¹ Aha yaklanak kim zauk, Yesus Ho Gutuna Galilea mo alpnak zauꞌunka. Zi beyana ki zep ze dot dasik– Alap mo olsa dikim esane gwen hap.
² Yesus ki zep zewe hisglimnik bul darena akeka, hwena buluk iwe de syal ta gwen wenya in mes atiti gwek. Zere mae mo jaringnik men zen desyana etehekke, desa kap dasiꞌik.
³ Yesus ki zep aha buluk sewe seka– Simon mo buluk. Ki zep gubluka, “Simon, bulu ansa em ata gun– engka en deka esek gwehak. Man asa dot dasiꞌin.” Bul mwanak zep Yesus nikinki, dekon zep zi beyana insa tawa tabirki– men zen ho alp san teinikin sonekye.
⁴ Kim tawa tasibirki, Zen hom bulu in kon ati gweka, hwena ki zep Simonsa gubluka, “Emki tatek san dep golsong gwen. Em jaringsi ahakore naban zitol sonen– hogwesa ekakim lahyok.”
⁵ Simon ki zep ding gulbluka, “Bian, kam blal ee ama syal ta tiner, hwena hogwe maena home balk ul. Hwena mese ki asa gublunda, ee asa ki etan otol soner.”
⁶ Kim notol sonek, beya en tangankam zep etehek, hendep jaringni in kalk-kalk gwen hap alp gwesik.
⁷ Dekam zep aha buluk de wenya kip tahana walap nulsubirida gweꞌak– zen de mas gwibiridazan hap. Kim yaing gwezak, dekam zep apdekam nul inek. Bul darena insa kim hogwena inkam biti dazimk, hendep man su nek, hendep keing nen hap alp neisiꞌik.
⁸ Simon Petrus kim kirekam hlaulku, ki zep Yesus mo nwenak utuk gwehe zaka, ki zep kon gu seblaka, “Asa hli ta, Bian, sap ee an kirekam-kirekam karek naban.”
⁹ Simon in mae hap ki gubluka, sap zen hen tingare wal bose wal zeban man serkam denggwanblak– insa kirekam beya tangankam dahyokke.
¹⁰ Hen kirekam– Simon mo syal bosena, Zebedeus mo walas darena Yakobus ne Yohanis ne. Yesus ki zep Simon maesa gubiridaka, “Bahem eairin. Angkam hwena zisi esa lahyo gwer.”
¹¹ Ki zep bulu insa hisglim sin dep ata nosok, zao zep hendep tingan hli dandak. Hwena Yesussu zep kon ang neblak.
¹² Aha yaklanak Yesus man aha enak gweꞌanka. Zao zini ki– sop sang-sang karek de tingare tim sin hla tanna. Zini in kim Yesussu hla taka, ki zep zeno nwenak ik gwehe zaka, dekon zep abe ta seka, “Bian, Eme dwam gweꞌanam, Em emaka asa dawem taꞌara.”
¹³ Yesus ki zep towanblan naban ding gulbluka, “Ëe ama dwam gweꞌan. Em dawem gwen!” Dekam zep hendep sop sang-sang karekna in hli tak.
¹⁴ Zao zep gubluka, “Insa emsa dawem tanan, bahem mae ahasa tonbiridan. Diki nonol Alap mo golak de syal tan zi hip ahana kip enaka zertrebla. Zao gublu, ‘Emki asa hla tan. Ëe san ha mese dawem gwer?’ Musa Bak mo titi tabin olak men kirekam sop sang-sang karek zi de dawem gwennak dep dena lwakke, zen kirekam em syal gwibin. Zen dekam sa tingan emsa anakan tame dal, ‘Zen eiwa mes tangan dawem gweka.’”
¹⁵ Sap man Yesus tonbiridan hap jalse gwibirida gweka, hwena zere hap de ola man etan langa gwesik haladak. Ki zep zini etan beya tangan nik yaing gwe-gwezak– sane tan hap, hen sang-sang nakon de dawem ta gwibin hip.
¹⁶ Yesus dekam otan-otankam zi srem san dep song gwe-gweka– dekon de ze-ere nakon Biansa gu sone gweblan hap.
¹⁷ Aha yaklakam, Yesus man zi beyasa tawa tabiꞌinka. Hwena Farisikam de gubirida gwen zi niban, Musa mo titi tabin olsa de tawa ta gwibin hip de zi niban zao hen lowe heꞌak. Zen tingare e-e nakon mes etagal gwek– Galilea mo lang nakon, hen tingare Yerusalem mo lang nakon. Dekam Bian onakore sosonna, zi sang-sangsa dikim dawem ta gwibin hip dena, Yesus hon lwaꞌak.
¹⁸ Dekam zep hen taha-tana teisya ine gwen srem zi sang-sangna berya ban neiren halzak. Zen sap Yesus osan dep ner halzak,
¹⁹ hwena ba san dep? – Zebon osan dep de zertilzin naye. Sap zini mes tangan kyang gwesik. Gol bol san zep nersewek, dekon zep dre dasik anehak, desan zep berya ban Yesus osan dep ner dwanuk.
²⁰ Yesus kim anakan tame tabirki, “Eiwa, zen man tangan Asa daibliblaꞌan,” ki zep zi sang-sangna insa gubluka, “Tane tol, eno karek-karekna mese ep tap gulsublunan.”
²¹ Musa mo olsa de tawa ta gwibin zi niban Farisikam de gubirida gwen zi niban enlala ennak zep anakan donsubluꞌak, “Zini an zeno ola bolte-bolte tanganna! Zen bap kirekam Alapsa lamang tanda! Zi bejen zi bose zik mo karek-karekna tap gulsublun. Diki Bian Alap bap.”
