¹ Dekam zini mes ribu-ribukam Yesussu tagal neblazak hen ngirin daꞌak, hendep man ze zenaka nyaubirida gweꞌak. Dekam zep nonol zere hon de ang ta gwen zi ensa gubiridaka, “Dawem. Ema Farisi zi mo ek enkam de tawa tabin sin ang tanank. Zeno mae mo karekna in, zen ragi makan mam gwe-gwenan.
² Mensa zini ber-ber nul gwenan, zen sa lamkam wet sol. Mensa enlalana aning da gwenan, zen sa lamkam tame dal.
³ Em mensa angkam kawesinnik lon gwibiꞌin, zen hwena lamkam yaklam sa esane gwe-gwer. Hen mensa gol mwanak i mwa ennak lon sonebirida gweꞌan, zen hwena lamkam enak sa ol mam-mamkam donbirisen gwer.”
⁴ “Wal bose wal, zi bose omka bahem airibirida gwen, sap zen auhu-kama tim en naka damera gwenan. Hwena tan hyanak bejen emsa etan karek tan.
⁵ Hwena Ëe ama emsa gubiridaꞌan: Diki Alap ensa em airi gweblan. Sap zen zeno dena– tan hyanak de syauk blanak emsa tak ta irin hip denaye. Zep eiwa, zen diki Desa en em airi gweblan.
⁶ Emki mawana tainim bes-bessa enlala gwibiridan. Desa zini hom te-alakam de kap tan hap dwam neibirida gwenan. Sap eiwa kirekam, hwena Alap bejen aha-en mae desa hen eititi gwibiridan.
⁷ Hen kirekam, eno mae mo nol alana, Bian Alap mes desa anakan tawa gwibirki, ‘Beyana ki en.’ In zep ere mae mo tim hip dena bahem engalap gwe-gwen, sap em Alap mo nwenak mawana tainim bes-bes naban apdenak hom.”
⁸ “Ëe ama emsa gubiridaꞌan: Zini men zen aha zi hon zenaka anakan kira ta gwenna, ‘Ëe an Yesussu de ang gwe-gweblanna,’ kire zini Ëe asa hen Alap mo dam taha nakore zinik anakan kira tal, ‘Zen an hen eiwa Asa de ang gwe-gweblanna.’
⁹ Hwena zi de aha zi hon Asa anakan nazabeblaꞌak, ‘Ëe Yesussu de ang gwe-gweblan zisi hom,’ ki Ëe asa desa hen aumwa hap de zisi klis gunnuk Alap mo dam taha nakore zinik anakan kira tal, ‘Zini an Asa de ang gwe-gweblan zisi hom.’
¹⁰ Ngatan zi mo lang nakore Zi Tanganna Asa de zi lamang taꞌanka, karekna insa Alap maka zebe hap tap gulsubluꞌara. Hwena zi de Alap mo Enhosa lamang tankam, desa Alap bejen tangan tap gulsublun.
¹¹ “Emsa sa dahyo gwer– Yahudi mo but srem golak de mam-mam wenya kip de goletrei gwizimdin hip, hen auhu-kamanak de teipsin-teipsin wenya kip. Anakan sa emsa noletrei gwizim, ‘An Yesus hon de ang ta gwen zi.’ Kirekam de ebon mae lwankam, dekam bahem anakare hap enlalana ebeya gwe-gwen, ‘Ëe banakarekam asa ze ton hen ding gulzim?’
¹² Sap emsa de taken-taken gweblan ennak sa ki Alap mo Enho ebe mae hap gol gwizimdi– em de kirekam eton gwen hap denaye.”
¹³ Ki zep zi beyana in kon ahanik Yesussu gubluka, “Bian, emki ano ayasa gublun– zen de bian swe mo kire-kire hli tan dansa abe hap hli tablan hap.”
¹⁴ Yesus ki zep ding gulbluka, “Asa hom ki nenblak– mam zi mo kim de bian swe uk mo kire-kiresa ep klis gulzimdin hipye.”
¹⁵ Ki zep etan tingare zi hip ayang gulzimki, “Dawem. Banakare kire-kiresa de hole gwibinni, zen zen sa emsa karek tabir. Sap eno mae mo lowe henna, zen kire-kire beya ennak hom lwa gwenan.”
