¹ Saulus dekam nama Yesussu de taibliblan wenya gubirida gweꞌanka, “Ëe asa tameral.” Dekam zep Alap mo golak de teipsin zi nik song gweka,
² zao zep surat hap abe gweka– Damsik de but srem golak de mam-mam wenya kip de anakare hap goltreizimdin hip, “Saulus an, aha ora san de ang tan zisi de Yerusalem san etan tahyohan hap– sap zi, sap we.”
³ Damsik kim golek de gweꞌan zaka, mumuk ennak zep ngli nakore serkam de ngatanna wale tazak.
⁴ Ki zep ze kama san zanka. Dekon zep hwena ola sal seka, “Saulus, Saulus, em ba habe asa karek ta gwenda?”
⁵ Ki zep ding gulbluka, “Bian, Em an nara?” Ki zep hwena ding gulbluka, “Ëe an Yesus– insa em karek ta gweꞌarake.
⁶ Dekam luwe. Ënak hendep hatase. Zao sa zini ano olsa ebe hap ayang gulblula– em de desan ang gwen hapye.”
⁷ In deban mae goleteꞌanka, zen eau-hlonkam balk tasin niban hendep ezausuk. Zen hen sap man ola insa esak, hwena ba maena hom hla nuk.
⁸ Saulus ki zep luweka, hwena nwe kara gwen hap man sap akasiki. Dekon zep Damsik sin dep irik da song gwek.
⁹ Yaklana dan-ahan nwena hom mae kara gweka, hen hom mae tembane gweka, hen ho maena hom otdeka.
¹⁰ Damsik, Yesussu de taibliblan zini ki, bosena Ananias. Desa zep nwe lirisin neblannak Bian Yesus takenblaka, “Ananias!” Ki zep ding gulbluka, “Ëe an de, Bian!”
¹¹ Bian ki zep etan gubluka, “Yudas mo gol san em song gwen– ora bosena Dam-damna san. Tarsus walya Saulussu em ze duweblan. Zen dekon Asa gu soneblaꞌara.
¹² Zen hen mes hamal hap emsa nwe nik de lirisin neblankam zebon de hatannak hla tanda. Em kime tahana tehabla inera, dekam zep nwena kara gwera.”
¹³ Ananias ki zep ding gulbluka, “Bian, zini in ee mese beyakam sal gweblak. Zen Emsa de taibliblan zini man karek ta gwibirida. Yerusalemk mes ki gweibirida gweka,
¹⁴ zep hendep awe hen hata zaka. Alap mo golak de syal tan zi mo teipsinni mes zebe hap suratna golblaka– dekam de Emsa de taibliblan zisi kitak tahyohan hap denaye.”
¹⁵ Hwena Bian Yesus ki zep ding gulbluka, “Sap esa song gwera. Sap zini insa Ëe mese dam tasik– Yahudi srem zi mo e-e san de abe hap denaka golzim halada gwen hap, hen zeno mae mo teipsin-teipsin nika de zen abe hap denaka tonbirida gwen hap, hen sap Yahudi zisi.
¹⁶ Ëe asa hen zebe hap anakan goltre gweblal, ‘Ano bosesa dikim ap mam gulblun hap, em karekna mam tangan naka esa goltowe gwera.’”
¹⁷ Ananias dekam zep gola in san dep song gweka, ki zep hendep seweka. Taha tehabla inen nakon zep gubluka, “Oso Bak Saulus, Bian Yesus, men Zen oranak ebe hap Zenaka zertreblakake, Zen asa ebon osan dep zer sone zala– em dikim etan nwesa kara gwen hap, hen Alap mo Enho dikim ebon ing gwehen hap.”
¹⁸ Dekam zep mumuk ennak nwe nakon hogwe jingkir makare nik nanyanzak, dekam zep etan kara gweka. Hendep dekam zep luweka. Ki zep hwena Ananias Yesussu dikim ang gweblan hap baptis taka.
¹⁹ Zen kim tembane gweka, dekam zep etan soson gweka. Saulus dekam zep Damsik Yesussu de taibliblan wenya ban golegweꞌanka– mingguna san ha dan-dan.
²⁰ Dekam zep nabakam Yahudi mo but srem gol-gol san anakan tawa tabiri daka, “Yesus Zen eiwa Alap mo Tane.”
²¹ Tingare zini man tangan anakan denggwan gweblak, “An san ha zen hom? Yerusalemk Yesussu de taibliblan zini zen dwan-am karek ta gwibirki. An san ha zen hom yap hata zaka? – zisi de etan Alap mo golak de syal tan zi mo mam-mam san dep tahyohan hapye.”
²² Saulus mo tawa tabinni, sosonna man esek gwese zahe gweꞌak. Zen Alap mo epba ol ale gun nukorena kim anakan tawa ta gwibirki, “Yesus Zen eiwa nesa de ngaya tabin hip de Teipsinni Zen– mensa nen guk gweblakke.” Hendep zewe de Yahudi zini enlalana man tangan topse neblak, sap zeno ola bejen anakan gulsublun, “In boton.”
