¹ Dekam teipsin tangan zini ki, zen langna beya en tangan naka Roma kon irik gilki. Zen dekam zep tingare zisi de zere mo irik gin nika aitbin hip gubiridaka.
² An nonol aitbinni– Kirenius men kim Siria mo langnak gubernor gwekake.
³ Tingare zini dekam zep zere mae mo auyan-aza mo e-e san dep sek gwendak– zeno mae mo bosem-sesa dikim ze ale tabir-zimdin hip.
⁴ Yusup ne Maria ne dekam zep hen kire hap Galilea mo langnak de ena Nazaret kon Yerusalem mo langnak de aha ena Betlehem san dep song ek– teipsin zini Daudsa men zao orep jaha gwekke. Sap Yusup mo auyan-azana Daud onakon. Zebe hap de golgu gweblan wenya Maria in dekam u nuban gweꞌak.
⁵ (2:4)
⁶ Betlehemk hom tangan holo eꞌak, Maria ki zep zi walassa jaha gwek– nonol walassa. Kaen hak-haknak zep tahalek, desa zep domba-sapi mo tembane ta gwen kolho makarenak drenek. Sap kitak de gol-gola mes zi enkam ebeya gwek.
⁷ (2:6)
⁸ Langna iwe dekam domba zaho ta gwibin wenya man kam domba zaho zemka sonak kara dabiꞌik.
⁹ Hwena Alap mo dam taha nakore zini ki zep zebon mae onak jowe ane zaka, hen Bian mo ngatanna man ze zilbirida anezak. Karekkam zep ze eairiꞌak.
¹⁰ Hwena Alap mo dam taha nakore zini in ki zep gubiridaka, “Bahem eairin, sap ee an ol dawemsae ebe mae hap golhatazimninzal. Ola ansa de esankam, tingare zini serkam tangan sa eisrip-sri gwer.
¹¹ Namen, Daud mo enak, wenya man jaha gwer– emsa de ngaya tabin hip de Teipsin nika, Alap mensa dam tasikike.
¹² Ol tan-tansae ebe mae hap golzimꞌin: Em esa walas tolsa deyol hak-hakkam de tahalen naka hla lal. Domba mo tembane ta gwennak taꞌara. Zen dekam esa anakan dam lasil, ‘An Zen.’”
¹³ Ki zep hwena mumuk ennak ahakore Alap mo dam taha nakore zini beya en tangankam ejowezak, ki zep ze Alapsa isrip-sri neblaꞌak,
¹⁴ “Alap Em eiwa teipsin tanganna! Eno bosena dikire kitak teip nulsuk gweblak. Sap angkam ema okamanak de zi niban golesesek gweꞌara– ere mo nwenak men zen oto gwesiꞌinye.”
¹⁵ Alap mo dam taha nakore zini in kim etan ngatan zi mo lang san dep sesek gwesek, zini in dekam zep eguk, “Nen ki nabakam Betlehem san dep gweyo gwen– eka ki ze hla kuk, in desa Bian nesa gubiridandake.”
¹⁶ Ki zep hendep sek gwek. Dekam zep hendep Yusup ne Maria neka nakek, hen walas tola insa dekam zep hla dak– domba mo tembane ta gwen kolho makarenak de tannak.
¹⁷ In kim hla dak, dekam zep kitak donbiridak– walas tola in hap dena, men desa Alap mo dam tahana kore zini in tonbiridakaye.
¹⁸ Ola insa de esane gwenkam, tingare zini man tangan etenggwank.
¹⁹ Hwena Maria zena, in zen ki ze lwa gweꞌak, desa kitak enlala ennak lam gul gweꞌak hen enlala gwe-gwibiꞌik.
²⁰ Zini in ki zep etan Alapsa de terya ban boltere tan naban lwan dahak. Sap tingan mensa esane gwek hen hla nuk, zen hendep men kirekam Alap mo dam tahana kore zini in gubiridakake.
²¹ Walas tola insa kim mingguna aha-en tap gweblak, dekam zep to mipna nablonsubluk, hen dekam zep “Yesus”kum bose dak– men kirekam Alap mo dam taha nakore zini Mariasa u gwen sremnak gubirkike.
²² Musa Bak men desa nonol zi walas we tan hap dena zere mo titi tabin olak ale gulku, Maria ne Yusup ne man desan ang ek. Zen nonol Maria de sasa gwesinnik dep orapna empat-pulu enkam eissik, dekam zep walas tola insa Yerusalem san erzahek– Alap hap dikim ertreblan hap.
²³ Mae hap ertreblak: Sap Musa mes ki zere mo titi tabin olak anakan ale gulku, “Tingare nonol zi walas we tanna, zen Alap zere hap dena. Zep emki zere hap zertre gweblan.”
²⁴ Zen hen man ang ek– mawasa de dan-dan Alap hap teisyablanna, desa de Alap mo golak de syal tan zi ang sosublun hap. Sap Musa mo titi tabin olak nonol walas we tansa de Alap hap zertreblan hap dena kirekam hen lwak.
²⁵ Dekam Yerusalemk, zini bosena Simeon. Zini in enho dam-damkam gwe gweka hen Alap hon mes tangan tal gwesiki. Zen man Alapsa Israelsa de dawem gun hup kara ta gweka, hen Alap mo Enho zergwe gweka.
²⁶ Alap mo Enhona mes hamal hap gu-gubluka, “Em molye na-en tilki– Teipsin Zini insa de hla tan sremnakye, Ëe Mensa Israelsa de ngaya tabin hip dam tasikye.”
²⁷ Dekam zep hen Simeonsa Alap mo Enhona anakan gubluka, “Emki Alap mo golak de teksonna iwe tin.” Hwena Maria ne Yusup ne dekam zep hen Yesussu Alap hap de zertreblan hap ertiꞌinzak– Musa mo ola in san de ang en hap.
