¹ Aha Hari Sabatnak kim zauk, ki zep Farisi walya teipsin tolik Yesussu gubluka– zeno golak de goletembane tan hap. Hwena zen mes ahakore Farisi zi niban hen Musa mo ol tawa ta gwibin zi niban ola ziaha-en gulku– zao de dawemkam Yesussu anakan karatda tan hap, “Zen wehe neno mae mo Hari Sabat hap denaka gulmunꞌunka?”
² Zen in zep serkam de tese-tese nabare zini hen nenblak– zen de hen ang gwen hap. Hendep zen Yesus mo dang gwen nakon zep nikinꞌinka.
³ Yesus ki zep hwena kitak takensibiridaka, “Em banakane Musa mo titi tabin ola dam ulsuꞌun? Hari Sabatkam san ha zi sang-sangsa sap de dawem tabinkim? San ha bejen?”
⁴ Hwena man nasalsiblik. Ki zep hwena tese-tese nabare zini insa irik tasiki, hendep ki zep ze dawem taka. Zao zep gubluka, “Sap esa angkam song gwera.”
⁵ Ki zep hwena gubiridaka, “Eno walas ahaksa sapi zaho de Hari Sabatkam aili honak dum gwe heꞌanam, em san ha molye dekam er aneꞌanam?”
⁶ Zini in sap man Yesus mo ola insa husus neibiꞌik, hwena hom dam nulsuk– kirekam de ding gulblun hapye.
⁷ Nama kim tembane yala iwe lowe heꞌak, Yesus ki zep hlauludaka, ahakon bose bete-tek nik ngein nikore komal tum dawemsa teinikirinkim alt dasibik. Ki zep zebe mae hap ola gulk sun blaonzimki,
⁸ “Zi de we-zi daresa de oto sonnak de tembane yawala kon emsa ang gwen hap gublunkam, em bahem na-en ngeinnik de komal tum dawemna al sosun. San ha zen mes yap hen aha zisi, ebon onakon de bose nik teipsiblin naka, ang gwen hap gublula?
⁹ Ki hwena zen de hatankam, gol bina in sa emsa gublula, ‘Em aes gwesiblin.’ Hwena em dekam saher tola ban esa lun tangan nikiri.
¹⁰ Diki em de hatankam, nonol lure tangannak em nikirin. Zen diki gol bi nik sa emsa gublula, ‘Haen, ano wal bose, ngeinni an kon em hen nikirin.’ Dekam eno bosena sa dawem gwer– tingare zi mo nwenakye.
¹¹ Sap tingare zini men zen mam gwen hap edwam gwe-gwenan, Alap sa hwena otde tangannak kang gulu. Hwena men zen otde tangannak lowehe gwenan, desa hwena gut de tangannak sa kang gul sera.”
¹² Ki zep gol bina insa gubluka, “Em de tembane yawalsa syal gwe-gwibinni, bahem dekon zi dawem ensa gubirida gwen– men kiye, wal bose wal om, iye om, oso wal om, hen sowe tane wal om, ahaksa gol golek denak de te-ala beya zisi. Ki zen sa emsa nerhwe-hwe gwer. Dekam mensae golzimꞌinka, kiresa sa hwena ebe hap nol gweblal.
¹³ Diki em de tembane yawalsa syal gwe-gwibinni, zen tahalha zisi em kon gubirida gwen– sap zi tim karek, sap zi lek, hen zi nwe dimin maesa.
¹⁴ Kirekam Alap sa ebe hap heꞌho gwibin nika golblala. Sap kirekam de zini bejen emsa zerhwe-hwe gwen. Alap hwena sa ebe hap dawemsa golblala– yaklana in dekam zi dawem-dawemna tin nikon luk taꞌakye.”
¹⁵ Yesus kim tonsuku, dekam zep ahanik gu aneka, “Alap mo irik gin kon gwisibir hanan tembane yawalak men zen ang taꞌak, zen heꞌho gwibin tangan naka sa hla nul!”
¹⁶ Yesus ki zep zeno ola insa de ding gulblun hap gulk sun ola blaonzimki, “Zini ki tembanesa yawal tangankam syal gwibirki, hen zini beya tangankam hamal hap gubirida guku– tembane tanna iwe de ang tan hapye.
¹⁷ Tembanena insa kim taiblin nilsik, ki zep babu zemka ahanaka gubluka, ‘Em anakan taken naseran, “Haen. Tembanena angkam mes de danan!”’
¹⁸ “Hwena men desa sap hamal hap gubiridaka, zen kitak man hwena babu zem insa anakan nen gweblaꞌak, ‘Ëe molye hatak.’ Ahana man gubluka, ‘Ëe mese ngasa zer. Ëe zebe karatda tan hap song gweꞌan. Anakan gublu, “Bap zen asa jakal gweblan.”’
