¹ Aha Hari Sabatnak kim zauk– Israelk de zi mo syal tan srem yaklanak, Yesus ki zep gandum tra san goletaman gweꞌanka. Hwena zere hon de ang ta gwen wenya zen gandum dansa kilk di-in kini gweꞌak, ki zep tahakam legek da gwibiꞌik– dekam de sop nik ebatralhen hap, ki zep dwenblandak.
² Farisikam de zini kim hla nulidak, ki zep jalse neibiridak, “Em ba habe Musa mo titi tabin ola ngip uꞌin? Kirekam em ema hwena Hari Sabatnak syal taꞌan!”
³ Yesus ki zep hwena ding gulzimki, “Em bawalkam esa Alap mo ola an mo eini dam ulsul? – men kim Daud Bak zere hon de ang ta gwen wenya ban goleusak gweꞌankaye.
⁴ Zen kim Alap mo golak til zika, zen dekam Alap hap de roti loneblansa gol kinika. Desa zep zere hon de ang ta gwen wenya ban zitwinbir song gweka. Hwena sap neno mae mo titi tabin olak man lwak: Sap Daud zena hen zebon de ang ta gwen wenya, zen bejen Alap hap de rotina insa twinbin. Zen diki Alap mo golak de syal ta gwen zi en dwin gwibirin. Sap eiwa kirekam, hwena Daud hom Alap mo nwenak karek gweka– zen kim usak hap zitwinbirkiye. Zep hen kirekam, Abon de ang ta gwen wenya an kim usak hap kilk di-in kinzil, zen hom ekarek gwer.”
⁵ Ki zep Yesus waulsuzimki, “Ngatan zi mo lang nakore Zi Tanganna, Ëe an Zen tangan– Hari Sabat mo Nolaye. Zep anakarekam de klis gul gwizimdin hip dena, ‘Desa sap esa Hari Sabatnak syal eibir,’ ahaksa, ‘Kirekam bahem,’ zen ano dena.”
⁶ Aha Hari Sabatnak kim hatak, Yesus dekam etan but srem golak tawa tabirki. Hwena zao zini ki. Dam taha nik sak gweblaka.
⁷ Hwena Musa mo titi tabin olsa de tawa ta gwibin hip de zi niban Farisikam de gubirida gwen zi niban man Yesus mo kareksa de hlaulblun hap ealp gweꞌak. Zep kara daꞌak, “Zen wehe neno mae mo syal tan srem yaklana an hap dena ngip guꞌunka– zisi de dawem tankamye?”
⁸ Hwena Yesus mes zeno mae mo enlalana tame tazimki, ki zep hendep zini in zen tahana sak gweblaka desa gubluka, “Haen, ano mae mo dang gwenna a dekon emki zauzun.” Zini in dekam zep ze zau zuka.
⁹ Ki zep Yesus takensibiridaka, “Musa mo titi tabin olak, nen basa de Hari Sabatkam gol gwen? Hari Sabatkam san ha nen kareksa zi hip gol gwizimdin? San ha dawemsa nen gol gwizimdin? Hari Sabatkam san ha nen zisi ngaya ta gwibin? San ha nen tamera gwen?”
¹⁰ Yesus ki zep tingan nwekam amjanbirki, ki zep hwena zi taha sakna insa gubluka, “Tahana insa emki inin gilsin.” Ki zep hendep inin gilsiki, dekam zep hendep tahana in etan dawem gweblak.
¹¹ Hwena Musa mo titi tabin olsa de tawa ta gwibin zini Farisikam de zi niban man tangan Yesussu dail gibliꞌak. Dekam zep enlalasa deblaꞌak, “An banakan esa eblal?”
¹² Zao kim lwa seꞌak, Yesus ki zep kwatap teknak hata seka, dekon zep kam blal Alapsa gu sone gweblaꞌanka.
