¹ Yesus kim nama Alap mo golak gweꞌanka, ki zep kara tabiꞌinka– te-ala beya zini kim Alap hap te-alana biti da sone gweblaꞌanzak.
² Dekam zep hen we sem tahalhana hlaulku– zen kim hen te-alana dan tolaka Alap hap ing so soneblaꞌanzak.
³ Yesus dekam zep gubiridaka, “Eiwa denakae emsa gubiridaꞌan: We sem tahalhana an mes tingare ahakore zini kwei-kwik gulun.
⁴ Sap ahakon in zen biti da gwe sanzal, zere mae hap de hlikna nama beya nik erlwazimꞌin. Hwena we sem tahalhana an mes tingan ing gulun– zen dikim tol sap gwen hap denaka.”
⁵ Yesus hon de ang ta gwen wenya ki zep Alap mo gola insa anakan donbiꞌik, “Alap mo gola an man tangan weir gulsunkum kwa nuk, hen zeno kaso kong ta zahenna serkam de nwe-awes tanganna. Hen mensa Alap hap kire-kirena nol gweblak, serkam de dawem-dawem tanganna.” Yesus ki zep gubiridaka,
⁶ “Yaklanak sa hatal, an desa namen kara uꞌin, sa dre nulsul. Hendep zeno kaso kong ta zahenna aha-en mae molya lwak. Zen tingan tangan sa dri nulsul.”
⁷ Ki zep Yesussu dakensiblik, “Bian, zen bawalkam sa ki lwal? Hen banakare owassa asa hla kul gwer? – dekam de anakan dam gulsun hup, ‘Angkam man ki lwaꞌan– men kirekam hamal hap asa gu-gubiridakaye.’”
⁸ Ki zep ding gulzimki, “Salok-salokkam lowehe gwek. Emsa mana yasik da gwibirink. Sap zini beya nik sa ebon mae onak anakan eboton gwe-gwezal, ‘Ëe an Zen– Yesusye. Angkam mes ze zaunun!’ Hwena bahem salbirida gwen.
⁹ Em de anakan esane gwe-gwenkam, ‘Zewe man eeijaꞌan,’ hen anakan, ‘Dekon pemerinta nakon de wet so gwen hap man esoson gweꞌan,’ hwena em dekam bahem eairi gwen. Sap zen nonol kirekam sa Alap mo dwam gwibin sin lwa gwer. Hwena dekam bahem ekil gil gwen, ‘An aumwa hap denak mes zaul, zep ki lwaꞌan.’
¹⁰ “Aha zi ausu nakorena aha zi ausu naban sa eeija gwer, hen aha irik ginni aha irik gin niban sa eeija gwer.
¹¹ Lang yala an san jingili mam enkam sa tailida gwera. Usak yawala sa hatanda gwer. Hen sang-sang yawal sa hlauluda song gwer. Nglinak esa owasna hla kulse gwer, dekam esa eairi gwer.
¹² “Hwena kirekam de lwan sremnak, emsa sa dahyo gwer hen karek da gwibir. But srem golak de mam-mam wenya kip sa emsa kap nulzimhal gwer, ki sa hwena pemerinta mo bwinak emsa yal nulne gwer. Hen emsa sa pemerinta mo teipsin-teipsin wenya kip anakan noletrei gwizim, ‘An hen ahana– Yesus hon de ang gwe-gwenna.’
¹³ Hwena zen kirekam Alap mo dwam gwibin sin sa ki ebe mae hap lwa gwizim– em dikim ze abe hap denaka eton gwen hap.
¹⁴ Aen asa ebe mae hap enlala blala ing ta sone gwizim, dekam hendep eno mae mo jal zini molya eno mae mo ola insa nulsuk halasen gwek. Zep emki hamal hap enlalasa anakan hohle ta gwen, ‘Ëe ba hap de enlalana beya gwen hap? Zen sa zewe de zaunkum enlala blala abe hap zerblala– ee de kirekam ding gul gwizimdin hip denaye.’
¹⁵ (21:14)
¹⁶ Ere mae mo ane-bianna, aya-wal oso-wal om, iye wal om, hen wal bose wal om, zen sa emsa abe hap de jal hap karek tabin hip nolegu gwer. Hendep emsa sa ahakon damera gwer.
¹⁷ Emsa tingare zini sa husus neibirida gwer, sap em an Asa de ang gwe-gweblan wenya.
¹⁸ Em sap esa okamanak awe juwer, hwena lamkam etan tim ese naban esa luk tal.
¹⁹ Zep em Asa de taibliblannak em tatetekam ezauk gwen. Zen dekam esa enaka ngaya labir!”
