¹ Yesus dekon Yerusalem mo lang san zep zere hon de ang ta gwen wenya ban golesek gweka, hen weyana Yordan mo men eihya san de lang san dep goletablan kinika. Zi beyam-byana zao zep etan Zebon dep yaing gwe-gwezak, zao zep etan tawa ta gwibirki– men kirekam gwe gwekake.
² Farisikam de gubirida gwen zini hen man Yesussu de akasiblin hap yaing gwezak. Ki zep dakensiblik, “Em banakane Musa mo titi tabin ola dam gulsuꞌura? San ha zini we zemka sap de baes gwibinkim? San ha bejen?”
³ Ki zep ding gulzimki, “Musa ki banakan kire hap nesa titi tabirki?”
⁴ Ki zep ding nulblik, “Zen anakan titi tabirki, ‘Zini we zemka sap de baes gwibinkim, hwena nonol baes gwibin hip de suratsa de anakan ale gunkum, “Ëe mese kire hap baes gwibik.”’”
⁵ Ki zep hwena gubiridaka, “Em in kitak kwasang enlalana tawa naka hom, in zep Musa kirekam ein ebe mae hap ale gulzimki.
⁶ Hwena diki Alap mo dwam gwibin tanganna, zen diki men kirekam okamana ansa de yang gulsun nukon lwakke, ‘Alap nonol tanganna zi niban wenya ban yang sosuku.’ Hen Zen dekam anakan guku,
⁷ ‘Zini an-bi zemka hli sonkam– dekam de we zeban aha-en en hapye.
⁸ We-zi darena in dekam Alap mo nwenak san de aha-ere timni kiye.’ In zebe emsa gubiridaꞌan: Alap mo nwenak we-zi darena zen dan hom. Zen hwena aha-en.
⁹ Zen in zep, Alap mensa aha-en sonna, zi bap zen etan kles son.”
¹⁰ Golak kim golebiti gweka, zere hon de ang ta gwen wenya zao zep etan we baes gwibin hip dena insa dakensiblik.
¹¹ Yesus ki zep ding gulzimki, “Zi de we zemka baes gwibinni, hwena ahanaka de etan gonkam, dekam Alap mo nwenak zen mes nonol we zemka yane-ne gulku, hen zena kahalonak gwe gweꞌara.
¹² Hen kirekam, we de zi zemka baes gweblanna, hwena ahanaka de etan zenkam, zen hen dekam Alap mo nwenak mes zi zemka yane-ne tak. Zena kahalonak gwe gweꞌan.”
¹³ Zini dekam man walas zemka Yesus onak dep kap nulhal gweꞌanzak– Zen de tahasa tehabirida ine gwen hap. Hwena zere hon de ang ta gwen wenyik anakan jalse neibirida gweꞌak, “Walasna bahem an san kap gulhal gwezan. Bahem Gurusa blostablan.”
¹⁴ Hwena Zena kim hlauludaka, ki zep anakare ola ban jal gwibiridaꞌanka, “Em bap jalse eibiridal. Dikire walasna Abon noleyaing gwe-gwezak. Bahem jalse gwibiridan. Sap walasna an makare wenya, zen zen Alap mo irik ginni bi neibiꞌin.
¹⁵ Eiwa denakae emsa gubiridaꞌan: Men zen de walas bete-tekna an mo kim Alapsa anakan daibliblaꞌak, ‘Zen eiwa ano teipsinni,’ zen zen Alap mo irik ginnik biti gweꞌan. Men zen de kirekam daiblibla srem gweꞌak, zen molya Alap mo irik ginnik biti gwek.”
¹⁶ Ki zep hwena walas tane-nena insa babang tabin niban tahana tehabirida ine gweꞌanka– anakan de Biansa abe ta gwen naban, “Bian, walasna an hap dawemna gol gwizim.”
¹⁷ Yesus kim etan dekon song gweꞌanka, zini ki zep hwena Zebon osan dep hluwe zaka, zao zep zeno nwenak boklena kom so zaka, ki zep kon gu seblaka, “Bian Guru, em airis. Ëe basa asa syal gwibir? – ee dikim hendep de gwen hap denaka gul irin hipye.”
¹⁸ Ki zep ding gulbluka, “Diki airis aha-en tangan Alap Ze-en. Zep em Asa banakane enlala gweblaꞌara?
¹⁹ Em dwan mes-eme sap Musa mo titi tabin ola tawa gwibirki– men zen anakan lwakye: ‘Zini bahem tan. Bahem kahalo gwen. Bahem sowe gwen. Zisi bahem boton hap klak tan hen boton olsa bahem gol hala seran. Zisi bahem lwa tasin.’ Hen, ‘Ane-biasa em blikip gwesik gwizimdin.’”
²⁰ Zini in ki zep ding gulbluka, “Guru, ee beteknake ki hendep desan ang gwe-gwek, hendep angkam namae desan ang gwe-gweꞌan.”