¹⁶ Yesus ki zep ola gulk sun blaonzimki, “Orep ki zini gwe gweka. Zeno kire-kirena beya tanganna. Zeno kamanak mulkwan maena dawemkam hata gweka.
¹⁷ Ki zep zere en hap enlala gweka, ‘Ano nga nakore kire-kire kang ta gwen gol-gola an yak-yak naka hom– dekam de ere mo mulkwan maesa ze kang ta gwen hapye. Ëe banakan asa syal gwibir?’
¹⁸ Ki zep etan enlala gweka, ‘O angkam mese dam gulsunun. Ëe asa ere hon de syal ta gwen wenyaka gubiridal– kire-kire kang ta gwen gol-gola ansa de wet tyasibin hip. Dekam ahasa sa mam-mamkam daublul– zewe de kang ta gwen hap.’
¹⁹ Zen dekam asa enlala gwer, ‘Ëe an heꞌho gwibin nika de goltowe gwen zi. Ëe dekam na-en molye tahalha gwek. Angkam sap asa sewe henkam gwe gwer. Tembane derek-dereksa asa twin gwibir, hen ho dereksa asa otde gwer, hen ere mo gwenna asa nga-ngol gwibir.’
²⁰ “Hwena Alap dekam zep gubluka, ‘Em enlala joblo-topna! Namen mo kam dekam Ëe asa hwena eno angna zersil. Hwena dekam eno kire-kirena mensa ere en hap lam taka, aha zi sa bi neblandal.’”
²¹ Ki zep etan Yesus aumwa hap gubiridaka, “In kirekam sa lwa gwer– zini men zen auhu-kamanak zere en hap kire-kirena kang da gwenanye, hwena zen hom hendep de gwen hap de kire-kire dikim Alap mo nwenak ebeya gwen hap syal ta gwenan.”
²² Yesus ki zep hwena dua-blaskam de zere hon ang ta gwen wenya in en hap ayang gulzimki, “Zen in zebe emsa gubiridaꞌan: Bahem anakan engalap gwe-gwen, ‘Ëe banakan asa gwer? Ëe basa asa twin gwibir? Hen ee basa asa ala so gwer?’
²³ Sap eno gwenna zen tembane en nakon hom lwa gwenan, hen timni ala so gwen hap de en nakon hom lwa gwenan.
²⁴ Emki mawana blensa enlala gwibiridan. Zen hom ba maena eiyas nil gwenan, hen hom dan gwenan. Hen zeno mae mo tembane kang gul gwen gola hom. Hwena Alap ki zebe mae hap tembanena gol gwizimnira! Zep em bahem engalap gwe-gwen, sap em Alap mo nwenak mawa mo kim hom.
²⁵ Em de ere mo gwen hap ngalap gwenkam, san ha em emaka ere mo gwenna insa engka en mae langa gulsuꞌura? Bejen.
²⁶ Em de enlala nik ebeya gwe-gwenkam molye ere mo gwenna betek en maekam ayang ul ine gwek. Ki ba hap de enlalana beyam-bya gwen hap? – ala son hap de kire-kire hap, hen tembane mae hapye.
²⁷ Emki sap sona ok eissi enlala gwibiridan. Zen hom syal ta gwenan, hen pakeanna hom dayal gwibirin. Hwena Ëe ama emsa gubiridaꞌan: Sap teipsin zini Salomo Bak, zen hwena hom ok eis nwe-awes makare pakeanna akeka– desa de zere mo te-ala beyakam teisyan hapye.
²⁸ Em in Biansa de taibliblanna tawa naka hom! Ok eis mo ehultunnu tihis tanganna, sap zen namen de enwe-awes gwenkam, hwena kaꞌan de ejek-jak gwen. Zen sap eiwa kirekam, hwena Alap ki desa kara ta gwibirida. Zep emki Biansa anakan taibli gweblan, ‘Zen molya asa ala so gwen hap denakim da tasiki.’
²⁹ “Zep bahem anakan enlalana ebeya gwe-gwen, ‘Ëe basa asa twin gwibir hen otde gwibir?’ Bahem banakare mae hap engalap gwe-gwen.
³⁰ Sap Alapsa de tame tan srem zini zen kirekam engalap gwe-gwenan. Hwena neno mae mo Bianna Zen anakan tawana, ‘Ano walasna kire hap etahalha gweꞌan.’
