halka. Hwena ni truwennak zep hlauluda zaka. Petrussu zep ze gublu zaka, “Simon, em san ema taꞌara? Em san bejen em engka en mae Asa zersalen!”
³⁸ Ki zep etan gubiridaka, “Enlalakam lowehek. Alapsa e-en e-enkam abe la tinek. Kareknak ema altilink. Sap eno mae mo enho enna dawemsa de sap syal gwibin hip dwam gwe-gwenda, hwena eno mae mo timni in tatete naka hom.”
³⁹ Zena dekam zep etan gweyoka– men dekon Alapsa gu soneblaka, desan dep. Dekon zep men kirekam nonol abe taka, kirekam etan abe taka.
⁴⁰ Kim hya gwesiki, dekam etan ni truwennak zep hlauludaꞌan zaka. Sap zeno mae mo nwena man tangan nwe-alk hap edohon-hon gwek. Kim ze jalse gwibirida zaka, balk enkam zep nasalsiblik. Banakan dep? – ding gulblun naye.
⁴¹ Dan-ahanna kim etan zebon mae osan dep lwahal zaka, dekam zep gubirida zaka, “Em san namae ni truwen hap edwam gwe tineꞌan? In syake! Ngatan zi mo lang nakore Zi Tanganna Asa angkam man karek-karek gol gwen zi mo tahanak dep tapbla dazimꞌin.
⁴² Dekam luk tak! Nen sek gwen. Emki hla tan. Asa de zergun hup de zini angkam man hataꞌara!”
⁴³ Yesus in kim nama tonꞌanka, Yudas, dua-blaskam de zere hon ang ta gwen wenyik mo ahana in, dekam zep zi beyam-bya naban Yesussu de balk tan hap goleyaing gweꞌanka– nebok te tek teiredan naban, mensa Alap mo golak de mam-mamna hen Yahudi mo nol-nola nenbiridakke.
⁴⁴ Zen mes hamal hap anakan gubiridaka, “Men desae babang taꞌak, zen zen– zini inye. Zen desa balk lahak, hen dawemkam kara lak.”
⁴⁵ Yudas kim goleyaing gweꞌan zaka, ki zep hendep Yesussu babang tan naban gublu zaka, “Guru.”
⁴⁶ Dekam zep hendep balk dazak.
⁴⁷ Hwena ahana men zen zewe zauꞌunka, dekam zep nebokna mol ineka, dekam zep Alap mo golak de teipsin tangan zi nik de babu gwe-gwen zini sap zip soka. Hwena ing ala en naka zep blansibli kinika.
⁴⁸ Dekam zep Yesus gubiridaka, “Em san Asa jal zisie hla lal? – zebe Asa de balk tan hap nebok te tek teiredan naban yaing gwenan zalye!
⁴⁹ Ëe men yakla jamkam Alap mo golak emsa tawa ta gwibik! Dekam ba habe ze Asa balk la srem gwek? Hwena an desae angkam syal eibiꞌin, zen men desa orep Alap mo ol ayang gul gwen zini abe hap dena ale nukke. Zao dikim zaun hube kirekam syal eibiꞌin. Ena hwena home tame uꞌin.”
⁵⁰ Zere hon de ang ta gwen wenya in dekam zep kitak heya-hya gwenkam hli dak.
⁵¹ Ëe an Markus dekam walyak. Ëe kaen ala gun en nabane sap ang gwebla song gweꞌak. Hwena asa hen maka balk dak.
⁵² Hwena kaen enna in kon zep sap asa irik dasik. Zao zebe hendep hli yuk. Dekon irkan zebe heya gwek.
⁵³ Yesussu ki zep nersong gwek– Alap mo golak de teipsin tangan nik mo gol san dep. Zewe mes Yahudi zi mo teipsin sinodenak dena kitak etagal gwesik gik. Zen ahakon Alap mo golak de syal tan zi mo mam-mamna, hen ahakon Yahudi mo nol-nola, hen ahakon Musa mo olsa de tawa ta gwibin hip de wenya.
⁵⁴ Petrus zen lun sap-sap gwen dankam Yesussu ang gwebla song gweka, hendep zen hen teipsin tangan zini in mo gol temnak hata zaka. Kol sonna iwe kim til zika, zao zep teipsin zini insa de kara ta gwen hap de jana nabare zini syauk tuwirinnik hlauludaꞌanka. Zen zao zep hen nikinꞌin zaka.