²¹ Yesus hwena embwan naban zep hla taka, deban zep gubluka, “Hwena aha-en tangan lwa kiniꞌan– em de desan ang gwen hap denaye: Em song gwen, ere mo kire-kirena kitak tangan te-ala hap lirak tabir. Te-alana desa tahalha zi hip kae gwebla-zim. Kirekame syal gwibiꞌinka, ki ngatan zi mo langnake hendep de te-alasa beyakam lam taꞌara. Ena dekam etan hataza– Asa dikim ang gweblan hapye.”
²² Kirekam kim salblaka, dekam zep kon enlala dowe hanan naban song gweka– mae hap: Sap zeno kire-kirena beya tanganna.
²³ Yesus ki zep hwena zere hon de ang ta gwen wenya insa nwekam amjanbirki, ki zep ze gubiridaka, “Eiwa, gwa-gwa tanganna– te-ala beya zi de Alap mo irik ginnik hatan hapye!”
²⁴ Zere hon de ang ta gwen wenya in man tangan Yesus mo ola insa denggwanbiꞌik. Dekam zep hwena etan gubiridaka, “Ano walas, eiwa dam-dam naka hom– Alap mo irik ginnik de hatan hapye.
²⁵ Te-ala beya zi de Alap mo irik ginnik tin hip dena, zen men kiye– unta yawal de jaron hul betek san tinni. Kire otweran yawala toton bejen tin.”
²⁶ Kirekam de esane gwenkam, zen man etan serkam etenggwank, dekam zep zenaka dakensibiridak, “Hare eiwa kire tangankamke! Ki hwena endan nik sa engaya gwer? Toton nara molya.”
²⁷ Yesus ki zep hwena nwekam de amjanbin niban ding gulzimki, “Eiwa, auhu-kama zini zere mae mo sosonkam bejen zenaka ngaya tabin. Hwena Alap de zi hip syal gwibir-zimdin srem hap dena, aha-en mae hom tanganke.”
²⁸ Petrus zep hwena takensiblika, “Ki hwena abe mae hap dena bankarekam sa lwal? Sap ee mese ere mae mo tingare bi gwibinni Emsa de ang gweblanda gwen hap hli kulidak. Zep ee basa asa lamkam ulin?”
²⁹ Ki zep ding gulbluka, “Eiwa de tangan nakae emsa gubiridaꞌan: Zini men zen Asa de ang gwe-gweblan hap hen Alap mo ol dawemsa de gol halada gwen hap zere mae mo bi gwibin kire-kirena hli nulida gweꞌak, zebe mae hap sa Alap mam en tangankam kap ta gwizimdi. Zen mensa hli tandan naye– sap gol zem, aya-wal oso-wal zem, an-bi zem, walas zem, hen sap nga maena,
³⁰ zebe mae hap sa Alap nama de okamanak lowehe gwennak serkam de beya tangankam hen heꞌho gwibin tangan wenyaka etan lup gul gwizimdi– sap aya-wal oso-walkam de gubiridan wenya, ane-biakam dena, walaskam dena, sap gola, hen nga maena. Hwena kire zisi, zini hen sa abe hap de jal hap karek da gwibir. Hwena Alap kim de kitak irik ginkim kon gwesibir hanaꞌanka, Zen dekam sa hen zebe mae hap hendep de engaya gwen hap dena golzimdi.
³¹ Hwena beyana men zen sap angkam bose naban lowehe gweꞌan, zen zen sa hwena lamkam lure san egwer. Hen men zen angkam bose srem wenya lowehe gweꞌan, zen zen sa hwena lamkam ngein sin egwer.”
³² Yesus kim zere hon de ang ta gwen wenya ban Yerusalem san dep goleyaing gwe seꞌanka, Zena man ngeirki. Dua-blaskam de zere hon ang ta gwen wenya airin hip enlala nik ebeya gwen daꞌak– mae hap, “An banakan wehe Yesus hup de jal hap Yerusalemk lwaꞌak?” Lun kon men zen hen ang tan daꞌak, zen hen airin niban ang tan daꞌak. Yesus ki zep dua-blaskam de wenya in ensa engka en golesyalhe halka, zao zep zere hap dena hamal hap anakan tonbiridaꞌanka,
³³ “Ola ansa emki esan: Nen angkam Yerusalem san debe yaing gwe seꞌan. Zewe sa ngatan zi mo lang nakore Zi Tanganna Asa tapbla dazim– Alap mo golak de syal tan zi mo mam-mam wenya kip, hen Musa mo olsa de tawa ta gwibin wenya kip. Zen sa hwena Asa de tan hap ola aha-en nul, hendep Asa sa Yahudi srem zi mo tahanak dep tapbla dazim.
³⁴ Zen sa hwena Asa lamang da gwer, hen oltepkam hol-hol da gwer, hen sa Asa dangole gwer. Ki sa hendep Asa dal. Hwena yaklana dan-ahan, ki asa tin nikon etan ngaya gwer.”