²⁸ Simeon dekam zep hendep walas tola insa zer inki, ki zep dawemna Alap hap golblaka,
²⁹ “Teipsin Zini Bian, angkam Eno asa de gu-guk gweblanna mese eiwa de guluda. Ema asa sam tanda. Zep ere hon de babu gwen zini ee angkam mese auhu-kamana ansa de hli yun hup hohle gwenan.
³⁰ Sap angkam ee mese ere mo nwekam hla tanan– ere mo zisi de ngaya tabin hip de Zi zer sonen naye,
³¹ men Desa Ena tingare zi dikim tame tan hap hamal takaye.
³² Zen Zen sa ngatanna golzimdi– tingare zi ausu mo enlalasa dikim ngatan tazimdin hipye. Hen zen Zebon onakon sa Israel mo bosena dawem gwer.”
³³ An-bi zem man tangan lenggwanꞌak– Simeon mo ola insa kim zere nik mo walasna in hap dena sane eꞌakye.
³⁴ Simeon ki zep guzimki, “Bian sa ep dawemna golzimdi.” Hen Mariasa ki zep gubirki, “Walas tola an mes Alap dam tasiki– Zen de Israelk de zisi klis gun hup. Dawem gol gwen wenya, desa Alap zere hap sa kang gul seblala. Hwena karek gol gwen wenya, desa hendep kareknak sa kang gulu. Sap An Alap mo dam tasin Zi, zep sa hen zini beya nik lamang da gwer.
³⁵ Alap insa kirekam syal gwibiꞌira, zini zen dekam sa zere mae mo enlala aning tanna nertre gwer. Hwena Maria, eno enhonak enlwan yawal sa hen nebok ben-ben makan tisil.”
³⁶ We sem bogola Hana Bak dekam zao hen gweꞌak. Zen Alap mo hamal hap de olsa de ayang gul gwen hap de we. Zeno biana Panuel– Asyer Bak mo auyan-aza nakorena. Wenya in zi zeban tuju tahun enkam ek,
³⁷ dekam hwena sem nik zep ze-en holokam gwe gwek. Hendep in kim Yesussu ertilzik, zeno tahuna dekam 84 enkam. Zen hom tangan Alap mo gola langa gulsuk gwek. Yaklam denaban kam denaban zen dekon Alapsa isrip-sri gwebla tine gwek hen gu sonebla tine gwek– tembane lwa gwen naban.
³⁸ Zen dekam zep hen hatazak, dekam zep Alap hap dawemsa golblak. Hen men zen ze lowe heꞌak, dekam zep desa anakan tonbiridaꞌak, “Walasna an Zen Zen sa jal zi mo irik gin nikon nesa gwiswe sonera.”
³⁹ Yusup ne Maria ne in kim ze Musa mo titi tabin ola insa syal eisibik– nonol walas we tan hap dena, dekam zep etan zere nik mo ena Nazaret san dep erlwahak– Galilea mo langnak dep.
⁴⁰ Walas tola in ki zep hendep mam gweꞌanka, hen sosonna mam gweblaꞌak, hen enlala blala dekam zep tangan mam gweblaꞌanka. Hen Alap mo kwasang-kwasangna Zebon lwa gweꞌak.
⁴¹ Tahunna men kiye, Yesus mo ane-biana man yakla yala Paskanak dep Yerusalem san dep yahe gwek.
⁴² Yesus mo tahunna kim dua-blas gwek, ki zep etan kire san dep sek gwek– men kirekam Israelk de zini egwe gwekke.
⁴³ Kim ehya gwesik, ki zep etan lwan dahak, hwena Yesus man Yerusalemk gweka. Hwena an-bi zem hom anakan tawa eblak, “Zen man gwera.”
⁴⁴ Zen zi beya hap tim uk, “Zen hen mes ang gwe zala.” Hwena hom. In kim song ek, truwe guk gwennak kim kam-en yaing gwek, dekam zep ohwensiblik. Dekam zep iye zem osan hen wal bose wal zem osan leblak.
⁴⁵ Hwena hom hla lak. Kaꞌan zep kaknak etan Yerusalem san dep olahak– zewe de leblan hap.
⁴⁶ Yaklana dan-ahanna kim zep hla lak. Zen Alap mo golak nikinꞌinka, Alap mo olsa de tawa ta gwibin wenyaka sane tabiꞌinka, hen man takensibirida gweꞌanka.
⁴⁷ Tingare zini men zen sane da gweꞌak, zeno enlala blala man anakan denggwan gweblaꞌak, “Owas, zen en ba hap dam gulsuk gweꞌara?”
⁴⁸ An-bi zem hen man tangan zao de hla lankam lenggwanblak. An zem ki zep gubluk, “Temlan, em ba habe kirekam asa gweizimki? Ëe bia han ngalap nabane emsa ahakalblal!”
⁴⁹ Ki zep ding gulbirki, “Em ba habe sren san Asa ahakalblaka? Zen emaka enlala eka, ‘Zen Bi zik mo golak gweꞌara.’”
⁵⁰ Hwena zen hom zeno ding gulzimdinni insa tame ulblik.
⁵¹ Dekam zep etan Nazaret san dep ang gwizimki, hen dekam man ze betek gwe-gwizimki. Maria kirekam-kirekamna insa tane zikhip dena hlaul gwek, desa enlala ennak lam gul gwek.
⁵² Yesus kim mam gweꞌanka, enlala blala dekam zep hen mam gweblaꞌanka. Zen man tangan Alap mo nwenak hen tingare zi mo nwenak oto gwesiki.