³¹ Hwena em Alap de nabakam irik gilzin hap denaka em syal gwe-gwibin, ki Zen sa hen ebe mae hap eno tahalha gwibinni gol gwizimdi.
³² “Em in zen dan en Abon ang ta gweꞌan, bahem eairin, sap eno mae mo Bianna man emsa sam gwesibiridaꞌara– em de zeno irik ginnik biti gwen hapye.
³³ Ere mo bi gwibin kire-kirena te-ala hap em lirak tabin. Te-alana desa tahalha zi hip em kae gwebla-zimdin. Dekam em dakal hap de kire-kiresae lam taꞌara, hen kire-kirena in molya ep ejek-jak gweblak. Ngatan zi mo langnak em lam tan, sap zewe sowe zi molya kap dak, hen winimni molya dwenblandak.
³⁴ Sap men zewe eno kire-kirena erlwa gwenna, eno enlalana hen zewe sa lwa gwera.”
³⁵ “Em salok-salokkam em lowehe gwen– Asa de hut tu ane gun hupye. Em zep em pakean alala tan naban hen syauk ngatan naban Asa kara gwe-gweblan.
³⁶ Men kirekam babu gwen zini mam zemka kara ne gweblananke, zen de we-zi daresa de oto son nakon lwahal zannak, em hen kirekam em lowehe gwen. Mam zini in kim de hataꞌan zaka, lilikinsi sa gaꞌ-ga so zala. Dekam sa hendep dalusublul.
³⁷ Zen de babu zem insa nama de salok-salokkam de es gweblannak hlauluda zankam, dekam sa tangan sam gwesibiridala. Ëe eiwa denakae emsa gubiridaꞌan: Mam zini in dekam sa babu gwen zi makan zenaka gweblala. Dekam sa zen zebe mae hap tembane dereksa syal gwibir-zimdi. Ki sa teinikirin hip gubiridala– zao de golzimdin hip.
³⁸ Zen de ngirin anen mae hatankam, nama de salok-salokkam de esblannak hlauluda zankam, ki zere hon de babu gwen zini in heꞌho gwibin tangan naka sa hla nul.
³⁹ Emki sap eenlala gwen: Gol bi nik de anakan tawa gweꞌanam, ‘Ano golak sowe zini namen mo kam sa til zila,’ zen dekam molya nini taꞌanam. Sowe zini in de tilzin srem hap maka saleꞌara.
⁴⁰ Zen in zep, em hen kirekam salok-salokkam lowehe gwek, sap em home tame uꞌin– ngatan zi mo lang nakore Zi Tanganna Ëe de lwa halzan hap denaye.”
⁴¹ Petrus ki zep takensiblika, “Bian, ola insa gulk sun blaonzimdi, san ha abe mae en hap? San ha hen tingare zi hip?”
⁴² Ki zep ding gulbluka, “Ebe mae hap dena, zen aisili a kirekam sa lwal: Teipsin zi nik de holokam langa san song gweꞌanam, zere hon de babu gwe-gwen zini men zen de enlala blalkam gweꞌanam hen taibliblan nik, zen zebe hap maka syala anakan wei yul sone gublu haꞌara, ‘Ano tim bwanak babu gwe-gwen bose omka em irik gil gwe. Zebe mae hap tembanena hen sowe henkam gol gwizim.’
⁴³ Teipsin zini in de mumuk ennak lwahal zankam, zen de anakan hla taꞌan zanam, ‘Zen dawemkam ano tim bwanak irik gil gweka,’ ki zen sa zebe hap isrip-sri gwibin nika golblala.
⁴⁴ Eiwa denakae emsa gubiridaꞌan: Teipsin zini in dekam sa zeno bosena esek gul seblala, hen zere mo kire-kiresa de kitak kara ta gwibin hip sa gublula.
⁴⁵ “Hwena babu gwen zini in de anakan enlala gweꞌanam, ‘Ano teipsinni in na-en molya lwahal zaka,’ zen sa hwena ahakore babu gwen bose zemka tangole gwibiri– sap zi, sap we. Hen zi bina in mo te-alakam ze-en sa tembane gwe-gwera, hen ho mamaksa sa kim otdeblanda gwera, dekam sa hendep mamak gwera.