²³ Yaklana kim ze beya gweꞌak, Yahudi zini in dekam zep tan hap kalang neblaꞌak.
²⁴ Ëna in, kasokam de kola ban. Yaklam denaban kam denaban zep ena in mo wasnge te so kinin lilikin nikon dil gik gweblaꞌak. Hwena zeno mae mo tan hap de kalang gweblanna man etawa gwek.
²⁵ Paulussu men zen ang ne gweblaꞌak zep dokotkam e san dep yu yala ban sring di sonek.
²⁶ Yerusalemk kim hataka, ki zep sap akasiki– dua-blas enkam de zini in han de golesiri gwen hap. Hwena man nairiblak, sap zen hom anakan daibliblaꞌak, “Zen eiwa-eiwakam Yesussu taibliblaꞌara.”
²⁷ Hwena Barnabas zep zebon mae onak zerhata zaka. Zen zep anakan tonbiridaka, “Saulus an oranak Yesussu hla taka, hen Bian dekam zep ola tonblaka. Zen kim Damsik gwe gweka, zen hen Yesus hup denaka zewe udobe naban tonbirida gweka.” Dekam zep Barnabas mo ola kon dua-blaskam de wenya in anakan daibliblak, “Zen eiwa mes hen Yesussu taibliblaka.”
²⁸ Dekam zep dawemkam Yerusalemk apdenak nergwe gwek. Zen hen dekam zep udobe naban Yesus hup dena tonbirida gweka.
²⁹ Hwena Yesussu de taibliblan srem Yahudi zini kim nerol tetek gwek, dekam zep tan hap alp dasik. Yahudi zini in, zen men zen Yunani mo langnak de lowe henkam Yahudi ola eititi neibikke, zen zen nerol tetek gwek.
³⁰ Hwena ahakore Yesussu de taibliblan wenya kim esak, dekam zep Kaesarea san dep zon dak. Hen dekon etan Tarsus sun dep zep bulkum ner sonek.
³¹ Dekam zep kitak de Yerusalem mo langnak de Yesussu taibliblan wenya, Galileak, hen Samariak de wenya, umlaekam lowehe gwek. Hen zini Yesussu de taibliblankam emas-mas gwek. Sap Alap mo Enhona man zebe mae hap sosonsa gol gwizimki, hen Alapsa de blikip gwesiblin hap de enlalasa zer gwizimki– hen Yesus onak dikim tatem ezauk gwen hap denaka.
³² Petrus dekam zep tingare langna in san tawa tabirida gweka. Ë bosena Lidak de Yesussu taibliblan zini ki zep hen amjanbirki.
³³ Zao zep zini hla taꞌanka, bosena Einias. Zeno taha-tanana orep mes juweblak. Tahunna delapan enkam tum ennak lwa gweka.
³⁴ Dekam zep Petrus gubluka, “Einias, Kristus Yesus emsa dawem taꞌara! Em luwen. Ere mo tumna insa em wa tasin.” Hendep dekam zep luweka.
³⁵ Tingare ena Lidak de zini, hen Saronk dena, desa de kirekam hla tankam zep Bian Yesussu hen daibliblak.
³⁶ Ëna Yopek, wenya Yesussu de taibliblanna dekam ki, bosena Tabita. Yunani olkam de gubinkim, Dorkas. Bosena Dorkas, zeno enlalana “rusa.” Wenya in aha zi hip dawem ensa syal gwe-gwibir-zimk, hen tahalha zini man mas gwibirida gwek.
³⁷ Hwena ki zep sang-sang gwek, hendep tik. Tokna ngan nulsuk, ki zep gulk de teksonnak nonnek.
³⁸ Ëna Lida kon, Yope golek. Yesussu de taibliblan wenya kim esak, “Petrus Lidak gweꞌara,” dekam zep zi darena nenzimk, “Emki nabakam dangitilblin. Anakan enbla, ‘Ëe an emsae kwang la halan– naba tangankam dep!’”
³⁹ Hendep kim apta zaka, ki zep hendep zigwe halka. Kim zihataka, ki zep hendep gulk de teksonna in san dep nersewek. Tingare we sem-semna dekam zep go naban anakare ola ban dot dasik, “Bajuna an zen tol ap tayalbir-zimk– nama kim gweꞌakke.”
⁴⁰ Ki zep gubiridaka, “Dekam tingan atiti gwek.” Kim atiti gwek, dekam zep bokle kom soblan naban Alapsa gu soneblaka. Kim gu sonesiki, ki zep nwe-masenak de hlaun nuban gubirki, “Tabita, em luwen.” Dekam zep hendep nwena kara gwek, hen Petrussu hla tak. Ki zep hendep nikink.
⁴¹ Dekam zep zaun gun hup taha nakon gul ineka. Kim zauk, dekam zep kwang guludaka– Yesussu de taibliblan wenya hen we sem-semna in saye. Ki zep gubiridaka, “Zen mes ngaya gwenan.”
⁴² Ola insa kim tingare Yopek nolteisik, dekam zep beyakam Bian Yesussu daibliblak.
⁴³ Zao Petrus holo tolkam zep gweka– tweran sop sam tasik gwibin zini Simon Bak hon.