²² Hwena Yesus mes zeno mae mo enlalana insa tame tazimki, dekam zep gubiridaka, “Em bap kirekam enlala ennak Asa lonsubluꞌan!
²³ Em ema ano ola husus eibir– anakan insa gublulye, ‘Eno karek-karekna mese ep tap gulsublunan.’ Hwena anakan de gublunkam, ‘Em luwen, hendep song gwe,’ san esa hen etan husus eibir? Sap ol-gun darena in apdenak– Alap mo sosonkam de gublun ol.
²⁴ Hwena angkam Ëe ama ebe mae hap goltreizimꞌin– em dikim Asa anakan tame tan hap, ‘Alap mes ki ngatan zi mo lang nakore Zi Tanganna abe hap sosonna golblaka– okamanak awe dikim zi mo karek-kareksa tap gulsuk gwizimdin hip denaye.’” Ki zep hwena etan zi sang-sangna insa gubluka, “Ëe ama emsa gubluꞌan: Em luwen. Ere mo berya insa teisya, ki gol san song gwe.”
²⁵ Hendep ki zep zeno mae mo nwenak luweka, berya insa man einki, ki zep song gweka. Dekam Alapsa man isrip-sri gwebla song gweka.
²⁶ Tingare zini serkam etenggwank, dekam zep Alap mo bosena teip nulsuk gweblaꞌak, hen airin niban egu gweꞌak, “Namen eiwa owas hap ki kirekam lwanan!”
²⁷ Yesus kim hyanak gola in kon wet so zaka, dekam zep Roma mo irik ginnik dep de pajak te-ala alal ta gwizimdin hip de zini hla taꞌanka, bosena Lewi. Zen zere mo syal gwe-gwen teksonnak nikinꞌinka. Yesus ki zep ze gublu zaka, “Haen. Asa em ang gweblan.”
²⁸ Lewi ki zep hendep luweka, zao zep zere mo teksonnak de kire-kirena tingan hli tan daka, ki zep Yesussu ang gweblaka.
²⁹ Dekam zep Lewi zere mo golak tembane yawalsa golzimki– zao de Yesussu zertreizimdin hip. Zini beya tangan nik yaing gwezak. Ahakore pajak te-ala alal tanda gwen zini man hen yaing gwezak.
³⁰ Farisikam de gubirida gwen zini man ze hen hla nulidazak. Zen e-en nakon ezauꞌuk. Hom biti gwek. Ahakore Farisikam de zini in, Musa mo titi tabin olsa de tawa tabin hip dena. Zen Yesus hon de ang ta gwen wenyaka anakan jal neibiridaꞌak, “Em ba hap tangan tembane tal– pajak te-ala alal tanda gwen zi nibanye, hen aha zi enlala karek-karek naban! Zen in kwae nabanke!”
³¹ Yesus ki zep ding gulzimki, “Zini, sang-sang srem wenya, zen hom doktersa dwam ne gweblanan. Zen diki zi sang-sang en dwam ne gweblanan.
³² Ëe an dokter makane hatazak– zi enlala karek-kareksa de dawem san dep kwang guludan hap, zen dekakim ehalek. Hwena men zen zenaka tim di gwibirin, ‘Ëe an dawem-dawemna,’ Ëe desa de kwang guludan hap home hatazak.”
³³ Zini ki zep Yesussu dakensiblik, “Yohanis hon de ang ta gwen wenya zen etan-etankam tembanesa elwa gwenan– Biansa dikim enlala zon tasiblin naban abe ta gwen hapye. Farisikam de gubirida gwen wenya hen kirekam. Hwena ebon de ang ta gwen wenya, zen hwena tembanena serkam dwenblanda gwenan, hen hona notdeblanda gwenan.”
³⁴ Yesus ki zep ding gulzimki, “Abon de ang ta gwen wenya kip man dakastilzimꞌin– an kirekam tembanesa de elwan sremkam lowehe gweꞌanye. Sap zen angkam teipsin zisi de zergwen makan Asa nergwe gweꞌan.
³⁵ Hwena jal zini kim de Asa jek-jak daꞌak, Abon de ang ta gwen wenya dekam molya tembane tak. Embwan hap sa baes tal.”
³⁶ Etan ki zep kire hap gulk sun de ol blaonzimdinni dan mas sozimki, “Baju esena bejen kalk so irin– baju epba kalknak de yal irin hipye. Zini hom kirekam nei gwizimnin, sap zen dekam de hwena baju esena insa kalk son, hen epba wenya in han ese kalk naban bejen nadakastin.
³⁷ Hen kirekam, anggur ho esesa bejen kambing sopkam de botol epbanak yuren. Kirekam hom dakastiꞌin. Sap anggur ho esesa de kambing sop botol epbanak yurenkam, anggur hona in kim de nopna tail giꞌik, kambing sopkam de botola in dekam sa kalk ner. Anggur hona in dekam sa hen hleweher.
³⁸ Anggur ho esena zen diki kambing sop botol esenak de yurenkam dakastiꞌin. Zep hen kirekam, Abon de ang ta gwen wenyik de etan epba lowehen san abarenak ang tan hap hom dakastiꞌin.”
³⁹ Aumwa hap ki zep etan gulk sun ola blaonzimki: “Zi de anggur epbasa otdenna, zen bejen esena dwam gwibin. Zen sa gulu, ‘Ëpba wenya, zen zen– dawem tangan wenyaye. Zen zen tangan abe hap sam gwesibliꞌan.’”