¹³ Kim litik, ki zep zere hon men zen beyakam ang ta gwek, desa gu sonebiridaka, zao zep hwena dua-blas enkam dam tasibirki– zen de zere mo olsa gol halada gwen hap.
¹⁴ Ahana Simon– men desa hen Yesus “Petrus”kum bose takake, hen oso zem, Andreas. Ahana Yakobus, Yohanis, Pilipus, Bartolomeus,
¹⁵ Matius, Tomas, hen Alpeus mo tanena Yakobus, hen Simon– men zen nonol Israel dikim Roma mo irik gin nikon eze-en gwen hap de easas gwennak ang gwekake.
¹⁶ Ahana Yakobus mo tanena Yudas, hen aha zini Yudas– ena Kariot wal. Zen men zen hendep Yesussu zergukuke.
¹⁷ Yesus ki zep dua-blaskam de zini in han etan golehut gwehe tinjaka, ki zep hendep seseknak golezau zuka. Zere hon de ang ta gwen wenya aha hlikna zewe beya nik etagal gweꞌak, hen ahakore zini beya tangan nik mes yaing gwezak– sap Yerusalem kon, hen tingare Yahudi mo lang nakon, hendep hi alpnak de e darena Tirus hen Sidon kon.
¹⁸ Zen Yesussu de sane tan hap hen zere mae mo sang-sang nakon dikim edawem gwen hap yaing gwezak. Dowal mo tilbiridan wenya dekam zep edawem gwek.
¹⁹ Dekam tingare zini man sap Yesussu de olk tan hap eakasik gweꞌak. Sap zeno tim nikon man sosonna wet so gweꞌak, zep zi sang-sangna dekam kitak edawem gwe-gweꞌak.
²⁰ Yesus ki zep zi beyana in zen zere hon ang ta gwek karatda tabiꞌinka, ki zep ze gubiridaka, “Tahalha wenya, heꞌho gwrbinni ebon mae onak lwaꞌan, sap em makare zini, zen zen Alap mo irik ginni bi neibiꞌin.
²¹ Angkam em in zene usak naban lowe heꞌan, heꞌho gwibinni ebon mae onak lwaꞌan, sap em esa lamkam eitri gwer. Angkam em in zene go naban lowe heꞌan, heꞌho gwibinni ebon mae onak lwaꞌan, sap em esa lamkam enga-ngol gwer.
²² Hen emsa kim ngatan zi mo lang nakore Zi Tanganna abe hap de jal hap dail gibirida gweꞌak, hen baes neibirida gweꞌak, hen lamang da gwibiꞌik, ahaksa bosena gwa-tek gwa-tek da gwibiꞌik, dekam heꞌho gwibinni ebon mae onak mamkam lwaꞌan.
²³ Kirekam de emsa gweibirida gwenna, em dekam isrip-sri naban etasya gwek, sap ebe mae hap de dawemna ngatan zi mo langnak yawal tangan nik lwazimꞌin. Sap zini men zen angkam emsa kirekam neibirida gweꞌan, auyan-aza zem hen kirekam orep Alap mo olsa de ayang gul gwen hap de zini neibirida gwek.
²⁴ “Hwena kwasang tol, em in zene angkam te-ala naban lowehe gweꞌan, em engalap gwen, sap eno heꞌho gwibinni mes lwak.
²⁵ Kwasang tol, em in zene angkam itri naban lowehe gweꞌan, em engalap gwen, sap em in zen esa lamkam eusak gwer. Kwasang tol, em in zene angkam nga-ngola ban lowehe gweꞌan, em engalap gwen, sap em in zen esa lamkam gona ta tine gwer.
²⁶ Kwasang tol, em in zene angkam bose dawem naban lowehe gweꞌan, em engalap gwen. Zini men zen angkam eno bosena nurensiꞌin, auyan-aza zem kirekam hen orep yasik tabin hip de zi mo bosem-sena nurensik gwizimk, men zen dekam anakan eboton gwe-gwek, ‘Ëe an Alap mo olsa de ebe mae hap ayang gul gwizimdin hip de zi.’”
