¹ Yesus ki zep zere hon de ang ta gwen wenyaka gubiridaka, “Zini ki, zeno te-alana beya tanganna. Zeno irgwa taha nakore zini hen ki. Zen zen zeno kire-kirena kara ta gwibir-blika. Hwena te-ala beya zini insa man aha zi anakan nenblak, ‘Eno irgwa taha nakore zini in man eno te-alana twen gweblaꞌara.’
² Dekam zep kwang taka, zao zep gubluka, ‘Zini man eno karekna asa don gweblanan. Em mensa ano kire-kirena kara ta gweꞌara, bukuna men zao aitbinkim ale gul gwenda, desa em ap golblan. Em molye etan kara ta gweka. Em esa syala in kon wet sola.’
³ “Kim nama bon ait gwibin bukuna insa golbla srem gweꞌanka, ki zep enlala gweka, ‘Ëe an banakan asa gwer? Ëe asa ere mo syal dawemna an kon wet sol. Hwena ee soson naka hom– dekam de kamasa lwi gwen hapye. Hen wagam hap de hakalasen gwenna, zen saherak asa kim enaka drene gwer.
⁴ O ee mese dam gulsunun! Ëe asa aha te-ala beya zi niban goledokot gwer. Ëe de wet sonkam, zen sa asa zere mae mo gola kon kwang da gwer.’
⁵ “Dekam zep irgwa taha nakore zi ahak-ahakna in sowekam kwang guluda gweka– zini men zen te-ala beya zini in hon ebon gwekke. Nonol zen hata zaka, ki zep desa takensiblika, ‘Em banakaꞌene bon gweka– ano mam mo kire-kirena kim kap takaye?’
⁶ “Ki zep ding gulbluka, ‘Tembane taiblin gin hip de minyak dremna dua-pulu enkam.’ “Dekam zep irgwa taha nakore zini in gubluka, ‘Dokot, emki nabakam ere mo bon alena ansa wet gulsun. Anakan hwena ale gul, “Sepulu enkame lop tak.”’
⁷ “Ki zep etan aha zini hata zaka, desa ki zep takensiblika, ‘Em banakaꞌene bon gweka– ano mam mo gandumnu kim lop takaye?’ “Ki zep ding gulbluka, ‘Gandum sakna 1.000 enkam.’ “Ki zep hwena ding gulbluka, ‘An de– kire hap de suratna, men zao ere mo bosena ale gulkuye. Dokot, 800 enkam wet gulsuk.’ Hwena mam zem in hom anakan tame gulku, ‘Zen abon de bonna totoresa wet gulsuk gweꞌara.’
⁸ “Aumwa hap kim te-ala beya zini in tame gulku, ‘O zen man etan asa serkam ahak-ahak taka,’ dekam zep guku, ‘Eiwa, zen nwe hleng gwen tanganna.’” Ki zep Yesus ayang gulzimki, “Men zen auhu-kama ennak dep de enlala naban lowehe gwenan, zen hwena dawemkam ngein sin dep anakan ekalang gwe-gweꞌan, ‘Ëe kirekam asa goledokot gwer– te-ala beya zi nibanye.’ Men zen ngatan zi mo lang nakore ngatan naban lowehe gwenan, zen hom kirekam etewesik gwenan.
⁹ Zep Ëe ama emsa gubiridaꞌan: Auhu-kamanak de te-alakam diki Alap han em zerdokot gwen. Eno auhu-kamanak de te-alana insa kime tinkim hli taꞌanka, Alap Zen Zen sa emsa kwang tala– hendep de gwen hap de gola kon.
¹⁰ “Teipsin zi de babu zikhip banakare beteksa bohe gulblunna– zen de jek-jak gun sremkam, ki hen yawal kire-kirena maka zebe hap bohe gulbluꞌara. Dekam mes taibliblaka, ‘Zen airis.’ Hwena zen de banakare betek maesa jek-jak guꞌunam, ki yawal kire-kirena maka hen jek-jak guꞌura.
¹¹ Zep emsa de auhu-kamanak de kire-kire hap taibliblan sremkam, ki hen molya Alap wakuwe emsa taibliblaka– dakal hap de elwa gwen kire-kire hapye.
¹² Hen bohe gulblun kire-kire hap de emsa taibliblan sremkam, ki hen Alap molya wakuwe ebe hap lop tablaka– dakal hap de elwa gwen kire-kire naye, mensa sap menkam ebe hap hamal gulblukaye.”
¹³ Ki zep ola gulk sun blaonzimki, “Zini bejen dare teipsin zisi dawemkam babu gwizimdin. Zen hwena aha-en naka sa dawemkam kwasang gwe-gweblala hen blikip gwesik gweblala. Aha zini insa molya. Zep em hen kirekam: Em bejen em syala dan son– Alap mo syala ban, te-ala beya gwen hap de syala banye.”