²⁰ “Em kime jana nabare zini Yerusalemsa de dot tasinnik hla kulidaꞌak, zen dekam eenlala gwek, ‘Yerusalemsa de dre tan hap de yaklanak mes zaunun.’
²¹ Em dekam, Yerusalem mo langnak de lowehen wenya, kwatap san dep em heya-hya gwen. Yerusalemk de lowehen wenya, emki hli tasin. Hen e alp san de lowe hendan wenya, bahem etan e san dep lwanda halzan.
²² Dekam men kirekam hamal hap ale nul gwekke, kire enkam sa Alap mo jala hatazim.
²³ Kwasang tol, we walya u nubare wenya, hen nama de walassa momkam taizi gwibin wenya. Zen tol banakan molya easendak. Dekam langna sa tangan dohon-hon gwer– Alap mo jal de awe de zi hip hatazimdinkimye.
²⁴ Ahakon nebokkam sa blom da gwibir. Ahakon tingare lang san dep sa dahalebirhal gwer– zao de zi mo tana iltikinnik ebabu gwe-gwen hap. Dekam Yerusalemsa Yahudi srem zi en sa nyauk gweblal– hendep yaklana de tap gweꞌanka, Bian mensa ki-en zebe mae hap aitbir-zimkike.”
²⁵ “Alap dekam sa tan-tanna bennak, yaklanak, hen keisnik gol gwizimdi. Dekam hina sa mam en tangankam ngep-ngep gwe-gwer– auku mam naban. Okamanak de tingare langnak de zini zep sa anakare hap eairi gwer, ‘Nen an molye lowehek.’
²⁶ Zini hendep kim de lang olo gwen hap dena insa neisbiꞌik, airin hip sa etilsik gwer. Sap dekam nglinak de teipsin-teipsin dowal-dowala serkam sa eilman gwe nasen gwer.
²⁷ Zen diki dekam sa ngatan zi mo lang nakore Zi Tanganna Asa but de zerati gwe zannak hla dase gul. Zen dekam asa ere mo soson naban ngatan yawala ban ziati gwezal.
²⁸ Kirekam kim de lwaꞌak, zen dekam em luk tan, ki gulk sun isrip-sri naban ekara gwesek, sap zen dekam emsa de ngaya tabin hip ki lwaꞌan.”
²⁹ Yesus ki zep gulk sun de ol blaonzimdinkim aisil gwibiridaꞌanka, “Emki eenlala gwen– deren, ahaksa aha te.
³⁰ Zen de alsin hyanak etan ala gwenkam, zen dekame tame ul gwenan, ‘Angkam sasa gwen hap ki lwaꞌan.’
³¹ Hen kirekam, owas-owasna insa kime hla kul gweꞌak, zen dekam esa anakan etawa gwer, ‘Angkam Alap Zen de kitak irik gilzin hap denak man zauꞌun!’
³² “Eiwa denakae emsa gubiridaꞌan: Em an zene angkam lowe heꞌan, molye kitak juwek, zen dekam sa ki tingan lwal.
³³ Ngli naban kama naban sa jek-jak ner. Hwena ano ola, zen hendep denaban sa lwa gwer.”
³⁴ “Ere mo gwensa em kara gul gwen– mae hap, mana eno enhona in beya gwenanka, syan-syan en hap de enlalakam, hen ho mamak otde gwen en hap de enlalakam, hen ere mo gwensa de ngalap gwibin hip de enlalakam. Ki hwena aumwa hap de yaklanak zol makarenak esa ekyan nahlal.
³⁵ Sap yaklana dekam kirekam sa hatazim– tingan men zen okamanak lowehe gwenan, zebe mae hapye.
³⁶ Zen in zep salok-salokkam lowehe gwek– Alapsa de gu sonebla tine gwen naban, tatetekam ekakim ezauk. Karek yala in zen hataꞌan, kire hap em abe ta sone gwen– desa ekakim dawemkam yaubik, hen dawemkam ekakim ngatan zi mo lang nakore Zi Tanganna Asa etan de hata zannak ertowek.”
³⁷ Zao kim lwa seꞌak, Yesus dekam yaklam Alap mo golak tawa ta gwibirki. Kam-en zep hwena zere hon de ang ta gwen wenya ban zaitun tra nabare kwatap tek san dep golesek gwe-gweka– zao de goletruwe gwen hap.
³⁸ Zi beyam-byana kak tangannak zep Alap mo golak yaing gwe-gwezak– Yesus mo tawa tabinni insa de esane gwen hap.