²⁷ “Hwena angkam em an zene asa sane laꞌan, an desae ep golzimꞌin: Ere mae hap de jal zini em kwasang gwibirida gwen. Zen de emsa tail gik gweblanna, zebe mae hap hwena dawemsa em goltrei gwizimdin.
²⁸ Zen de emsa lamang tanna, ahaksa karek tanna, em hwena Biansa em zebe mae hap gu sone gweblan– Zen deka dawemsa golzimki.
²⁹ Zi de emsa itranak tahakam lek tyanna, eihya itrasa em zitreblan– zao de hen emsa lek tyan hap. Zi de eno tahan bajusa al sonna, etan de eno olk de bajusa al soblan hap bahem jalse gweblan. Em zebe hap alblan.
³⁰ Ebon de ahanik ba maesa abe gwibinni, em hendep golblan. Ahanik de eno ba maesa al gunnu, etan bahem ebe hap de golblan hap abe tan.
³¹ “Men kirekam ena dwam gweꞌara, zi de kirekam emsa gwe gweblan hap, em hen ahasa kirekam em gweibirida gwen.
³² “Em de enaka de kwasang gwe-gweblan zi ensa etan kwasang gwibirida gwenkam, ki hwena anakan bahem ekil gil gwen, ‘Alap sa dekam asa sam gwesibiridala.’ Sap kareksa de gol gwen zini hen ki kire enkam kwasang neibirida gwenan– zini men zen zenaka kwasang neibirida gwenanye.
³³ Hen em de dawemsa goltrei gwizimdinni men zen en ebe hap hen dawemna noltre gweblanan, hwena aha zi hip hom, dekam toton bahem ekil gil gwen, ‘Ano bosena dekam sa Alap mo nwenak dawem gwer.’ Sap kareksa de gol gwen zini hen ki kire enkam egwe gwenan.
³⁴ Hen em de te-alasa bohe gul gwizimdinni men zen en ebe hap etan lop da gweblanan, hwena aha zi hip hom, dekam toton bahem ekil gil gwen, ‘Ano bosena dekam sa Alap mo nwenak dawem gwer.’ Sap kareksa de gol gwen zini hen ki bohe nulzimnira gwenan– karek gol gwen bose zikhipye, men zen hen kire enkam etan lop dazimnira gwenanye.
³⁵ Hwena em jal zi omka em kwasang gwibirida gwen, hen dawemsa em goltrei gwizimdin. Em totoresa bohe gul gwizimdin, hwena bahem lun kon etan anakan eenlala gwe-gwen, ‘Etan sa ap golblala.’ Dekam sa eno bosena ngatan zi mo langnak dawem gwer, hen Teipsin Zini Alap sa emsa gublula, ‘An ano bi gweblan walas ahana.’ Sap Alap mo kwasangna zen zi dawem en hap hom. Hwena Zen man hen kwasang gwibirida gwenda– kareksa de gol gwen zini, hen zini men zen dawemna zebe hap nolbla srem gwe-gwenanye.
³⁶ In zep, men kirekam Bian om zi karek-karekna enlwan gwibirida gwenda, em hen kirekam em zi bose omka enna lwabirida gwen.”
³⁷ “Bahem zi bose omka enlala gwibirida gwen, ‘Zini in karekna.’ Ki hwena Alap hen sa kirekam emsa enlala gweblala, ‘Zena hen karekna.’ Bahem gubirida gwen, ‘Zini in karek tan hap man dakastiꞌira,’ ki hwena Alap sa kirekam hen emsa gublula. Karekna mensa aha zi ebe hap nol gwizimnin, desa em eititi gwibir-zimdin. Ki sa Alap hen eno karek-karekna ep tap gulsublula.