¹⁴ Farisikam de zini in kim Yesussu kirekam sane daꞌak, dekam zep swre daꞌak, sap zen te-alasa ensa nola gweblak.
¹⁵ Yesus ki zep gubiridaka, “Em in zene ere mae mo bosena teip ulsuk gwenan– aha zi dikim emsa kil tibin hip, ‘An eiwa Alap mo nwenak dawem-dawemna.’ Hwena Alap tawana eno mae mo enhona. Men desa auhu-kama zini teip nulsuk gwenan, zen Alap mo nwenak san de ble nabare kire-kirena kiye.”
¹⁶ Yesus hen dekam anakan tawa tabirki, “Musa mo titi tabin ola, hen hamal hap de ola mensa Alap mo ol ayang gul gwen zini ale nul gwek, desan en de ang ta gwen hap dena, zen mes Yohanis hon zausuk. Hwena angkam Ëe an desae Ëre hon de ang ta gwen wenya ban zigol halada gweꞌan, zen Alap Zen de irik gin hip de ol dawem saye. Zep Ëe ama emsa gubiridaꞌan: Zen desan em kitak ang tan.
¹⁷ Ngli naban kama naban zen maka jek-jak neꞌan, hwena Musa mo titi tabin ola, sap aha-ere huruf mae, molya jek-jak gwek.
¹⁸ Zi de wesya baes gwibinni, hwena ahanaka de etan gonkam, zen kahalo. Hen kirekam, zi de gonna zi mo we baes gwibinsi, zen hen kahalo.”
¹⁹ Yesus anakarekam ola gulk sun blaonzimki, “Orep ki zini, zeno kire-kirena beya tanganna. Zeno pakeanna serkam de dawem-dawem tanganna, hen mwin-mwankam tembane derek-dereksa twin gwibirki.
²⁰ Zewe hen ki zini, bosena Lazarus. Zen tahalha tanganna, hen kwatyal-kwatyala man timni sul soneblak. Desa man te-ala beya zini in mo te so kini gwennak dera guk gwezak–
²¹ tembane lausa de dekon twenblanda gwen hap, in zen te-ala beya zini in mo meja nakon altil gwekke. Hen lwana man yaing gwe-gwezak– dekam de zeno kwatyal sussu kwlem gul gweblan hap.
²² Tahalha zini in ki zep tol tilki, dekam zep Alap mo dam taha nakore zini neir inehak– Abraham Bak mo dang gwen nakon de heꞌho gwibinnik drenen hap. “Hwena dekam zep te-ala beya zini in hen tilki, ki zep ner dwanuk.
²³ Zen hwena syauk bla sal-salak karekkam de sang-sangsa golgwe onka. Dekon zep Abrahamsa langa ennak kara ta seꞌanka. Lazarus zeno alp nakon nikinꞌinka.
²⁴ Ki zep herhe seblaka, ‘Auyan Abraham, asa kwasang gwebla. Lazarussu gublu– zen deka honak taha bolsa os taka, dekam de ano mahalsa bleble tazan hap. Sap ee an syauk bla sal-sal kareknake gweꞌan.’
²⁵ “Hwena Abraham man ding gulbluka, ‘Ano walas, emki enlala gwen: Em kime auhu-kamanak gweka, em dawem ensae goltowe gweka. Hwena Lazarus an karek ensa goltowe gweka. Zep zen mes angkam awe sam gwesili, hwena em sang-sang nabane kareknak gwe gweꞌara.
²⁶ Zen toton molya hata zaka, sap ngirinnik dwrakna mam tanganna. An kon bejen in san dep ati gwe inezan, hen in kon bejen an san dep ta gwe sezan.’
²⁷ “Te-ala beya zini in ki zep gubluka, ‘Auyan Abraham, ki emki Lazarussu ano bian mo gol san dep zer sonen.
²⁸ Ano oso walya zao aha-ere taha-tapkam lowe heꞌan– zen deka zebe mae hap ol zim-zimsi golzimki. Zen mana hen sang-sang kareksa awe ere mo kim hla nul inzak.’
²⁹ “Hwena Abraham ki zep ding gulbluka, ‘Zebon mae onak ki– Musa mo ol ale gunnu, hen Alap mo ol ayang gul gwen zi mo alena. Zen dikire desan ang tak.’
³⁰ “Hwena ki zep ding gulbluka, ‘Auyan Abraham, kirekam hom sowe heꞌan. Diki zi zen tin nikon ngaya gwen– zen de zebon mae hatan hap. Dekam maka ehaleꞌan– zere mae mo karek-karek nakonye.’
³¹ “Hwena ki zep ding gulbluka, ‘Zen de Musa mo olsa hen Alap mo ol ayang gul gwen hap de zi mo olsa i-san i-san gwe-gwibin sremkam, zen hen molya etaiblik– zi de tin nikon ngaya gwen maekamye.’”