¹ Ki zep Yahudi mo sinodenak de teipsin-teipsin wenya ezauk, dekam zep Yesussu teipsin zini Pilatus osan dep nerhak.
² Ki zep nenblak, “Zini an ee mese dam lasik: Karek san dep zen zini lup gulhal gweꞌara. Zen man tawa ta gwibirida, ‘Romak de teipsin tangan zi mo dwam gwibin sin bahem ang ta gwen– pajak te-alasa de kap ta gwizimdinkimye.’ Zen man hen zenaka gu gweblanda, ‘Ëe an Emsa de ngaya tabin hip de Zini Zen– mensa egu-guk gwekye. Ëe an Zen– eno mae mo Teipsin niye.’”
³ Pilatus ki zep takensiblika, “Em an san ha eiwa zen– Yahudi mo teipsin niye?” Ki zep ding gulbluka, “In kirekame gunda, zen kirekamke.”
⁴ Ki zep Pilatus Alap mo golak de mam-mam wenya hen tingare zi trana insa gubiridaka, “Ëe home zini an mo karekna hlaulblunan.”
⁵ Hwena zen dekam anakan easas gwesikhal gweꞌak, “Zeno tawa tabinni in dekon eilman gwe song gwe-gwenan. Galilea kon ki kon gweka, hendep Yerusalem mo langna mes sul soneka, hendep angkam mes awe hata zala.”
⁶ Pilatus kim kirekam salbiridaka, ki zep takensibiridaka, “An san Galilea wal?”
⁷ Ki zep ding nulblik, “In eiwa, Galilea wal.” Dekam zep Herodes osan dep zer soneka, sap Galilea, zen Herodes mo irik ginni. Herodes zena dekam Yerusalemk gweꞌanka.
⁸ Herodes man tangan Yesussu de hla tankam sam gwesiki, sap zen orep mes zebe hap dena sane gwe-gweka. Zep man sap hla tan hap dwam gwe-gweka– hen zeno owas syal gwibinsi de hlaun hup.
⁹ In zep sap Herodes beyakam taken-taken gwe-gweblaꞌanka, hwena Yesus hom tangan ding gul gweblaꞌanka.
¹⁰ Hwena Alap mo golak de syal tan zi mo mam-mamna hen Musa mo olsa de tawa ta gwibin zini men zen Yesussu nertilzik dekam Yesus mo karek-karekna beya tangankam Herodes Bak hap ol drakkam deiri nul guk gweblaꞌak.
¹¹ Dekam zep Herodes zere mo jana nabare zi niban Yesussu ziswre ta gweꞌanka hen zilamang ta gweꞌanka. Ki zep hwena teipsin zi hip de baju dawemna ala nosoblak– deban de anakan swre ta gwen hap, “Dawem, bian. Em in zen– Yahudi mo teipsin niye.” Deban zep etan Pilatus osan dep ner sonek.
¹² Yaklana dekam zep Herodes ne Pilatus ne, orep men zen zenaka gil-gil ei gwizimki, etan dokot eka.
¹³ Pilatus ki zep tagal gulsuku– Alap mo golak de mam-mamna hen Yahudi mo nol-nola, hen zi trana insa,
¹⁴ ki zep ze gubiridaka, “Em ansa zini abon onak dep anakare ola ban erhalzal, ‘Zen man zisi karek san dep lup gulhal gweꞌara,’ eno mae mo nwenak ee mese sap takensik gweblasan, hwena ee home mae zeno karekna hlaulblunan– men kirekam em enblalye.
¹⁵ Hen kirekam Herodes. Zen hen hom karekna hlaulblula, sap zen totoresa etan nebon mae osan zer sonera. Eiwa, zen hom mae karekna golka– dekam de tan hapye.
¹⁶ Zep ee asa lek-lek tan en hap gubiridal, ki asa zeser soner.”
¹⁷ (23:16)
¹⁸ Kitak de zi beyam-byana in ki zep egu anek, “In lak! Barabassa ap hil ti sonezim!”
¹⁹ Barabas in Roma mo irik gin nikon zisi hlil inꞌinka, dekam zep goleilman gwenkam zisi zitaka. In zep bwinak tak daink.