¹⁹ “Ahana hen man gubluka, ‘Ëe ner home sapisa dare taha-tap enkam kap guk. Ëe zebe song gweꞌan– anakan de akasibiridan hap, “Wehe apdekam syal taꞌak?” Anakan gublu, “Zen molya hataka. Man gulu, Bap zen asa jakal gweblan.”’
²⁰ “Ahana hen man gubluka, ‘Ëe ner home wenya gok, zep ee molye hatak.’
²¹ “Babu zem in ki zep ze-en lwa halka, ki zep tonbla zaka– men kirekam ding nul gweblaꞌakye. Gol bina in dekam man tangan jal gwibiridaka. Ki zep gubluka, ‘Em hendep nabakam etan song gwen– e yala awe de ora-ora san. Dekam kwang guluda halza– sap te-ala srem zi, sap zi karek, zi lek, hen nwe dimin mae naka.’ Ki zep kwang guludahal zaka.
²² “Kim lwa halka, ki zep gublu zaka, ‘Mese kire naka kwang guluda halanzal, hwena komal tum jam en hom.’
²³ “Ki zep etan gubluka, ‘Em etan song gwen– sap eik sin de ora bete-tek mae san. Desan ang tan hap wan-wan tabir song gwe– hendep ano golak awe de ebeya gwezak.
²⁴ Ëe ama emsa gubluꞌan: Mensa sap nongka hamal hap gubiridak, zen molya lun etan yaing gwezak– tembanena ansa de akasiblindan mae hapye.’”
²⁵ In kim sap zini beya tangan nik Yesus hon ang taꞌak, ki zep lero gwibiridan naban gubiridaka,
²⁶ “Zini men zen an-bi zemka dawemkam enna nolabirida gwenan, hwena zeno mae mo Asa de en lwablanna lwala henna, kirekam de zini zen bap zen Asa ang gweblan. Hen kirekam, men zen we zemka, walas zemka, ahaksa aya-wal oso-wal zemka dawemkam enna nolabirida gwenan, hwena zeno mae mo Asa de en lwablanna lwala henna, zen hen bap zen Asa ang gweblan. Hen kirekam, zi de Abon onakon zere mo gwensa dawemkam ensa lwabinni, zen hen bap zen Asa ang gweblan.
²⁷ Hen zi de zenaka anakan sosok tan sremna, ‘Asa sap sa Yesus mo kim te-lidak sonnak makan dain,’ zen bap zen hen Asa ang gweblan.
²⁸ “Ebon mae onakon ahanik de klibu nabare gol syal gweblan hap enlala gweꞌanam, zen nongka maka nikinꞌira– zere mo te-alasa de aitblin hap, mae hap, ‘Wehe sowe heꞌanka? – gola ansa dikim so ta sonen hapye.’
²⁹ Sap sowehen sremkam, ki hwena ei-te en naka de eiyas tannak sa te-alana topse gwera. Dekam tingan men zen gol ik sosunnu insa hla daꞌak anakan sa swre dal,
³⁰ ‘Zen man tim gulku, “Ëe asa tap ta soner,” hwena hom tol!’
³¹ “Hen kirekam, teipsin zi de zeno jana nabare zi sepulu ribu enkam lowe heblanna, hwena zen de sane gweꞌanka, ‘Aha teipsinni zeno jana nabare zini dua-pulu ribu enkam man emsa de hatabin hip sek gweꞌanzal,’ zen maka enlala gweꞌara, ‘Ano an wehe sowe heꞌak? – deban mae de eijan hapye.’
³² Anakan de enlala gweꞌanka, ‘Ano molya sowehek,’ dekam ahanaka maka zer soneꞌara– zen de nama egolek de gwezan sremnak, anakare ola ban, ‘Ëe basa asa ebe hap golblal– dekam de nen eeijan srem hapye?’
³³ “Zen in zep, em hen kirekam. Em de ere mo gwensa kitak tapbla gun sremkam, em molye Abon osan ang gweka.
³⁴ “Em an zene Abon onak ang ta gweꞌan, em okamanak san de hina kiye. Hina zen sap tembanesa de derek gun hup dawemna. Hwena bleble gwenkam, dekam tembanesa dikim derek gun hup dena man hom gwe-gwenan. Derekna in de hom gwenkam, dekam zini bejen ba mae hap dwam gwibin. Dekam zalta dep de kama san hiri gun en hap dena. Zen in zep, em dwan i nibanke! Emki esal gwen.”
³⁵ (14:34)