⁴⁶ Ki sa hwena mumuk ennak babu gwe-gwen zi karekna in mo tame gun sremnak teipsin zini in hata zala. Dekam sa tok hap zip so zala. Hen zeno angna dekam sa tak ta iri– men zewe Biansa de taibliblan srem wenyik mo angna lowehe gweꞌanke.
⁴⁷ “Babu gwe-gwen zini men zen mam zik mo dwam gwibin sin anakan tame gunnu, ‘An ano syala zen,’ hwena zen de zenaka hohle tan sremkam hen syal gwibin sremkam, ki mam zini in de hatankam desa sa mamkam de lek-lek tan hap gubiridala.
⁴⁸ Hwena babu gwe-gwen zini men zen mam zik mo dwam gwibinsi tame gun sremna, desa betekkam de lek-lek tan hap sa gubiridala. Ebe hap de mamkam hli tablankam, zen hen aumwa hap mamkam de goltreblan hap sa emsa gublula. Ep de beyakam hli tablan dankam, ki hen beyakam de goltreblan hap sa emsa gublula.”
⁴⁹ “Ëe an okamanak de zisi de klis gun hube hatazak. Ano klis gunnu zen syauk makan sa tingare zini neisbir. Hen Ëe ama dwam gweꞌan, nabakam bae ki syauknu in hitiꞌinam!
⁵⁰ Hwena nonol Aen asa karek yawala goltower. Ëe dohon tangan nakae eis gwibiꞌin– desa de goltowen hapye.
⁵¹ Bahem anakan Asa kil ti gwen, ‘Zen an umlaesa de okamanak awe golhatazan hap hata zaka.’ Ëe kire hap home. Hwena abe hap de jal hap Asa de tame tan srem wenya sa emsa gil-gil neibirida gwer.
⁵² Zep angkam ebon mae a kirekam sa lwa song gwer: Aha-ere golak de zi aha-ere taha-tapkam lowe heꞌanam, hwena Abon onakon esa enaka gil-gil eibirida gwer. Anakarekam sa lwa song gwer: Dan-ahan men zen Abon ang ta srem gwe-gweꞌan, zen hwena dan-dan dena emsa sa gil-gil nei gwizim.
⁵³ Ebon mae onakon, abe hap de jal hap walas oban esa enaka gil-gil eibirida gwer– sap zikim dena hen wekam dena, hen sap aebo wal maekam dena.”
⁵⁴ Yesus ki zep gubiridaka, “Yakla de kaknak sal-sal gwe zanna, dekam ema dam ulsuk gwenan, ‘Sa o dil gwer.’ Hendep kirekam sa ki lwal.
⁵⁵ Yakla de but-som but-som gwe zanna, dekam ema dam ulsuk gwenan, ‘Sa sasa gwer.’ Hendep kirekam sa ki lwal.
⁵⁶ O de il ti gwen hap dena hen sasa gwen hap dena, em desa en ema dam ulsuk gwenan. Zep em ba habe ano owas-owas syal gwe-gwibinni dam ulsuk srem gwe-gweꞌan? Em in eiwa enlala joblo-top tanganna.
⁵⁷ “Em ba habe anakan dam ulsuk srem gweꞌan? – ‘Diki angkam ee amaka kirekam syal eibiꞌin.’
⁵⁸ Eme mamkam te-ala beya zi nik bon gweꞌanam, hwena otan de desa ber-ber gun sremkam, zen hwena emsa de balk tahan hap maka jana nabare wenyak zerguꞌura– zen de teipsin zi sin dep emsa zerhan hap. Diki dawemna, zen de nama emsa teipsin zinik zerhatan sremnak, emki anakan de zersesek gwen hap akasiblin, ‘Bahem na-en asa zertreblan. Ëe basa asa ep golblal? – dekam de eban sesek en hapye.’ Kire sremkam, ki zen sa hendep teipsin zini in hap emsa zertreblala. Hen teipsin zini in sa zere mo jana nabare zi hip emsa zerzimdi– zen de hwena bwinak emsa tayalsin hip.
⁵⁹ Ëe ama emsa gubiridaꞌan: Em bejen em dekon wet son– bonna insa de tingan ber-ber gun sremkamye.”