³⁵ Ki zep Zebedeus mo walas darena Yakobus ne Yohanis ne Yesus hon apta zaka, ki zep ze enblaka, “Bian Guru, ano nik mo enlalana man lwaꞌara– em de kirekam abe nikip syal gwibir-zimdin hip.”
³⁶ Ki zep takensizimki, “Em basae dwam eibiꞌira? – Ëe de desa ep syal gwibir-zimdin hipye?”
³⁷ Ki zep ding ulblika, “Em kime teipsinkim irik giꞌinka, ee ama dwam eꞌan– eno dam-taha irgwa-taha nakon de hen teipsinkim inikirin hip.”
³⁸ Yesus ki zep ding gulzimki, “Hwena ena home tame uꞌira– in zebe abe endaye. Karek yawala men desa Ëe goltoweꞌak, em wehe desa de hen oltowen hap hohle eꞌara? Ëe men kire dohon-hon nakae wei yuꞌuk, em wehe hen desa de hen wei kun hip hohle eꞌara?”
³⁹ Ki zep ding ulblika, “Ëe ama hen hohle eꞌan.” Zao zep etan guzimki, “Eiwa, em hen esa tol oltowera– Ëe men kiresae goltoweꞌakye. Hen Ëe men kire dohon-hon nakae wei yuꞌuk, em hen kire naka esa lamkam wei kuli.
⁴⁰ Hwena men zen de ano irgwa taha nakon hen dam taha nakon inikinꞌinka, desa Ëe bejene dam sosun. Zewe de inikirin hip dena, zen diki ano Bian Zena mensa dam sosuku, zen diki zen sa ze inikiri.”
⁴¹ Hwena dare taha-tapkam de ahakore ang ta gwen wenya in kim zeno nik mo abe lan ola insa esak, zen man tangan sisngin neizimꞌik– mae hap, “Zen bap zen de mam en hap abe lala!”
⁴² Yesus ki zep tingan tagal gulsuku, zao zep gubiridaka, “Ena dwan tawa nakake, Alapsa de tame tan srem lang-langnak men zen anakan zenaka tim di gwibirin, ‘Ëe an teipsinni,’ zen man zere kore naka jap nul sonenda gwenan hen nyaubirida gwenan.
⁴³ Hwena em zeno mae mo kim bahem. Ebon mae onakon men zen mam gwen hap dwam gweꞌara, zen diki tingare zi mo babu gwen zi makan zen gwen.
⁴⁴ Hen ebon mae onakon men zen teipsin hip dwam gweꞌara, zen diki tingare zi mo tana iltikinnik zen nikirin.
⁴⁵ Sap ngatan zi mo lang nakore Zi Tanganna, Ëe an zi de Asa babu gweblan hap home hatazak. Zep em hen ano tana wei san emki Asa zertro gwen. Sap Ëe tingare zi mo tana iltikinnik de nikirin hibe hatazak– hendep ere mo angsa de tingare zisi dikim hil ti sonebin hip sosok tazimdin hip.”
⁴⁶ Yesus kim zere hon de ang ta gwen wenya ban Yerikok goleyaing gweka, hen ahakore zi tra naban, dekon kim etan egwa haꞌak, hwena zi nwe diminni ora alpnak nikinꞌinka. Zeno bosena Bartimeus, Timeus Bak mo tane. Zen te-ala hap kon aberbe ta sone gwibirki.
⁴⁷ Zen kim salka, “In Nazaret walya men Yesus tamanꞌara,” dekam zep taken soneblaka, “Yesus, Daud Bak mo Auyan-tane, asa tol kwasang gwebla.”
⁴⁸ Hwena zi beyana in jalse neblak, “Balkkam.” Hwena zen mam tangankam kim taken sone gweꞌanka, “Daud Bak mo Auyan-tane, asa kwasang gwebla!”
⁴⁹ Yesus dekam zep zausuku, ki zep gubiridaka, “Em kwang tan.” Kim kwang daꞌak, zao zep nenblak, “Em luwen, hen emki sewehen! Yesus man emsa gublunda– zebon osan de song gwen hap.”
⁵⁰ Zi nwe diminni in dekam zep nabal-bakam de luwesik ane kininkam deyol utuknu hiri gulin guk halka– Yesus osan dikim song gwen hap.
⁵¹ Yesus ki zep takensiblika, “Em basae dwam gwibiꞌira? – Ëe de desa ebe hap syal gwibir-blin hapye.” Ki zep ding gulbluka, “Bian guru, ee ama tangan nwesa de kara gwen hap dwam gweꞌan.”
⁵² Ki zep ding gulbluka, “Angkam sap esa song gwera. Em mese Asa taibliblala, in zebe dawem gwenda.” Dekam zep ki hendep nwena kara gweka, dekam zep ora san Yesussu ang gwe sebla halka.