³⁸ Em aha zi hip dawemsa gol gwizimdin, dekam sa Alap ebe hap hen dawemna gol gweblala. Dekam taha dohon naban sa ebe hap lop ta gweblala. Lau-lau kire-kirena, Zen sa etan ebe hap inik gul sone gweblala, sa ebe hap taik-tik gilsik sone gweblala. Ho nabare kire-kirena zen sa hendep esuwehe kini gwer. Aha kire-kirena zen esa taha-taha gweblala, hendep esa dangnak yaing tahal gwera. Em de yunak aha zi hip biti tablanna, ki Alap sa etan yunak ebe hap beya enkam biti tablala.”
³⁹ Zewe zep Yesus ola gulk sun de blaonzimdinni dan-dan mas sozimki: “Zi nwe haina bejen nwe hai bose zemka irik tahan. Ki hwena apdenak sa ho dwrak san laman anera.
⁴⁰ “Zi mo nwenak mam-mamna nara? San ha guru? San ha sekola walas? Zen diki guruke. Hwena walasna in, sekola zemka kim sul sonenna, zen diki dekam sa guru zeban apde era.
⁴¹ “Hen em ba habe wal bose uk mo ngip gun betek tolsa hla kul gwizimnin? Hwena ere mo ngip gun yawala em desa de oto gulsun hup ema baes ta gwenan.
⁴² Kirekam de lwankam, em kitak men kiye: Zi de wal bose zemka gublunna, ‘Anik eno nwenak de te klana insa gulsuk,’ hwena zere mo nwenak balok tek yawala hen ki lwaꞌan. Zen maka desa nonol mulsuꞌura– dekam de wal bose zik moka hlaun hupye. Em in Alapsa ek enkame ang e gweblanan. Diki nonol emaka aha-en-aha-enkam ere mae mo karek yala insa ngan ulsu’un. Ki esa dawemkam nwekam ekara gwer– dekam de betekkam de ngip gun wal bose wal omka halen ora san golewet so gwen hapye.”
⁴³ “Men kiye hen tenya: Zen zere mo dan enkam ete gwenan. Tenya men zen twin gwibin srem tetan dankam ete gwenan, zen bejen twin gwibin tetan dankam ten. Hen tenya men zen twin gwibin tetan dankam ete gwenan, zen bejen twinbin srem tetan dankam ten.
⁴⁴ Tingare tenya zen ten nakon tame nul gwenan. Kwiwe dansa bejen lemo timnik taran. Hen dokot te ngi-ngina bejen rambutan dankam ten.
⁴⁵ Hen kirekam, zi enlala dawemna, zen enhonak dawemsa ing nul gwenan. Zen desa zep aha zi hip noltrei gwizimnin. Zi enlala karekna, zen enhonak kareksa ing nul gwenan. Zen hen desa zep noltrei gwizimnin. Zep men zen zi mo enhonak beya gwe-gwenan, zen zep nopna sewe gwenan– ek tihi san de wet son hapye.”
⁴⁶ “Em ba habe waba hap Asa laken gweblanan? – ‘Bian, Bian’, hwena em home ano ol san ang ta gwenan.
⁴⁷ Hwena men zen eiwakam Abon yaing gwe-gwenanzal, hen ano ola esal gwenan hen desan ang ta gwenan, zen men kiye–
⁴⁸ zi de golsa moko dawem naban taunnu. Zen nonola kamasa de olk en san hul-hul gun, kire drak-drak tenya eiyas tan. Ho namwa gwenkam, gola in san de ho namwa til zinna, gola in bejen ewak gwen, sap zen dawemkam de moko tanna.
⁴⁹ “Hwena men zen ano ola sap esane gwe-gwenan, hwena desan hom ang ta gwenan, zen men kiye– zi de golsa moko sremkam taunnu. Ho namwa de desan til zinna, zen sa nabakam mirsik kinila, hendep karekkam sa drewera.”