1 Naonda ing ki Yesus iḷumuai nongkon Baḷoi Tuhan, tobatuí murií-Nya noguman ko'i Yesus, "Pak Guru, indoiaikah im bangunan tana'a. Tarukira im batunya mita. Totu'u mopia!"
2 Tubag i Yesus, "Inontongmu bidon im bangunan mita inta noḷoben tatua toh? Ta'e diaíbií tobatuímai in batu mita tatua pomayak makow mo'itudu makow kon tampatnya. Komintanbií daiton rumbunon."
3 No'iduduimai kon tua ki Yesus minayak im buḷud Zaitun bo ilimituí kon tampat inta noyogintayow im Baḷoi Tuhan. Ki Petrus, ki Yakobus, ki Yohanes bo ki Andreas namangoi ko'i-Nia sin nongonguman takin-Nya.
4 Mosia noguman ko'i Yesus nana'a, "Pak Guru, pogumanpa ko'inami mongo to'onu ing kobaliían intua komintan? Bo onu im mobalií tanda aka wakutunyadon?"
5 "Mokopo'ingat," kai Yesus, "Dika modapot ing koaíkaḷan mo'ikow.
6 Mobayong intau mamangoi bo momakeí in tangoi-Ku poḷat moguman, 'Aku'oi na'a in Sia tua!' bodongka monguboḷ i mosia kon intau moaíntoí.
7 Aka mo'ikow mokodongog kong goḷotup mita im parang bo habar mita poparangan, dikabií mo'ondok. Sin tua im mustibií mobalií muna, ta'e de'emanbií kon tuadon i wakutunya mokiamat.
8 Tobatuí bangusa moparang im bangusa ibanea. Tobatuí negara monuntun kon negara ibanea. linug bo malarat mobalií kom bayongan tampat. Tua komintan bagupabií pomangkoian roriga, naonda bo takit inta korasa'an im bobay inta mononggadií.
9 Musti mokopo'ingat i mo'ikow sin domokon bo poki'sidang kom mahkamah agama. Mo'ikow bongkugon kom baḷoi mita pososambayangan. Diaan i mo'ikow potayow kom mongonguasa mita bo raja lantaran murií-Ku mita im mo'ikow. Bo tuata ing kasampatan monimu mongonguman ko'i monia soaáḷ Aku'oi.
10 Habar Mopia nongkon i Allah tua, musti muna pota'au magií-makow kom bayongan bangusa.
11 Bo aka domokon bo diaan im mo'ikow kom pongadilan, yo dikabií mohawatir kon soaáḷ onu im musti singogon monimu. Aka wakutudon monimu mosingog, yo singogdon onu im poporoho ko'i monimu kowakutu intua. Sin de'emanbií mo'ikow im mosingog, ta'e Rohobi' i Allah.
12 Kon dodai intua intau moposarahkanbií ko'i utatnya tontanií sin limodon, natua doman aidan in tobatuí guyanga ḷoḷaki ko'i adiínya. Adií mita moḷawangdon ko'i amaí bo ko'i inaínya, bo moposarahkan ko'i monia sim poki'limod.
13 Mo'ikow kodoií im bayongan intau lantaran dumodudui-Ku. Ta'e mosia inta mokotahang dapot im pangabisan posaḷamatonbií."
14 "Mo'ikow i moko'ontong kon 'Oaíid mora'at inta mokorimumud' simindog kon tampat inta poton sindogan. (Tarukiradon onu im mangalenya!) Kowakutu intua intau inta kon Yudea, musti moḷagui mopobayak im buḷud.
15 Intau inta kon omonikan baḷoi dikadon moponag bo tumu'ot kom baḷoi sim mogamaí kon onukadon.
16 Intau inta kong gobaí dika bidon mobui sim mogamaípa kon jubahnya.
17 Moko'ondok totok in singgai tatua ko'i monia inta sidia bo inta koyogotpa mopoteteí in adií!
18 Posambayang simbaí soaáḷ mita tatua diaí mobalií kon sempo in uagat.
19 Kon singgai mita inta moko'ondok tatua, mo'iaíntugbií in roriga inta diaípa dodai onda in nobalií mulaipa pinomia i Allah in dunia na'a nodapot i masa in tana'a, bo diaíbií domandon mobalií bui.