⁵⁵ Alap mo golak de mam-mam wenya hen tingare teipsin sinodenak de wenya zen orasa deblaꞌak– dekam de Yesus hup boton ol blo-blosa mam gulblun hap, dekam de tan hap. Hwena sap beya nik blo-blo tan ola ban nolluwe gweꞌak, hwena zeno mae mo ola in hom mae apde nek, zep dekon de karek tan hap dena hom dam nulsuk.
⁵⁶ (14:55)
⁵⁷ Dekam zep etan ahakore nik kire ola ban nolluwek,
⁵⁸ “Zini an ee kie asalblak. Zen man guku, ‘Alap mo gola an mensa zini dauk, ee asa dri yulsul. Hwena yaklana dan-ahan ki asa hwena owas hap syal gwibinkim etan sul soner– zi mo syal gwibin srem naka.’”
⁵⁹ Hwena dekam hen nama bejen karek tan, sap zeno mae mo ekira-kla gwenna in hom ahanik mo ban apde ne gweꞌak. Kitak man esren-sren gwe-gwizimꞌik.
⁶⁰ Alap mo golak de teipsin tangan zini in ki zep zeno mae mo ngirinnik luweka, ki zep Yesussu gubluka, “Em san ha molye mae ding gulzimki? – insa eno karekna kira nul gweꞌan zalye.”
⁶¹ Yesus hwena balk enkam salsiblika. Ki zep etan takensiblika, “Em san ha eiwa Zen tangan? – Teipsin Zini Alap mo Tane naye, Israelsa de ngaya tabin hip de Zini.”
⁶² Dekam zep ding gulbluka, “Ëe an Zenke. Hwena Ëe hen ama emsa gubiridaꞌan: Em esa ngatan zi mo lang nakore Zi Tanganna Asa hla laser– Teipsin Zini Alap mo dam taha nakon de nikirinnik. Hen dekon kime etan lwa haꞌanzak, butnak esa Asa hla laser.”
⁶³ Dekam zep teipsin tangan zini in Yesus hup de u sisngin hip zere mo timnik de bajuna kalk-kalk soꞌanka, dekon zep gubiridaka, “Nen ba hap de etan zeno kareksa de kira gulblun hap zini teibiridan hap?
⁶⁴ Nen mes em-am kitak Alapsa de lamang tannak asalblanan! Zep angkam ebon mae onakon banakan?” Dekam zep kitak ding nulblik, “An tok hap de karek tan hap man sam gwesiꞌira!”
⁶⁵ Dekam zep oltepkam nwe-masenak hol-hol da gweꞌak, hen nwena dekam zep nahaleblak. Kire naka zep lek-lek da gweꞌak, deban nen gweblaꞌak, “Eme eiwa Alap mo zer sonen zi gweꞌanam, emaka anakan asa gubirida gweꞌara, ‘Zi bosena zen asa lek tyanda.’” Teipsin zini insa de kara ta gwen wenya in dekam zep itra lwa soblan naka e san dep irik dahak.
⁶⁶ Petrus in kim nama teipsin tangan zini in mo gol temnak syauknu zituwinꞌinka, hwena ki zep ze teipsin zini in mo golak de babu gwe-gwen wenya hataꞌanzak.
⁶⁷ Syauk ngatannak kim Petrussu dawemkam nwe-masenak hla tak, ki zep ze gubluk, “Em an hen zenke– men zen Nazaret walya Yesus mae han apdenak ete gwekye.”
⁶⁸ Hwena Petrus ki zep ding gulbirki, “Ëe home mae tame guꞌun– insa em gundaye.” Dekam hwena kol son lilikin alpnak zep zauꞌun naka. [Dekam hom hleng gweꞌak, hwena ayangna ki zep hendep nonola gu aneka.]
⁶⁹ Wenya in zao zep etan Petrussu hla taꞌanzak, ki zep ze etan ahakore naka gubiridak, “Zini an hen zen– men zen Yesussu ang neblanda gwekye.”
⁷⁰ Hwena Petrus man etan ding gulbirki, “Ëe hom.” Zao hom holo gweꞌak, ki zep etan men deban mae apdekam golezauꞌunka nenblak, “Em an hen zeno mae mo ahanakake, sap em an hen Galilea wal.”
⁷¹ Dekam zep Alap mo bose gubin niban anakan guku, “Ëe hom tangan am zini insa tame tak– insa en gweblaꞌanye.”
⁷² Kirekam kim guku dekam zep ayangna dan sonna gu aneka. Petrus dekam zep ola mensa Yesus anakan hamal hap gubluka enlala gwibirki, “Ayang de gunsu dan son sremnak, em dekam dan-ahan sonkam esa Asa zabeblala!” Dekam zep gona yusyustinkim mam enkam gweka.