²⁰ Pilatus Yesussu de zeser sonen hap sap dwam gweka, in zep sap etan kirekam ol mamkam gubiridaka.
²¹ Hwena dekam tangan zep ol nop-nopkam egu ane gweꞌak, “Desa te-lidak sonnak makan laink! Te-lidak sonnak makan laink!”
²² Ki zep etan dan-ahanna gubiridaka, “Hwena zeno karekna homke! – dekam de tan hap denaye. Ëe hom am aha-en mae hlaulblunan! Ëe asa sapꞌnen lek-lek tan hap gubiridal, ki asa hil ti soner.”
²³ Hwena zen ki zep ol nop-nopkam te-lidak sonnak de makan ta irin hip egu ane gweꞌak, hendep dekon Pilatus hom etan zeno mae mo ola esek gulzimki.
²⁴ Ki zep hendep zeno mae mo gun sun tapbla tazimki.
²⁵ Dekam zep hwena zini mensa zena abe neblak, desa zeser sonezimki– mensa goleilman gwenkam de zi tan hap bwinak tak da inkke. Hwena Yesussu zep zeno mae mo dwam gwibin sin dikim syal gwibin hip tapbla tazimki.
²⁶ Yesussu ki zep nerhak. Oranak zep Kirene walya Simonsa nertoweꞌak. Zen man Yerusalem san dep lwa haꞌan zaka. Zao zep balk dak, ki zep tik-tik dak– Yesus hup de te-lidak sonna insa de hwena Yesus zere hon zikong gwe hendan hap.
²⁷ Zini beya nik hen ang tan daꞌak. Ahakon we walya gosa dablan daꞌak hen aitin-aitin neblaꞌak.
²⁸ Yesus ki zep we walya insa lero gwibiridaka, zao zep gubiridaka, “Yerusalem we wal, bahem Asa gona gweblan. Diki ere mae mo timsi em gweibin, hen walas omka em gweibiridan.
²⁹ Sap yaklanak sa hatal– zi de anakan gun hup, ‘Dawem tanganna, we wal de u gwensa akasin sremna, hen ewalas gwen sremna, hen momkam de walassa taizin sremna. Sap Alap mo jala nabakam sa hatazal.’
³⁰ Dekam zini sa airin hip kwatap-kwatapna naherhebirida gwer, ‘Asa em kei-king gun! Asa em ani-ning gun– ee de Alap mo jala ansa hlaun srem hap.’
³¹ Angkam de zini em an walas mo kime angkam jala tame uꞌin, hwena kire nikeki Asa eblaꞌan. Hwena zi mo jal-jala sa ta gwese zaher, hendep sa tangan taman kinil. Hwena zao sa Alap mo jala hatazimzir.”
³² Hen karek gol gwen zi darena man deisyak– apdekam de Yesus mae han tameran hap.
³³ Lang tek bosena Zi Nol Swrak kim yaing gwesek, zao zep jana nabare zini Yesussu te-lidak sonnak makan daink. Karek gol gwen zi darena insa hen man makan nosoink– ahana Yesus mo dam taha san dekam, ahana irgwa taha san dekam. [
³⁴ Yesus ki zep ola gu soneka, “Bian, zini an zen Asa karek danan, zeno mae mo karekna ansa tap gulsuzim, sap zen hom tame nuꞌin– an desa zena syal neibiꞌinye.”] Jana nabare zini in ki zep hwena zeno pakeanna dobe abu mo kim de zenaka dam tasik gwibinkim kae neblandak.
³⁵ In kim ki ze kirekam lwaꞌak, zini beya nik ze hen kara dabiꞌik. Yahudi mo mam-mamna hen man ze durum gwehek. Zen hen Yesussu anakan swre da gweꞌak, “Zen aha zi ensa ngaya ta gwibirki. Zen de eiwa Alap mo Dam Tasinni, Israelsa de Zen ngaya tabin hip, ki Zen ki angkam Zenaka ngaya tan!”