20 Aka kuma bo diaídon impoḷokan i Allah i wakutunya tatua, daí diaíbií in tobatuímai mosaḷamat. Ta'e lantaranbií umat-Nya, daí impoḷokan i Allah in wakutu-Nya.
21 Ko wakutu intua aka oyuíon intau moguman ko'i monimu, 'Indoiai, Ki Raja Mopoposaḷamat kon na'a!' ande 'Indoiai, kon tua in Sia!' -- dikabií mopirisaya kon intau tatua.
22 Sin ki inta de'eman totu-totu'u mopoposaḷamat bo ki inta de'eman doman totu-totu'u nabi im mamangoibií. Mosia mogaid doman kon soaáḷ mita inta diaí im poliuan, bo soaáḷ mita inta mokoherang sim ponguboḷ, bo aka oyuíon ing kasampatan yo mopoyaying doman kon umat mita i Allah.
23 Daí, tuamai mokopo'ingatdon! Tua komintan nodait-Kudon pinoguman ko'i monimu wakutu in diaípa mobalií intua."
24 "Ta'e naonda ing kowakutudon in roriga tatua, mata in singgai mobaliídon mosindip, bo buḷan diaídon monindar.
25 Tundi mita moḷabuí nongkon ḷangit, bo bayongan mongonguasa kom baḷangon motomba'uk.
26 Ko wakutu in tuata ko'ontongandon ki Adií Intau mamangoi kom bonu ing goḷom takin kawasa moḷoben bo kamulia'an.
27 Sia nopotabaíbií im malaekat-Nya mita sim mosipun kon umat inta aim pinilií-Nya nongkon siku mita in dunia na'a, nongkon popod mita in dunia mopobayak im popod in ḷangit."
28 "Pakeí im polajaran nongkon pangkoi in ara. Aka tanganya mita moḷunow bo moḷukoí, bo momangkoidon momoḷimping, yo kota'auandon monimu kon diaídon mo'onggot bo sempodon im pononinggai.
29 Naí doman tua, aka mo'ikow moko'ontong kon soaáḷ mita tatua mobalií, yo kota'auandon monimu kon modiugdon totok i wakutunya.
30 Pokota'audon! Bayongan inta mobalií tana'a i mobaliíbií kowakutu intau mita inta nobiag masa in tana'a diaípa matoi modait.
31 ḷangit bo butaí im moyoyangbií, ta'e singog-Ku im mononoibií."
32 "Umpakah natua, ta'e diaíbií in tobatuímai mokota'au kon singgai ande wakutu kobaliían tua. Malaekat mita kon soroga bo Adií diaíbií doman monota'au kon tua, tongaíbií ki Amaí im monota'au.
33 Manangka intua mo'ikow musti umuran mobasadia, sin diaí kota'auan monimu i wakutunya.
34 Ka'ada'anea ibarat tobatuí intau inta nonaḷaímai kom baḷoinya bo minayak in tampat moyayuk. Sia nopotabaí im bobantungnya mita noḷukad kom baḷoinya bodongka nosilai kon oaíidan ko'i monia kom batuíannea. Bo sia nongoyow kon intau inta pinokiḷukadan ing ngara simbaí umuran moḷukad mokopopia.
35 Tuamai mo'ikow musti umuran kiḷuka-ḷukadmai, sin diaíbií kinota'auan monimu mongoto'onu ing ki togi baḷoi mobui mangoi -- moḷoḷabung, ande mo'onggot kon doḷom, ande modiug mobayag, ande bagu momukaí mata in singgai.
36 Simbaí aka sia daḷi-daḷií mamangoi, yo diaí koaíngoianmai mo'ikow koyogot i mosiug.
37 Onu im poguman-Ku ko'i monimu tana'a, poguman-Ku doman kom bayongan intau: umuran kiḷuka-ḷukadmai!"

Studi Alkitab lengkap, silahkan lihat Alkitab SABDA :: Markus 13
Studi Alkitab mobile, silahkan lihat Alkitab Mobi :: Markus 13
Studi Alkitab dengan Video LUMO, silahkan lihat LUMO Indonesia :: Markus

Download Aplikasi Alkitab Karaoke (BETA) Android:
https://play.google.com/store/apps/details?id=org.sabda.alkitabkaraoke