³⁶ Ki zep hen jana nabare zini swre daꞌak. Zen anggur ho eteksa noltre seblazak,
³⁷ deban zep ze nen seblak, “Eme eiwa Yahudi mo teipsin zisi, emki enaka ngaya tan!”
³⁸ Te-lidak sonna iwe nol bol tahan nakon man anakarekam de alena makan nulink, “An zen– Yahudi zi mo teipsin niye.”
³⁹ Aha karek gol gwen zini mensa Yesus mae han makan dabirink, zen Yesussu anakan hen lamang taꞌanka, “Em san zisi de ngaya ta gwibin hip de Alap mo dam tasin Zisi hom?! Emki nenaka ngaya tabin!”
⁴⁰ Aha zi nik zep jalse gweblaka, “Em san home Alapsa airiblaꞌara? Nebe mae hap mes ki lwazimnin– tameran hap denaye.
⁴¹ Hwena nebe nikip dena, nere nik mo karek-karek nakon ki lwazimnin. An hwena hom tangan karekna golka.”
⁴² Ki zep Yesussu gubluka, “Asa enlala gwebla– Em de irik gin hip lwahal zankamye!”
⁴³ Ki zep ding gulbluka, “Ëe ama emsa gubluꞌan: Namen heꞌho gwibin langnak eban esa apdekam era.”
⁴⁴ Yaklana kim bolak zauku, dekam zep tingare langna owas hap kawesik. Hendep yakla nwena kim dan-ahannak zauku, dekam zep etan hleng gwek.
⁴⁵ Alap mo gol mwanak de kaen lilikin glaing-gling yawala dekam zep owas hap kalk neisik sonek.
⁴⁶ Yesus ki zep hwena ol mamkam herhe hanaka, “Bian, Ëe ere mo angna eno tahanake dre neꞌan!” Kirekam kim gu aneka, ki zep hendep tilsiki.
⁴⁷ Jana nabare zi mo mamna in zen ze kara taꞌanka, dekam zep Alap mo bosena anakare ola ban teip gulsubluꞌanka, “Zini an eiwa kareksa de gol gwen sremna.”
⁴⁸ Zi beyam-byana men zen kara tan hap yaing gwezak, kim ze kirekam hla nuk, dekam zep go naban anakare enlala naban lwan dahak, “O ee ba habe ola mas gul– zi dawemna insa de tan hapye!”
⁴⁹ Ahakon men zen Yesussu nergwe gwek, hen we walya men zen Galilea kon ang neblazak, zen langa nakon ezauꞌuk. Dekon zep hen kara nuꞌik– in zen ki ze lwaꞌakye.
⁵⁰ Yahudi mo aha ena Arimatea walya Yusup, zen zini dawem tanganna, hen zini man desa blikip neisik gweblak. Zen man tangan Alap de kitak nabakam irik gilzin hap hohle gweꞌanka. Zen sap Yahudi mo teipsin sinodenak de aha mamna, hwena zen hom Yesussu de tan hap de ol aha-en gunnuk ola mas gulku.
⁵¹ (23:50)
⁵² Yusup ki zep Pilatus onak dep song gweka– Yesus mo tok naka dikim lo tasin hip de abe tan hap. Dekam zep gubluka, “Amki.”
⁵³ Dekam zep zizeryahe halka. Kaen ngap-ngap blalkam zep zitahaleka, ki zep hwena kaso hul hamal gun esenak zidre neka– aha zisi de ze drenen sremnak.
⁵⁴ Yaklana in Jumatkam, hen man kam-en gweꞌak, zep Hari Sabatnak dikim hatan hap aha-ere jam maekam hom lwaꞌak.
⁵⁵ We walya men zen Yesussu Galilea kon ang neblazak, zen man Yusupsu nertrok. Kaso hula insa man hla nuk, hen zidre nennak man kara dabiꞌik.
⁵⁶ Ki zep lwan dahak, hwena dekam zep irase dawem nabare kire-kirena hamal nuk– Yesus mo tok naka dikim dra tandan hap, hen ahakorena kaen mwa san de kang tanun hap. Hari Sabatnak, syala dekam man nolzausuk– men kirekam Musa titi ta gwibirkike.